Kasukuyninchikqa Jehová Diospa sonqontam kusichin

‘Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniyta.’ (PRO. 27:11.)

1, 2. a) Job libropa nisqanman hina, ¿ima nirqataq Satanasqa runamanta? b) ¿Imaynatam yachanchik Satanasqa Jehová Diospa contranpi hinalla hatarisqanta?

JOBPA kasukuyninta Satanas pruebaman churananpaqmi Jehová Diosqa saqerqa. Chaymi animalninkuna hinaspa churinkunapas wañururqa, paypas onqorurqam. Satanasqa manam Jobpa kasukuq kasqallantachu pruebaman churarqa, nirqam: “Vidanraykum runaqa; tukuy ima kapuqnintapas qonman”, nispa. Chaynatam Diabloqa huk tapukuyta runakunapaq rikurichirqa, chayqa kunankamapas hinallaraqmi kachkan (Job 2:4).

² Jobpa ñakarisqanmanta yaqa 600 wata pasaruptinmi, Salomonwan Jehová Diosqa kaynata qellqachirqa: ‘Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniyta’, nispa (Pro. 27:11). Salomonpa tiemponpipas Satanasqa hinallam hatarirqa Jehová Diospa contranpi. Chaymantapas apostol Juanmi revelacionninpi qawarqa Satanas hanaq pachamanta qarqorachikamuspan  Diospa serviqninkuna acusasqanta, chayqa karqa 1914 watapi Diospa Gobiernon munaychakuyta qallarisqan qepatam. Kay tukupay tiempopipas Diabloqa hinallam pruebaman churachkan Dios serviqkunapa kasukuyninta (Apo. 12:10).

3. ¿Imakunatam Job libromanta yachasunchik?

³ Kay estudiopim Job libromanta qawasunchik 3 yachachikuykunata. 1) Satanasqa runakunapa enemigonmi hinaspa Diospa llaqtanpa contranpi churakuqmi. 2) Ima pruebaña kaptinpas Dioswan amistadninchik allin kaptinqa Paytaqa kasukusunmi. 3) Jobta hinam ñoqanchiktapas yanapawasun sasachakuypi kaptinchik. Arí, yanapawasunmi Bibliawan, llaqtanwan hinaspa chuya espiritunwanpas.

Amayá qonqasunchu pim enemigonchik kasqantaqa

4. ¿Pitaq huchayoq sasachakuykuna kasqanmanta?

⁴ Yaqa lliw runakunam preocupasqa kachkanku tukuy ima pasasqanmanta, ichaqa manam yachankuchu imanasqa chayna kasqanta. Satanaspa mana kasqanta piensaspankum chaynaqa kanku, paymi huchayoq sasachakuykuna kasqanmanta. Runakunapas rikurichinmi sasachakuykunataqa. Adanwan Eva Diosta mana kasukusqankumantapacham runakunaqa mana allinllataña ruranku. Ichaqa Diablom Evataqa engañarurqa hinaspam convencechirqa Diospa contranpi churakunanpaq. Paymi rikurichimurqa sasachakuykunata hinaspa mana allinkunatapas, paypa makinpitaqmi kachkan kay pachapi mana allin ruraqkunapas. Kay pachapi mana allin ruraqkunapa Diosnin Diablo kasqanraykum, runakunaqa kanku pay hina hatunchakuq, contrapi churakuq, envidianakuq, imatapas munaq, suwakuq otaq llullakuq hinaspa mana kasukuqpas (2 Cor. 4:4; 1 Tim. 2:14; 3:6; leey Santiago 3:14, 15). Chayna kasqankum rikurichin gobiernokunapiwan religionkunapi sasachakuyta, cheqninakuyta, mana allin rurayta, kaykunam runakunata ñakarichin.

5. ¿Imatam rurananchik Diosmanta yachasqanchikkunawan?

⁵ Cristianokunaqa yachanchikmi tukuy mana allinkuna kasqanmanta Satanas huchayoq kasqanta. ¿Manachu kallpanchasqa kanchik kay yachasqanchikmanta runamasinchikman willanapaq? ¿Manachu kusisqa tarikunki Diospa sutinta defiendespayki hinaspa Satanasta chaynataq ñakariykunata Dios chinkachinanmanta yachachispayki?

6, 7. a) ¿Pitaq huchayoq Diospa llaqtan qatikachasqa kasqanmanta? b) ¿Imaynatam qatipakuchwan Elihupa ejemplonta?

⁶ Diospa llaqtan qatikachasqa kasqanmanta hinaspa sasachakuykunamantapas Satanasmi huchayoq. Payqa munachkanmi pruebasqa kananchikta. Apostol Pedrotam Jesus kaynata nirqa: “Simon, Simon, trigota hina suysusunaykichikpaqmi Satanas mañakurun”,  nispa (Luc. 22:31). Jesuspa ejemplonta qatiqkunapas pruebasqam kasunchik. Pedroqa manam yanqachu nirqa ‘Diablo yarqasqa leon hina’ kasqantaqa. Chaymantapas Pablom nirqa: “[Diospa] agradonpaq kawsakuy munaqqa Cristorayku ñakarichisqam kanqa”, nispa (1 Ped. 5:8; 2 Tim. 3:12).

⁷ Iñiqmasinchik ñakariptinqa, manam ninanchikchu Jehová Diosmi ñakarichichkan nispaqa. Qawasqanchikman hinaqa Satanasmi runakunataqa ñakarichin. Iñiqmasinchikmanta karunchakunamantaqa Elihu hinam cheqap amistad kananchik. Enemigonchik Satanasta vencenanpaqmi yanapananchik (Pro. 3:27; 1 Tes. 5:25). Paykuna imawanña ñakariptinpas kasukuq kananpaqmi yanapananchik, chaynatam Jehová Diospa sonqonta kusichinqa.

8. ¿Imanasqataq Satanasqa Jobta mana saqerachirqachu Jehová Dios hatunchasqanta?

⁸ Diabloqa Jobtam sasachayta qallarirqa mantienekunanpaq uywasqan animalninkunata chinkachispan. Chay animalkunamanta wakintam Jobqa Diospaq ofrendata kañaq. Job 1:4, 5 kaynata nin: ‘Jobqa tutapayta hatarispanmi sapa churinpa huchanrayku animalta wañuchispa Diospaq lliwta kañaq, [. . .] kaynata piensaspan: “Ichapas churiykunaqa imawanpas huchallikurun, ichapas paykunaqa sonqonkupi Diosta insultarunku”’, nispa. Ichaqa sasachakuynin qallaykuptinmi Jobqa manaña animalkunata Jehová Diospaq kañapuqñachu, hatunchananpaq ‘tukuy kapuqninkuna’ chinkarusqanrayku (Pro. 3:9). Chayna kaptinpas rimaspanmi Diosta hinalla hatuncharqa.

Jehová Dioswan allin amistadta rurasun

9. Diosninchikwan, ¿imayna kasqanchiktaq ancha valorniyoq?

⁹ Wakcha otaq apu, mozo-sipas otaq yuyaqña hinaspa sano otaq onqosqa kaspapas atichwanmi Dioswan amistad ruraytaqa. Imawanña pruebasqa kaptinchikpas chay amistadninchikmi yanapawasun mana huchallikuq kanapaq hinaspa Jehová Diosta kusichinapaqpas. Diosmanta chayllaraq yachaqkunapas atirqakum mana manchakuspa hinaspa Diosta kasukuspa kawsakuytaqa.

10, 11. a) ¿Imaynam karqa Rusia nacionniyoq cristiana pruebakunapi tarikuspan? b) ¿Satanaspa imayna kasqantam qawachin paypa rurasqan?

¹⁰ Qawasunchik Rusia nacionniyoq Valentina Garnovskaya sutiyoq cristianamanta, payqa Job hinam Diosman sonqo karqa. 1945 watapim, 20 watayoq kachkaptin huk cristiano predicarqa, ichaqa iskay kutillatam watukurqa Bibliamanta yachachinanpaq. Chayna kaspanpas, Valentinaqa vecinonkunaman willaytam qallaykurqa, chayraykum presochasqa hinaspa sentenciasqa karqa 8 wata sasa llamkaykunata rurananpaq. 1953 watapim preso kasqanmanta lloqsimuspa kaqlla predicayta qallaykurqa. Ichaqa kaqmantam presocharurqaku hinaspam 10 watapaq  sentenciarqaku. Achka wataña preso kachkaptinmi huklaw sitioman aparurqaku, chaypim testigokunapa Biblianku karqa, huk punchawmi huknin hermana qawaykachirqa. Chaymi Valentinaqa llumpayta kusikurqa, chay tiempokamaqa 1945 watallapim predicaqnin hermanopa Biblianta rikurqa.

¹¹ Valentinaqa 1967 watapim preso kasqanmanta lloqsimurqa hinaspam chayraq bautizakurqa. Hinaspam tukuy sonqowan predicayta kaqllamanta qallarirqa. 1969 watapi kaqmanta kimsa watapaq presochaptinkupas manam predicaytaqa saqerqachu. 2001 watapi wañukunankamaqa 44 runakunatam yanaparqa Diosta reqsinankupaq. Llapanpiqa 21 watam preso hinaspa sasa llamkaykunapi churasqa karqa. Presochasqa kaytapas manam manchakurqachu Diosta kasukunanpaqqa. Manaraq wañukuchkaspanmi nirqa: “Manam wasiyqa karqachu, imaykunapas huk baullapim yaykurqa. Chayna kaptinpas Jehová Diosta servispaymi ancha kusisqa karqani”, nispa. Valentinapa rurasqanmi qawachin Satanas llulla kasqanta, payqa nichkanmi runakuna sasachakuypi kaspaqa Diosta qepanchanankuta (Job 1:9-11). Segurom kachkanchik Diospa sonqonta Valentina kusichisqanmanta, hinaspa payta chaynataq wañukuq serviqninkunata Jehová Dios kawsarichimunanmantapas (Job 14:15).

12. ¿Imanasqataq Dioswan allin amistadqa kanchik?

¹² Dioswan allin amistadqa kanchik payta kuyasqanchikraykum. Sumaq kayninkunatam chaninchanchik hinaspam munasqanman hina kawsanapaq kallpanchakunchik. Jehová Diostaqa sonqomantam kuyanchik manam imaraykuchu. Kuyasqanchikmi yanapawanchik sasachakuykuna kaptin Diosta hinalla kasukunapaq. Chaymantapas, Diosqa yanapawanchikmi hinaspa ‘paypi sonqoyoqkunata waqaychanmi’ (Pro. 2:8; Sal. 97:10).

13. ¿Imaynatam Dios qawan payta servisqanchikta?

¹³ Jehová Diosta kuyasqanchikmi kallpanchawanchik sutinta hatunchanapaq. Ichaqa, wakinpiqa piensanchikpaschá achkata mana rurasqanchikta. Chayna kaptinpas Jehová Diosqa yachanmi ruray munasqanchikta, chaymi chaninchan atisqanchikman hina rurasqanchikta. Payqa qawan manam rurasqallanchiktachu aswanqa imarayku rurasqanchiktam. Sasachakuykunawan Job llumpay llakisqa kaspanpas, consuelaq tukuqkunatam nirqa Jehová Diospa kamachikuyninkuna kuyasqanta (leey Job 10:12; 28:28). Job libropa tukuynin capitulonpim Elifazta, Bildadta hinaspa Zofarta Dios nirqa mana cheqapta rimasqankurayku paykunawan llumpay piñasqa kasqanta. Ichaqa Jobta favorecesqantam qawachirqa “serviqniy” nispan chaynataq consuelaq tukuqkunapaq mañakunanpaq kamachispan (Job 42:7-9). ¡Mayna allinmi Diospa favorninta chaskinanchikpaq imatapas rurayninchikqa!

Jehová Diosqa yanapanmi kasukuq serviqninkunata

14. ¿Imaynatam Diosqa Jobta yanaparqa piensasqanta cambiananpaq?

¹⁴ Pantaq kaspanpas Jobqa kasukuqmi karqa. Wakinpiqa llumpay sasachakuypi kaspanmi mana allintachu piensarqa. Ejemplopaq, Jehová Diostam nirqa: “Qayakamullaptiypas manamya contestaykuwankichu [. . .]. Piñakuywanmi qamqa ñakarichiwanki”, nispa.  Chaymantapas allin ruraq kasqantam qawachiyta munarqa. Chaymi nirqa: ‘Mana culpayoqmi kani’, ‘Manam daño ruraqchu kani’ hinaspa ‘Allin sonqowanmi mañakunipas’, nispa (Job 10:7; 16:17; 30:20, 21). Chayna kaptinpas Jehová Diosqa kuyakuywanmi Jobta yanaparqa. Tapukuykunata ruraspam yanaparqa mana kikillanpi piensananpaq hinaspa runamantaqa Dios aswan atiyniyoq kasqanta entiendenanpaq. Payqa reqsikurqam pantarusqanta hinaspam imayna piensasqantapas cambiarqa (leey Job 40:8; 42:2, 6).

15, 16. ¿Imaynatam Jehová Dios kunan tiempopi yanapawanchik?

¹⁵ Kunanpas, Jehová Diosqa kuyakuywanmi allinninchikpaq yanapawanchik. Chaymantapas, achkatam bendeciwarqanchik. Ejemplopaq, vidanta Jesus qosqanraykum huchanchikmanta pampachasqa kanchik, chaymi pantaq kaspanchikpas Dioswan allin amistad rurayta atichwan (Sant. 4:8; 1 Juan 2:1). Chaynataq, mañakuptinchikqa chuya espirituntam qowanchikman pruebakunata aguantanapaq. Chaymantapas Bibliatam qowanchik. Leespa chaynataq yuyaymanaspaqa preparasqam kasunchik ima pruebakunatapas atipananchikpaq. Estudiaspanchikmi allinta entiendesun pim Llapallan Kamachiq kananpaq derechoyoq kasqanmanta hinaspa imanasqam kasukuyninchik pruebaman churasqa kasqanmantapas.

¹⁶ Chaymantapas, ancha favorecesqam kanchik Diospa llaqtanpi kasqanchikmanta, Jehová Diosqa ‘allin yuyayniyoq confianza sirvientewanmi’ yachachiwanchik (Mat. 24:45-47). Enteron Pachapim Jehová Diospa testigonkunaqa 100.000 congregacionkunapi huñunakunchik, chaypi yachasqanchikmi kallpanchawanchik pruebakunata aguantanapaq. Chayna kallpanchasqam karqa Alemania nacionniyoq Sheila sutiyoq iñiqmasinchik, paymantam rimasunchik qatiqninpi.

17. ¿Imaynatam huk sipaschapa rurasqan qawachin huñunakuyman riyqa ancha allin kasqanta?

¹⁷ Huk punchawmi Sheilapa profesornin salonninmanta lloqsiruptin, estudiaqmasinkuna horqoramurqaku hamuq tiempomanta yachanapaq layqakunapa servichikusqankuta. Ima ruranankumanta Sheila cuentata qokuruspanmi utqayman pasakurqa. Chaymantam yacharurqa wakin estudiaqmasinkuna mancharisqallaña lloqsisqankumanta, chaynaqa lloqsirqaku demoniokunapa sasachasqanta musyaspankum. ¡Sheilaqa allintamá tantearurqa! Ichaqa, ¿imataq yanaparqa allinta tanteananpaq? Paymi nin: “Chay punchawkunallam huñunakuypi uyarirqani hamuq tiempomanta yachanapaq layqakunapa servichikusqanku mana allin kasqanta. Chaymi yacharqaniña mana allin kasqanmanta. Chaymantapas, Proverbios 27:11 nisqanman hinam Jehová Diospa sonqonta kusichiyta munarqani.” ¡Mayna allinmi karqa Sheilapa huñunakuyman risqan hinaspa allinta uyarisqanpas!

18. ¿Ima ruranaykipaqmi kallpanchasqa kachkanki?

¹⁸ Sapa kutiyá kasukusun llaqtanwan Diospa niwasqanchikta. Lliw huñunakuymanyá risunchik, Bibliata leesun hinaspa Diosmanta yachachiq qellqanchikkunatapas estudiasun. Chaynapim yanapasqa hinaspa kallpanchasqa kasunchik. Chaymantapas sapa kutim orakunanchik hinaspa iñiyninpi allin takyasqa iñiqmasinchikkunawan amistadta rurananchik. Jehová Diosqa munanmi hinaspa confianmi tukuy sonqonchikmanta hinalla kasukunanchikta. Mayna sumaqmi Jehová Diospa sutin hatunchayqa, kasukuyqa hinaspa sonqonta kusichiypas.

¿Yuyachkankichu?

• ¿Imamantam Satanasqa huchayoq?

• Diosninchikwan, ¿imayna kasqanchiktaq ancha valorniyoq?

• ¿Imanasqataq Dioswan allin amistadqa kanchik?

• ¿Imaynatam Jehová Dios kunan tiempopi yanapawanchik?

[Kay yachachikuypa tapukuyninkuna]

[8 kaq paginapi dibujo]

¿Kallpanchasqachu kachkanki Diosmanta yachasqaykita willanaykipaq?

[9 kaq paginapi dibujo]

Iñiqmasinchikkunataqa yanapachwanmi pruebakunata aguantanankupaq

[10 kaq paginapi dibujo]

Valentinaqa tukuy imatam saqerqa Diosta tukuy sonqonmanta kasukunanpaq