Jehová Diospa Gobiernonmi aswan allinqa
Jehová Diospa Gobiernonmi aswan allinqa
‘Alto-altopi Diosmi [. . .] lliw gobiernopi munaychakuqqa.’ (DAN. 4:17.)
1, 2. ¿Imanasqataq runapa gobiernonqa mana allinllaña?
MANA iskayrayaspam nichwan runakunapa gobiernon mana allin kasqanta. Chaynaqa kanku kamachinankupaq mana ancha yachayniyoq kasqankuraykum. Kunanmi astawan qawakun runakunapa mana kamachiy atisqanku, paykunaqa kanku “kikillanpaq munaqkuna, qollqella kuyaqkuna, hatun tukuspa alabakuqkuna, Dios insultaqkuna”, “huchallapi purikuqkuna” “mana pampachay munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqkunapa contranpi kaqkuna” hinaspa ‘runamasin traicionaqkunam’ (2 Tim. 3:2-4).
2 Waranqantin wata ñawpaqtaraqmi punta tayta-mamanchikkuna Jehová Diospa Gobiernonta qepancharurqaku. Ichapas piensarqaku libreña kasqankuta, ichaqa ‘kay pachapi kamachikuq’ Satanaspa makinpiñam karqaku. Runakunaqa 6.000 wataña Diablopa makinpi munaychakuspankum, aswan sasachakuypi tarikuchkanku (Juan 12:31). Kunan imayna kasqanmantam, Historia Oxford del siglo XX sutiyoq qellqa nin: “Kay Pachapi allin kanankupaq kallpanchakuyqa yanqam”, nispa. Chayna kasqanmantam nin: “Manam mana ruray atinallachu, allichayta munasqankum apan mana allinman, huk partidolla llapallan runata kamachiyman hinaspa manchakuypaq wañuchinakuyman”, nispa. ¡Cheqappunim runapa gobiernonmanta chayna nisqanqa!
3. ¿Imaynatam Diosqa kay Pachata gobiernanman karqa Adanwan Eva mana huchallikuptinkuqa?
3 Jehová Diospa allin Gobiernonta Adanwan Eva qepancharusqankuqa manam allinchu karqa. Manamá yachanchikchu mana qepancharuptinku imaynata kay Pachata kamachinanmantaqa. Ichaqa segurom kachwan, kasukuq runakunata kuyakuywan hinaspa mana sayapakuspa kamachinanmanta (Hech. 10:34; 1 Juan 4:8). Tukuy yachayniyoq kasqanman hinaqa, manachá runakuna hinaqa ruranmanchu karqa. Diospa Gobiernonqa llapallan kawsaqkunatachá ‘munasqankuwan’ saksaykachinman karqa (Sal. 145:16). Allin gobiernom kanman karqa (Deu. 32:4). ¡Chayna gobiernotam qepancharurqaku!
4. ¿Llapanpichu Satanas munaychakurqa?
4 Kaytam yuyarinanchik: runakuna kikinkupura kamachikunankuta Jehová Dios saqeptinpas manam Llapallan Kamachiq kasqantaqa haykapipas saqerqachu. ‘Alto-altopi Diosqa [. . .] lliw gobiernopi munaychakuqmi’, chaytam yacharqa Babilonia kamachiq atiyniyoq reypas (Dan. 4:17). Tukuyninpiqa Diospa munasqanmi rurasqa kanqa (Mat. 6:10). Arí, Diosqa saqechkanmi kay pachapi mana allin kaqkunata Diablo munaychakunanta, chaynapim mana kasukusqanmanta sasachakuykuna allichasqa kanqa (2 Cor. 4:4; 1 Juan 5:19). Ichaqa, manam Diabloqa imatapas rurananpaq permitisqa kasqanmanta mastaqa haykapipas rurarqachu (2 Cro. 20:6; tupachiy Job 1:11, 12 hinaspa 2:3-6). Chaymantapas, Satanaspa munaychakusqanpi kaspankupas tukuy tiempom karqa Unanchaqnin kasukuq runakunaqa.
Diosmi Israelpi munaychakun
5. ¿Imatam israelitakunaqa Diosman prometekurqaku?
5 Abelpa tiemponmanta Israel nacion rikurinankamam, karqa Diosta tukuy sonqonkuwan serviq hinaspa kasukuq qarikunawan warmikuna (Heb. 11:4-22). Moisespa tiemponpim Diosqa Jacobpa mirayninkunawan contratota rurarqa, paykunawanmi Israel nacion rikurirqa. Cristianokunapa tiemponmanta 1513 wata ñawpaqtam, israelitakunaqa churinkupiwan prometekurqaku Jehová Dios Llapallan Kamachiq kasqanta respetanankupaq, nirqakum: “Tayta Diospa tukuy kamachisqantaqa rurasaqkum”, nispa (Exo. 19:8).
6, 7. ¿Imaynam Diospa Gobiernon karqa Israel nacionta munaychakuptin?
6 Israel naciontam Jehová Dios akllarqa llaqtan kananpaq, ichaqa manam yanqapaqchu (leey Deuteronomio 7:7, 8). Chaytaqa rurarqa manam paykunaraykullachu. Aswanqa sutinrayku hinaspa Llapallan Kamachiq kasqanraykum. Israelitakunam yachananku karqa Jehová Dioslla cheqap Dios kasqanta (Isa. 43:10; 44:6-8). Chaymi paykunata nirqa: ‘Qamkunaqa yupaychasqaykichik Tayta Diospaq sapaqchasqa runakunam kankichik. Kay pachapi kaq wakin runakunamantam akllarqaykichik [. . .] runaykunaña kanaykichikpaq’, nispa (Deu. 14:2).
7 Israelitakunapi munaychakuspanqa Diosqa yacharqam pantaq kasqankuta. Chaynataq Moiseswan chuya leykunata qorqa, chaypim qawachirqa chuya kasqanta, allin ruray kuyasqanta, llakipayakuq hinaspa pacienciakuq kasqantapas. Watakuna pasaruptinmi Josueypa tiemponpiña, israelitakunaqa Diospa kamachisqanta kasukuspanku hawkayayta hinaspa bendicionkunata tarirqaku (Jos. 24:21, 22, 31). Chayna tarikusqankum qawachirqa Diospa Gobiernon ancha allin kasqanta.
Rey kananpaq runata akllasqankum mana allinchu karqa
8, 9. ¿Imatam israelitakunaqa mañakurqaku, hinaspa imapim tukurqa?
8 Achka kutitam israelitakuna Diosmanta karunchakuspanku manaña amparasqachu karqaku. Samuelwanmi mañakurqaku runaña kamachiqninku kananpaq. Jehová Diosqa mañakusqankutam uyarirqa, ichaqa Samueltam nirqa: “Manam qamtachu qepanchakusunkiqa aswanqa ñoqatam. Manam munankuchu paykunapa reynin kanayta”, nispa (1 Sam. 8:7). Mañakusqankuta qospanpas willarqam sasachakuykunawan ñakarinankuta (leey 1 Samuel 8:9-18).
9 Tukuy ima pasasqanmi qawachirqa Diospa nisqan cheqap kasqanta. Israelpi huk runalla kamachiptinqa sasachakuypim karqaku, astawanqa reykuna mana kasukuq kaptinku. Tukuy tiempopim lliw nacionkunapi chayna karqa, Diospa yanapayninta kamachikuqkuna mana reqsikuptinqa, rurasqankum mana allinpi tukurqa. ¿Imatam nichwan llaqta hawka kananpaqmi Dios bendeciwanku niq kamachiqkunamanta? Diosta mana kasukuspankum yanapakuynintaqa mana chaskinkuchu (Sal. 2:10-12).
Diospa kamachisqan mosoq nacion
10. ¿Imanasqataq Jehová Diosqa Israel nacionta manaña chaskirqachu?
10 Tiempo pasaptinmi israelitakunapa Dios kasukuyta mana munasqanku sutilla qawakurqa. Mesiasta mana chaskiptinkum, Jehová Diospas paykunata manaña chaskirqachu hinaspam rantinkupi mosoq naciontaña rikurichirqa. Chay nacionqa rikurirqa 33 watapim, paykunaqa kanku hanaq pachaman riy suyaqkunam. Paykunatam Pablo sutichan ‘Diospa cheqap akllasqankuna’ nispa (Gal. 6:16).
11, 12. ¿Imakunapim chaynalla kanku ‘Diospa cheqap akllasqankunawan’ ñawpaq Israel nacion?
11 Ñawpaq Israel nacionwan ‘Diospa cheqap akllasqankunaqa’ wakinpim chaynalla kanku wakinpim ichaqa mana. Ejemplopaq, Jehová Diospa llaqtanpiqa manam kanchu kamachiwaqninchik reyqa nitaq huchanchikmanta animalkunata kañaypas. Ichaqa, Israel nacionpi hinam kachkan punta apaq ancianokuna (Exo. 19:3-8). Paykunaqa manam hatunchakuspachu congregacionpi kaqkunata kamachinku. Aswanqa kuyakuywanmi cuidanku hinaspa Dios serviypi ejemplo kanku. Paykunaqa llapankutam kuyakuywan hinaspa respetowan yanapanku (2 Cor. 1:24; 1 Ped. 5:2, 3).
12 ‘Diospa cheqap akllasqankuna’ chaynataq ‘sapaq ovejakunapas’ piensananchikmi ñawpaq israelitakunawan Jehová Dios imayna kasqanpi. Chaynapim, Diosta astawan kuyasun hinaspa llaqtanta imayna yanapasqantapas chaninchasun (Juan 10:16). ¿Imaynataq reykuna karqaku Israel nacionpaq? Allinninpaq otaq mana allinninpaqmi karqaku. ¿Imatam chaymanta yachanmanku congregacionpi ancianokuna? Reykuna mana kaspankupas, kallpanchakunankum iñiypi allin ejemplo kanankupaq (Heb. 13:7).
Kunan tiempopi Jehová Diospa Gobiernon
13. ¿Imam pasarqa 1914 watapi?
13 Cristianokunaqa allpantinpim willanku runakunapa gobiernon chinkachisqaña kananmanta. 1914 watapim Jehová Diosqa Gobiernonta hatarichirqa Jesucristota rey kananpaq hanaq pachapi churaspan. Chay watapim atiyta qorqa ‘aswanraq vencestin’ lloqsinanpaq hinaspa ‘enemigonkunapa munaychakusqanpi gobiernananpaq’ (Apo. 6:2; Sal. 110:2). Llakikunapaqmi nacionkunaqa Diospa Gobiernonta sapa kuti qepanchanku. Chayna kasqankum qawachin paykunapaq ‘Dios mana kasqanta’ (Sal. 14:1).
14, 15. a) ¿Imaynatam Diosqa kay tiempopi gobiernawanchik, hinaspa imakunatam tapukunanchik? b) ¿Imataq qawachin Diospa Gobiernon ancha allin kasqanta?
14 Hanaq pachaman riy suyakuyniyoq kaqkunamantaqa asllañam kay Pachapi kawsachkanku. Paykunaqa ‘Diospa cheqap akllasqankunam’, “Cristopa rantinpim” kachkanku (2 Cor. 5:20). Llapankuqa kanku allin yuyayniyoq confianza sirvientem, paykunam hanaq pachaman riy suyaqkunatawan Paraisopi kawsay suyaq achkallaña runakunata mikuchinku otaq yachachinku (Mat. 24:45-47; Apo. 7:9-15). Diosta servisqanchikpi allin tarikusqanchikmi qawachin confianza sirvienteta Jehová Dios yanapasqanta.
15 Sapakamam kaynata tapukunanchik: “¿Cumplinichu congregacionpi rurayniykunawan? ¿Kusikunichu Diospa Gobiernon kamachiwasqanmanta hinaspa mana imallapaqchu yanapani? ¿Kallpanchasqachu kachkani chay Gobiernomanta atisqayman hina willakunaypaq?”, nispa. Lliw cristianokunam kasukunanchik Jehová Diospa Llaqtanpi Punta Apaqkunatawan congregacionpi ancianokunatapas. Chaynapim qawachinchik Diospa Gobiernasqan kay munasqanchikta (leey Hebreos 13:17). Niwasqanchikta sonqomanta kasukuspam rakinasqa runakunapa chawpinpi huñulla, hawkalla hinaspa allinta ruraspa kawsakunchik. Chayna kawsakusqanchikmi Jehová Diosta hatunchan hinaspa qawachin aswan allin Rey kasqanta.
Jehová Diospa Gobiernonmi atipanqa
16. ¿Imatam kunan tiempopi runakunaqa akllakunanku?
16 Eden huertapi rikuriq sasachakuypa allichakunanqa hichpallapiñam kachkan. Kunanmi runakunaqa akllakunanku Jehová Diosta otaq runapa gobiernonta kasukunankupaq. Cristianokunaqa yanapananchikmi manso runakuna allinta akllakunankupaq. Chayaykamuchkanñam Armagedonwan sutichasqa guerra, chaypim Diospa Gobiernon chinkachinqa llapallan gobiernokunata (Dan. 2:44; Apo. 16:16). Satanaspa yanapayninwan runapa rikurichisqan gobiernokunam kanqañachu, hinaptinmi Diosña lliw Allpapi munaychakunqa. Sutillam qawakunqa Diospa Gobiernon aswan allin kasqanqa (leey Apocalipsis 21:3-5).
17. ¿Imam yanapanqa manso runakunata pipa gobiernon allin kasqanmanta yachanankupaq?
17 Diosta manaraq serviqkunaqa orakuspam tanteananku Paypa Gobiernon ima bendicionkuna apamunanmanta. Runapa gobiernonqa manam allichayta atinkuchu runapura wañuchinakusqankutaqa. Diospa Gobiernonmi ichaqa mana allin ruraqta chinkachinqa (Sal. 37:1, 2, 9). Kamachiqkuna sasachakuykunapi arwisqa hina kaptinkupas, Diosqa ‘guerrakunatam [. . .] kay Pachapa cantonkama tanichinqa’ (Sal. 46:9). Runakunawan animalkunapas kaqmantam hawkayaypi tarikunqaku (Isa. 11:6-9). Chaynataq, runapa mana allichay atisqan wakchayaytawan yarqaytam chinkachinqa (Isa. 65:21). Mayqan gobiernopapas mana ruray atisqantam ruranqa: lliw runakunatam mana onqoqta kawsachinqa chaynataq yuyaqyaytawan wañuyta chinkachinqa (Job 33:25; Isa. 35:5, 6). Wañuqkunapas kawsarimunqakum kay Pacha paraiso kaptin (Luc. 23:43, NM; Hech. 24:15).
18. ¿Imaynatam qawachinchik Diospa Gobiernollan ima gobiernomantapas aswan allin kasqanta?
18 Diospa Gobiernonmi allichanqa punta tayta-mamanchikpa tiemponmantaraq Satanaspa rikurichisqan tukuy ima sasachakuyta. Diabloqa 6.000 watañam mana allinta rurachkan, Diosmi ichaqa waranqa watallapi Jesuswan allichanqa. Sutillamá kachkan, ¡Diospa Gobiernollanmi aswan allinqa! Jehová Diospa testigon kasqanchikmi qawachin pim Kamachiwaqninchik kasqanta. Chaymi, sapa punchaw otaq sapa hora qawachinanchik pay servisqanchikta, kamachiwaqninchik hinaspa testigon kasqanchiktapas. Chaynataq, uyariy munaqkunawan maypipas tupaspanchikqa willasun Diospa Gobiernollan ima gobiernomantapas aswan allin kasqanta.
¿Imatam yachachiwanchik Diospa Gobiernonmanta . . .
[Kay yachachikuypa tapukuyninkuna]
[29 kaq paginapi dibujokuna]
Diosqa manam gobiernaytaqa haykapipas saqerqachu
[31 kaq paginapi dibujo]
Dios Kamachiqninchik kaptinmi enteron Pachapi huk sonqolla kanchik
