Amayá premiopi piensaytaqa saqeychu

“Carrerapi hinam kallpachkani chayanayman, chaynapi [. . .] premiota chaskinaypaq.” (FILI. 3:14.)

1. ¿Ima premiota chaskinanpaqmi apostol Pablo kallpanchakurqa?

TARSO llaqtayoq Saulo otaq apostol Pabloqa, ancha reqsisqa ayllumantam karqa. Yachachiqninmi karqa Moisespa chaskisqan Leymanta yachaq Gamaliel, paymi yachachirqa ñawpaq abuelonkunapa religionninmanta (Hech. 22:3). Runakunapa piensasqankuman hinaqa allin reqsisqa hinaspa tukuy imayoqmi kanman karqa. Ichaqa, chayllam religionninta saqespan cristianoña rikurirurqa. Chaymantapacham kallpanchakurqa Diospa prometesqan premiota chaskinanpaq: chayqa karqa mana wañuchiy atina kawsakuymi hinaspa Diospa Gobiernonpi rey chaynataq sacerdote kananpaq suyakuymi (Mat. 6:10; Apo. 7:4; 20:6).

2, 3. ¿Imaynatam apostol Pablo qawarqa hanaq pachapi kawsakuy premiota?

² Qatiqninpi Pablopa nisqanmi qawachiwanchik chay premio chaskiyqa paypaq ancha allin kasqanta, paymi kaynata nirqa: “Ñawpaqpi allinpaq hapisqaykunatapas mana valeqpaqña hapini Cristorayku. Manataqmi chayllachu, aswanqa Señor Jesucristota reqsinayraykum tukuy imatapas mana valeqpaqña hapini, payrayku tukuyta pierderuspaymi chaykunataqa qopata hinaña hapini”, nispa (Fili. 3:7, 8). Runakunapaq Diospa munaynin ima kasqanmanta entienderuspanmi, Pabloqa kapuqniyoq kayta hinaspa ancha reqsisqa kaytapas mana valeqpaqña qawarqa.

³ Chay tiempomantam kallpanchakurqa Jehová Diosmanta hinaspa Churinmanta astawan cheqapta yachananpaq, Taytanta mañakuspanmi Jesusqa kaynata nirqa: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3). Pabloqa wiñay kawsaytam munarqa, chayna kasqantam qawachiwanchik Filipenses 3:14 versiculopi kayna nisqan: “Carrerapi hinam kallpachkani chayanayman, chaynapi Jesucristontakama Diospa qayawasqan premiota chaskinaypaq”. Arí, payqa kallpanchakurqam hanaq pachapi wiñay kawsayta haypananpaq chaynataq Diospa Gobiernonpi kamachiq kananpaqpas.

Kay Pachapi wiñaypaq kawsakuymanta

4, 5. ¿Ima premiotataq chaskinqaku Diosta serviq achkallaña runakuna?

⁴ Yaqa llapanchikpa premionchikqa kay Pachapi wiñaypaq kawsakuymi, chaskinapaqqa kallpanchakunanchikmi (Sal. 37:11, 29). Kay suyakuyqa cheqappunim, Jesusmi kaynata nirqa: “Mayna kusisqam llampu sonqoyoqkunaqa, paykunaqariki herenciapaqmi kay pachata chaskinqa”, nispa (Mat. 5:5). Salmo 2:8 nisqanman hinaqa Jesusmi puntata kay Pachata herenciapaq chaskinqa, paywanmi hanaq pachamanta 144.000 runakuna kamachimunqaku (Dan. 7:13, 14, 22, 27). Chayna kaptinpas Diospa Gobiernonpa munaychakusqan kay Pachatam sapaq ovejakuna herenciapaq chaskinqaku, kayqa ‘unanchasqa kasqanmantapunim’ paykunapaq alistasqa karqa (Mat. 25:34, 46). Diosqa ‘manam llullakunmanchu’, chaymi promesankuna cumplinanmantaqa mana iskayrayachwanchu (Tito 1:2). Hinaptinqa, Josuey hinam seguro kachwan, paymi israelitakunata kallpancharqa kaynata: ‘Tayta Diospa tukuy allin prometesqankunaqa cumplikurqam. Chaykunamantaqa manam chullapas yanqaqa karqachu’, nispa (Jos. 23:14).

⁵ Diospa prometesqan mosoq pachapi kawsakuptinchikqa manam kunan tiempopi hina  ñakariykunaqa kanqañachu. Chinkanqam runamasin wañuchiqkuna, guerra hatarichiqkuna hinaspa mana allin ruraqkunapas. Manañam kanqachu wakchayaypas, onqoypas nitaq wañuypas. Runakunam manaña onqospa kawsakunqaku, kay Pachapas suma-sumaq huertamanmi tikrasqa kanqa. Imayna kusikuy kananmanta piensasqanchikmantapas astawanmi kusikusun. Sapa punchawmi kusisqa kawsakusun. ¡Suma-sumaq premiotamá chaskisunchik!

6, 7. a) Diospa Gobiernon kay Pachapi rurananmanta qawachinanpaq, ¿imakunatam Jesus rurarqa? b) ¿Ima suyakuymi kachkan wañukuqkunapaq?

⁶ Jesus kay Pachapi kachkaptinmi Taytanqa chuya espiritunta qorqa, chaynapi Diospa Gobiernon enteron Pachata kamachiptin admirakuypaq kaqkuna rurananmanta qawachinanpaq. Ejemplopaq, Bibliam willawanchik 38 wataña suchuyasqa runata Jesus sanoyachisqanmanta (leey Juan 5:5-9). Huk kutipiñataqmi ‘nacesqanmantapuni ñawsa runata’ sanoyachirqa. Kay runata tapuptinkum Jesusmanta kaynata nirqa: ‘Kunankamaqa manaraqmi uyarikurqachu nacesqanmantapuni ñawsata pipas qawarichisqanmantaqa. Sichu chay runa Diosmanta mana hamuspaqa manachá kaykunataqa ruranmanchu’, nispa (Juan 9:1, 6, 7, 32, 33). Arí, Diospa atiyninwanmi Jesusqa chayna milagrokunata rurarqa. Maymanña rispanpas ‘sanoyachirqam onqoqkunataqa’ (Luc. 9:11).

⁷ Jesusqa manam onqoqkunallatachu sanoyachirqa, atirqam wañuqkunata kawsarichiytapas. Huk kutipim 12 watayoq sipascha wañukurqa, chaymi tayta-maman llumpay llakisqa karqaku. Sipaschapa kasqanman Jesus chayaruspanmi kaynata nirqa: “¡Hatariy!”, nispa. Hinaptinmi sipaschaqa kawsariramurqa. ¡Maynatachá admirakurqaku tayta-maman hinaspa chaypi kaqkunapas! (Leey Marcos 5:38-42.) Mosoq pachapiqa maynatachá admirakusun millonninpi runakuna kawsarimusqanta qawaspa, Bibliaqa willanmi “allin runakunatawan mana allin runakunata hamuq punchawpi Dios kawsarichimunanta” (Hech. 24:15; Juan 5:28, 29). Wañukuqkunaqa atinqakum kawsarimuyta hinaspa wiñaypaq kawsakuytapas.

8, 9. a) Jesucristo Waranqa Wata Kamachimuptin, ¿imataq pasanqa pantaq kasqanchikwan? b) ¿Imamantam juzgasqa kanqaku kawsarimuqkuna?

⁸ Kawsarimuq runakunaqa juzgasqam kanqaku, ichaqa manam kawsachkaspa huchallikusqankumantachu, chayna kaptinqa kaqllamanta wañunankupaqchá sentenciasqa kanmanku (Rom. 6:7). Jesucristo Waranqa Wata Kamachiptinmi Diospa Gobiernonpi kawsaqkunapa pantaq kasqanku pisi-pisimanta chinkachisqa kanqa Jesuspa vidan qosqanrayku (Rom. 8:21). Llapallan Kamachiq Jehová Diosmi “wiñaypaq chinkachinqa wañuyta” hinaspam “pichanqa llapallan waqaqkunapa weqenta” (Isa. 25:8). Chaymantapas, Bibliaqa willawanchikmi huk librokuna kichasqa kananmanta, chayna nisqanmi qawachiwanchik mosoq yachachikuykuna paraisopi kaqkunapaq kananmanta (Apo. 20:12). Kay Pacha sumaq huertaman tikrasqa kasqanman hinaqa “allinkuna ruraytam yachanqaku kay pachapi” kawsaqkunaqa (Isa. 26:9).

⁹ Juzgasqaqa kanqaku manam Adanmanta miraq kaspa pantasqankumantachu, aswanqa kawsarimuspanku qepaman ima rurasqankumantam. Apocalipsis 20:12 nin: ‘Wañuqkunam juzgasqa karqaku rurasqankuman hina hinaspa librokunapi qellqasqaman hina’, nispa. Chayna nisqanmi qawachin kawsarimusqanku qepaman rurasqankumanta juzgasqa kanankuta. ¡Mayna sumaqmi Jehová Diospa allin ruraynin, llakipayakuynin hinaspa kuyakuyninpas! Chaymantapas, kawsarimuqkunapa kay pachapi mana allin ruraykuna kaptin ñakarisqankuqa ‘qonqasqaña chaynataq mana pipapas yuyarisqanñam’ kanqa (Isa. 65:17). Kanqam mosoq hinaspa sumaq yachachikuykuna, kusisqallaña kawsakuspankum mana allinkuna pasasqankutapas manaña yuyanqakuchu (Apo. 21:4). Chaynam kanqaku Armagedon chayamuptin kawsaspalla qepaq ‘achkallaña runakunapas’ (Apo. 7:9, 10, 14).

10. a) ¿Imaynataq kawsakuy kanqa mosoq pachapi? b) ¿Ima ruraymi yanapasunki premio chaskinaykipaq suyakuyta mana qonqarunaykipaq?

¹⁰ Mosoq pachapiqa ‘manañam mayqanninchikpas nisunñachu: “Onqochkanim” nispaqa’  (Isa. 33:24). Manataqmi pipas wañunqañachu. Tiempopa risqanman hinam Paraisopi kawsaqkunaqa manaña imawanpas onqonqakuchu, aswanmi sapa punchaw hatarinqaku allinta kawsakunankupaq. Paykunapi interesakuq amistadninkupas achkallañam kanqa, llamkasqankuwanpas kusisqam kanqaku. ¡Mayna kusikunapaqmá kanqa! ¿Imanasqataq kaqllamanta mana leenkichu Isaias 33:24 hinaspa 35:5-7 nisqanta? Chay textokunapi nisqanman hina chaypiña kasqaykita piensay. Chay ruraymi yanapasunki premio chaskinaykipaq suyakuyta mana qonqarunaykipaq.

Premio chaskinankutam qonqarurqaku

11. ¿Imaynatam Salomonpa kamachisqan qallarirqa?

¹¹ Wiñay kawsakuymanta yacharuspanchikqa kallpanchakunanchikmi hukkuna hina chay premiopi piensayta mana qonqarunapaq. Salomonmi Israelta kamachinanpaq rey kaspanqa, humillakuspan Diosta mañakurqa yachaytawan allin entendimientota qoykunanpaq, chaynapi llaqtanta allinta juzgananpaq (leey 1 Reyes 3:6-12). Hinaptinmi Bibliapa nisqanman hina ‘Diosqa Salomonman qorqa [achkallaña] yachaytawan entendimientota’. Chayraykum ‘intipa qespimunan lawpi yachayniyoqkunamantapas chaynataq Egipto nacionpi llapallan yachayniyoqkunamantapas aswan yachayniyoqraq Salomonqa karqa’ (1 Rey. 4:29-32).

12. ¿Ima kamachikuytam Jehová Dios qorqa Israel nacionpi rey kaqkunaman?

¹² Jehová Diosmi nirqa pipas rey kaspanqa “achka caballokunata” ama huñunankupaq hinaspa ‘achka warmiwan’ ama casarakunankupaq, chaynapi Paymanta mana karunchakunankupaq (Deu. 17:14-17). Achka caballokunata huñukuspanqa qawachinmanmi karqa nacionta defiendenanpaq tropakunapi confiasqanta, manam Diospa amparananpi confiasqantachu. Achka warmiyoq kaypas manam allinchu karqa, wakin warmikunaqa huklaw nacionniyoq kaspankum taytacha-mamachakunata yupaychaqku chaymi reyta karuncharunmanku karqa Jehová Diosmanta.

13. ¿Imaynatam Salomonqa Diospa kamachisqanta mana kasukurqachu?

 ¹³ Salomonqa Jehová Diospa nisqantam mana kasukurqachu, aswanqa waranqantin caballokunata hinaspa sillakuqkunatam huñururqa (1 Rey. 4:26). Chaymantapas, 700 warmiyoq hinaspa 300 compañerayoqmi karqa, achkam huklaw nacionniyoq karqaku. Kay warmikunam “taytacha-mamachakunataña Salomonta adorachirqaku chaynapim payqa yupaychasqan Tayta Diospaqqa hawa sonqollaña karqa”. Chayraykum Jehová Dios nirqa: ‘Gobiernasqayki nacionta partispam serviqnikiman qosaq’, nispa (1 Rey. 11:1-6, 11).

14. ¿Imapim tukurqa Salomonpa hinaspa israelitakunapa mana kasukusqanku?

¹⁴ Salomonqa manañam valorniyoqtachu qawarqa Diospa serviqnin kasqantaqa chaymi taytacha-mamachakunataña yupaychayta qallaykurqa. Hinaptinmi tiempopa risqanman hina Israel nacionqa Diosta qepancharurqa, chaymi cristianokunapa tiemponmanta 607 wata ñawpaqta puchukachisqa karqa. Judiokuna cheqap yupaychayta kaqllamanta qallarichiptinkupas, achka wata qepatam Jesus nirqa: “Diospa munaychakusqanmanqa manam yaykunkichikñachu, chaymanqa yaykunqaku paypa munasqanman hina kawsaqkunañam”, nispa. Chaymantapas nirqam: “Chayraykum wasikichikpas chunninqaña”, nispa (Mat. 21:43; 23:37, 38). Chaynamá karqa, mana kasukusqanraykum Israel nacionta Diosqa manaña favorecerqachu. 70 watapim Roma nacionmanta tropakuna Jerusalenta hinaspa templontapas puchukachirqaku, qepaq achka judiokunañataqmi sirvienteña karqaku.

15. ¿Pikunataq sonqonkuta mana cuidaspanku Dios servisqankuta saqerurqaku?

¹⁵ Piensarisuntaq Jesuspa apostolnin Judas Iscariotepi. Payqa uyarirqam Jesuspa yachachisqanta hinaspa qawarqam Diospa chuya espiritunwan milagrokuna rurasqantapas. Ichaqa sonqontam mana cuidarqachu. Jesuspa hinaspa apostolkunapa huñusqanku qollqetam waqaycharqa, ichaqa ‘suwam karqa [. . .] chaymi payqa horqokuq qollqe waqaychasqanmanta’ (Juan 12:6). Qollqe sonqo kaspanmi Jesusta traicionananpaq sacerdotekunapa jefenkunamanta kimsa chunka qollqeta chaskirqa (Mat. 26:14-16). Apostol Pablopa puriqmasin Demas sutiyoq cristianopas sonqontam mana cuidarqachu. Pablom paymanta kaynata nirqa: “Demas sutiyoq wawqepas kay mundopi kaqkunata akllakuykuspanmi saqeruwaspan ripukun”, nispa (2 Tim. 4:10; leey Proverbios 4:23).

Kaykunaqa yachachiwanchikmi

16, 17. a) ¿Ima rurananchiktam Diabloqa munachkan? b) ¿Imataq yanapawasun Diablopa ima rurasqantapas vencenapaq?

¹⁶ Kay tukupay tiempopi Jehová Diosta serviqkunaqa ñawpaq tiempopi kaq ejemplokunapim yuyaymanananchik, Bibliaqa kaynatam nin: “Tukuy chaykunam abuelonchikkunata sucederqa ejemplopaq hinaptinmi Dios qellqachirqa qepa tiempokunapi yuyarichiwananchikpaq”, nispa (1 Cor. 10:11; 2 Tim. 3:1, 13).

¹⁷ Diabloqa “yachachkanmi pisi tiempoyoqllaña kasqanta” (Apo. 12:12; 2 Cor. 4:4). Chaymi cristianokunata imawanpas urmachiyta munachkan, chaynapi Diosta mana kasukunankupaq. Chaynataq kay pachapi mana allin kaqkunata munaychakuchkan, hinaspam runakunata kallpanchan munasqanta ruranankupaq. Chayna kaptinpas cristianokunaqa Diosmantam ‘hatu-hatun atiyta’ chaskinchik (2 Cor. 4:7). Segurom kananchik kay atiywan Diablopa ima rurasqantapas vencenanchikmanta. Jehová Diosqa ‘chuya espirituntam’ qon mañakuqkunamanqa, chaymi tukuy tiempo mañakunanchik (Luc. 11:13).

18. ¿Imataq pasanqa Satanaspa munaychakusqan mana allin kaqkunata?

¹⁸ Chaymantapas, kay pachapi mana allin ruraqkuna  chayllaña chinkachisqa kananmanta yachasqanchikraykum kallpanchasqa tarikunchik. “Kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa.” (1 Juan 2:17.) Chaynaqa, tukuy imapa puchukaynin hichpallapiña kachkaptinqa manam allinchu kanman Satanaspa munaychakusqan mana allin kaqkuna Dioswan amistadninchikmanta aswan allin kasqanta piensayqa. Satanaspa munaychakusqan kay pachapi mana allin kaqkunaqa chinkarunqañam, chaymi Diosqa qowanchik congregacionta chaypi waqaychasqa kananchikpaq. Chayllañam Diospa kayna prometesqan cumplikunqa: “Tukunqamá mana allin ruraqkuna. Allpatamá dueñoyanqa Tayta Diospi suyaqkuna” (Sal. 37:9). Arí, Mosoq Pachaqa hichpallapiñam kachkan, hinaptinqa kallpanchakusunyá Diospa prometewasqanchik premiota chaskinanchikpaq.

¿Yuyachkankichu?

• ¿Maynatam Pablo chanincharqa Diospa prometesqan premiota?

• ¿Imamantam juzgasqa kanqaku Mosoq Pachapi kawsaqkuna?

• ¿Imayna kawsakuytaq imamantapas aswan allinqa?

[Kay yachachikuypa tapukuyninkuna]

[12 hinaspa 13 kaq paginakunapi dibujo]

Paraisomanta willakuq textokunata leespayki, ¿rikukunkichu chaypi kusisqa tarikusqaykita?