Cristopa kuyakuq kasqanmi yachachiwanchik kuyayta

‘Jesusqa [. . .] kay pachapi kaqmasinkunamanmi hatu-hatun kuyakuyninta qawachirqa.’ (JUAN 13:1.)

1, 2. a) ¿Imanasqataq Jesuspa kuyakuyninqa mana tupachiy atina? b) ¿Imakuna kaptin kuyakuq kanamanta kay estudiopi yachasunchik?

JESUSQA kuyakuypim allin ejemplo, chaytam qawachirqa tukuy ima rurasqanpi, rimasqanpi, yachachisqanpi hinaspa ñoqanchikrayku wañusqanpipas. Kay Pachapi kaspa wañunankamam lliwta kuyarqa, aswanqa qatiqninkunata.

² Jesusqa allin ejemplotam saqewarqanchik, kaymi yanapawanchik iñiqmasinchikkunatawan huk runakunatapas kuyanapaq. Kay estudiopim yachasun imaynatam ancianokuna Jesuspa ejemplonta qatikuspa, iñiqmasinchikkuna huchallikuptin yanapanankumanta. Qawasuntaqmi imaynatam Jesusta qatipakuspa iñiqmasinchikkunata kuyakuywan yanapachwan: wakchayaypi, desgraciapi hinaspa onqoywan tarikuptinku.

3. Pedro negaruchkaptinpas, ¿imaynam Jesusqa paywan karqa?

³ Manaraq wañukusqan tutam Pedro kimsa kutikama Jesusta negarurqa (Mar. 14:66-72). Chayna kaptinpas Jesusmi nirqa Pedro wanakunanta, chaynata ruraptinmi pampachaykurqa hinaspam nirqa iñiqmasinkunata kallpanchananpaq (Luc. 22:32; Hech. 2:14; 8:14-17; 10:44, 45). ¿Imatam kaymanta yachanchik? ¿Imatam yachanchik pipas huchallikuruptin Jesus imayna kasqanmanta?

Pipas huchallikuptinqa Jesus hina kasun

4. ¿Imata ruraruptinkum astawanqa Jesus hina rurana?

⁴ Kawsakuyninchikpiqa achkapim Jesuspa ejemplonta qatipakunanchik, ichaqa sasam familianchik otaq iñiqmasinchik hatun huchata ruraruptinqa. Puchukay tiempo hichpallapiña kaptinmi runakunapa mana allin rurasqanku aswan sasachawanchik. Mana cuidakuspaqa Diospa yachachikuyninkunata mana kasukuq runakuna hinam rikuriruchwan, chayna kaspaqa mana allin ruraytam qallaykuchwan. Punta pachak watapim wakin cristianokuna congregacionmanta qarqosqa hinaspa wakinñataq corregisqa karqaku. Kunanpas chaynallam (1 Cor. 5:11-13; 1 Tim. 5:20). Huchallikuqkunata ancianokuna kuyakuywan yanapaspankuqa sonqonmanmi chayanmanku.

5. ¿Imaynatam ancianokunaqa Jesusta qatipakunmanku pipas huchallikuptin?

⁵ Jesusta qatipakuspankum ancianokunaqa allin ruraykunata haykapipas defiendenanku. Ichaqa Jehová Dios hinam llampu sonqo, llakipayakuq hinaspa kuyapayakuq kananku. Huchallikuq cristianokuna huchankumanta ‘wanakuptinkuqa’, mana sasachakuspankum ancianokunaqa ‘llampu sonqolla’ yanapanqaku (Sal. 34:18; Gal. 6:1). Ichaqa, ¿imataq pasanman huchallikuq mana wanakuptin otaq contrapi churakuptin?

6. ¿Imatam ancianokunaqa haykapipas mana ruranankuchu huchallikuqta yanapaspa, hinaspa imanasqa?

⁶ Bibliapa nisqanta huchallikuq mana kasukuptinqa otaq rurasqanmanta hukkunaman tumpaptinqa, ancianokuna hinaspa congregacionpi kaqkunam piñakunmanku. Chaynaqa kanmanku mana allin rurasqanta hinaspa imayna kasqanta qawaspankum. Piñakuspaqa manam yanapasunchu nitaq  ‘Cristopa piensasqanman hinachu piensasun’ (1 Cor. 2:16; leey Santiago 1:19, 20). Wakinpim Jesusqa mana manchakuspan runata corregirqa, chaytaqa rurarqa manam cheqnispanchu nitaq mana allin rurayta munaspanchu (1 Ped. 2:23). Aswanqa qawachirqam, huchallikuqkuna wanakuspa Diospa favorninta kaqllamanta tarinankuta. Payqa kay Pachamanmi hamurqa ‘huchasapakunata salvananpaqpas’ (1 Tim. 1:15).

7, 8. ¿Imatam ancianokuna yuyarinanku huchallikuqkunata juzgaspankuqa?

⁷ Congregacionpi corregisqa kaqkunata, ¿imayna qawanapaqmi Jesuspa ejemplon yanapawanchik? Puntataqa kayta yuyanapaqmi: pitapas correginku ñoqanchik allin kananchikpaq hinaspa huchallikuq wanakunanpaqmi (2 Cor. 2:6-8). Llakikunchikmi huchankumanta mana wanakuspa wakinku qarqochikuptinku, ichaqa kusikunchikmi Diosman wakinku kutimuptinqa. Jesus hina piensaspa ancianokuna huchallikuqta yanapanankupaq kallpanchakuptinkuqa, yaqapaschá huchallikuqqa wanakunman hinaspa congregacionman kutimunman. Manapaschá yuyanqakuchu Bibliawan consejasqantaqa, ichaqa manam haykapipas qonqanqakuchu kuyakuywan hinaspa respetowan yanapasqankutaqa.

⁸ Huchallikuq mana kasukuptinpas ancianokunaqa ‘chuya espirituman’ hinam kuyakuywan yanapananku (Gal. 5:22, 23). Manam utqaymanqa huchallikuqta qarqonankuchu. Aswanmi qawachinanku yanapay munasqankuta. Chaynapim wanakuqkunaqa anchata agradecekunqaku Jehová Diosta hinaspa punta apaq ‘runakunata’ otaq ancianokunata, Dioswan amistadninkupi utqayman allinyanankupaq yanapasqankumanta (Efe. 4:8, 11, 12).

¿Imaynatam kuyanakunanchik tukupay tiempopi?

9. Willarimuy qatiqninkunata kuyaspa Jesuspa huknin rurasqanmanta.

⁹ Lucas libropim tarinchik kuyakuywan Jesuspa huknin rurasqanmanta. Payqa yacharqam Diospa sentenciasqan Jerusalenta,  hamuq tiempopi Romamanta tropakuna muyurirunanta hinaspa chaypi runakuna mana ayqey atinankutapas. Chaymi qatiqninkunata nirqa: “Jerusalenpa muyuriqninpi tropakunata qawarispaqa, chay llaqta purmachinanku tiempo chayaramusqantam yachankichik”, nispa. ¿Imatam rurananku karqa chay punchaw chayaramuptin? Jesusqa nirqam: “Judea lawpi kaqkunaqa orqokunamanyá ayqechunku, Jerusalen llaqtapa chawpinpi kaqkunapas lloqsichunkuyá. Chakrapi kaqkunapas amañayá llaqtamanqa kutiykuchunkuchu. Chay punchawkunaqa Diospa castiganan punchawkunam kanqa Bibliapi nisqankuna cumplikunanpaq”, nispa (Luc. 21:20-22). 66 watapim tropakunaqa Jerusalenta muyurirurqaku hinaspam qonqaymanta kutikurqaku, hinaptinmi kasukuqkunaqa Jesuspa nisqanman hina rurarqaku.

10, 11. ¿Imaynatam Jerusalenmanta ayqeq cristianokunapa ejemplon yanapawanchik “llumpa-llumpay ñakariy” punchawpaq?

¹⁰ Jerusalenmanta ayqespankum cristianokunaqa Jesuspa kuyasqanman hina kikinkupura kuyanakunanku karqa, chaynataq imankutapas qonakunanku karqa. Jesuspa willakusqanqa hamuq tiempopim astawan cumplikunan karqa. Payqa nirqam: “Llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qepa punchawkunapipas”, nispa (Mat. 24:17, 18, 21). Manaraq chay punchaw chayamuchkaptin hinaspa chay tiempopipas hatun sasachakuykunapichá tarikusun, imanchikpas pisinqachá. Jesus hina piensaymi chay sasachakuy tiempopi yanapawasun.

¹¹ Chay tiempopiqa Jesuspa ejemplontam hinalla qatikusun hinaspa hukkunata kuyaspa yanapasun. Pablom nirqa: “Sapakamayá runamasinchikta agradasun paypa allinninpaq ruraspa chaynapi iñisqanpi wiñananpaq. Manam Cristopunipas kikillantachu agradakurqa [. . .]. Pacienciachiwaspanchik sonqonchik tiyaykachiq Diosyá yanapaykusunkichik imaynam Jesucristopa yachachisqanman hina huk sonqolla kanaykichikpaq”, nispa (Rom. 15:2, 3, 5).

12. ¿Imaynatam kuyanakunanchik, hinaspa imanasqa?

¹² Pedrotapas Jesusqa kuyarqam, chaymi Pedroqa iñiqmasinkunata kallpancharqa ‘cheqap willakuyman’ hina imatapas ruranankupaq  hinaspa ‘cheqaptapuni wawqe-panintin kuyanakunankupaq’. Arí, tukuy ‘sonqonkumantam kuyanakunanku’ karqa (1 Ped. 1:22). Kunanmi kallpanchakunanchik chayna kananchikpaq, Jehová Diospa llaqtanmi sapa kuti aswan sasachakuypi tarikuchkan. Manam kay pachapi tukuruqlla kaqkunapiqa hapipakunanchikchu, tukuruqlla kasqantam qawachin qollqemanta kay tiempopi sasachakuykuna (leey 1 Juan 2:15-17). Puchukay tiempo hichpallapiña kasqanraykum Diosman astawan asuykunanchik, chaynataq iñiqmasinchikkunamanpas asuykuspa allin amistad kananchik. Pablom nirqa: “Wawqe-panintin hinayá lliwchaykichik sumaqllataña kuyanakuychik. Respetanakuspayá wakinnikichikta imapipas aswan allinpaq hapiychik”, nispa (Rom. 12:10). Pedropas nirqam: “Tukuy imamantapas llalliriqtaqa kuyanakuychikyá, kuyanakuyqa maynaña huchatapas chinkachinmi”, nispa (1 Ped. 4:8).

13-15. ¿Imaynatam achka cristianokuna kuyakuyninkuta qawachirqaku iñiqmasinkupa wasinta sinchi wayra tuñichiptin?

¹³ Allpantinpim Jehová Diospa testigonkunaqa kuyakuyninkuta qawachinku ruraspanku. Ejemplopaq, 2005 watapim yanaparqaku Estados Unidos lawpi sinchi wayrapa tuñichisqan wasikunata hatarichiypi. Jesuspa ejemplonwan kallpanchasqa kaspankum 20.000 masnin Testigokuna gratislla yanaparqaku. Achkam, wasinkutawan llamkayninkuta saqerqaku iñiqmasinkuta yanapanankupaq.

¹⁴ Lamar qocha lawpim sinchi wayrawan yaku 10 metrota hoqarikururqa, chaymi yaku lloqsirurqa 80.000 metrota. Sinchi wayrapa pasasqan lawpi kaq wasikunamantam kimsa parte wasikuna pasaypaqta tuñirurqa. Achka nacionkunamantam yanapaqkuna rirqaku herramientankuta chaynataq wasikunata hatarichinankupaq imapas necesitasqankuta apaspa. Ñañantin viuda iskay cristianakunapas 3 millon metrotam chay llaqtakama camionetapi rirqaku. Hukninmi chaypi yachananpaqña qeparurqa, precursora hinam servichkan hinaspa chaypi yanapaqkunata llamkaysichkan.

¹⁵ Ñam 5.600 iñiqmasinchikkunapa wasinku hatarichisqaña otaq allichasqaña kachkan. ¿Imaynam iñiqmasinchikkuna tarikunku yanapasqa kasqankumanta? Tuñichisqa wasiyoq huk cristianam wasiman rikchakuq carroman astakurqa, chaypiqa yakum sutuq, cocinapas malograsqam karqa. Ichaqa, mana achka qollqepa chanin sumaq wasita iñiqmasinchikkuna qoykuptinkum payqa kusikuymanta waqarqa. ¡Anchatam agradecekurqa Jehová Diosta hinaspa iñiqmasinchikkunata mosoq wasinmanta! Tuñichisqa wasiyoq iñiqmasinchikkunam, wasinkuta allichasqankumanta huk wataña pasaruptinpas huk wasikunapi yachapakurqaku. ¿Imanasqa? Wasikuna hatarichiypi yanapaq iñiqmasinchikkuna rurayninkuta tukunankukama chay wasinkupi samanankupaqmi.  Kay iñiqmasinchikkunaqa Jesuspa piensasqanman hinam rurarqaku.

Jesus hina kasun onqoqkunapaq

16, 17. ¿Imaynatam Jesusta qatipakuchwan iñiqmasinchikkuna onqoptin?

¹⁶ Wakillanchikmi chay sinchi wayrawan hinaqa sasachakunchik, ichaqa yaqa llapallanchikmi onqonchik otaq familianchikpas onqochkanku. Onqoqkunapaq Jesus imayna kasqanmi yanapawachwan. Onqoywan ñakariqkunata pusamuptinkum, kuyakuq kasqanrayku llakipayarikuspa paykunata ‘sanoyachirqa’ (Mat. 8:16; 14:14).

¹⁷ Kunanqa manam Jesus hinaqa milagrota ruraspa onqoqkunata sanoyachichwanchu, ichaqa atichwanmi pay hina llakipayakuq kaytaqa. Ejemplopaq, ancianokunam Jesusta qatipakuspanku iñiqmasinchikkunata ninku hinaspa cumplichinku congregacionpi onqoqkunata yanapanankupaq, Mateo 25:39, 40 nisqanman hina (leey). *

18. ¿Imaynatam iskay cristianakuna kuyakuyninkuta qawachirqaku iñiqmasinchik onqoptin, hinaspa imapim tukurqa?

¹⁸ Manam ancianoraqchu kana hukkunata yanapanapaqqa. Rimarisun 44 watanpi Charlene sutiyoq iñiqmasinchikmanta, cancerwan onqosqanraykum doctorkuna payta nirqaku 10 punchawllaña kawsananta. Qosanpaq llumpay sasallaña atiendey kasqanta yacharuspankum, congregacionninmanta Sharon hinaspa Nicolette cristianakuna tuta-punchaw atiendenankupaq ofrecekurqaku. Ichaqa 6 semanam atienderqaku, manam 10 punchawllachu. Chayna kaptinpas, Charlene wañukunankamam kuyasqankuta qawachirqaku. Sharonmi nin: “Llakisqam karqaniku mana sanoyananta yacharuspayku, ichaqa Jehová Diosmi yanapawarqaku aguantanaykupaq. Yanapasqaykuraykum Diosman astawan asuykurqaniku, paywanpas astawanmi kuyanakurqaniku”, nispa. Charlenepa qosanmi nin: “Manam haykapipas qonqasaqchu kay iskay iñiqmasiykunapa yanapakuynintawan kuyakuynintaqa. Charleneyta sonqomanta yanapasqankum wañukunankama onqoyninta aguantananpaq yanaparqa, ñoqatapas yanapawarqam mana llumpay pisipasqa hinaspa mana hukmanyasqa kanaypaq. Kallpanchakusqankum yanapawarqa Diospi astawan hapipakunaypaq hinaspa iñiqmasiykunata astawan kuyanaypaqpas”, nispa.

19, 20. a) ¿Jesuspa imayna kasqanmantam kay kimsa estudiokunapi yacharunchik? b) ¿Imata ruranaykipaqmi tanteakurunki?

¹⁹ Kay kimsa estudiokunapim yacharunchik Jesuspa 5 sumaq kayninkunamanta, chaynataq ejemplonta imayna qatipakunamantapas. Pay hinayá ‘llampu sonqo humillakuq’ kasunchik (Mat. 11:29). Kallpanchakusunyá pantaq kaptinkupas llapankuwan sumaq sonqo kanapaq. Chaymantapas, Diospa nisqantayá valorchakuspa kasukusun sasachakuypi kaspapas.

²⁰ Hinaspapas, Cristo hinayá tukupayninkama iñiqmasinchikkunata kuyasunchik. Chayna kasqanchikwanmi cheqap cristiano kasqanchikta reqsichikunchik (Juan 13:1, 34, 35). Hinaptinqa, ‘iñiqmasinchikkuna kuyasqanchikqa amayá tukuruchunchu’. Mana iskayrayaspam vidanchikta servichikunanchik Diosta alabanapaq hinaspa hukkunata yanapanapaqpas (Heb. 13:1). Jehová Diosqa bendecinqam kallpanchakusqanchiktaqa.

[Willakuy]

¿Yuyachkankichu?

• ¿Imaynatam ancianokunaqa Jesusta qatipakunmanku huchallikuq iñiqmasinta yanapaspanku?

• ¿Imanasqataq kay tukupay tiempopiqa Jesus hina kuyakuq kananchik?

• ¿Imaynatam Jesus hina kachwan onqoqkunapaq?

[Kay yachachikuypa tapukuyninkuna]

[17 kaq paginapi dibujo]

Ancianokunaqa munankum huchallikuqkuna wanakuspanku Jehová Diosman kutimunankuta

[18 kaq paginapi dibujo]

¿Imaynatam Jerusalenmanta ayqeq cristianokuna qawachirqaku Jesus hina piensasqankuta?

[19 kaq paginapi dibujo]

Jehová Diospa testigonkunaqa kuyakuywan yanapanakuspam reqsichikunku