¿Imanasqataq hinaspa imaynatam yanapachikuna?

KAY Pacha manaraq unanchasqa kachkaptinmi karqaña yanapachikuyqa. Diosqa sapallan Churintam unancharqa, hinaspam ‘ruraysiq maestron’ Jesuswan rurarqa cielopiwan kay Pachapi kaqkunatapas (Pro. 8:22, 23, 30; Juan 1:3). Adantawan Evata unancharuspanmi nirqa: “Kay pachamanyá huntaychik, munaychakuychikyá”, nispa (Gen. 1:28). Paykunatam nirqa lliw Allpata Eden huertata hina sumaqyachinankupaq. Hinaptinqa, Jehová Diospiwan llaqtanpi kaqkunapas qallariymantaraqmi yanapachikuqku.

¿Imataq yanapachikuyqa? ¿Imanasqataq ancianokuna wakinpiqa congregacionpi yanapachikunanku? ¿Imaynatam rurananku?

¿Ima ninantaq yanapachikuyqa?

Huk diccionariom nin: “Yanapachikuyqa, rantinchikpi rurananpaq hukkunaman saqeymi” nispa. Huk rimaypiqa nichkanchikmi imapas rurananchikwan cumplinapaq yanapachikunamanta, chaypaqqa rurananpaqmi ninanchik.

Congregacionpi imatapas ruranankupaq chaskiqkunaqa cumplinankum hinaspa rurasqankumanta willananku, tapunankutaqmi rurananpaq encargaqta. Ichaqa, rurananpaq  encargaqmi yanapanan hinaspa segurakunan rurasqa kananpaqpas. Ichapas wakinkuqa kaynata tapukunmanku: “¿Imapaqtaq rurananpaq nisaq kikiy rurayta atichkaspayqa?”, nispa.

Imanasqa yanapachikunamanta

Piensasun Jesusta Jehová Dios unanchaspan imakunatapas rurananpaq yanapachikusqanpi. ‘Paynintakamam Diosqa unancharqa cielopi tukuy ima kaqkunatapas, kay pachapi kaqkunatapas’ (Col. 1:16). Diosqa imatapas sapallanmi ruranman karqa, ichaqa munarqam Churinpas allin llamkayta ruraspan kusikunanta (Pro. 8:31). Kaymi Jesusta yanaparqa Paypa sumaq kayninkunata astawan reqsinanpaq. Chaynatam Diosqa sapallan Churinta yachachirqa.

Kay Pachapi kaspanqa Jesuspas Taytanta qatipakuspanmi yanapachikurqa. Qatiqninkunatam yachachirqa, hinaspam 12 apostolninkunata chaymanta 70 qatiqninkunatapas predicanankupaq kamachirqa (Luc. 9:1-6; 10:1-7). * Chaymi maymanpas predicananpaq riptinqa, runakunaqa paymanta yacharqakuña. Hanaq pachaman kutispanpas experienciayoq qatiqninkunamanmi encargarqa enteron Pachapi predicanankupaq chaynataq ancha allin huk ruraykunatapas ruranankupaq (Mat. 24:45-47; Hech. 1:8).

Diospa llaqtanpi kaqkunapas imayna ruraytaqa yachachiqku hinaspa yanapachikuqkum. Pablopas kaynatam Timoteota nirqa: “Uyariwasqaykitayá yachachiy confianzayoq runakunaman chaynapi paykunapas hukkunaman yachachinankupaq”, nispa (2 Tim. 2:2). Chaynaqa, experienciayoqkunam hukkunata yachachinanku, chaynapi paykunapas yachachinankupaq.

Rurananta yanapachikuq ancianoqa, yanapaqninwan kuskam kusikun yachachisqanmanta hinaspa iñiqmasinkunata yanapasqanmantapas. Manam llapallantaqa rurayta atisunchu, chayta yachaspam ancianokunaqa wakin ruranankuta yanapachikunanku. Bibliaqa ninmi: ‘Humillakuq [otaq mana atisqanta reqsikuq] runakunaqa yachayniyoqmi kanku’, nispa (Pro. 11:2). Humilde kaspaqa reqsikusunmi imakunata mana ruray atisqanchikta. Mana atichkaspa imaynatapas ruraqqa, pisiparunmanmi hinaspa tiemponpas manam kanmanchu ayllunpaqqa. Chaynaqa, yachayniyoqqa yanapachikunmi. Ejemplopaq, congregacionpi ancianomasinkunawan ruranankupaq yanapaqmi ninman huk ancianota congregacionpi qollqe chaskisqanku imayna kasqanmanta qawananpaq. Chayta qawaspankum, ancianokunaqa yachanqaku congregacionpi qollqe imayna kasqanmanta.

Yanapananpaq encargasqa kaspanqa yachanqam hinaspa experienciayoqmi kanqa, encargaqtapas yanapanqam paykunapa imayna rurasqanta qawananpaq. Ancianokunaqa yanapachikuspankum hamuq tiempopi siervo ministerial kay munaqkunapa imayna kasqankuta pruebanqaku (1 Tim. 3:10).

Chaymantapas, yanapachikuspam ancianokunaqa qawachinku hukkunapi confiasqankuta. Pablom Timoteota yanaparqa predicanankupaq pusaspa. Paykunaqa allin amistadmi karqaku, chaymi Pabloqa Timoteota  nirqa ‘churin’ kasqanta (1 Tim. 1:2). Chaynam karqaku Jehová Dioswan Jesuspas, tukuy ima unanchaypim kuska llamkarqaku. Chaynataqmi ancianokunapas allin amistad kanmanku hukkunawan yanapachikuspanku.

Wakinkuqa kikillankum ruranku

Yanapachikuy ancha allin kasqanta yachaspankupas, wakin ancianokunaqa mana respetasqa kanankuta piensaspam kikillanku ruranku. Ichapas chaynataqa ruranku paykunalla ruranankuta piensaspanku. Ichaqa yuyarinankum, Jesuspas manaraq hanaq pachaman kutichkaspanmi qatiqninkunata encargarqa predicanankupaq, rurasqanmanta mastaraq ruranankuta yachachkaspanpas (Mat. 28:19, 20; Juan 14:12).

Ichapas huk ancianopa encargasqan mana allinta ruraruptin, piensanman kikinpuni imatapas allinta hinaspa utqayman rurananta. Qawasun Pablopa ejemplonta: yacharqam yanapachikuy allin kasqanta hinaspa yanapasqan runakuna paypa munasqanman hina mana ruranankutapas. Punta viajenpim Pabloqa yanaparqa Marcos sutiyoq mozota, ichaqa llumpay llakisqam tarikurqa paymanta rakikuruspan wasinman kutikuptin (Hech. 13:13; 15:37, 38). Chayna kaptinpas, hukkunataqa yanaparqam. Chaymi Timoteota pusarqa predicanankupaq, imatapas rurananpaq preparasqa kaptinñataqmi saqerqa Efeso llaqtapi, hinaspam encargarqa ancianokunatawan siervo ministerialkunata nombrananpaq (1 Tim 1:3; 3:1-10, 12, 13; 5:22).

Ancianokunaqa kunanpas manam saqenankuchu yachachiytaqa otaq yanapaytaqa, yachachisqanman hina huknin mana ruraptinqa. Hukkunapi confiayqa hinaspa yachachiyqa manam allin rurayllachu, aswanqa yachayniyoq kasqanchiktam qawachin. ¿Imakunatam yachana piwanpas yanapachikuspaqa?

Imaynatam yanapachikuna

Ima ruraytapas encarganapaqqa iñiqmasinchikkunapa ima ruray atisqantam yachana. Jerusalen llaqtapi mikuy aypuymanta sasachakuy kaptinmi, apostolkunaqa akllarqaku ‘chuya espiritupa huntasqan yachayniyoq’ 7 runakunata (Hech. 6:3). Wakinpiqa mana cumpliq cristianoman imatapas encargaptikiqa, manapaschá ruranqachu. Chayrayku qallariy imallatapas rurananpaq kamachispa, cumpliptinñam ancha confianapaq kaq ruraykunataqa encarganayki.

Manamá chayllatachu yachana. Runakunapa imayna kasqanku, ima ruray yachasqanku hinaspa experienciankupas manam chaynallachu. Ichapas kuyakuq cristianoqa huñunakuyman hamuqkunata allin chaskiq kanman, imatapas mana chaqwaruspan ruraqñataq secretariopa yanapaqnin kanman. Imatapas sumaq allichaq cristianañataqmi Jesucristopa wañukusqanta Yuyarinapaq huñunakuypi waytakunata allichanman.

Chaymantapas, encargaqmi yanapaqninta clarota willanan ima rurananta. Bautizaq Juanmi Jesusta tapumunankupaq qatiqninkunata manaraq kachachkaspan ima yachay munasqanta hinaspa imata nispa tapunankutapas willarqa (Luc. 7:18-20). Ichaqa Jesusmi milagrota rurasqanmanta puchuq mikuyta hoqarinankupaq qatiqninkunata encargaspan, tanteasqankuman hina ruranankupaq saqerqa (Juan 6:12, 13). Encarganapaqqa  yachanam yanapaqninchikpa ima rurananta hinaspa ima ruray atisqantapas. Imayna kaptinpas, encargaq chaynataq yanapaqpas yachananmi ima ruray munasqankuta hinaspa rurasqanmanta haykapi willananmantapas. Iskayninkum yachananku imakunapim kikinku tanteaspa ruranankumanta. Haykapi tukunanmanta nispaqa saqenanchikmi piensasqanmanta rimarinanpaq chaynapim kallpanchasqa kanqa nisqanchikta rurananpaq, haykapi tukunanpaq obligasqa kananmantaqa.

Yanapaqmi chaskinan herramientakunata, yanapayta hinaspa ima necesitasqantapas. Chaymantapas, allinmi kanman encargado kasqanmanta hukkuna yachasqankuqa. “Diospa munaychakusqanman yaykunapaq llavekunata” Pedroman Jesus qospanqa hukkunapa qayllanpim qorqa (Mat. 16:13-19). Chaynallataqmi, wakinpiqa allin kanman ima rurananpaqpas pim encargado kasqanmanta congregacionpi kaqkuna yachasqankuqa.

Allinta tanteaspa ima ruraypas allinmi. Huk anciano yanapaqninpa rurayninta sapa kuti controlaspanqa, qawachichkanmanmi mana confiasqanta. Wakinpiqa manapaschá munasqanman hinachu ruranqa. Ichaqa, yanapaq cristiano tanteasqanman hina rurananpaq saqesqa kaspanqa, confianzata hinaspa experienciatachá tarinqa. Chayna kaptinpas ancianoqa interesakunanmi yanapaqninpa imayna rurasqanpi. Diosqa Churinwan tukuyta unanchaspanpas hinallam llamkarqa. Ruraysiq Maestrotam nirqa: “Runata rurasun ñoqanchikman rikchakuqta”, nispa (Gen. 1:26). Hinaptinqa, rimasqaykiwan hinaspa rurasqaykiwanpas yanapay chaynataq kallpanchay yanapaqnikipa rurasqanmanta. Yanapawaqtaqmi imakunaña rurakusqanmanta rimaspaykipas. Rurasqan mana allin kaptinqa, mana iskayrayaspa yanapay otaq consejay. Amataq qonqaychu, hukkuna yanapasuptikipas qanmi cuentataqa qonki imayna rurakusqanmantaqa (Luc. 12:48).

Achka cristianokunam experienciata tarirunku ancianokuna ima ruraytapas encargaptinku. Chaynaqa, llapallan ancianokunam entiendenanku yanapachikuyqa allin kasqanta, yachanankutaqmi Diosta qatipakuspa imayna ruraytapas.

[Willakuy]

[29 kaq paginapi recuadro]

YANAPACHIKUSPAQA,

• hukkunawanmi rurasqanchikmanta kusikunchik

• astawanmi rurasun

• llapanta mana ruray atisqanchiktawan yachayniyoq kasqanchiktam qawachinchik

• hukkunatapas yachachichkanchikmi

• hukkunapi confiasqanchiktam qawachinchik

[30 kaq paginapi recuadro]

IMAYNATAM YANAPACHIKUNA

• Nisqayki ruray atiqta akllay

• Allinta yachachiy hinaspa yanapay

• Niy imakuna rurananta

• Necesitasqantam qonayki

• Rurasqanpi interesakuy hinaspa confiasqaykita qawachiy

• Encargasqaykimantaqa qanmi cuentallikunki

[31 kaq paginapi dibujokuna]

Encargaspaykiqa rurasqanpim interesakunayki