Pipas pampachakuqqa qusanpa utaq warminpa pantasqantaqa manam yuyarayanchu, aswanqa sunqumantam pampachaykun.

BIBLIAPIM NIN: “Piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik”, nispa (Colosenses 3:13).

Aaronmi nin: “Warmichanchikta utaq qusanchikta kuyaspaqa manam pantasqallantachu qawanchik, aswanqa imatapas allinta ruwananpaq kallpanchakusqantam”, nispa.

Qusanchikpa utaq warmichanchikpa pantasqanta yuyarayaspaqa wakinpiqa unquruchwanmi, hinaspapas rakinakuymanmi chayaruchwan.

Juliam nin: “Huk kutipim qusay piñarachiwarqa hinaspam pampachaykunaypaq niwarqa. Ichaqa sasachakurqanim chaylla pampachaykunaypaq, chayna kaptinpas pampachaykurqanim. Ñawpaqmanta chaynata ruwaspaykuqa manach llakichinakuymankuchu karqa”, nispa.

PIENSARIYCHIK KAYKUNAPI

Qusayki utaq warmichayki imawanpas sientirachisuptiki:

• ¿Chayllachu piñakurunki?

• ¿“Pampachaykuway” nisunaykitaraqchu suyanki?

KAYMANTAM RIMAWAQCHIK

• ¿Imapipas pantanakuruspanchikqa chayllachu pampachanakuykunchik?

• ¿Imatam ruwananchik chaylla pampachanakuykunanchikpaq?

KAYKUNATAM RUWAWAQCHIK

• Qusayki utaq warmichayki sientirachisuptikiqa manam ninaykichu “llullantam kaytaqa ruwaruwan”, nispaykiqa.

• Yuyarinaykichiktaqmi pantaq kasqaykichiktapas, chaymi pantanakuruspaykichikqa pampachanakuykunaykichik (Santiago 3:2).

Kimberlym nin: “Imapipas iskayniyku pantaruspaykuqa mana sasachakuspallam pampachanakuniku, huknillayku imapipas pantaruspam ichaqa chaylla pampachanakuytaqa mana atinikuchu. Pampachakuykuq kanapaqqa mana hatun tukuqmi kananchik”, nispa.

BIBLIAPIM NIN: “Quejakuqnikiwanqa ñanpi kachkaspallaraqyá paywan imamantapas chaylla allichanaykipaq kallpanchakuy”, nispa (Mateo 5:25).