Jehová Diosqa Llapallan Kamachiqmi

“Llapallan Kamachiq Señor Jehová Diospim amparakuni ñoqallayqa.” (SAL. 73:28, NM.)

1. ¿Imamantam 1 Corintios 7:31 nisqanpi Pablo rimachkanman karqa?

‘KAY pachapi qawasqanchikkunaqa tukurunqam’ (1 Cor. 7:31). Yaqachusmi kayna nisqanwan Pabloqa kay pachapi qawasqanchikkunata tupachichkarqa imapipas actuaqkunawan, chaypim rikurin allin hinaspa mana allin runakuna, tukuruptinñataqmi hukña qallarin.

2, 3. a) ¿Ima rikchanachiymi yanapawanchik Diospa llapallan kamachiq iskayrayachisqa kasqanta entiendenapaq? b) ¿Ima tapukuykunamantam yachasun?

² Kunanpas yaqa chaynam pasakuchkan, Jehová Diospa llapallan kamachiq kasqanmi iskayrayachisqa kachkan hinaspam llapallanchik actuaq hina kachkanchik. Kayqa rikchakunmi huk nacionpi runakuna iskayman rakinasqa kaspa atipanakuqman. Hukninmi imapas allin kananpaq kallpanchakuq kikin gobierno, hukninñataqmi mana allin ruraq, engañaq hinaspa wañuchiq runakuna. Kay runakunaqa autoridadkunapaqqa manam allinchu, hinaspam llaqtapi runakunata iskayrayachin gobierno kasukusqankuta.

³ Yaqa chaynam pasan hanaq pachapiwan kay pachapipas. Kanmi huk gobierno, payqa ‘Llapallan Kamachiq Señor Jehová Diosmi’ (Sal. 71:5, NM). Kantaqmi lliw runakunata ñakarichiq mana allin runakuna, paykunatam Satanas kamachin (1 Juan 5:19). Paykunaqa manamá allinchu Diospa gobiernonpaqqa hinaspam runakunapa Dios kasukuyninkutapas iskayrayachin. ¿Imaynatam kay sasachakuy qallaykurqa? ¿Imanasqataq Diosqa saqen? ¿Imaynatam yanapakuchwan?

Imakuna iskayrayachisqa kasqanmanta

4. ¿Imakunam iskayrayachisqa kachkan?

⁴ Iskayrayachisqam kachkan Jehová Diospa llapallan kamachiq kasqan hinaspa runakunapa Diosman sonqo kayninkupas. Bibliam achka kutita nin Jehová Diosqa “Llapallan Kamachiq” kasqanta. Salmistam confiaspan nirqa: “Llapallan Kamachiq Señor Jehová Diospim amparakuni ñoqallayqa”, nispa (Sal. 73: 28, NM). Llapallan Kamachiq niq rimayqa, huk nacionpi aswan atiyniyoq autoridadmantam rimachkan. Chaymi chaynata sutichakun. Chayraykum astawanraq nichwan Alto-altopi kaq Diosta Llapallan Kamachiq kasqanta (Dan. 7:22).

5. ¿Imaraykum Jehová Diospa llapallan kamachiq kasqanta defiendenanchik?

 ⁵ Jehová Dios tukuyta unanchasqanraykum, kay Pachapiwan hanaq pachapi Llapallan Kamachiq (leey Apocalipsis 4:11). Chaymantapas Juezninchikmi, Decretokuna qowaqninchik hinaspa Reyninchik, chaymi paypi kachkan poder judicial, legislativo hinaspa ejecutivo nisqakuna, chayqa lliw gobiernopim kachkan (Isa. 33:22). Dios unanchawasqanchikrayku paytaqa qawananchik Llapallan Kamachiwaqninchikta hina, hinaspam chayna kasqanta defiendenanchik. Chaypaqmi yanapawasun Bibliapa kayna nisqanta yuyariyninchik: “Diosmi tiyananta hanaq pachapi churarun. Llapallanpi munaychakunanpaqmi chaypi churarun” (Sal. 103:19; Hech. 4:24).

6. ¿Ima ninantaq Diosman sonqo kayqa?

⁶ Diospa llapallan kamachiq kasqanta defiendeyta munaspaqa, payman sonqom kananchik. Ichaqa, ¿ima ninantaq chayqa? Job qawachisqanman hinaqa, Diosman sonqo kayqa chuya kawsakuymi, mana acusasqa kaymi hinaspa imapipas allin ruraymi (Job 1:1).

Llapallan kamachiq kasqantam iskayrayachin

7, 8. ¿Imaynatam Satanasqa Jehová Diospa llapallan kamachiq kasqanta iskayrayachirqa?

⁷ Yaqa 6.000 wata masninñam, Diospa contranpi huk angel hatarirurqa. Rimasqanwan rurasqanwanmi Diospa llapallan kamachiq kasqanta iskayrayachirqa. Chaytaqa rurarqa yupaychasqa kayta munaspanmi. Chaymi Adantawan Evata engañarurqa mana kasukunankupaq. Chaymantapas Dios llulla kasqanta piensachispanmi sutinta qachachayta munarqa (leey Genesis 3:1-5). Chaymi Diospa enemigon rikurirurqa. Tiempopa risqanman hinam sutichasqa karqa Satanas, Diablo, culebra hinaspa dragon sutikunawan, kaykunam qawachin contrapi kaq, kamiq, engañakuq hinaspa millpukuq kasqanta (Apo. 12:9).

⁸ Satanasmi hatunchakuspan Diospa contranpi churakurqa. ¿Imatam Jehová Diosqa ruranman karqa? ¿Chayllachu Satanasta hinaspa Adantawan Evata chinkarachinman karqa? Chinkarachinanpaqqa atiyniyoqmá karqa. Chayta ruraspanqa tukuy atiyniyoq kasqantachá qawachinman karqa. Chaymantapas mana llulla kasqantam qawachinman karqa mana kasukusqanmanta wañuchispanqa. Hinaptinqa, ¿imanasqataq mana wañuchirqachu?

9. ¿Imakunatam Satanasqa iskayrayachirqa?

⁹ Satanasqa llullakuykunawanmi Adantawan Evata Diosmanta karuncharurqa. Chaynatam kasukunanchikpaq Dioslla derechoyoq kasqanta iskayrayachirqa. Chaymantapas Adantawan Evata Diospa contranpi hatarirachispanmi, angelkunapatawan runakunapa Diosman sonqo kayninkuta iskayrayachirqa. Jobtapas chaymi pasarqa, Diablom nichkarqa Diosmanta karunchay atisqanta, ichaqa Jobqa Diosman sonqom karqa (Job 2:1-5).

10. ¿Imapaqmi Jehová Diosqa tiempota qorqa?

¹⁰ Chaylla wañurachispan llapallan kamachiq kasqanta Dios qawachinanmantaqa, Satanas llulla kasqanta qawachinanpaqmi tiempota qorqa. Saqerqataqmi runakuna Diosman sonqo kasqankuta qawachinankupaq. ¿Imam pasarqa tiempopa risqanman hina? Satanasmi rikurirachirqa tukuy mana allinkunata. Diosmi ichaqa paytawan qatiqninkunata chinkachispan qawachinqa Llapallan Kamachiq kasqanta. Jehová Diosqa vencenqapunim. Chaytam nirqa huchallikuy qallaykuptillan (Gen. 3:15).

11. ¿Imaynatam runakuna Dios llapallan kamachiq kasqanta defienderqaku?

¹¹ Achka runakunam Diosman sonqo kasqankuta qawachirqaku Diosta kasukuspanku hinaspa sutinta chuyanchaspanku. Paykunamantam kanku Abel, Enoc, Noey, Abraham, Sara, Moises, Rut, David, Jesus, punta cristianokuna hinaspa kay tiempopi Diosman sonqo millonnintin cristianokuna. Dios llapallan kamachiq kasqanta defiendespankum, Satanas llulla kasqanta qawachirqaku. Sutintapas  chuyancharqakum Diosman sonqo kaspanku, Satanasmi pi runatapas Diosmanta karuncharuy atisqanta nispan Diospa sutinta qachacharqa (Pro. 27:11).

Tukuy ima allichasqa kananqa segurom

12. ¿Imanasqam seguro kachwan mana allinkunata Dios puchukachinanmanta?

¹² Diosqa qawachinqañam Llapallan Kamachiq kasqanta. ¿Imanasqam seguro kachwan? Payqa manam wiñaypaqqa mana allinkunataqa saqenqachu. Tukuy ima pasakusqanpas qawachinmi tukupay tiempopi kasqanchikta. Payqa ñawpaqpipas mana allin runakunataqa chinkarachirqañam. Chaytam rurarqa Sinchi parawan, chinkachirqataqmi Sodoma Gomorra llaqtakunatawan faraontapas tropantinta. Wañuchirqataqmi Sisara runapa tropankunatawan Asiriapa reynin Senaquerib runapa tropankunatapas (Gen. 7:1, 23; 19:24, 25; Exo. 14:30, 31; Jue. 4:15, 16; 2 Rey. 19:35, 36). Hinaptinqa, Diosqa manamá wiñaypaqqa saqenqachu sutin qachachaqkunatawan Testigonkunata cheqniqkunataqa. Chaytaqa ruranqañam, sutillamá kachkan Cristopa kutimusqanqa chaynataq mana allinkunapa puchukayninpas (Mat. 24:3).

13. ¿Imatam rurananchik Diospa enemigonkunawan kuska mana wañunapaq?

¹³ Diospa enemigonkunawan kuska wañuyta mana munaspaqa, llapallan kamachiq kasqantam qawachinanchik. ¿Imaynatam chayta rurachwan? Satanaspa munaychakusqan runakunawan mana chaqrukuspa chaynataq mana atipachikuspa (Isa. 52:11; Juan 17:16; Hech. 5:29). Chayta ruraspallam Diospa llapallan kamachiq kasqanta defiendesun, hinaspam mana chinkachisqachu kasun sutinta chuyanchaptin hinaspa Paylla Llapallan Kamachiq kasqanta qawachiptinpas.

14. ¿Imakunamantam Bibliaqa willawanchik?

¹⁴ Enteron Bibliapim runakunamantawan Dioslla llapallan kamachiq kasqanmanta yachachin. Qallariypi 3 capitulokunam Diospa unanchasqanmantawan hucha rikurisqanmanta riman, tukuyninpi 3 capituloñataqmi riman tukuy imapas allichasqa kananmanta. Wakin capitulokunañataqmi willawanchik runakunapaq, kay Pachapaqwan hanaq pachapaq munasqan cumplinanpaq Diospa tukuy ima rurasqanta. Genesis libropim qawachin Satanas ima rurasqanmantawan hucha rikurisqanmanta, Apocalipsis libropiñataqmi rimachkan mana allinkunata Dios chinkachinanmanta, Diablota wañuchinanmanta hinaspa munaynin hanaq pachapi hina kay Pachapipas rurakunanmanta. Arí, Bibliaqa willawanchikmi huchawan wañuy imanasqa kasqanmanta hinaspa imayna chinkananmantapas, chaynapi enteron pacha paraiso kaptin Diosman sonqo runakuna wiñaypaq kusisqa kawsanankupaq.

15. ¿Imatam rurananchik bendicionkunata chaskiyta munaspaqa?

 ¹⁵ Tukurunqañam kay pachapi qawasqanchikkunaqa, chaynataq unay watakunaña Diospa llapallan kamachiq kasqan iskayrayachisqa kasqanpas. Satanaspas wiñaypaqmi chinkachisqa kanqa. ¡Diospa munayninqa rurakunqamá! Chay rurakunanta hinaspa Bibliapa willakusqan bendicionkuna chaskiyta munaspaqa, kunanmi defiendenanchik Diospa llapallan kamachiq kasqanta. Manamá iskayrayanachu. Diospa favorninpi kaspallam nichwan “Diosmi yanapawaqniyqa”, nispa (Sal. 118:6, 7).

Diosman sonqo kaytaqa atichwanmi

16. ¿Imanasqataq atichwan Diosman sonqo kayta?

¹⁶ Atichwanmi Diosman sonqo kayta hinaspa llapallan kamachiq kasqanta defiendeytapas, Pablom nirqa: “Tentasqa kasqaykichikqa manam maschu wakinkunapa tentasqa kasqanmantaqa. Ichaqa Diosmi confiakuna kasqanrayku mana munanqachu mana aguantay atinaykichikkama tentasqa kanaykichiktaqa. Tentacionkuna hamuptinqa Diosmi vencenaykichikpaq kaqta qosunkichik chaynapi aguantanaykichikpaq”, nispa (1 Cor. 10:13). ¿Maymantam chay tentacionkuna hamun, hinaspa imatam Dios qowanchik atipanapaq?

17-19. a) ¿Ima tentacionpim wichiykurqaku israelitakuna? b) ¿Imanasqam Diosman sonqo kayta atichwan?

¹⁷ Israelitakunata chunniqpi pasasqanman hinam, Pablopa rimasqan ‘tentacionkunaqa’ rikurin Diospa kamachisqanta mana kasukunapaq hina kaptin (leey 1 Corintios 10:6-10). Israelitakunaqa chay tentacionkunataqa atipanmankum karqa, ichaqa llumpaytam ‘mana allin’ kaqkunata munapayarurqaku. Kayqa pasarqam Dios milagrota ruraspan killantin aychata mikunankupaq yutu kaqlla animalkunata qoptin. Unayña aychata mana mikuspankupas allintam mikurqaku, achkam karqa maná nisqa mikuyninkuqa. Ichaqa llumpay munapayaymanmi wichiykurqaku chay animalkunata llumpayta huñurukuspanku (Num. 11:19, 20, 31-35).

¹⁸ Ñawpaqtaraqmi Sinai orqopi Kamachikuykunata Moises chaskinankama israelitakunaqa toro taytachata yupaycharqaku hinaspa huchapakunapaq kusirikuykunaman qokurqaku. Chaymanmi facilllata wichiykurqaku Moises mana chaypi kasqanrayku (Exo. 32:1, 6). Chaymantam, Prometesqa Allpaman yaykunankupaqña kachkaspanku waranqantin qarikuna Moab llaqtayoq warmikunawan huchapakururqaku hinaspam wañuchisqa karqaku (Num. 25:1, 9). Wakinpiñataqmi mana kasukuspanku quejakurqaku. Arí, huk kutipim Moisespa chaynataq Jehová Diospa contranpi rimarqaku (Num. 21:5). Rimapakuytapas qallaykurqakum mana kasukuq Corey, Datan, Abiram chaynataq qatiqninkuna yanqa wañuchisqa kasqankuta piensaspanku. Chaymi Diosqa 14.700 runakunata wañurachirqa (Num. 16:41, 49).

¹⁹ Chay tentacionkunaqa manam sasa atipaychu karqa. Ichaqa israelitakunam Diospi manaña iñisqankurayku chaypi wichiykurqaku, Diostam qonqarurqaku, kamachikuynintawan sumaq cuidasqantapas. Chaymantapas llapallan tentacionkuna pasasqankuqa lliw runakunatam pasarqa, ñoqanchiktapas pasawanchikmi. Jehová Diospa yanapakuyninwan atipanapaq kallpanchakuspaqa, atisunmi payman sonqo kayta. Chaymantaqa segurom kachwan, ‘Diosqa confiakunapaqmi’ payqa ‘manam munanqachu mana aguantay atinanchikkama tentasqa kananchiktaqa’. Manamá haykapipas qonqawasunchu; manataqmi saqewasunchu runakunapa mana aguantay atinan sasachakuypi kananchiktaqa (Sal. 94:14).

20, 21. ¿Imaynatam Dios yanapawanchik tentacionkunata ‘vencenapaq’?

²⁰ ¿Imatam Jehová Dios qowasun vencenapaq? Kallpatamá qowasun. Piensarisun qatikachasqa kasqanchikpi. Enemigonchikkunaqa yaqapaschá iñiyninchikta qepanchanapaq maqawasun. Chaymi iñiyninchikta qepancharuchwan  ñakarichiwananchikta otaq wañuchiwananchikta manchakuspa. Ichaqa Pablopa 1 Corintios 10:13 nisqanpi hinaqa tentacionkunaqa manam unaypaqchu kanqa. Diosqa manam saqenqachu payman sonqo kasqanchikta ima sasachakuypas chinkarachinantaqa. Payqa iñiyninchiktam kallpanchayta atinman, payman sonqo kananchikpaq.

²¹ Jehová Diosqa espiritunwanmi yanapawanchik. Chuya espiritunwantaqmi tentacionkunata atipanapaq Bibliapa yachachikuyninta yuyarichiwanchik (Juan 14:26). Chaynapim mana wichisunchu manaqq allinkunamanqa. Arí, yachanchikmi Diospa Llapallan Kamachiq kasqan hinaspa runakunapa Diosman sonqo kayninku iskayrayachisqa kasqanta. Chay yachasqankum Dios serviqkunata yanaparqa wañunankukama Diosman sonqo kanankupaq. ¿Imataq yanaparqa tentacionkunata ‘vencenankupaq’? Manam wañuspachu atiparqaku, aswanmi Jehová Diospa yanapakuyninwan. Payqa chay yanapakuytam lliwman qowanchik. Yanapawanchikmi angelninkunawan, “paykunaqa salvakunankupaq kaqkunata servinankupaqmi kachamusqa kachkanku” (Heb. 1:14). Qatiqnin yachachikuypim qawasunchik, Diospa llapallan kamachiq kasqanta wiñaypaq defiendeyqa sumaq ruray kasqanta. Chay ruraytam atisun payman sonqo kaspalla hinaspa Llapallan Kamachiq kasqanta reqsikuspa.

¿Imatam kutichichwan?

• ¿Imanasqataq reqsikunanchik Jehová Dios llapallan Kamachiq kasqanta?

• ¿Imataq Diosman sonqo kayqa?

• ¿Imanasqam ninchik Diosqa ñam llapallan kamachiq kasqanta Satanaspa iskayrayachisqanta allichanqa nispa?

• ¿Imaynatam 1 Corintios 10:13 qawachin Diosman sonqo kay atisqanchikta?

[Kay yachachikuypa tapukuyninkuna]

[24 kaq paginapi dibujo]

Satanasmi Adantawan Evata tanqarqa Diosta qepancharunankupaq

[26 kaq paginapi dibujo]

Manam iskayrayanachu Jehová Dios Llapallan Kamachiq kasqanta defiendenapaqqa