Jehová Diospim astawan confianiku sasachakuykuna kaptin

Kaytam willakun Ada Dello Stritto

Sutiymi Joel, cuadernoypim qellqayta tukuruni sapa punchaw leenapaq textota. 36 wataypi kaspaypas iskay horapim qellqaruni. ¿Imanasqa? Mamaymi chaymanta willasunkichik.

LUIGI sutiyoq qosaywan kuskam 1968 watapi bautizakurqaniku Jehová Diospa testigon kanaykupaq. Iskaymi sano warmayku karqa Davidwan Marc, hinaptinmi 1973 watapi manaraq tiemponpi Joel nacerurqa hospitalpi, Binche (Bélgica) sutiyoq llaqtapi Bruselasmanta sur lawman rispa yaqa 60.000 metropi. Yaqa iskay kilollatam llasarqa (1 kilo, 700 gramos), chaymi llasaynin yapakunankama hospitalpi saqerqani.

Semanakuna pasaptinpas Joelqa hina kaqllam karqa, chaymi warmakunata qawaq doctorman qosaywan kuska aparqaniku. Allinta qawaykuspanmi, niwarqaku: “Manam yachankichikchu imayna sientesqayta. Iskaynin warmaykichikpa mana onqosqanwanchusmi payqa ñakarinqa”, nispa. Manam pipas rimarqachu. Sutillam karqa warmaykupa mana allin tarikusqan. Hinaptinmi doctorqa qosayta huk lawman pusaspa willarqa warmayku “trisomía 21” otaq síndrome de Down onqoywan kasqanta. *

Imawan onqosqanta niwaptinkum llumpayta llakikurqaniku, chaymi huk doctorkunaman tapuq rirqaniku. Yaqa huk horam doctorqa Joelpa imayna tarikusqanta qawarqa mana imatapas rimaspan, ñoqaykupaqqa una-unaymi rikchakuwarqaku. Qawaykuwaspankum nirqa: “Payqa qamkunamantam achkata necesitanqa”. Nirqataqmi: “Ichaqa kusisqam kanqa, payqa ancha kuyakuq tayta-mamayoqmi”, nispa. Wawachaytam marqakuykuspay wasiykuman aparqani. Chay tiempopaqqa 8 semanayoqñam karqa.

Huñunakuykunawan predicacionmi kallpata qowanku

Kaqmanta doctor qawaspanmi tarirurqa sonqonmanta Joel onqosqanta hinaspa anemiawan kaptin  tullunkuna mana allin kasqantapas. Sonqonmi llumpay hatun kaspa qaspanninta ñitiq, chaymi infeccionpas sapa kuti qonman karqa. Tawa killayoq kachkaptinmi, hospitalman aparqaniku broncowan onqoruptin, hinaptinmi wakinkunamanta sapaqchasqa karqa. Anchatam llakikurqaniku ñakariqta qawaspayku. Abrazaykuspa kuyaykuytam munarqaniku, ichaqa chunka semanapunim llapchaykunaykutapas mana saqewarqakuchu. Luigiwan ñoqaqa manam ima ruraytapas atirqanikuchu, abrazanakuykuspam Jehová Diosta mañakuq kaniku.

Chayna tarikuspaykupas hinallam huñunakuyman rirqaniku Davidwan hinaspa Marcwan, chay tiempopaqqa 6 hinaspa 3 watayoqñam karqaku. Salonpiqa iñiqmasinchikkunawan kaspam Jehová Diospa kuyakuywan cuidawasqankuta qawarqaniku. Preocupasqa kasqaykutam paypa makinpi saqerqaniku, chaymi hawkayachiwaqku (Sal. 55:22). Joel cuidaq enfermerakunapas cuentatam qokurqaku hawkalla kanaykupaq huñunakuykuna yanapawasqankuta.

Mañakurqanitaqmi Jehová Diosta kallpata qowaptin predicaq rinaypaq. Wasiypi waqanaymantaqa, vecinoykunamanmi willayta munarqani onqoykunata Dios chinkachinanpaq prometesqanmanta hinaspa chay suyakuy kallpanchawasqanmantapas. Predicaq lloqsispaymi sapa kuti cuentata qokuq kani mañakusqayta Dios uyariwasqanta.

“¡Admirakuypaqmi!”

Joelta wasiykuman apamunaykupaq suyasqayku punchawmi chayaramurqa. Ichaqa qatiqnin punchawllatam kusikuyniykuqa llakipi rikurirurqa. Joelmi qonqaymanta astawan onqorurqa hinaptinmi hospitalman kaqmanta kallpaylla rirqaniku. Atiendeq doctorkunam niwarqaku: “Joelqa soqta killallañam kawsanqa”, nispa. Iskay killa pasaruptinmi yaqa doctorkunapa nisqanman hinaña Joelqa karqa, astawanmi peorchakuchkarqa. Warmaypa kasqanmanta hawaman lloqsispanmi doctorqa niwarqaku: “Manañam imatapas paypaqqa rurayta atinikuchu. Anchatam llakikuni”. Nirqataqmi: “Kaypiqa Jehová Diosllam yanapanman”, nispa.

Pisipasqa hinaspa hukmanyasqa tarikuspaypas Joelpa kasqanmanmi kutirqani, manam saqeyta munarqanichu. Luigim qawanan karqa iskaynin mayor wawaykunata, ñoqatañataq congregacionpi cristianakuna turnonpi yanapawaq. Huk semana pasaruptinmi, qonqaymanta sonqon sayarurqa. Enfermerakunam chaylla yanaparqaku, ichaqa manam imatapas rurayta atirqakuchu. Chayllam huknin enfermera llakisqa rimaywan niwarqa: “Lliwmi tukurunña”, nispa. Manaña aguantayta atispaymi waqarqani. Cuartomanta chaylla lloqsispaymi orakunaypaq kallpanchakurqani, llakisqa kaspaymi imayna rimayta atirqanichu. Admirakunaypaqmi 15 minuto pasaruptillan huk enfermera lloqsiramuspan niwarqa: “¡Allinyachkanmi!”, nispa. Makiymanta hapiykuwaspanmi niwarqa: “Hakuchik, qawaykamuy”, nispa. Yaykuptiyqa sonqochanmi kaqllamanta llamkachkasqa. Chayna pasakusqanmantam enteron hospitalpi yacharurqaku. Doctorkunawan enfermerakunam qawaykuspanku nirqaku: “¡Admirakuypaqmi!”, nispa

 Joelmi tawa watanpi ñawparin

Joel wawallaraq kaptinmi doctorqa sapa kuti niwaqku: “Paytaqa anchatam kuyana”, nispa. Jehová Diosmi Luigitawan ñoqata kuyakuywan cuidawarqaku, astawanqa warmaykupa nacesqanmanta. Ñoqaykuñataq Joelta chayna cuidayta munarqaniku. Imapipas yanapanaykupaqqa karqam.

Punta 7 watankunapim: octubremanta marzokama, chiri killakunapi onqoqllaña karqa chaymi hospitalman chaylla apaq kaniku. Tiempochakurqanitaqmi 2 mayor wawaykunawan kanaypaqpas. Paykunapas Joeltaqa allintam yanaparqaku, chayna rurasqankuqa allinpim tukurqa. Ejemplopaq, doctorkunam niwarqaku Joelqa mana haykapipas purinanta. Ichaqa huk punchawmi Marc kaynata nirqa: “¡Hatariy! Mamanchikman qawachiy atisqaykita”, nispa. Admirakunaypaqmi, ¡puriyta qallaykurqa! Ancha kusisqam Jehová Diosta tukuy sonqoykumanta llapayku agradecekurqaniku. Joel mana achkata ruraptinpas, felicitaspaykum kallpancharqaniku.

Diosmanta yachachisqaykum allin karqa

Atispaykuqa Salonmanmi Joelta apaq kaniku. Onqoqllaña kaptinmi, tanqaspalla apana uchuy carrochapi apaq kaniku, mana onqorunanpaqmi rikuriq plasticowan carrochata taparqaniku. Chayna tarikuspanpas huñunakuypiqa kusisqam karqa.

Iñiqmasinchikkunam tukuy atisqankupi kuyakuywan yanapawaqku. Hukninmi sapa kuti yuyachiwaqku Isaias 59:1 kayna nisqanta: “Diospa atiyninqa manam pisiyarunchu manaña salvananpaq hinaqa. Tayta Diospa rinrinqa manam upayarunchu manaña uyarinanpaq hinaqa”. Chayna nisqanmi yanapawaqku Jehová Diospi hinalla confianaykupaq.

Tukuy kay watakunapim Joelta yanaparqaniku Dios serviyta chaninchananpaq. Tukuy tiempom Diosmanta yachachirqaniku. Munarqanikum Taytanta hina qawananta hinaspa kuyanantapas. Mañakurqanikutaqmi paymanta yachachisqaykuta Jehová Dios bendecinanpaq.

Mozo kayta qallarisqanpim Bibliamanta rimayta gustarqa, chaymi anchata kusichiwarqaku. Ejemplopaq, 14 watanpi kachkaspanmi operachikusqan qepata tapuwarqa: “Mamay, ¿qoykuymanchu Vivir para siempre librota operawaqniy doctorman?”, nispa. ¡Ancha kusisqam tarikurqani! Watakuna pasaptinpas kaqllamantam operachikurqa, vidanqa peligropim tarikurqa. Manaraq operachikuchkaspanmi yanapayniykuwan qellqasqan cartata doctorkunaman qorqa, chaypim nirqaniku yawarmanta ima piensasqanta. Doctormi tapurqa: “¿Cartapi nisqanman hinachu piensanki?”, payñataqmi kallpawan nirqa: “Arí doctor”, nispa. Kusisqam karqaniku Unanchaqninpi confiasqanmantawan kusichiy munasqanmantapas. Agradecekurqanikum doctorkunapa entiendesqankumanta.

 Dios servisqanpi Joelpa ñawparisqan

Joelmi Diosman qokusqanta bautizakuspan qawachirqa 17 watanpi. ¡Chay punchawtaqa manam qonqasaqchu! Ñawparisqanmi anchata kusichiwarqaku. Jehová Diostawan cheqap yachayta tukuy sonqonwan kuyasqanqa hinallam kachkan. Piwan tupaspanpas ninmi: “¡Cheqapmanta yachasqaymi vidayqa!”, nispa.

Anchata kallpanchakuspanmi chay watakunapaq leeytawan qellqayta yacharurqa. Sapa kuti imallatapas qellqasqanqa, imapas ganaruy hinam karqa. Chaymantapacham Diospa Palabranta sapa punchaw estudianapaq folletota sapa punchaw leen. Chaymantañataq anchata kallpanchakuspa cuadernonpi qellqan chay textota, llapanpiqa achkallañam kachkan.

Huñunakuy punchawqa, Salonman temprano chayanaykutam Joelqa munan, huñunakuyman hamuqkunata chaskinanpaq. Chaymantapas munanmi huñunakuypi rimayta hinaspa demostracionkuna ruraytapas. Microfonokunatapas haywanmi, hinaspa huk ruraykunatapas ruranmi. Allin tarikuspanqa sapa semanam predicacionman riysiwanku. 2007 watapim congregacionpi willakurqa siervo ministerial kasqanta. Kusikuymantam waqarqaniku. ¡Chayqa Jehová Diospa sumaq bendicionninmi!

Jehová Diosqa yanapakuqmi

1999 watapim huk hatun sasachakuypi tarikurqaniku. Mana cuidakuspa manejaq huk runam carroykuman chocaramurqa, hinaptinmi qosay llumpay mana allin qeparurqa. Paypa huknin chakintam kuchururqaku hinaspa achka kutita operachikurqa wasa tullunta otaq columnanta. Kaqmantam Jehová Diosman asuykurqaniku, hinaptinmi kallpanchawarqaku (Fili. 4:13, NM). Huknin chakiyoqllaña qosay kaptinpas, kallpanchakunikum allin kaqkunapi piensanaykupaq. Manaña llamkayta atispanpas aswan tiempoyoqmi kachkan Joelta cuidananpaq, chaymi ñoqaqa Dios serviypi astawan rurani. Chaynataq, Luigiqa aswan allintam atienden familiaykutawan congregacionta Diosmanta yachachispan, hinallam congregacionpi ancianomasinkunawan ruranankupaq yanapaq kachkan.

Chayna tarikuspaykum achka tiempo kuska kaniku. Yacharunikum entiendeq kayta hinaspa imatapas imam kaq qawayta. Hukmanyasqa kaspaykuqa, Jehová Diosmanmi willaniku imayna tarikusqaykuta. Ichaqa llakisqam tarikuni Jehová Diosta David hinaspa Marc saqesqankumanta. Yuyayniyoqña kaspa wasiykumanta lloqsiruspankum, cheqapmanta karunchakuyta qallaykurqaku. Munanikum huk punchaw kutimunankuta (Luc. 15:17-24).

Tukuy kay watakunapim Jehová Dios yanapawarqaku, yacharunikum sasachakuykuna kaptin payman hapipakuytapas. Chaninchanikum Isaias 41:13 nisqanta, ninmi: “Ñoqa Tayta Diosmi alleq makikichikmanta hapiqnikichik kani. ‘Ama manchakuychikchu, ñoqam yanapasqaykichik’ niqnikichikmi kani”, nispa. Yachanikum makiykumanta hapiykuspa pusawasqankuta, chaymi consuelawanku. Cheqaptapunim niymanku, sasachakuykunawan Taytanchik Jehová Diospi astawan confiasqaykuta.

[Willakuy]

[16, hinaspa 17 kaq paginakunapi dibujokuna]

Joelmi maman Adawan

[18 kaq paginapi dibujo]

Ada, Joel hinaspa Luigi

[19 kaq paginapi dibujo]

Joeltam anchata gustan Huñunakunapaq Salonman hamuqkunata chaskiy