Huñulla kasqanchikmi Diosta hatunchan

‘Chuya espiritupa yanapakuyninwanyá chulla sonqolla kasunchik.’ (EFE. 4:3.)

1. ¿Imaynatam Diosta hatuncharqaku punta pachak watapi Efeso congregacionpi kaqkuna?

PUNTA pachak watapim huk congregacionpi admirakuypaq huñulla kasqanku cheqap Diosta hatuncharqa. Efeso congregacionmi karqa. Kay llumpay negociopa kasqan llaqtapiqa, wakin cristianokunam apu kasqankurayku sirvienteyoq karqaku, wakinkunañataq sirviente karqaku hinaspa llumpay wakchapaschá karqaku (Efe. 6:5, 9). Wakinkuqa karqaku huñunakunanku wasipi Pablopa 3 killa predicasqanwan cheqapmanta yachaq judiokunam, hukkunañataq karqaku huk nacionniyoq runakunamanta Diana mamacha yupaychaqkunawan brujokunapas (Hech. 19:8, 19, 26). Cheqap religionqa sutillatam hukllawarurqa tukuy hinastinmanta runakunata. Pablopas yacharqam iñiqkunapa chayna huñulla kasqanku ‘Diosta hatunchasqanmanta’ (Efe. 3:21).

2. ¿Imam peligropi churarqa Efeso congregacionpi huñulla kasqankuta?

² Efeso congregacionpi huñulla kasqankum peligropi tarikurqa. Pablom ancianokunaman willarqaña: “Qamkuna ukumantam wakinkuna hatarinqa llullakunata yachachispanku chaynapi iñiqkuna qatinankuta munaspanku”, nispa (Hech. 20:30). Wakin cristianokunaqa rakinachiy munaqraqmi karqaku, Pablopa nisqanman hinaqa chaynam karqaku ‘Diosta mana kasukuqkunata kallpanchaq’ munaychakuptin (Efe. 2:2; 4:22).

 Huñulla kanapaq carta

3, 4. ¿Imaynatam huñulla kanamanta qawachin Efesopi kaqkunaman carta?

³ Pabloqa yacharqam huñulla chaynataq hinalla hawka kanankupaq lliw kallpanchakunankuta. Dios yanapaptinmi Efeso congregacionpi huñulla kanankupaq cartarqa. Nirqam Cristopi ‘lliwta Dios hukllawananmanta’ (Efe. 1:10). Chaynataq cristianokunata tupachirqa perqapa ruminkunawan, nirqam: “Wasiqa [tukuy ima huñusqa kaptinmi] sumaqllataña wiñachkan chaynapi Señorpaq sapaqchasqa templo rikurinankama”, nispa (Efe. 2:20, 21). Qawachirqataqmi judio kaqkunawan mana judio kaq cristianokuna imanasqa huñulla kasqankuta hinaspa yuyarichirqa llapankuta Dios kawsachisqanta, ‘Pay unanchasqanrayku lliw ayllukuna hanaq pachapi chaynataq kay pachapi kasqantapas’ (Efe. 3:5, 6, 14, 15, NM).

⁴ Efesios libropa 4 capitulonpim qawasunchik huñulla kanapaq imanasqa kallpanchakunamanta, chayna kanapaq Jehová Dios yanapawasqanchikmanta hinaspa mana chinkarachinapaq imayna kananchikmantapas. Kay estudiowan allinta yanapachikunapaqqa, puntatam leenanchik lliw capitulota.

¿Imanasqam kallpanchakuna?

5. ¿Imanasqataq angelkunaqa Diosta huñulla servinku, ichaqa imanasqam ñoqanchikpaqqa sasa?

⁵ Pablom ruegarqa Efesopi cristianokuna anchata kallpanchakuspa ‘chuya espiritupa yanapakuyninwan chulla sonqolla kanankupaq’ (Efe. 4:3). Chaynata kallpanchakunamanta entiendenapaq tupachikusun kasukuq angelkunawan. Kay Pachapiqa manam kanchu tukuypi chayna kaqlla 2 runakuna, chaymi piensachwan millonnintin angelkunapas mana chaynalla kasqankumanta (Dan. 7:10). Chaywanpas lliwmi Jehová Diosta huñulla servinku, Palabranta kasukuspanku hinaspa munayninta rurasqankurayku (leey Salmo 103:20, 21). Ñoqanchikpaqmi huñulla kayqa aswan sasa, paykuna hina sumaq kayniyoqkuna kaspanchikpas tukuypi pantaqmi kanchik.

6. ¿Imayna kasqanchikmi yanapawasun iñiqmasinchikpa imayna kasqan piñachiwaptinchikpas kusisqa llamkanapaq?

⁶ Iñiqmasinchikwan llamkaspam pantaq kasqanchikrayku sasachakuykuna kanman. ¿Imataq pasanman llampu sonqo ichaqa tardeyaq cristiano, mana tardeyaq ichaqa chaylla piñakuq cristianowan congregacionpi llamkaptinku? Yaqachá kikinkupa mana allin rurasqankuta qonqaruspa hukninpa mana allin rurasqanta qawanqa. ¿Imatam rurananku huñulla llamkanankupaq? Imayna kanamanta Pablopa nisqantam kasukunanku. Qellqasqanta leespam puntata qawasun chay cristianokunatawan ñoqanchikta huñulla kanapaq imayna yanapawananchikmanta. Nirqam: ‘Ruegakamuykichikmi allinta kawsanaykichikpaq. [. . .] Humillakuspayá llampu sonqolla hinaspa pacienciakuq kaychik, imamanta  faltanakuspapas kuyakuywanyá aguantanakuychik. Chuya espiritupa yanapakuyninwanyá chulla sonqolla kaychik tukuy tiempopi hawkalla kawsanaykichikpaq’, nispa (Efe. 4:1-3).

7. ¿Imanasqataq pantaq kaspanchikpas yachananchik huñulla llamkayta?

⁷ Iñiqmasinchikkuna pantaq kaptinkupas yachananchikmi Jehová Diosta paykunawan huñulla serviyta, congregacionllapim cheqap cristianokunataqa tarisun. Ñoqanchikqa ‘kanchik chulla cuerpollam, chullallataqmi espiritupas, Diosqa qayawarqanchik huk sonqolla suyananchikpaqmi. Chullallam Señorqa, chullallam iñiypas, chullallataqmi bautismopas. Llapallanchikpa Taytanchik Diospas chullallam.’ (Efe. 4:4-6.) Manam Diospa espiritunta nitaq bendicionnintapas chaskichwanchu llaqtanpi mana kaspaqa. Chayrayku, ¿maymantaq richwan mayqan iñiqmasinchikpas mana agradawaptinchikqa? Diospa llaqtanmanta hawapiqa manam uyarisunchu wiñay kawsay qokuq yachaykunataqa (Juan 6:68).

Ancianokunam huñulla kanapaq yanapawanchik

8. ¿Pikunatam Cristo servichikun huñulla kasqanchikta mana imapas rakinachinanpaq?

⁸ Congregacionpi huñulla kanapaq ‘regalokunata runakunapi [Jesus] qosqanmanta’ qawachinanpaqmi Pablo tupachin ñawpaq tiempopi soldadopa rurasqanwan. Guerrapi ganamusqanmanta kutimuspanmi wakinpiqa presota pusamuq sirvienten kaspa señoranta yanapananpaq (Sal. 68:1, 12, 18). Chaynataqmi, kay pachapi mana allinkunata vencespan Jesuspas achkata ‘presocharurqa’, paykunam kikinkumanta serviyta munanku (leey Efesios 4:7, 8 *). ¿Imakunata ruranankupaqmi kay sirvientekunaman encargarqa? Wakinmanmi, “apostol kanankupaq”, ‘Diosmanta willanankupaq’, “allin noticiata willakunankupaq” hinaspa “iñiqkunata yachachispa michiq kanankupaq”. ‘Paykunatam churarqa Cristopa cuerpon iñiqkunata yanapaspa wiñachinankupaq [. . .]. Chaynapi iñisqanchikpi [. . .] lliw wiñaspa hukllaña kananchikpaq’ (Efe. 4:11-13).

9. a) ¿Imaynatam huñulla kanapaq yanapawanchik ‘regalokunata runakunapi qowasqanchikkunaqa’? b) ¿Imanasqataq llapallanchik yanapakunanchik congregacion huñulla kanapaq?

⁹ ‘Regalokunata runakunapi qowasqanchik’ otaq ancianokunam michiqkuna hina kallpanchakunku huñulla kanapaq. Ejemplopaq, ¿imatam ruranman ancianoqa 2 cristianokuna sapa kuti imapipas llallinakuq kasqankuta  qawaspan? Iskayninkutam sapankupi consejanan. Imayna kasqankuta cambianankupaq ‘llampu sonqollawan’ nispanqa, congregaciontam aswan huñullata tarichinqa (Gal. 5:26–6:1). Ancianokunaqa yachachiq kaspankum yanapawanchik Bibliapa yachachisqanpi iñisqanchik allin kananpaq, huñulla kanapaqwan Dios serviypi yuyayniyoq kanapaqpas. Pablom qellqarqa manaña warmakuna hina kananchikpaq, “warmakunaqa hukta-hukta creeruspam wayrawan apachikuchkaq hina runakunapa yachachisqanwan aysachikunku, paykunataqa sacre runakunam sumaqllataña rimaspa pantarachin” (Efe. 4:13, 14). Ichaqa, lliwmi cuerponchikpa partenkuna hina yanapanakunanchik iñiqmasinchikwan huñulla kanapaq (leey Efesios 4:15, 16).

Allin kaqkunatam rurananchik

10. ¿Imaynatam huñulla kasqanchikta yanqachanman huchapakuyqa?

¹⁰ Efesios libropa 4 capitulonpi leesqanchikpim, Pablo qawachin huñulla hinaspa Dios serviypi yuyayniyoq kanapaq kuyakuy ancha allin kasqanmanta. Qatiqninpim qawachichkan kuyakuy ñanpi puriq cristianokunapa kawsakuynin imayna kananmanta. Manam huchapakunachu nitaq millakuypaq ruraykunata ruranachu. Pablom iñiqmasinkunaman consejarqa: “Amañayá kawsaychikchu Dios mana reqsiq runakuna hinaqa”, nispa. Chay tiempopiqa runakunam ‘manaña penqakuq rikuriruspanku tukuy imaymana qanra vidallapi purirqaku’ (Efe. 4:17-19). Kunanpas huchapakuymi huñulla kasqanchikta peligropi churanman. Chaymantam rimanku asichinankupaq rimaykunapi, takikunapiwan peliculakunapipas. Achkam huchapakunku, mana pipa rikusqanta otaq mana penqakuspapas. Pipas casarakuyta mana piensachkaspa warmita otaq qarita kuyaq tukuspaqa Diosmantawan congregacionmantam karunchakurunman. Chaynata ruraspaqa chayllam huchapakuruchwan. Chaykunata ruraq casado kaspanqa huchapakuymanwan divorciomanpas chayanmanmi, chayqa llumpaytam ñakarichin inocente kaqtawan warmankutapas, paykunam taytallanwanña otaq mamallanwanña yachanmanku. Chayna mana allin ruraykunaqa rakinachinmi. Chaymi mana yanqachu Pablo nirqa: “Qamkunam ichaqa mana chaynatachu Cristomanta yacharqankichik”, nispa (Efe. 4:20, 21).

11. ¿Imata ruranapaqmi Biblia kamachiwanchik?

¹¹ Rakinachiq piensayta saqenamanta hinaspa rantinpi hawkalla kanapaq kaqkunata ruranapaqmi Pablo qellqarqa: ‘Huchaman aysaqnikichikmanta karunchakuspayá amaña ñawpa vidaykichikpi hinañachu puriychik, chayna vidaqa pantachikuspam mana allinllata munachisunkichik. Imayna piensasqaykichikta mosoqyachispayá [. . .] mosoqwan pachakuchkaq hina mosoq runaña kaychik Diosman rikchakunaykichikpaq, chayna runatam Diosqa unancharqa cheqaptapuni mana huchallikuq justo kananpaq’ (Efe. 4:22-24). Ichaqa, ¿‘imaynatam piensasqanchikta mosoqyachichwan’? Agradecekuspam yuyaymanananchik Bibliapi yachasqanchikkunapiwan experienciayoq cristianokunapa ejemplonkupipas. Kallpanchakuspaqa atisunmi Diospa munasqanman hina mosoq runaña kayta.

Amañayá ñawpaqta hinaqa rimasunchu

12. ¿Imaynatam huñulla kanapaq yanapakun cheqapta rimayqa, hinaspa imanasqataq wakinkuqa sasachakunku cheqapta rimanankupaq?

¹² Familiapiwan congregacionpi allinlla kanapaqqa haykapipas cheqaptam rimananchik. Cheqapta hinaspa kuyakuywan rimayqa runakunatam huñullata tarichin (Juan 15:15). Ichaqa, ¿imataq pasakunman pipas  confiasqanchik llullakuwaptinchik? Ñawpaqta hinaqa manañachá paypi confiasunchu. Chayraykuchá Pablo qellqarqa: ‘Cheqapta rimaychik runamasikichikwan lliwchanchikmi kanchik huk cuerpopa partenkuna hina’, nispa (Efe. 4:25). Wakinkupaqqa sasam kanman manaña llullakuyqa, unayña otaq warmacha kasqankumantaraq llullakusqankurayku. Diosmi ichaqa valoran cambianankupaq kallpanchakusqankuta chaynataq yanapanqa.

13. ¿Imatam rurananchik sientichiq rimaykunata saqenanchikpaq?

¹³ Diosqa munanmi familiawan hinaspa iñiqmasinchikwan huñulla kananchiktawan respetanakunanchikta, chaymi niwanchik rimayninchik imayna kananmanta: ‘Amayá [kaychikchu] qacha simiqa [. . .], piñakuqqa, rabiakuqqa, cheqnikuqqa, qaqchanakuqqa, insultanakuqqa nitaq ima mana allin ruraqpas’, nispa (Efe. 4:29, 31). Rimasqanchikwan mana piñachinapaqqa kallpanchakunam hukkunata aswan respetanapaq. Ejemplopaq, rimayninwan señoranta sientichiq qariqa señoranta imayna qawasqantam cambianan, astawanraqmi warmikunata Dios imayna chaninchasqanmanta yachaspanqa. Anchatam Diosqa warmikunata chaninchan chaymi akllarun Cristowan kamachimunankupaqpas (Gal. 3:28; 1 Ped. 3:7). Chaynataq, qosanta qaparispan rimapayaq warmipas cambiananpaq kallpanchasqa tarikunan, insultaptinku Jesus imayna kasqanmanta yachaspan (1 Ped. 2:21-23).

14. ¿Imanasqataq mana allinchu piñakuq kasqanchikta mana controlayqa?

¹⁴ Rimayninchikwan sientichiyqa tupanmi piñakuywanpas. Piñakuyta mana controlaptinchikqa allin amistadkunatapas rakinarunmanmi. Nina hina chaylla miraruspanmi sasachakuyta rikurichinman (Pro. 29:22). Piñakunapaq razon kaptinpas controlakunam, mana chayqa sumaq amistadninchiktam yanqacharuchwan. Sonqomantam pampachana, sientisqallaqa manam kanachu hinaspa qonqanañam ñawpaqpi mana allin rurasqankutapas (Sal. 37:8; 103:8, 9; Pro. 17:9). Efesopi kaqkunatam Pablo nirqa: ‘Piñakuspaqa amayá huchallikuychikchu, amayá inti seqaykunankamaqa piñakuychikchu. Amayá chikantapas dejakuychikchu Diablo huchallichisunaykichikta’, nispa (Efe. 4:26, 27). Pipas piñakuq kasqanta mana controlaspanqa, Diablomanmi lugarta qonqa rakinakuytawan sasachakuyta congregacionpi hatarichinanpaq.

15. ¿Imataq pasanman mana permisowan hukpa imantapas hapikuptinchik?

¹⁵ Congregacionpi huñulla kanapaqqa, hukkunapa imantapas mana permisowanqa manam hapinachu. Chaymi Pablo kaynatawan nirqa: “Pipas ñawpaqta suwa kaspaqa amañayá suwakuchunchu”, nispa (Efe. 4:28). Diosta serviqkunaqa confianakunkum. Pipas confiasqanrayku hukpa imantapas hapikuruptinqa, huk sonqolla kasqankum sasachasqa kanman.

Diosta kuyaspam huñulla kanchik

16. ¿Imaynatam rimananchik congregacionpi aswan huñulla kanapaq?

¹⁶ Cristianokunaqa Diosta kuyaspam huñulla tarikunchik, chaymi yanapawanchik kuyanakuspa imatapas ruranapaq. Paypa sumaq sonqo kasqanmanta agradecekuspam, kallpanchakuna kayna niwasqanchikta kasukunapaq: ‘Allin kaqkunatayá rimaychik chaynapi uyariqnikichikkunapas allinninpaq kaptin aswan wiñanankupaq. [. . .] Sumaq sonqo kaspayá kuyanakuychik, Diospas Cristoraykum pampachasurqankichik, chaynayá qamkunapas pampachanakuychik’ (Efe. 4:29, 32). Diosqa yachanmi pantaq kasqanchikta, llakipayawaspanchikmi pampachawanchik. ¿Ñoqanchikpas manachu hukkunata pampachachwan?

17. ¿Imanasqam huñulla kanapaq yanapananchik?

¹⁷ Huñulla kasqanchikmi Diosta hatunchan. Espiritunmi yanapawanchik tukuy imapi huñulla kanapaq. Saqekunanchikmi yanapawananchikpaq, Pablom nirqa ‘chuya espirituta’ mana llakichinapaq (Efe. 4:30). Paka hinam huñulla kasqanchikqa, chaymi waqaychananchik. Kusichiwaspanchikpas Jehová Diostam hatunchan. Chaynaqa Diosmanyá ‘rikchakusun’ kuyasqan churinkuna hina chaynataq ‘kuyakuy’ ñanpi hinalla purisun (Efe. 5:1, 2).

[Willakuy]

¿Imatam nichwan?

• ¿Imayna kaymi yanapawanchik huñulla kananchikpaq?

• ¿Imayna kawsakuymi yanapan congregacion huñulla kananpaq?

• ¿Imayna rimaytaq yanapan huk sonqolla yanapanakunapaq?

[Kay yachachikuypa tapukuyninkuna]

[17 kaq paginapi dibujo]

Tukuy nacionniyoq runakunam huñulla tarikunku

[18 kaq paginapi dibujo]

Casarakuyta mana piensachkaspa otaq casado kachkaspa rimapayayqa manam allinchu