Chuya espiritumanwan Diosman qokusqanchikman hina kawsasun

‘Chuya espirituman [. . .] hina kawsaspaqa aychapa munasqallantaqa manam rurankichikchu.’ (GAL. 5:16.)

1. ¿Ima iskay bautismokunam rurakurqa Pentecostes 33 kaq watapi?

JESUSPA qatiqninkunam 33 watapi chuya espirituwan bautizasqa karqaku, chaymi mana yachasqanku idiomakunata rimarqaku (1 Cor. 12:4-10). Qatiqninpim Pedro admirakuypaq yachachikuyta rimarqa. ¿Imaynatam chaypi kaqkunata yanaparqa? Achkam ‘sonqonkupi llumpayta llakikuspanku’, apostolpa nisqanta kasukurqaku, wanakurqaku hinaspa yakupi bautizakurqaku. Bibliam nin: ‘Llapankum kasukuqkunaqa bautizachikurqaku. Iñiqkunamanmi chay punchaw yapakurqaku yaqa kimsa waranqa runakuna’, nispa (Hech. 2:22, 36-41). Jesusta kasukuspankum bautizakurqaku Taytapa, Churipa hinaspa chuya espiritupa sutinpi (Mat. 28:19).

2, 3. a) ¿Imanasqataq mana chaynallachu chuya espirituwan bautizakuyqa chuya espiritupa sutinpi bautizakuywanqa? b) ¿Imanasqataq yakupi bautizakuna cheqap cristiano kanapaq?

² ¿Chaynallachu kanman chuya espirituwan bautizakuyqa chuya espiritupa sutinpi bautizakuywan? Manam. Chuya espirituwan  bautizakuqkunallam mosoqmanta nacenku Diospa churin kanankupaq (Juan 3:3). Akllasqataqmi kanku rey hinaspa sacerdotekuna hina Diospa Gobiernonpi kanankupaq, chaynapim Cristopa cuerpon hina kanku (1 Cor. 12:13; Gal. 3:27; Apo. 20:6). Hinaptinqa, Pentecostes punchawmantam chuya espirituwan bautismota Diosqa rurachkarqa Cristowan gobiernaqkunata akllananpaq (Rom. 8:15-17). ¿Imatam nichwan Jehová Diospa testigonkuna chuya espiritupa sutinpi asambleakunapi bautizakusqankumanta?

³ Yakupi bautizakuspam cristianoqa qawachin Jehová Diosman tukuy sonqonwan qokusqanta. Chaytam hanaq pachaman riy suyaq otaq kay Pachapi wiñaypaq kawsakuy suyaq millonnintin qarikunawan warmikunapas rurarqaku. Maypi kawsakuyta suyaq kaspankupas, Diosta agradanankupaqqa bautizakunankum Taytapa, Churipa hinaspa chuya espiritupa sutinpi. Bautizakuruspapas lliwmi ‘chuya espirituman [. . .] hina kawsananchik’ (leey Galatas 5:16). Tapukusunchik: “¿Chuya espirituman hinaspa Diosman qokusqayman hinachu kawsachkani?”, nispa.

¿Ima ninantaq ‘chuya espirituman [. . .] hina kawsayqa’?

4. ¿Imaynatam ‘chuya espirituman’ hina kawsanchik?

⁴ ‘Chuya espirituman [. . .] hina kawsayqa’ vidanchikpi Diospa kallpan haykapipas yanapawasqanchikta reqsikuymi. Huk rimaypiqa, ima rurasqanchikpipas sapa punchawmi yanapachikunanchik. Galatas libropa 5 capitulonmi niwanchik chuya espirituman hina kawsay aychapa munasqanman hina kawsaywan mana tupasqanta (leey Galatas 5:17, 18).

5. ¿Imakunawanmi mana intuchikunachu chuya espiritu yanapawananchikpaq?

⁵ Espirituman hina kawsaqkunaqa kallpanchakunkum pantaq kasqanchikpi aychapa munasqanta mana ruranankupaq. Aychapa munasqanqa kaykunam: huchapakuy, millakuypaq ruraykuna, manaña penqakuspa ruraykuna, taytacha-mamachakuna adoray, layqa ruray, cheqninakuy, piñanakuy, envidianakuy, liryanakuy, atipanakuy, rakinakuy, sapa-sapaq huñunakuy, tomakuy, mana allinkunawan kusikuy hinaspa hukkunapas (Gal. 5:19-21). Wañuchichkaq hinam cristianokunaqa aychankupa munasqankuta chinkachinku. ¿Imaynata? ‘Chuya espiritupa’ yanapayninwanmi (Rom. 8:5, 13). Aychapa munasqanwan mana intuchikuspankum mana sasachakuspa espirituman hina piensanku hinaspa yanapachikunku.

6. ¿Imatam rurananchik chuya espiritupa rurunta vidanchikpi qawachinapaq? Huk ejemplowan willamuy.

⁶ Chuya espiritu yanapawaptinchikmi chayman hina kawsachwan otaq Diospa munasqanman hina sumaq kayniyoqkuna kachwan (Gal. 5:22, 23). Sapakamapas kallpanchakunanchikmi. Kayta rikchanachisun tarpuqwan. Tarpunanpaqqa yakutawan intipa kanchaynintam necesitan. Chaykuna mana kaptinqa manam imatapas cosechanqachu. Chuya espiritutam tupachichwan intiwan, ancha allinmi sumaq kayniyoqkuna kanapaq. Ichaqa manamá chayllachu, tarpuqpas kallpanchakunanmi allinta cosechananpaqqa (Pro. 10:4). Chaynallataqmi chuya espiritupa rurun ñoqanchikpi achka  hinaspa allin kananpaqqa, tarpunapaq allpata preparachkaq hina sonqonchikta allinta preparananchik. Chaymi tapukunanchik: “¿Saqekunichu chuya espiritu yanapawananta chaynapi rurunta vidaypi qawachinaypaq?”, nispa.

7. Chuya espiritu vidanchikpi rurunanpaqqa, ¿imanasqataq estudianapaq hinaspa yuyaymananapaq tiempochakunanchik?

⁷ Tarpusqanchik allin qespinanpaqqa yakutapas necesitakunmi. Chaynallataqmi pasan espiritupa rurunta tarpuywanpas: necesitanchikmi Bibliapi yachachikuykunatapas kaymi yaku hina, chaytaqa tarinchik congregacionpim (Isa. 55:1). Achka kutitachá yachachirqanchik chuya espiritupa yanapayninwan Biblia qellqasqa kasqanta chaynataq yuyayniyoq confianza sirvientepa yanapakuyninwan entiendesqanchiktapas (Mat. 24:45-47; 2 Tim. 3:16). Chaynaqa, chuya espiritu yanapawananchikpaqqa Bibliata leespam yachasqanchikpi yuyaymanananchik. Chaynatam qatipakusun Diosmanta willakuqkunata, paykunam ‘tapukachakuspanku’ cuidadowan estudiarqaku chay tiempokama willakuykunata. Qatipakusuntaqmi angelkunapa ejemplontapas, paykunam anchata yachayta munarqaku prometesqa Miraymanta hinaspa hanaq pachaman riqkunamantapas (leey 1 Pedro 1:10-12).

¿Imaynatam chuya espiritu yanapawanchik?

8. ¿Imanasqataq Diosta mañakunanchik espiritunta qowananchikpaq?

⁸ Manam Bibliata estudiaspa yuyaymanayllachu yanapawasunqa, Diostapas mañakunanchikmi, paymi “ruran mañakusqanchikmantapas hinaspa piensasqanchikmantapas aswan llimparichkaqtaraq” (Efe. 3:20; Luc. 11:13). Ichaqa pipas ninmanchá: “¿Imanasqataq cristianokunaqa Diosta hinalla mañakunanku ‘manaraqpas mañakuchkaptinku’ imam necesitasqankuta yachachkaptinqa?”, nispa (Mat. 6:8). Chuya espiritunta qowananchikpaq mañakuspanchikmi qawachinchik Diospi confiasqanchikta. Piensasun imanasqa pitapas yanapasqanchikmanta. ¿Manachu wakinpiqa yanapanchik ñoqanchikpi confiasqanrayku hinaspa yanapananchikta niwaptinchik? (Tupachiy Proverbios 3:27.) Chaynallataqmi Diospas munan espiritunta qowananchikpaq mañakunanchikta, payqa qowasunpunim (Pro. 15:8).

9. ¿Imaynatam huñunakuykuna yanapawanchik chuya espirituwan yanapachikunapaq?

⁹ Chuya espiritupa yanapaynintaqa chaskinchiktaqmi huñunakuyninchikpi hinaspa asambleanchikkunapipas. Ancha allinmi huñunakuyman rinapaq hinaspa allinta uyarinapaq kallpanchakuyqa. Chaynapim yachasun “Diospa sonqonpi kaqkunatapas” (1 Cor. 2:10). Allinmi huñunakuypi sapa kuti rimariyqa. Tapukuchwanmi: “¿Hayka kutitataq pasaq 4 semanapi rimanaypaq makiyta hoqarirqani chaynapi iñisqayta qawachinaypaq? ¿Kallpanchakuymanchu astawan rimarinaypaq?”, nispa. Allinmi kanman hamuq semanakunapi rimanapaq tanteayqa. Jehová Diosqa yachanmi rimariy munasqanchikta, espiritunwanmi yanapawasun huñunakuywan astawan yanapachikunapaq.

10. ¿Ima invitaciontam qochkanku espirituman hina kawsaqkunaqa?

¹⁰ Espirituman hina kawsanapaqqa kasukunanchikmi  Apocalipsis 22:17 nisqanta, chaypim nin: ‘Espirituwan Carneropa novianmi nin: “Hamuy” nispa. Uyariqpas nichun: “Hamuy” nispa. Pipas yakunayachikuqqa hamuspayá kawsachikuq yakuta tomachun mana imallapaq’, nispa. Chuya espiritum ‘Carneropa novianwan’ otaq hanaq pachaman riqkunawan lliwta invitanku kawsachikuq yakuta tomanankupaq. ¿Imatam nichwan qanmanta? ¿Chaskirunkiñachu invitacionta hinaspa kallpanchasqachu kachkanki hukkunaman willanaykipaq? ¡Mayna allinmi runakunapa vidan salvaypi yanapakuyqa!

11, 12. ¿Imaynatam chuya espiritu predicacionpi yanapawanchik?

¹¹ Punta pachak watapi hinam predicacionqa rurakun chuya espiritupa yanapakuyninwan. Arí, chay tiempopim Diospa espiritun yanaparqa huk nacionkunapi predicakunanpaq. Ejemplopaq, Bibliam willawanchik Asia lawpi predicanankuta Pablotawan riqmasinkunata ‘chuya espiritu harkarusqanmanta’ hinaspa Bitiniaman yaykunankuta mana saqesqanmantapas. Manam yachanchikchu imaynata harkarusqantaqa, ichaqa yachanchikmi Europa lawman rinanpaq Pablota yanapasqanta, chaytaqa rurarqa Macedonia law runa yanapakuyta mañakusqanta revelacionninpi qawachispanmi (Hech. 16:6-10).

¹² Kunanpas Diosqa espiritunwanmi yanapan allpantinpi predicacionta. Manaña revelaspanpas hinallam chuya espiritunta servichikuchkan hanaq pachaman riqkunata yanapananpaq chaynataq cristianokuna tukuy kallpankuwan predicanankupaq hinaspa yachachinankupaqpas. Chaytaqa rurachkanchikñachá, ichaqa ¿atichwanchu Diosta astawan serviyta?

13. ¿Imaynatawanmi chuya espirituwan yanapachikunchik? Huk ejemplowan willamuy.

¹³ Chuya espirituwanqa yanapachikunchiktaqmi Diospa llaqtanpi niwasqanchikta kasukuspapas. Rimasun Japon nacionniyoq Mihoko sutiyoq sipasmanta. Precursora kayta qallaykuspanmi piensarqa kaqmanta watukuyta mana atisqanta. ¿Imanasqa? Uyariqnin hinalla yachayta munananpaq imatapas rurayta mana atisqanta piensaspanmi. Ichaqa Diospaq Llamkayninchikpim leerqa allin yachachikuykunata, hinaspa tiempopa risqanman hinam rurakurqa Cómo lograr una vida llena de satisfacción qellqa, kaymi Japon nacionniyoqkunapaq ancha allin karqa. Chay qellqata imayna servichikunamanta consejokunatam kasukurqa, astawanqa kaqmanta watukuspa pisillata rimaspa yanapaymanta. Chayllam qawarqa ñawpaqpi mana uyariqnin achka runakuna Biblia estudiayta munasqankuta. Nirqam: “Achkamanmi estudiota qorqani, wakinpiqa yaqa 12 runakunaman, chaymi wakinta nirqani suyanankupaq”, nispa. Uyarisqanchik yachachikuykunata kasukuspaqa qawachinchikmi espirituman hina kawsasqanchikta hinaspam achka bendicionkunata chaskinchik.

Diospa espiritunwan yanapachikusun

14, 15. a) ¿Imaynatam pantaq runaqa atinman Diosman qokusqanman hina kawsayta? b) ¿Imaynatam tarichwan ancha allin amistadkunata?

¹⁴ Diosmi niwanchik payta servinanchikpaq, chaytaqa cumplinanchikmi (Rom. 10:14). Ichapas mana preparasqa kasqanchikta piensanchik, Diosmi ichaqa yanapawanchik hanaq pachaman riy suyaq kaptinchik  otaq manapas (leey 2 Corintios 3:5). Tukuy atisqanchikta ruraspa hinaspa chuya espirituwan yanapachikuspaqa, atisunmi Diosman qokusqanchikman hina kawsayta.

¹⁵ Pantaq kaspanchikmi chuya Diosman qokusqanchikwan cumpliyta sasachakunchik. Ichapas ñawpaq tiempo amistadninchikkuna piñakunqaku hinaspa ‘mana allinta rimanqaku’ puntata hina mana kasqanchikmanta (1 Ped. 4:4). Ichaqa ama qonqasunchu: mosoq amistadninchikkuna Jehová Dioswan Jesus kasqanta (leey Santiago 2:21-23). Chaymi congregacionpi cristianokunawan astawan kuyanakunapaq kallpanchakunanchik, paykunaqa enteron pachapi ‘iñiqmasinchikkunapa’ partenmi (1 Ped. 2:17; Pro. 17:17). Espiritunwanmi Diosqa yanapawasun allin hinaspa kallpanchaq amistadkunata tarinapaq.

16. ¿Imanasqataq Pablo hina nichwan ‘kusisqam kani mana kallpayoq kaspaypas’ nispa?

¹⁶ Iñiqmasinchikkunapa yanapayninwanpas sasam sapa punchaw sasachakuykunata atipayqa. Wakinpiqa sasallaña kaptinmi, yaqa hatun uchkupi purispa mayninta lloqsinapaq mana tariq hina tarikuchwan. Chayna kaspaqa, astawanmi Diosta mañakunanchik espiritunta qowananchikpaq. Qawasun Pablopa ejemplonmanta, paymi qellqarqa: “Mana kallpayoq kachkaspayqa aswan kallpayoqraqmi rikuriruni”, nispa (leey 2 Corintios 4:7-10 hinaspa 12:10). Payqa yacharqam mana kallpayoq hinaspa hukmanyasqa tarikuptinchik chuya espiritu kallpanchawananchikta. Ichaqa, ¿imanasqataq nirqa ‘kusisqam kani mana kallpayoq kaspaypas’?, nispa. Cuentatam qokurqa mana kallpayoq kaptin chuya espiritu yanapasqanta. Ñoqanchikpas chayna yanapachikuytaqa atichwanmi (Rom. 15:13).

17. ¿Imaynatam chuya espiritu yanapawanchik risqanchikman chayanapaq?

¹⁷ Qawasqanchikman hinaqa, chuya espiritutam necesitanchik Diosman qokusqanchikwan cumplinapaq. Ñoqanchikqa kanchik mana reqsisqan sitiopi tarikuq chofer hinam, richkanchikmi wiñay kawsayman chaynapi Diosta wiñaypaq servinapaq. Imaynam carropa choferninpas mana reqsisqan sitiopi tarikuspaqa maymi risqanman chayananpaq necesitan pipas reqsiykachinanta, chaynam chuya espirituta necesitanchik allinlla chayanapaq. Chay yanapakuytam maskananchik hinaspa kasukunanchik. Manam munanchikchu Satanaspa munaychakusqan kay pachapi kaq espiritu mayman risqanchikmanta horqoruwananchiktaqa (1 Cor. 2:12). Risqanchikmanqa chayasun Bibliapa chaynataq Diospa llaqtanpa yanapakuyninwanmi.

18. ¿Imaman hina kawsaytam haykapipas mana saqenanchikchu, hinaspa imanasqa?

¹⁸ Unay tiempoña Jehová Diospa testigonkunawan kuska kaspayki hinaspa estudiaspayki chaynataq Diosman manaraq qokuspa bautizakuspaykiqa, tapukuy: “¿Imataq harkawachkan?”, nispa. Diospa munaynin rurakunanpaq chuya espiritupa yanapakuyninta reqsikuspa chaynataq yanapasusqaykimanta agradecekuspaqa, kallpanchakuy yachasqaykiman hina ruranaykipaq. Jehová Diosqa achkanpim bendecisunki. Makinta kicharispam chuya espiritunta qosunki. Achka tiempoña otaq chunkantin wataña bautizasqa kaspaykipas, cuentatachá qokurqanki aguantanaykipaq hinaspa vidaykipi chuya espiritu imayna yanapasusqaykimanta. Wiñay-wiñaypaqmi chayna bendecisqa kawaq. ¡Amayá haykapipas saqeychu chuya espirituman hina kawsaytaqa!

¿Yacharunchikchu kaykunamanta?

• ¿Ima ninantaq ‘chuya espirituman’ hina kawsayqa?

• ¿Imam yanapawasun ‘chuya espirituman’ hina haykapipas kawsanapaq?

• ¿Imaynatam atisun Diosman qokusqanchikman hina kawsayta?

[Kay yachachikuypa tapukuyninkuna]

[15 kaq paginapi dibujo]

Tarpunapaq allpata preparachkaq hinam sonqonchikta preparana

[16 hinaspa 17 kaq paginakunapi dibujokuna]

¿Yanapachikunchikchu chuya espirituwan?