Kasukuynikim, nisqaykiman hina ruwaynikim hinaspa haykapipas imam kaqta willakuynikim. Chayna kaptikiqa tayta-mamaykim, amistadnikim hinaspa patronnikim allinpaq hapisunki.

Allinta imatapas ruwaptikiqa tayta-mamaykim saqisunki kikikimanta imatapas tantiakunaykipaq.

Sarahim nin: “Tayta-mamayki yuyayniyuq kasqaykita yachanankupaqqa paykuna mana qawasuchkaptikipas, allinta tantiaspam imatapas ruwanayki”, nispa.

BIBLIAPIM NIN: “Hinallataqyá qawachiychik imayna runa kasqaykichiktapas”, nispa (2 Corintios 13:5).

Tayta-mamayki qanmanta mana iskayrayananta munaspaykiqa kaykunatam ruwanayki.

Manam llullakunaykichu. Llullakuptikiqa imapas willakusqaykitam mana chiqappaqchu hapinqaku, mana llullakuspayki imam kaqta willakuptikim ichaqa confianza runapaq pipas hapisunki.

Caimanmi nin: “Imapas allinninchikpaq kaqtaqa mana llullakuspam willakunchik, sasachawaqninchik kaqtam ichaqa mana. Ichaqa haykapipas imam kaqta willakuynikiqa ancha allinmi”, nispa.

BIBLIAPIM NIN: “Ñuqaykuqa munachkanikum tukuy imapi allin kawsakuyta”, nispa (Hebreos 13:18).

Allin llamkakuqmi kanayki. Achka patronkunam ninku allin llamkakuq runakunata maskasqankumanta. Chaymi qampas kunanmanta imam ruwanaykita allinta ruwaspaqa, yuyayniyuq kaspaykipas allin llamkakuq kanki.

Saram nin: “Tayta-mamayqa cuentatam qukunku imatapas mana hikutasqalla ruwaptiyqa. Chaynata ruwaptiymi paykunaqa saqiwanku kikillayña imatapas tantianaypaq”, nispa.

BIBLIAPIM NIN: “Ñuqaqa manam iskayrayanichu nimusqayta ruwanaykimantaqa”, nispa (Filemon 21).

Hinalla kallpanchakuy. Runakunaqa chayllam cuentata qukunku warmakuna wiñasqanmantaqa, ichaqa manam chayllachu cuenta qukunku yuyayniyuq hinaspa allin tantiakuq kasqankumantaqa. Chaymi hinalla kallpanchakunayki.

Brandonmi nin: “Tayta-mamaykiqa manam chayllachu saqisunki kikiki imatapas tantiakunaykipaqqa, chaypaqqa imam ruwanaykitam hinalla ruwanayki”, nispa.

BIBLIAPIM NIN: ‘Pachawan churakuchkaq hinayá pacienciakuywan pachakuychik’, nispa (Colosenses 3:12).