Jehová Diosmi ‘qawariykachikun’ paykunawan

UYANCHIKWANMI qawachinchik kusisqa otaq llakisqa kasqanchikta hinaspa imayna tarikusqanchiktapas. Uyanchikqa yanapawanchiktaqmi rimasqanchikta runakuna allinta entiendewananchikpaq. Astawanraqmi señasllawan rimaq runakunataqa. Arí, uyankuwan hinaspa makinkuwan señasta ruraspankuqa atinmankum lliw imapas niy munasqankuta entiendechiyta. Chaymi achka runakuna admirakunku señas rimaywan sasa pensamientokunata entiendechiy atisqankumanta.

Enteron pachapim señasllawan rimaq achka runakuna Jehová Diosninchikta reqsichkanku yaqa ‘uyantapas qawachkanmanku’ hina (Lam. 2:19, NM). Kayqa manamá qonqayllamantachu. Jehová Diosqa kuyanmi señasllawan rimaq runakunataqa. Chayna kasqantam qawanchik Israel nacionpa tiemponmantaraq (Lev. 19:14). Kunan tiemponchikpipas Jehová Diosqa hinallam paykunaman kuyakuyninta qawachin. Payqa ‘munachkanmi llapallan runakuna salvakunankuta hinaspa cheqap yachachikuy reqsinankutapas’ (1 Tim. 2:4). Diosmanta cheqaptapuni yachasqankuraykum uyantapas “qawachkanmanku” hina Diosta reqsirunku. Ichaqa, ¿imaynatataq reqsirunku Diosmanta mana uyarichkaspankuqa? Kayta entiendenapaqyá qawasunchik paykunapaq señasllawan rimayninku imanasqa ancha allin kasqanmanta.

Qawaspallam uyarinku

Señasllawan rimaq runakunamantam tukuyta rimanku, wakinmi cheqap wakinñataqmi mana. Señaswan rimaqkunaqa carrotapas manejankum. Ichaqa runakunapa rimasqankuta qawaspalla entiendenankupaqqa sasachakunkum. Manataqmi kanchu enteron pachapi chaynalla señas rimayqa, aswanmi sapakama llaqtapi señas rimayniyoq kanku.

¿Leeyta atinmankuchu señasllawan rimaqkuna? Wakinku leeptinkupas, yaqa llapallankum sasachakunku. ¿Imanasqa? Qellqasqa kaqkuna, rimaq runakunallapaq kasqanrayku. Piensarisun uyariq warmachakuna rimayta imayna yachasqankumanta. Paykunaqa nacesqankumantapacham uyarichkanku runakunapa rimasqankuta, chaymi pisi-pisimanta uyarisqankuman hina rimayta qallarinku. Arí, uyariq warmachakunaqa uyarispankum rimayta yachanku. Chaymi leeyta qallarispankuqa, leesqanku letrata tupaylla-tupachinku ña uyarisqankuwan.

Kunanñataq kaypi piensariy: qamta aparusunkiman huk rimayniyoq nacionman hinaspa mana imatapas uyarinaykipaq vidriowan rurasqa wasipi wichqarusunkiman. Runakunañataq sapa punchaw hamuspanku hawamanta rimapayamusunkiman, qamñataq siminku kuyuchisqallanta rikuwaq. Mana entiendesqaykita musyaruspankuñataq papelpiña idiomankupi qellqaspa qawachimusunkiman  entiendenaykita piensaspanku. ¿Yaqachum chaywan ima nisusqaykita entienderuwaq? Manamá. ¿Imanasqa? Papelpi qellqasqa kaqkuna mana entiendesqayki idiomapi rurasqa kasqanrayku. Chaynam tarikunku yaqa llapallan señasllawan rimaqkunapas.

Chaymi paykunapaqqa señaswan rimayqa ancha allinpuni. Uyankutawan makinkuta servichikuspankum imatapas ninku. Arí, chaynata ruraspankum huk rimaytapas rimachkankuman hina tukuy ima nisqankuta allinta entiendechikunku. Chaynapim hukkunawanpas parlayta atinku.

Hinaptinqa, uyankuwan, makinkuwan otaq cuerponkuwan tukuy señas rurasqankuqa imatapas niytam munan. Ejemplopaq. Wakin nacionkunapim señas rimaqkunaqa cejasninkuta hoqarinku tapukuyta arí otaq manam nispa kutichinankupaq. Ichaqa, “pi”, “pitaq”, “maypi”, “haykapitaq”, “imanasqa” otaq “imaynata” nispa tapuyta qallarinankupaqñataqmi cejasninkuta urayman kuyuchinku. Siminkuta imayna kuyuchisqankupas qawachinmi imapas hatun otaq taksa kasqanta, chaynataq imapas rurasqanku nisyu otaq tumpalla kasqantapas. Astawanraqmi paykunaqa imapas rimasqankuta entiendechinankupaq umankuta, hombronkuta, uyankuta, ñawinkuta otaq qechiprankutapas kuyuchinku.

Kayna rurasqankuwanmi señasllapi rimaqkunaqa sumaqta entiendechikunku, chaymi atinmanku niyta asinapaq kaqkunamanta, poesiakunamanta, mana rikuna kaqkunanmanta chaynataq hukkunamantapas.

Señasllawan rimaqkunapaq qellqanchikkunamanta

Mana uyariqkunata señaspi Jehová Diosmanta yachachiptinchikqa, paykunaqa uyarichkanmankupas hinam entiendenku hinaspam Diospi iñinku. Chaymi Jehová Diospa testigonkunaqa enteron pachapi kallpanchakunku señaspi rimaqkunata predicanankupaq, hinaspa paykunapaq qellqakunata ruranankupaqpas (Rom. 10:14). Achka nacionkunapim 58 grupo kachkan señasman tikraq iñiqmasinchikkuna, kachkantaqmi qellqakunapas DVD nisqapi 40 señas rimaypi. Hinaptinqa, ¿yanapakuchkanchu chayna kallpanchakusqanku?

Jeremy iñiqmasinchikpam tayta-mamanku señasllawan rimanku, paymi nin: “Huk kutipim 12 wataypi kachkaptiy taytayqa cuartonpi una-unay wichqakuruspan Llaqta Cuidaq revistapa iskay-kimsa parrafokunata entiendenanpaq preparakurqa. Lloqsiramuspanmi kusisqallaña señaspi kaynata niwarqa: ¡Entienderuniñam! ¡Entienderuniñam!, nispa, hinaspanmi entiendesqanmanta willawayta qallaykurqa. Chaymi revistata leeykuspay señaspi nirqani: ‘Papay, manachusmi chaynatachu nichkan’, nispa. Ima nisqanmanta niyta munachkaptiymi harkakuspan kaqmanta cuartonman yaykururqa kikinmanta entiendenanpaq. Manam  haykapipas qonqasaqchu hukmanyaspan qawawasqantaqa, nitaq entiendenanpaq kallpanchakusqantapas. Kunanqa DVD nisqapim señas rimaypi yachachikuykuna kachkan chaywanmi kikinña allinta entienden. Anchatamá kusikuni Jehová Dios kuyasqanmanta kusisqallaña rimaptin”, nispa.

Kunanñataq rimasunchik iskay iñiqmasinchikkuna Chile nacionpi señasllapi rimaq Jessenia sutiyoq sipaswan rimasqankumanta. Chay sipaspa mamanta permisakuspankum iñiqmasinchikkunaqa DVD nisqapi Bibliamanta willakuq libropa yachachikuyninta señaspi qawachirqaku. Paykunam willakunku: “Chay DVD nisqata Jessenia qawaykuspanmi kusikuspan waqayta qallaykurqa. Imamanta waqasqanta maman tapuykuptinmi, Jesseniañataq nirqa chay qawasqan sumaq kasqanwan waqasqanta. Chaymi mamanqa musyakururqa tukuy rikusqanta wawan entiendesqanmanta”, nispa.

Venezuela nacionpiñataqmi warmi churiyoq huk ayllu karqa. Señasllapi rimaq señoranmi yapamanta wiksayakururqa, ichaqa qollqemanta sasachakusqankuraykum abortananpaq tantearurqaku. Hinaptinmi Testigokuna qonqaymanta wasinman chayaruspanku ¿Imatam Dios munan ñoqanchikmanta? nisqa folletopa 12 yachachikuyninta videopi señas rimaypi qawachirqaku. Chaypim yachachin abortaywan runa wañuchiy mana allin kasqanta. Qepa punchawkunallatam kay warmiqa chay yachasqanmanta agradecekurqa, paytawan qosantam abortay piensasqankuta cambiarachirqa. Señaspi chay qawasqankuwanmi warmachankuta mana wañuchirqakuchu.

Lorraine sutiyoq señasllapi rimaq iñiqmasinchikpaqpas Bibliapa yachachisqanta entiendeyqa sasam karqa. Sasachakurqam Bibliapa wakin yachachisqankunata mana allinta entiendesqanrayku. Señas rimaypi yanapakuykunata chaskiyta qallaykuspanmi ichaqa Bibliapa tukuy yachachisqankunata entiendeyta qallaykurqa. Chaynallataqmi señasllapi rimaq George sutiyoq iñiqmasinchikpaqpas. Payqa 38 watañam bautizasqa, paymi nin: “Kikillaykimanta imatapas entiendeyqa anchatam kusichisunki. Arí señas rimaypi videokunam allinta yanaparuwarqa Jehová Dioswan amistadniy aswan allin kananpaq”, nispa.

“¡Hatun kusikuymi karqa señas rimayniypi huñunakuyqa!”

Jehová Diospa testigonkuna señas rimaypi qellqakunata ruraspankupas, rurankutaqmi señas rimaypi huñunakuykunatapas. Enteron pachapim kunanqa kachkan waranqa pachak masnin congregacionkuna. Chay huñunakuykunapim iñiqmasinchikkunaqa Bibliamanta yachachikuykunata señas rimayninkupi chaskinku.

¿Yanqapaqchu kanman señas rimaypi huñunakuykunaqa? Chaypaqqa qawasunchikyá Cyril sutiyoq iñiqmasinchikmanta. Paymi  bautizakurqa 1955 watapi, hinaspam kallpanchakurqa qellqanchikkunata entiendenanpaq, huñunakuykunamanpas manam faltakuqchu wakin kutillapi señasman tikrapuqnin kachkaptinpas. Mana pipas señasman tikrapuqnin kaptinñataqmi, wakin iñiqmasinchikkuna huñunakuypi yachachikuymanta pisillapi qellqapuqku. Chaynam karqa 1989 watakama, chay watapim Nueva York llaqtapi (Estados Unidos) señas rimaypi punta kaq congregacion rikurirqa, chaykamaqa Cyril iñiqmasinchikqa 34 watañam Jehová Diosta servirqa. ¿Imaynataq sientekun chay congregacionpi kasqanwan Cyril iñiqmasinchik? Paymi nin: “Montemantapas otaq tutay-tutay uchkumantapas lloqsichkayman hinam karqa. Ñoqapaqqa, ¡hatun kusikuymi karqa señas rimayniypi huñunakuyqa!”, nispa.

Señas rimaypi huñunakuykunaqa allinpunim mana uyariqkuna, Diosta yupaychanankupaq hinaspa paymanta yachanankupaqpas. Kunan tiempopi runakuna señas rimaqkunata mana kaqpaq hapiptinkupas, chay huñunakuykunaqa yanapanmi imayna kasqankupi hinaspa amistadkunata tarinankupaqpas. Chaypim señaslla rimaqkunaqa kuyasqa hinaspa respetasqa kanku chaymantapas Dios serviytam yachanku. Wakinkuqa precursorkunaraqmi kanku. Wakinñataqmi huklaw nacionkunamanraq astakunku paykuna hina señas rimaqkunata predicanankupaq. Wakinkunañataqmi ancianokuna, allin yachachiqkuna hinaspa congregacionpi llamkayniyoqkunapas kanku.

Estados Unidos nacionpim 100 masnin congregacionkuna kan hinaspa yaqa 80 grupokuna. Brasil nacionpipas yaqa 300 congregacionkunam, hinaspa 400 masnin grupokuna. Chaynallataqmi México nacionpipas yaqa 300 congregacionkuna kan, hinaspa Rusia nacionpiñataq 30 masnin congregacionkuna hinaspa 113 grupokunapas. * Kaykunam qawachiwanchik señas rimaypi congregacionkuna enteron pachapi yapakusqanmanta.

Kantaqmi señas rimaypi asambleankupas. Qayna watam kimsa punchaw asambleanku karqa enteron pachapi 120 masnin. Chay huñunakuykunam paykunata qawachin Jehová Diospa llaqtanpi paykunapas kasqankuta hinaspa wakin iñiqmasinkuna hina tiempollanpi Diospa yachachikuyninta chaskisqankutapas.

Señaslla rimaq Leonard iñiqmasinchikmi yaqa 25 wataña bautizasqa, paymi nin: “Jehová cheqap Dios kasqanta yachaspaypas, manam haykapipas allintaqa entienderqanichu imanasqa ñakariykunata Dios saqesqanmanta. Chaymi wakin kutipiqa hukmanyasqaraq Diospaq sientikurqani. Ichaqa señas rimaypi kimsa punchaw asambleapim chay yachachikuymanta discursota uyarirqani hinaspaymi chayllaraq allinta entienderurqani. Chay discurso tukuruptinmi asirispa kuchusninwan tanqariwaspan señoray niwarqa: ‘¿Kunanqa allintachu entienderunki?’, nispa. Hinaptinmi chayllaraq arí nirqani. Jehová Diostaqa kuyaqmi kani, ichaqa manam allintachu entienderqani ñakariykunata imanasqa Dios saqesqanmanta. Kunanqa allintañam entienderuni, ¡mayna allinmi karqa paymanta mana karunchakusqayqa!”, nispa.

Anchata agradecekusqankumanta

¿Imatataq señasllapi rimaqkunaqa Jehová Diospi qawanku paymanta yachaspanku? Qawankum kuyakuyninta, Justicianta, llakipayakuyninta hinaspa hukkunatapas.

Enteron pachapi señasllapi rimaq, Jehová Diospa Testigonkunaqa Diospa uyanta qawachkankumanpas hinam hinalla paymanta yachachkanku. Ancha kuyakuyninpim Jehová Diosqa ‘qawariykachikun’ paykunawan (Num. 6:25). ¡Ancha agradecesqamá paykunaqa tarikunku Jehová Diosta reqsisqankuwan!

[Willakuy]

[24 hinaspa 25 kaq paginakunapi dibujokuna]

Kunanqa enteron pachapim 1.100 masnin congregacionkuna kan señas rimaypi

[26 kaq paginapi dibujokuna]

Jehová Diosmi señaspi rimaqkunawan qawariykachikun