Chuya espirituwan noviam hinalla ninku: “Hamuy” nispa
Chuya espirituwan noviam hinalla ninku: “Hamuy” nispa
‘Chuya espirituwan Carneropa novianmi [hinalla] ninku: “Hamuy” nispa [. . .]. Pipas yakunayachikuqqa hamuspayá kawsachikuq yakuta tomachun mana imallapaq.’ (APO. 22:17.)
1, 2. ¿Imaynataq Diospa Munaychakuyninta maskayqa vidanchikpi kanan, hinaspa imanasqa?
¿IMAYNATAM qawananchik Dios servisqanchikpi rurasqanchikkunata? Qatiqninkunatam Jesus kaynata nirqa: ‘Puntataqa maskaychik Diospa munaychakusqantayá’, nispa. Chaymantam prometerqa, chayta ruraptinkuqa pisipuqninkuta Dios qonanmanta (Mat. 6:25-33). Diospa Munaychakuynin ancha allin kasqantam qawachirqa ancha chaninniyoq perlasman tupachispan, chaymi negociante ‘tukuy kapuqninta rantikuspan’ chay perlasta rantirurqa (Mat. 13:45, 46). Ñoqanchikpas chaynatam qawananchik predicaytawan runakunaman yachachiyta.
2 Punta kaq estudiokunapim yacharurqanchik valorwan predicanapaq hinaspa Bibliata allinta servichikunapaq chuya espiritu yanapawasqanchikmanta. Kay estudiopim yachasun hinalla predicanapaqpas yanapawasqanchikta. Qawasunchik imayna yanapawasqanchikmanta.
Llapanchiktam niwanchik
3. ¿Ima yakuta tomanapaqmi lliw runakunata niwanchik?
3 Chuya espirituwanmi lliw runakuna invitasqa kanchik (leey Apocalipsis 22:17). Lliwtam niwanchik “Hamuy” nispa, hinaspam kallpanchawanchik mana tupachiy atina yakuta tomanapaq. Manam sapa punchaw tomasqanchik yakumantachu rimachkan. Hinaptinqa, ¿imamantam rimachkan? Jesusmi Samaria law warmita pozopa waqtanpi kachkaptin nirqa: “Ñoqapa yaku qosqay tomaqmi [. . .] haykapipas mana yakunayachikunqachu. Chay yaku qosqayqa toqyaq yaku hinam rikurinqa runapa ukunpi hinaspam qonqa wiñay kawsayta”, nispa (Juan 4:14). Mana tupachiy atina yakuta tomanapaqmi niwanchik, chaymi qowasun wiñay kawsayta.
4. ¿Imataq kawsay qokuq yakuqa, hinaspa imanasqataq necesitakun?
4 ¿Imanasqataq necesitanchik kawsay qokuq yakuta? Bibliam willawanchik Jehová Diospa contranpi Adanpas señoran Eva hina churakusqanmanta (Gen. 2:16, 17; 3:1-6). Unanchaqmi yachasqanku huertamanta qarqorurqa. ¿Imanasqa? Diosmi nirqa: “Yanqañataqmi kawsay qokuq sachapa ruruntapas [Adan] pallaruspa mikurunman hinaspa wiñaypaq kawsaqña karunman”, nispa (Gen. 3:22). Punta taytanchikmantam lliw mirayninkuna herenciata hina chaskirqanchik wañuyta (Rom. 5:12). Ichaqa Diosmi tukuyta rurarun huchamantawan wañuymanta runakuna librakuspanku mosoq Pachapi wiñaypaq kawsanankupaq. Jesuspa rantinchikpi wañusqanman hina Diospa tukuy kaykuna rurasqanmi kawsachikuq yakuqa (Mat. 20:28; Juan 3:16; 1 Juan 4:9, 10).
5. ¿Pitaq niwanchik ‘hamuychik’ hinaspa ‘kawsachikuq yakuta tomaychik mana imallapaq’ nispa? Willamuy chayna nisqaykimanta.
5 ¿Pitaq niwanchik ‘hamuychik’ hinaspa ‘kawsachikuq yakuta tomaychik mana imallapaq’ nispa? Chay textopa ñawpaqnin hinaspa qatiqnin textokunapim rimachkan Jesuspa Waranqa Wata Kamachinanmanta, chaypim runakunaqa lliwpi yanapachikunqaku wiñay kawsanankupaq Jehová Diospa Churintakama rurasqanwan. Chay rurasqanmi tupan ‘cristal hina chuyay-chuyay’ kawsay qokuq mayuwan. Chay mayuqa ‘lloqsimun Diospa hinaspa Carneropa tiyananmantam’ (Apo. 22:1). ¿Imatam chayqa qawachin? Kawsay yaku qokuqqa Jehová Dios kasqanta, paymi kawsachiwanchik (Sal. 36:9). ‘Carnerowan’ otaq Jesucristowanmi qowanchik (Juan 1:29). Diosmi mayuwan rikchanachisqanta servichikun Adan huchallikusqanrayku lliw sasachakuykuna rikurimusqanta allichananpaq. Chaymi “Hamuy” niq invitacionqa Jehová Diosmanta.
6. ¿Haykapim kawsay qokuq ‘chuyay-chuyay mayuqa’ kallpayta qallaykurqa?
6 Kawsay qokuq ‘chuyay-chuyay mayuqa’ Jesus Waranqa Wata Kamachiptinmi astawan yapakunqa, ichaqa 1914 watapim kallpayta qallaykurqa rey kananpaq Jesucristo hanaq pachapi coronasqa kasqanwan ‘Señorpa punchawnin’ qallariptin (Apo. 1:10). Chaymantapacham runakunaqa kawsanankupaq tukuy imata chaskirqaku. Kaykuna qowasqanchikmi tupan Diospa Palabranwan, chaypi willakuymi tupachisqa kachkan “yakuwan” (Efe. 5:26). Señorpa punchawninpiqa lliw runakunam allin noticiata uyarispanku, kawsachiq yakuta tomanankupaq invitacionta chaskinmanku. ¿Pikunataq chay invitacionta apanku?
‘Carneropa novianmi nin: “Hamuy” nispa’
7. ¿Pikunataq ‘Señorpa punchawninpiqa’ “Hamuy” nispa puntata invitamurqaku, hinaspa pikunata?
7 ‘Carneropa novian’ otaq hanaq pachaman riqkunam puntataqa “Hamuy” nispa invitanku. ¿Pikunata? Manam kikillankutachu. Invitankuqa ‘Tukuy Atiyniyoq Diospa punchawninpi guerra’ qepata kay Pachapi wiñay kawsakuy suyaqkunatam (leey Apocalipsis 16:14, 16).
8. ¿Imakunam qawachin 1918 watamanta hanaq pachaman riqkuna Jehová Diospa invitacionninta hinalla willasqankuta?
8 Hanaq pachaman riqkunaqa 1918 watamantam invitachkanku. Chay watapim kayna yachachikuy uyarikurqa: “Millonnintin kunan kawsaqkunaqa yaqapaschá haykapipas mana wañunqakuchu”, kaymi qawachirqa Armagedon qepata achka runakuna kay Pacha paraiso kaptin kawsanankuta. 1922 watapim Biblia estudiaqkuna Estados Unidospi (Cedar Point, Ohio) asambleata rurarqaku, chaypim kallpancharqa Reymantawan Gobiernonmanta willanankupaq. Kaymi hanaq pachaman riqkunamanta puchuqkunata kallpancharqa astawan willanankupaq. 1929 watapim inglespi lloqsimuq kay revistapi horqomurqaku “kuyakuywan invitacion” niqta, chayqa horqosqa karqa Apocalipsis 22:17, nirqam: “Confianza sirvientepas kuyakuywanmi Diospa invitacionninmanta ninku: ‘Hamuy’ , nispa. Kay willakuymantaqa yachanankum allin ruray kuyaqkuna hinaspa cheqapmanta yachay munaqkunapas. Kunanmi kayqa rurakunan” (The Watchtower, 15 de marzo 1929). Hanaq pachaman riqkunaqa kunankamapas hinallam invitachkanku.
‘Uyariqpas nichun: “Hamuy” nispa’
9, 10. ¿Imaynatam kallpanchasqa karqaku kay Pachapi kawsay suyaqkuna paykunapas “Hamuy” ninankupaq?
9 ¿Imatam nichwan hanaq pachaman riqkunapa invitasqanku uyariqkunamanta? Paykunapas chaynatam rurananku. 1932 watapim noviembre killapi La Torre del Vigía (174 paginanpi) revista kaynata nirqa: “Hanaq pachaman riqkunaqa kallpanchanankum Diospa Gobiernonmanta allin noticia willakuy munaqkunata. Manam hanaq pachaman rinankupaq Señorqa akllasqanraqchu kananku paymanta willanankupaqqa. Jehová Diospa testigonkunataqa kusichiwanchikmi Armagedon pasaptin kay Pachapi wiñay kawsayta chaskiqkunaman kawsachiq yakuta apayqa”, nispa.
10 Enero killa 1934 watapim hina kay revista willarqa noviapa nisqanman hina invitamuq cristianokuna Jonadabman rikchakusqankuta, nirqataqmi: “Purinankum Jehuman rikchakuq kaqkunawan otaq hanaq pachaman riqkunawan hinaspam mana [. . .] hanaq pachaman riy suyakuyniyoq kaspankupas Diospa gobiernonmanta willakunanku”, nispa. (Kay yachachikuyqa castellanopim lloqsimurqa 1935 wata enero killapi, La Torre del Vigía revistapa 12 paginanpi) 1935 watapim yacharqaku Apocalipsis 7:9-17 nisqanpi rikurimuq ‘achkallaña runakunawan’ sutichasqa kasqankutapas. Kaymanta yachasqankum yanaparqa kay invitacionta astawan willanankupaq. Chaymantapacham achka runakuna invitacionta kasukurqaku, chaymi 7 millon masninña kachkanku. Paykunaqa cheqapmanta yachaspankum Diosman qokunku hinaspa bautizakunku chaynataq noviawan kuska lliw runakunata nichkanku: ‘Hamuspayá kawsachikuq yakuta tomaychik mana imallapaq’, nispa.
‘Chuya espiritum’ nin: “Hamuy” nispa
11. ¿Imaynatam chuya espiritu yanaparqa punta pachak watapi predicasqankuta?
11 Punta pachak watapiqa, chuya espiritu yanapaptinmi predicacionqa apakurqa. Huk kutipim Nazaret llaqtapa huñunakunanku wasipi Jesus yachachirqa. Chaypim Isaiaspa qellqasqanmanta kayna niqta leerqa: ‘Diospa espiritunmi ñoqapi kachkan. Paymi aceitewan talliwaspan sapaqchawarqa wakchakunaman allin noticiata willanaypaq [. . .], presochasqa kaqkunaman willaspay libranaypaq [. . .], ñawsakunata qawarichinaypaqpas [. . .]. Ñakarichisqakunata libranaypaqmi kachamuwarqa chaynapi Señor Diospa agradonpaq watamanta willakunaypaq’. Qatiqninpim paypi cumplikusqanmanta kaynata nirqa: “Uyarisqaykichikpi hinapas kunanmi kay palabrakuna cumplikurun”, nispa (Luc. 4:17-21). Manaraq hanaq pachaman richkaspanmi qatiqninkunaman prometerqa: ‘Chuya espiritu qamkunaman hamuptinmi atiyta chaskinkichik. Chaymi ñoqamanta willakunkichik [. . .] kay pachapa cantonkama”, nispa (Hech. 1:8).
12. ¿Imaynatam chuya espiritu yanapawanchik runakunata invitaypi?
12 ¿Imaynatam kunanqa chuya espiritu yanapan runakunaman invitamuypi? Jehová Diosmantam chuya espirituqa, chaytam servichikun hanaq pachaman riqkunapa yuyayninkutawan sonqonkuta kanchaykuptin Palabranta entiendenankupaq hinaspa serviqninkunata kallpanchananpaq, chaynapi Paraisopi kawsay munaqkunata invitamunankupaq hinaspa cheqapmanta yachachinankupaqpas. Uyariqkunapas cristianoña kaspankum chuya espiritupa yanapakuyninwan hukkunaman willanku. ‘Chuya espiritupa sutinpi’ bautizakuspankum yanapakuyninman hina ruranku (Mat. 28:19). Hanaq pachaman riqkunawan willakusqankuqa Bibliamantam, kayqa chuya espiritupa yanapayninwanmi qellqasqa karqa. Kaykunam qawachin chuya espiritupa yanapayninwan chay invitacion rurakusqanta. Arí, chay atiypa yanapakuyninwanmi willakunchik. Ichaqa, ¿imaynatam kaymanta yachayqa yanapawanchikman hayka tiempo predicananchikpaq?
‘[Hinallam] ninku: “Hamuy” nispa’
13. ¿Imatam qawachin chuya espirituwan noviapa hinalla: “Hamuy” nisqanku?
13 ‘Chuya espirituwan Carneropa novianqa’ manam wakin kutillapichu “Hamuy” nispa invitanku. Aswanmi sapa kuti invitanku, chaytam qawachin griego rimaypi imayna qellqasqa kasqan. Chaymi Traducción del Nuevo Mundo nin: “Chuya espirituwan noviam hinalla ninku: ‘¡Hamuy!’ nispa”. Kayna nisqanmi qawachin sapa kuti hinalla invitasqankuta. Invitacionta kasukuqkunapas hinallam nichkanku: “Hamuy” nispa. Chaymi kay Pachapi kawsay suyaqkunamanta Biblia nin: ‘Tuta-punchawmi payta [otaq Diosta] servichkanku templonpi’, nispa (Apo. 7:9, 15). ¿Imatam qawachin ‘tuta-punchaw’ nisqan? Kallpanchakuspa hinaspa sapa kuti hinalla ruranatam, Anapa chaynataq Pablopa rurasqanman hina (leey Lucas 2:36, 37, Hechos 20:31 hinaspa 2 Tesalonicenses 3:8).
14, 15. ¿Imaynatam Daniel qawachirqa Diosta sapa kuti serviy allin kasqanta?
14 Danielpas sapa kutim Diosta servirqa (leey Daniel 6:4-10, 16). Payqa Dios serviypi rurayninkunatam hinalla rurarqa, sapa punchawmi orakurqa ‘kimsa kutikama imayna ñawpaqmantaraq [. . .] rurasqanman hina’. Manam huk killallapas orakuyta saqerqachu, leonkunapa kasqan uchkuman wischusqa kanan kaptinpas. Allin ejemplotam qowarqanchik Jehová Dios yupaychayta mana haykapipas saqenapaq (Mat. 5:16).
15 Huk tutaña leonkunapa kasqanpi tarikuptinmi, qawaq rispan rey kaynata nirqa: “Kawsaq Diospa serviqnin Daniel, mana samaykuspa [otaq sapa kuti] servisqayki Diosnikiqa, ¿yaqachum leonkunamanta libraykusurqanki?”, nispa. Danielmi nirqa: “Wiñaypaq kawsakuq reynilláy, Diosniymi angelninta kachamuspan mana imanawananpaq leonkunapa siminta wichqarachirqa. Diosqariki yachanmi ñoqaqa mana huchayoq kasqayta chaynataq qampa qayllaykipiqa ima mana allinpas mana rurarusqayta”, nispa. Sapa kuti servisqanmantam Jehová Dios bendecirqa (Dan. 6:19-22).
16. ¿Danielpa ejemplonpi piensaspa, ¿ima tapukuykunatam predicasqanchikmanta rurakunanchik?
16 Danielqa manam wañuytapas manchakurqachu Diosta hinalla servinanpaq. ¿Imatam nichwan ñoqanchikmanta? ¿Imakunatam rurachkanchik otaq rurayta munanchik hinalla predicananchikpaq? Imayna tarikuspanchikpas manam huk killallapas saqenanchikchu Diosmanta rimaytaqa. Predicayta atichkaspaqa, ¿manachu sapa semana predicananchik? Onqospa otaq imawanpas llumpayta sasachakuspa killapi 15 minutollata predicaspapas, amayá killa tukuypi qoytaqa saqeychu. ¿Imanasqa? Espiritutawan noviatam yanapayta munanchik, hinaspam hinalla niyta munanchik: “Hamuy”, nispa. Arí, atisqanchikman hina ruraytam munanchik, chaynapi huk killallapas predicayta mana saqerunanchikpaq.
17. ¿Maykunapim Diosmanta willakunanchik?
17 ¡Yakunayachikuqkunaman “kawsachikuq yakuta” mana imallapaq tomanankupaq ‘hamuy’ ninanchikpaqmi favorecesqa kanchik! Ichaqa amayá wasin-wasinta rispallachu invitamusunqa. Willananchikmi rantiq rispa, viajaspa, llamkaypi hinaspa escuelapipas. Autoridadkuna harkakuptinkupas hinallam cuidadowan willananchik, ichapas huk wasita predicaruspa karupi kaq wasitaña predicachwan otaq aswanqa kallpanchakuchwan maypipas predicanapaq.
Hinalla nisun: “Hamuy” nispa
18, 19. ¿Imaynatam qawachinchik Diospa llamkaqmasin kasqanchik chaninchasqanchikta?
18 Isqon chunka wata masninñam espirituwan Cristopa novianqa yakunayachikuqkunata nichkanku: “Hamuy” nispa. ¿Imatam qanmanta niwaq? ¿Chaskirunkiñachu chay invitacionta? Chayna kaptinqa, hukkunaman willanaykipaqmi kallpanchaykiku.
19 Manam yachanchikchu haykapikama invitananchiktaqa. Ichaqa segurom kanchik chayta ruraspa Diospa llamkaqmasin kasqanchikmanta (1 Cor. 3:6, 9). Chaninchananchikmi chayna favorecesqa kasqanchikta. Chaynaqa, Diosman “ofrendata qochkaq hinayá” sapa kuti predicasun (Heb. 13:15). Hanaq pachaman riyta suyaq otaq kay Pachapi kawsakuyta suyaq kaspanchikpas hinallam ninanchik: “Hamuy” nispa, chaynapi kawsachikuq yakuta tomay munaqkuna mana imallapaq tomanankupaq.
¿Imakunatam yacharunchik?
• ¿Pikunatam “Hamuy” nispa invitanku?
• ¿Imanasqam ninchik Jehová Diosmanta chay invitacion kasqanta?
• ¿Imaynatam chuya espiritu yanapan runakunaman invitaypi?
• ¿Imanasqam kallpanchakunanchik sapa kuti predicananchikpaq?
[Kay yachachikuypa tapukuyninkuna]
[16 kaq paginapi dibujokuna hinaspa recuadro]
(Imayna kasqanmanta yachanapaq qaway kay qellqata)
Hinallam ninku: “Hamuy” nispa
1914
5.100 predicaqkuna
1918
Achka runakunam wiñaypaq kawsanqaku Paraisopi
1922
“Willamuychik, willamuychik, willamuychik Reymantawan gobiernonmanta”
1929
Hanaq pachaman riqkunamanta puchuqkunam ninku: “Hamuy” nispa
1932
“Hamuy” niq invitacionqa manam hanaq pachaman riqkunallapaqchu
1934
Jonadabwan tupachisqa kaqkunatam kallpanchanku predicanankupaq
1935
Yacharurqakum ‘achkallaña runakuna’ pikuna kasqanta
2009
7.313.173 predicaqkuna
