Diosta serviq familiakuna, listollayá kaychik

“Listollayá kaychik. Diosmanta Hamuq Runaqa kutiramusaq mana piensasqaykichik horam.” (LUC. 12:40.)

1, 2. ¿Imanasqam Jesuspa “listollayá kaychik” nisqanta kasukunanchik?

¿IMAYNARAQ familianchik kanqa ‘Diosmanta Hamuq Runa hamuptin’ hinaspa ‘runakunata rakiptin’? (Mat. 25:31, 32.) Jesuspa hamunanta mana yachasqanchikraykum, kasukunanchik kayna nisqanta: “Listollayá kaychik” (Luc. 12:40).

² Ñawpaq estudiopim yacharqanchik familiakuna iñiyninkupi rikchan-rikchanlla kanankupaqqa, sapakamaman Jehová Diospa kamachisqanta kasukunankumanta. Kunanñataqmi qawasun familiapa iñiynin allin kananpaq imatawan sapakama ruranamanta.

‘Ñawinchik allinllata qawachun’

3, 4. a) ¿Ima toqllamantam familiakunaqa cuidakunanku? b) ¿Ima ninantaq Bibliapa nisqan ‘allinlla qawaq’ ñawiqa?

³ Cristopa hamunanta familianchik listolla suyananta munaspaqa, manam imawanpas Dios servisqanchiktaqa harkachinanchikchu, aswanqa listollam kananchik. Kapuqniyoq kanapaq afanakuymi achka familiakunata toqllarun. Chayraykum ancha allinpuni ‘ñawiki allinllata qawachun’  Jesuspa nisqanta kasuyqa (leey Mateo 6:22, 23 *). Imaynam mecheropas mana urmananchikpaq achkiwanchik, chaynam sonqonchikman yaykuq kaqkunapas yanapawanchikman huchakunapi mana urmananchikpaq (Efe. 1:18, NM).

⁴ Ñawinchik sumaqta qawananpaqqa sanom kanan. Chaynam Bibliapa nisqan allinlla qawaq ñawipas Dios serviyllapi piensanan, manam tukuy ima kapuqniyoq maskaypichu nitaq familian tukuy imayoq kananpichu afanakun (Mat. 6:33). Huk rimaypiqa kapuqllanchikwanmi kusisqa kananchik, hinaspapas Dios serviyninchiktam puntapi churananchik (Heb. 13:5).

5. ¿Imaynatam Etiopía lawmanta sipas qawachirqa tukuy tiemponwan Diosta serviy munasqanta?

⁵ Churi-wawakunata Dios serviyllapi piensanankupaq yachachiyqa allinpipunim tukun. Qatiqninpi chayna kasqanmanta qawasun. Etiopía lawmanta sipasmanmi colegionta tukuruptin allin estudiaq kasqanrayku beca nisqata munachirqaku hinalla estudiananpaq. Paymi ichaqa mana chaskirqachu precursor kayta munasqanrayku. Mana unaymantañataqmi huk llamkayta munachirqaku sapa killa 4.000 masnin dolar qollqeta chaskinanpaq, nacionninpiqa wakillankum chaynataqa chaskinku. Ichaqa chaytapas manamá munarqachu. Chaynata tanteananpaqqa manamá tayta-mamanwanraqchu rimarqa. ¿Imatam tayta-mamanqa nirqaku chaymanta yacharuspanku? Paykunaqa anchatam kusikurqaku chayna rurasqanmanta.

6, 7. ¿Imanasqataq imapas llumpay munapayaymanta cuidakunanchik?

⁶ Mateo 6:22, 23 nisqanpiqa Jesusqa rimachkarqataqmi imapas llumpayta munapayaymanta cuidakunapaq, ¿imanasqa? ‘Mana allin’ niq palabraqa ‘envidiakuq’ ninantaqmi chayqa kanmantaqmi qollqella kuyaypas. ¿Ima nintaq Jehová Diosqa imatapas munapayaymantawan envidiakuymanta? Bibliam nin: “Amañayá rimayllapas rimariychikchu huchapakuymantaqa chaynataq manaña rimana huchakunamantapas nitaq qollqella kuyaymantapas”, nispa (Efe. 5:3).

⁷ Imapas llumpay munapayaytaqa sutillatamá runamasinchikpi qawanchik, ñoqanchikpiñataqmi ichaqa sasata. Chaymi allinpuni Jesuspa kayna nisqanta kasukuyqa: “Cuidakuychikyá qollqella kuyaruymanta [otaq imatapas llumpayta munapayaruymanta]”, nispa (Luc. 12:15). Chayta musyakunapaqqa imapi sonqonchik kasqantam qawananchik. Lliw familiakunam musyakunanku kusirikuykunapaq hinaspa imapas kapuqniyoq kanankupaq hayka tiempotawan qollqeta servichikusqankumanta.

8. ¿Imaynatam imapas llumpay munapayaymanta cuidakuchwan imatapas rantispa?

⁸ Imatapas rantispaqa manam rantiyllachu rantina. Aswanqa kaykunatam tapukuna: “¿Tiempoy kanqachu chay rantisqayta servichikunaypaq hinaspa cuidanaypaq? ¿Servichikuyta yachanaypaq tiempoyta qechuwanqachu?”, nispa. Mozo-sipaskunapas kaynatam tapukunanku: “¿Televisionpi otaq radiopi lloqsimuq willakuykunawan inturachikuspaychu sapa kuti tayta-mamayta hikutani imapas chaninniyoq kaqta rantipuwananpaq?”, nispa. Llapallanchikmi kaynata tapukunanchik: “Imatapas rantiruspay, ¿yaqachu familiayta yanapasaq Cristopa hamunan tiempopaq llapallanku listolla kanankupaq?”, nispa. Amayá haykapipas iskayrayasunchu Jehová Diospa kayna nisqanpiqa: “Manapunim dejasqaykichu nitaqmi saqesqaykichu” (Heb. 13:5).

 Dios serviypi kaqkunata haypanaykipaq tanteay

9. ¿Imaynatam familiakunata yanapan Diosta serviypi kaqkunata haypanankupaq tanteasqanku?

⁹ Chaymantapas, Diosta serviq familiakunaqa iñiyninkupim allin takyasqa kanmanku, Dios serviypi kaqkunata haypanankupaq tanteaspanku hinaspa chaypaq kallpanchakuspanku. Kaymi yanapasunki Dios serviyniki imayna kasqanta qawakunaykipaq chaynapi imakunapi astawan tiempochakunaykipaq (leey Filipenses 1:10).

10, 11. ¿Imakunata haypanankupaqmi familiayki tanteakurunku hinaspa mayqentataq chaymantaña haypanmanku?

¹⁰ Dios serviypi chaylla haypanapaq kaqkunapas familiapi lliw kaqkunatam allintapuni yanapanman. Hukninmi kanman sapa punchaw leenapaq qellqata familiantin leeyninchik. Chay qellqata estudiaspa rimasqankum, taytata yanapanman familian iñiyninkupi imayna kasqankumanta musyakunanpaq. Ancha allintaqmi familiawan Diospa Palabranta leeypas, kaymi yanapan wawakuna allinta leenankupaqwan entiendenankupaq (Sal. 1:1, 2). Chaymantapas allinmi kanman mañakuyninchik aswan allin kananpaq kallpanchakuyninchikqa. Kallpanchakuchwantaqmi chuya espiritupa rurunkunata qawachinapaq (Gal. 5:22, 23). Chaymantapas yachachwanmi predicasqanchik runakunapa imayna kasqanta entiendeyta. Chaynapim churi-wawanchikkunata yachachisun llakipayakuq kanankupaq hinaspa precursor otaq misionero kayta munanankupaqpas.

¹¹ ¿Imatawan haypanaykipaqmi qampas familiaykipas tanteakuwaqchik? ¿Yaqachu  astawan predicawaqchik? ¿Atiwaqchikchu manaña manchakuspa callepi, negociokunapi hinaspa telefonowan predicayta? ¿Riwaqchikchu predicaqkunapa mana ancha kasqan lawman? ¿Huk kaqnikichik atinmanchu huk rimay yachayta chaynapi huk rimayniyoq runakunata predicananpaq?

12. ¿Imatam taytaqa ruranman familianpa iñiynin aswan allin kananpaq?

¹² Allinmi kanman imakunapi familian aswan allin kanankupaq taytapa yuyaymanayninqa, hinaspam tanteanan sapakama chayta haypanankupaq imakuna ruranankumanta (Pro. 13:12). Arí, Dios serviyninchikpi kaqkunata haypanapaqqa anchatam kallpanchakuna. Chaypaqqa Dios serviypi rurayninchikkunapaqmi astawan tiempochakuna, televisionpi otaq huk ruraykunapi tiemponchikta usuchinamantaqa (Efe. 5:15, 16). Sapa kuti kallpanchakuspankuqa tanteasqankutam haypanqaku (Gal. 6:9). Chaynapim sutilla qawakunqa ‘ñawparisqaykichik’ (1 Tim. 4:15).

Ama qonqaychu Familiawan Diosta Yupaychanapaq Tutata

13. Qayna 2009 watamanta, ¿imaynañam huñunakuyninchik hinaspa ima tapukuykunatam rurakunanchik?

¹³ Qayna 2009 watapa 1 de enero killamanta huñunakuykuna iskay punchawllaña kasqanmi, achka familiakunata yanapachkan Cristopa kutimunanta listolla suyanankupaq. Ñawpaqpi sutichasqa Aslla Huñunakuspa Bibliamanta Estudiom huk punchawllapiña rurakun Diosmanta Yachachinapaq Escuelawan hinaspa Diosta Servinapaq Huñunakuywan kuska. Chaynapim familiakunaqa iñiyninkupi aswan allin kanankupaq semanapi huk punchawta rakinanku karqa Jehová Diosta yupaychanankupaq. Iskay wata masninña pasasqanraykum tapukuchwan: “¿Chay tiempota servichikuchkanichu Familiawan Diosta Yupaychana Tutapaq otaq sapallaypi Bibliata estudianaypaq? ¿Yanapawachkanchu iñiyniypi?”, nispa.

14. a) ¿Imapaqmi rurakun Familiawan Diosta Yupaychanapaq Tuta chaynataq sapallanchikpi estudiopas? b) ¿Imanasqam huk tutata rakinanchik estudianapaq?

¹⁴ Familiawan Diosta yupaychanapaq tutaqa otaq sapanchikpi Biblia estudiayqa, Diosman astawan asuykunapaqmi rurakun (Sant. 4:8). Sapa semana Bibliata allinta estudianapaq hinaspa Jehová Diosmantapas allinta yachanapaq tiempochakuptinchikqa, Dioswan amistadninchikmi astawan kallpanchakun. Dioswan amistadninchik kallpanchasqa kaptinqa tukuy sonqonchikwan, vidanchikwan, yuyayninchikwan hinaspa kallpanchikwanmi kuyasunchik (Mar. 12:30). Munasuntaqmi astawan kasukuyta hinaspa qatipakuytapas (Efe. 5:1). Qawasqanchikman hinaqa Familiawan Diosta Yupaychanapaq Tutata rurayqa ancha allinpunim, ‘llumpa-llumpay ñakariy punchaw’ chayaramuptin familianchik listolla kananpaq (Mat. 24:21). Chay rurayqa ancha allinpunim salvakunanchikpaq.

15. ¿Imaynatam Familiawan Diosta Yupaychanapaq Tuta familiakunata huñullata tarichin?

¹⁵ Sapa semana Familiawan Diosta Yupaychanapaq Tutapi Bibliapa yachachikuyninkunata familiapi kaqkuna kuska estudiasqankuqa, yanapantaqmi astawan kuyanakunankupaq hinaspa sapakama sientenakunankupaq. Chayna kasqanmi qawakun, casarasqa kaqkuna Bibliata kuska estudiaspanku astawan hukllawakusqankupi (leey Eclesiastes 4:12). Chaynallataqmi tayta-mamakunapas churi-wawankunawan Jehová Diosta kuska yupaychaptinkuqa kuyakuypim huk sonqolla kanku (Col. 3:14).

16. ¿Imaynatam kimsa cristianakunata yanaparqa sapa semana Bibliata estudianankupaq huñunakusqankuqa?

¹⁶ Qawasun imaynatam kayna estudiayqa  yanaparqa kimsa yuyaq viudakunata. Kay cristianakunaqa mana familia kaspankupas achka watañam sumaq amistad kanku. Hina llaqtallapi kawsasqankuraykum munarqaku imatapas kuska rurayta. Chaymi tantearurqaku semanapi huk tuta huñunakuspanku Bibliata estudianankupaq. Qallarirqakum “Testimonio cabal” del Reino de Dios nisqa librota estudiayta. Hukninmi nin: “Sumaqllaña kaptinmi mana huk horallachu estudianiku. Punta cristianokunapa ima pasasqankuta leespaykum qawachkaykumanpas hina piensaniku, hinaspam rimaniku imatam ruraymanku karqa chaynapi tarikuspayku. Chaymantañataq kallpanchakuniku yachasqaykuta predicacionpi rurayman churanaykupaq. Chaymi kunanqa predicasqaykuqa hinaspa yachachisqaykuqa aswan allin”, nispa. Manam iñiyninkullapichu yanaparqa, yanaparqataqmi aswan amistad kanankupaq. Llapallankum ninku: “Anchatam chaninchaniku estudianaykupaq chay huñunakusqaykutaqa”, nispa.

17. ¿Imakunam yanapawasun Familiawan Diosta Yupaychanapaq Tuta sumaqllaña kananpaq?

¹⁷ ¿Imaynatam ñoqanchikta familiawan Diosta yupaychanapaq tutaqa otaq sapallanchikpi estudiaypas yanapawarqanchik? Yuyarispalla ruraspanchikqa manachá yanapachisqaqa kasunchu. Manataqmi yanqa kaqkunawanqa harkachikunanchikchu. Chaymantapas familiapi lliw kaqkunam tanteasqanku horapaq kananku. Akllananchiktaqmi familiata yanapaq yachachikuyta. ¿Imatam rurananchik estudiasqanchik sumaq kananpaq? Chaypaqqa allin yachachiqmi kana hinaspa kusikunapaq chaynataq respetanapaq hinam rurananchik (Sant. 3:18). *

“Rikchaspayá cuidakusunchik” hinaspa ‘listollayá kasun’

18, 19. ¿Imaynatam qamtawan familiaykita yanapasunayki, Diosmanta Hamuq Runapa chayamuynin hichpallapiña kasqanta yachasqayki?

¹⁸ Mana allinllaña tiempopi kasqanchikmi qawachin, 1914 watamantapacha Satanaspa munaychakusqan tukupayninpiña kasqanta. Tukuymi qawachin Diospa piñakuynin punchaw hichpallapiña kasqanta. Ñam Diosmanta Hamuq Runaqa chayamunqaña Diospa contranpi kaqkunata chinkachinanpaq (Sal. 37:10; Pro. 2:21, 22). Kaykunamanta yachasqanchikmi ñoqanchiktawan familianchikta yanapawananchik listolla kananchikpaq.

¹⁹ ¿Kasukuchkankichu ‘ñawiki allinllata qawachun’ nispa señorninchik Jesuspa nisqanta? Reqsisqa hinaspa apu kanankupaq kallpanchakuq runakunamantaqa, ¿kallpanchakuchkankichu familiaykiwan Dios serviypi ñawparinaykipaq? ¿Imaynam kachkan Familiawan Diosta Yupaychanapaq Tuta rurasqayki otaq sapallaykipi estudiasqayki? ¿Haypachkankichu tanteasqaykikunata? Ñawpaq estudiopi nisqanman hina, ¿yanapachkankichu familiaykita rikchan-rikchanlla kanankupaq qanman Diospa kamachisusqaykita kasukuspayki? (1 Tes. 5:6.) Kay tapukuykunata arí niptikiqa, familiaykim listolla kanqa Jesuspa chayamunan punchawpaq.

[Willakuykuna]

¿Yuyachkankichu?

• ¿Imaynatam familiakunata listolla kanankupaq kaykuna yanapanman?

‘Ñawinchik allinllata qawaynin’.

Dios serviypi kaqkunata haypanapaq tanteayninchik.

Familiawan Diosta Yupaychanapaq Tutata rurayninchik.

[Kay yachachikuypa tapukuyninkuna]

[13 kaq paginapi dibujo]

Allinllata qawaq ñawiqa yanapawasunmi imawanpas mana aysachikunapaq