¿Imaynatam hinalla predicachwan?

¿HAYKAPIPAS piensarqankichu predicasqaykita saqeruyta pisipasqa chaynataq hukmanyasqa tarikuspayki? Hinalla predicanapaqmi sasachawanchik pipas contranchikpi churakusqanku, llakisqa kasqanchik hinaspa predicasqanchikta mana pipas uyariwasqanchik. Ichaqa Jesuspa imayna kasqanmi ñoqanchiktapas kallpanchawanchik. Paymi “ancha kusikuyniyoq kananta yachaspan” imaymana sasachakuykunata aguantarqa (Heb. 12:2 ). Payqa yacharqam Taytanpa contranpi rimasqankuta yanqachaspan, Taytanta kusichinanta (Pro. 27:11).

Qampas predicanaykipaq hinalla kallpanchakuspaqa Jehová Diostam kusichinki. Chaynaqa, ¿imatataq rurawaq predicanaykipaq kallpanchakusqaykita sasachakuykuna hukmanyachiptinqa? Llumpayta onqoq yuyaqña iñiqmasinchik Krystynam nin: “Sapa kutim pisipasqa chaynataq hukmanyasqa tarikuni. Wakinpiqa yuyaqña kasqaymi, onqosqaymi chaynataq imamantapas llakikusqaymi predicanaypaq kusikuyniyta hukmanyachin”, nispa. ¿Imaynatam qampas hinalla predicawaq ima sasachakuypi tarikuspaykipas?

Profetakunata qatipakuy

Predicayninchikpi mana hukmanyarunapaqqa, ñawpa tiempopi profetakuna hinam piensananchik. Ejemplopaq qawasunchik Jeremiasmanta. Profeta kananpaq Jehová Dios chayllaraq willaptinmi Jeremiasqa hukmanyarurqa. Chaynataña sientikuptinpas, Jehová Diospi tukuy sonqonmanta confiasqanmi yanaparqa tawa chunka wata masnin Diosmanta willakunanpaq (Jer. 1:6; 20:7-11).

Henryk iñiqmasinchiktam Jeremiaspa imayna kasqan anchata kallpanchan. Paymi nin: “Qanchis chunka wata masña predicasqaypim wakin kutipiqa hukmanyasqa tarikuni runakuna predicasqayta mana uyariptinku. Chayna tarikuspaymi piensani Jehová Diosta anchata Jeremias kuyasqanpi, paywan allin amistadninpi, kaymi kallpancharqa hinalla willakunanpaq”, nispa (Jer. 1:17). Jeremiaspa ejemplonqa yanaparqataqmi Rafałtapas, paymi nin: “Jeremiasqa imayna sientekusqallanpi piensananmantaqa, Jehová Diospim confiarqa hinaspam Diospa munayninta hinalla rurarqa runakuna contranpi kachkaptinkupas. Sapakutim kallpanchakuni chaypi piensanaypaq”, nispa.

Isaiaspa imayna kasqanpas achka cristianokunatam yanaparqa kallpanchakuspa hinalla predicanankupaq. Jehová Diosmi Isaiasmanqa willarqaña israelitakuna mana kasukunankumanta, nirqam: “Sonsoyachiy kay runakunapa yuyaymanayninta. Upayachiy kay runakunapa rinrinta”, nispa. ¿Predicasqanqa yanqapaqñachu kanman karqa? Diospaqqa manamá chaynachu karqa. Isaiaspas manamá chaynatachu piensarqa, paymi nirqa: “Kayqaya ñoqa kaypi kachkani [. . .]. Ñoqatayá kachaway”, nispan (Isa. 6:8-10). Chaymi, payqa tukunankama Diospa kamachisqanta cumplirqa. ¿Qampas kallpanchakunkichu chaynata ruranaykipaq? ¿Kallpanchakunkichu Diospa Gobiernonmanta predicanaykipaq?

Ñoqanchikpas Isaias hina Diospa kamachiwasqanchikta cumplinapaqqa, manam runakunapa imayna qawawasqanchikpichu otaq mana uyariwasqanchikpichu piensananchik. Rafałmi willakun hukmanyasqanta atipananpaq ima yanapasqanmanta, ninmi: “Predicasqaypi pipas mana allinta niwaptinqa, kallpanchakunim chaypi mana piensanaypaq. Arí, runakunaqa derechoyoqmi kanku imataña rimanankupaqpas”, nispa. Anna iñiqmasinchikpas nintaqmi: “Kallpanchakunim hukmanyachiwaq kaqkunapi mana piensanaypaq. Manaraq predicaq lloqsichkaspaymi Diosta mañakuni hinaspa Bibliata sapa punchaw leenapaq folletota leeni, chaynatam runakuna mana  uyariwanankumanta piensasqayta atipani”, nispa.

Diospa profetan Ezequielpas Babiloniapi kaq mana kasukuq israelitakunamanmi willakurqa (Eze. 2:6). Diospa juicionmanta mana willakusqanrayku pipas wañuptinqa Ezequielmi huchayoq kanman karqa. Jehová Diosmi nirqa: “Wañurusqanmantam cuentata mañasqayki”, nispa (Eze. 3:17, 18).

Henrykqa kallpanchakunmi Ezequiel hina kananpaq, chaymi nin: “Diospa piñakuyninpi wañuq runakunamantam mana culpayoq kayta munani. Runakunapa vidanmi peligropi kachkan”, nispa (Hech. 20:26, 27). Zbigniew iñiqmasinchikpas chayna kaqllatam nin: “Ezequielqa hinallam predicanan karqa, chayna rurasqanmi yanapawan runakuna imataña niptinkupas hinalla Diosmanta predicanaypaq”, nispa.

Manam sapallaykichu kachkanki

Predicaspaqa manam sapallanchikchu kachkanchik. Llapallanchikmi apostol Pablo hina ‘Diospa llamkaqmasin kanchik’ (1 Cor. 3:9). Yachamusqanchikman hinam Krystynapas wakinpiqa hukmanyasqa tarikun, chaymi nin: “Sapa kutim Jehová Diosta mañakuni kallpata qowananpaq, payqa yanapawanpunim”, nispa. Arí Jehová Diospa espirituntam necesitanchik hinalla predicanapaqqa (Zac. 4:6).

Predicaptinchikqa Jehová Diospa chuya espiritunmi yanapawanchik sumaq kayniyoqkuna kanapaq (Gal. 5:22, 23). Kaymi yanapawasun imapas kaptin pacienciawan hinalla predicanapaq. Henrykmi nin: “Predicacionqa yanapawanmi imayna kasqayta allinyachinaypaq, yachachiwanchikmi pacienciakunapaq, hukkunapi piensanapaq hinaspa mana hukmanyarunapaqpas”, nispa. Sasachakuykuna kaptinpas hinalla predicaspaqa, sumaq kayninchikkunatam aswan wiñachisunchik.

Angelninkunawanmi Jehová Diosqa kay tiempopi predicacionta yanapachkan (Apo. 14:6). Bibliaqa willawanchikmi ‘achka-achka wara-waranqantin’ angelkuna kasqanmanta (Apo. 5:11). Kay angelkunam Dios serviqkunata yanapan Jesucristo kamachiptin. ¿Chayna kasqanmanta piensankichu predicaspayki?

Annam nin: “Predicaptinchik angelkuna ñoqanchikwan kasqanpi yuyaymanasqaymi anchata kallpanchawan, chaymi Jehová Diosta agradecekuni angelninkunawan yanapawasqanchikmanta”, nispa. ¡Mayna kusikunapaqmi angelkunawan llamkayqa!

¿Ima nichwantaq wawqe-paninchikkunamanta? Arí, kusisqamá tarikunchik achka iñiqmasinchikkunata reqsisqanchikmanta. Cuentata qokurqankichá Bibliapa kayna nisqan cheqap kasqanta: “Imaynam fierro limawan fierrota afilanku. Chaynam amigopurapas entiendenachikunku”, nispa (Pro. 27:17).

Iñiqmasinchikkunawan kuska predicasqanchikmi yanapawanchik imayna predicaymanta astawan yachanapaq. Elżbietam nin: “Sapakama iñiqmasiywan predicaspaymi kuyakuyniyta paykunaman qawachini, predicasqay runakunaman hina”, nispa. Qampas kallpanchakuyá sapakama iñiqmasinchikwan predicanaykipaq, chaynapim imayna predicasqayki aswan allin kanqa.

Cuerpoykitawan Dioswan amistadnikita cuiday

Kusikuywan hinalla predicananchikpaqqa allin arreglokunatam rurana predicacionman lloqsinapaq, sapa punchaw Biblia estudianapaq hinaspa allinta puñunapaqpas. Otaq cuerponchiktawan Dioswan amistadninchiktam cuidananchik.

Bibliam kaynata niwanchik: “Ganaswan llamkakuq runapa yuyaymanasqanqa [“ñawpaqmantaraq tanteasqanqa”, NM] apuyachinqam”, nispa (Pro. 21:5). 88 watayoq Zygmunt iñiqmasinchikmi kaynata nin: “Allin arreglokunata rurasqaymi yanapawan allinta predicanaypaq. Rurayniykunapaq allin arreglota ruraspaymi tiempochakuni astawan predicanaypaq”, nispa.

Bibliamanta allinta yachayninchikmi kallpanchawanchik hinaspa yanapawanchik allinta predicanapaq. Cuerponchik allin kananpaqqa mikunanchikmi, chaynallataqmi hinalla predicanapaqpas Bibliata estudiananchik. Bibliata hinaspa ‘allin yuyayniyoq confianza sirvientepa’ qowasqanchik qellqakunata sapa punchaw leespaqa, kallpayoqmi kasunchik hinalla Diosmanta predicanapaq (Mat. 24:45-47).

 Elżbieta iñiqmasinchikmi arreglota rurarqa predicaynin aswan allin kananpaq. Paymi nin: “Kunanqa manañam anchatachu televisionta qawani, chaymi predicanaypaq allintaña preparakuni. Puñunaypaqña Bibliata leespaymi piensani predicasqay runakunapi. Chaymantapas textokunatawan qellqanchikkunapi yanapakuykunatam akllani yanapanaypaq”, nispa.

Arí, allinta puñuspaykiqa kallpayoqmi kanki, predicasqaykipas aswan allinmi kanqa. Llumpayta kusirikuykunaman qokuptikiqa, predicaynikim mana allinchu kanqa. Predicaypi allin llamkaq Andrzej sutiyoq iñiqmasinchikmi kaynata nin: “Mana allinta puñuspaykiqa pisipasqam tarikunki, pisipasqa kaspaykiñataqmi hukmayarunki. Chaymi kallpanchakuni chay mana pasawananpaq”, nispa (Ecl. 4:6).

Chaynata kallpanchakuptinchikpas manam lliw runakunachu chaninchanku allin noticiamanta willakusqanchiktaqa. Ichaqa Jehová Diosqa manam qonqanchu chayna kallpanchakusqanchiktaqa (Heb. 6:10). Achka runakunaña mana uyariwaspanchikpas, yaqapaschá watukusqanchikmantaqa pasakuptinchikña rimanqaku. Ezequielpa tiemponpi hinachá runakunaqa ‘yachanqaku paykunapa chawpinpi’ Diosmanta willakuq huk runa kasqanta (Eze 2:5). Predicayninchikta cumpliy sasa kaptinpas achkam bendicionkunaqa ñoqanchikpaq chaynataq uyariwaqninchik runakunapaqpas.

Zygmunt iñiqmasinchikmi nin: “Predicayninchikqa yanapawanchikmi mosoqwan pachakuchkaq hina allin runakuna kananchikpaq, chaynataq runakunatawan Dios kuyasqanchikta qawachinanchikpaqpas”, nispa. Andrzej iñiqmasinchikpas nintaqmi: “Mayna kusikunapaqmi runakunata salvanapaq kayna llamkayninchikqa, kunan tiempopi hina predicayninchikqa manamá haykapipas rurakunqachu”, nispa. Qampas achka bendicionkunatam tarinki predicanaykipaq hinalla kallpanchakuspaykiqa (2 Cor. 4:1, 2).

[31 kaq paginapi dibujokuna]

Hinalla predicanapaqqa, cuerponchiktawan Dioswan amistadninchiktam cuidana