Natanqa cheqap yupaychaytam chanincharqa

Sasam kamachikuq runata pantasqanmanta kutirikunanpaq qayllanpi niyqa. ¿Yaqachu qampas chayta rurawaq pipas huk runata wañurachisqanmanta yachaspayki?

Rey Davidqa Betsabey warmiwanmi huchapakururqa hinaspam wiksayarachirqa. Huchanta pakananpaqmi kamachirqa Betsabeypa qosan wañuchisqa kananpaq hinaspam paywan casarakururqa. Achka killakunam rey hina rurayninkunata hinalla rurarqa, mana imapas pasanmanchu hina. Jehová Diosmi ichaqa mana saqerqachu huchan hinalla pakasqa kanantaqa, hinaspam willakuq Natanta kamachirqa huchallikusqanmanta willananpaq.

Sichu qam Natan kawaq, entiendewaqmi chay ruray sasa kasqanmanta. Ichaqa Diosman sonqo kasqanmi hinaspa tukuypi kasukusqanmi kallpancharqa Davidpa huchankunata qawachinanpaq. ¿Imaynatam chayta rurarqa chaynapi wanakunanpaq?

ALLIN TANTEOWAN YACHACHIQ

¿Atiwaqchu 2 Samuel 12:1-25 nisqanta leeyta? Hinaptinqa piensariy qam Natan kasqaykita, hinaspañataq Davidman kay willakuyta niwaq: “Huk llaqtapis iskay runakuna kasqa, hukninsi kasqa apu, hukninñataq wakcha. Apupas kasqa achkallaña ovejankunawan vacankuna. Aswanqa chay wakchapas kasqa rantisqan chulla ovejachallan, chay ovejachantas kikinpuni uywakusqa. Chay ovejachas wiñasqa paywan chaynataq churinkunawan kuska, kikinpa mikunanmantas chay  ovejachaqa mikuqpas. Tomanan vasomanta tomaspansi puñuqpas oqllayninpi. Chay ovejachaqa warmi churin hinas kasqa. Huk punchaw apu runapa wasinman huk viajero chayaruptinsi apuqa ovejankunamantapas nitaq vacankunamantapas nakayta mana munasqachu samapakuqman mikuchinanpaq, chay wakcha runapa ovejachantaraq qechuramuspansi samapakuqninpaq mikuyta rurachisqa”, nispa (2 Sam. 12:1-4).

Yaqachusmi Davidqa ovejakuna michiq kasqanrayku, piensarqa chay willasqan cheqap kasqanmanta. Bibliamanta yachaq runapa nisqanman hinaqa, “ichapas Natanqa Davidman sapa kuti riq wakchakunata defiendenanpaq, chaychá Davidqa piensarqa chay willasqan huk kaqnin kasqanta”. Chayna kaptinpas, Natanqa Diosman sonqo kasqantawan qarinchakusqantam qawachirqa. Natanpa willasqanta uyarispanmi Davidqa piñasqallaña nirqa: “Juranim kawsaq Tayta Diosrayku, chayna ruraq runaqa wañunanpunim”, nispa. Chaymi Natanñataq nirqa: “Qanmi kanki chay runaqa”, nispa (2 Sam. 12:5-7).

Piensariy chay sasachakuyta Natan imanasqa chaynata allichasqanmanta. Sasaniraqmi pipas amistadninta imapi pantarusqanmanta allinta qawachiyqa. Chaymantapas runakunaqa manamá chayllaqa reqsikunchikchu pantasqanchikta pipas niwaptinchikqa. Natanmi ichaqa chayna willakusqanwan Davidta kallpancharqa huchanta reqsikunanpaq. Rey Davidqa sutillatam qawarqa chay apu runapa rurasqan mana allin kasqanta. Chay apu runa wañunanta David niptinmi, Natanqa nirqa kikin David chay runa kasqanmanta. Hinaptinmi payqa hatun hucha rurarusqanmanta musyakururqa, chaymi yanaparqa consejasqanta chaskikunanpaq. Mana allin rurasqanwan Jehová Diosta qepancharusqanmanta reqsikuspanmi, Diospa castigasqanta chaskikurqa (2 Sam. 12:9-14; Sal. 51, hanayninpi kaqta).

¿Imatam kay willakuy yachachiwanchik? Bibliamanta yachachiqkunaqa saqenankum kikin estudiaqkuna cuentata qokunankupaq. Natanqa respetarqam Davidta, chaymi allinllata rimapayarqa. Yacharqataqmi David sonqonpi allin ruray kuyasqanmanta, chaymi rikchanachisqanqa sonqonman chayarurqa. Ñoqanchikpas, allin sonqoyoq runakunapa allin ruray kuyasqankutam servichikuchwan Diospa nisqankunamanta entiendenankupaq. Ichaqa manam hatun tukuspachu rurananchik. Imapas allin otaq mana allin kasqanmanta piensasqallanchikman hina rimanamantaqa Bibliatam qawanchik.

Natanpa Diosman sonqo kasqanmi imamantapas puntataqa yanaparqa kamachikuq Davidta qaqchananpaq (2 Sam. 12:1). Ñoqanchiktapas Diosman sonqo kasqanchikmi yanapawasun qarinchakuspa Bibliapa nisqanta defiendenapaq.

CHEQAP YUPAYCHAYTAM CHANINCHARQA

Natanwan Davidqa yaqachusmi allin amistad karqaku, chaychá Davidqa huk kaqnin churinta Natan nispa suticharqa (1 Cro. 3:1, 5). Natanmanta Biblia willakuspanqa, Davidwan kuska kasqankumantam willakun. Iskayninkum Jehová Diosta kuyarqaku. Chaychá Davidqa Natanpi confiarqa, hinaspam willarqa Jehová Diospaq templota rurapuy munasqanmanta. Nirqam: “Qawasqaykipi hinam ñoqaqa cedromanta palaciopi yachachkani, Diospa baulninñataqmi kachkan karpallapi, nispa. Chaymi Natanñataq reyta nirqa: Rurayá tukuy piensasqaykiman hina. Tayta Diosmi qanwan kachkan”, nispa (2 Sam. 7:2, 3).

Natanqa Diosman sonqom karqa, chaymi templota Diospaq rurapuyta David munaptin kusikuywan yanaparqa. Ichaqa, yaqachusmi chay kutipiqa imayna piensasqanmanta rimarqa, Diospa piensasqanta ninanmantaqa. Chay tutam Diosqa kamachirqa Davidman huk willakuyta apananpaq: Davidqa manam templotaqa hatarichinanchu karqa, aswanmi huk kaqnin churinña. Diosqa Natantam kamachirqataq Davidwan contrato rurananmanta willananpaq, chaynapi gobiernon ‘wiñaypaq takyachisqa’ kananpaq (2 Sam. 7:4-16).

Qawasqanchikman hinam, templo hatarichiymanta Natanpa nisqanqa mana tuparqachu Diospa munayninwanqa. Chayna kaptinpas, Diosmanta willakuq Natanqa Diospa munaynin rurakunanpaqmi humildadwan yanapakurqa. Sichu Dios haykapipas anyawaptinchikqa, allinmi kanman Natanta qatipakuyninchikqa. Willakuq kasqanta  mana saqesqanqa, qawachinmi Diospa favorninta hinalla chaskisqanmanta. Yaqachusmi Jehová Diosqa Gad runatawan kuskata yanaparqa, 4.000 runakunata templopi tocanankupaq David allinta kamachinanpaq (1 Cro. 23:1-5; 2 Cro. 29:25).

KAMACHIKUQTAM YANAPARQA

Natanqa yacharqam qatiqnin kamachikuq Salomon kananmanta. Chaymi David wañukunanpaqña kachkaptin churin Adonias rey kasqanmanta qechuyta munaptin, Natanqa harkakurqa. Ichaqa ñawpaqpi hinam chaytaqa yachaywan rurarqa. Puntataqa, Betsabeytam nirqa churin Salomon rey kananpaq Davidpa jurasqanta yuyarichinanpaq. Chaymantapas kikinmi Davidta tapurqa sichus Adonias kamachikuq kananpaq nisqanmanta. Davidqa llumpay sasachakuypi kasqanta musyakuspanmi, Natantawan wakin serviqninkunata kamachirqa Salomonman aceiteta tallinankupaq chaynapi rey kananpaq, hinaptinmi Adoniasqa yanqachakururqa (1 Rey. 1:5-53).

HUMILDEM KARQA QELLQASQANPI

Yaqachusmi punta kaq Samuelpa 25-31 capitulokunata hinaspa iskay kaq Samuelta Natanwan Gad qellqarqaku. Diospa yanapakuyninwan chay qellqasqa librokunamantam, Biblia nin: “Rey Davidpa rurasqankunaqa qallariyninmanta tukuyninkamam qellqasqa kachkan Diosmanta willakuq Samuelwan sutichasqa libropi, qellqasqataqmi kachkan Diosmanta willakuq Natanpa qellqasqan libropipas chaynataq Diosmanta willakuq Gadpa qellqasqan libropipas”, nispa (1 Cro. 29:29). Chaymantapas yaqachusmi Natanqa qellqarqa ‘Salomonpa wakin rurasqankunamantapas’ (2 Cro. 9:29). Chaymi qawachin, David wañukuptin palaciopi hinalla llamkasqanta.

Natanmanta yaqa lliw yachasqanchikkunataqa kikinchusmi qellqarqa. Ichaqa paymanta mana lliwta qellqasqanmantapas achkatam yachachwan. Payqa manam hatuntukuq kaytawan ancha reqsisqa kaytaqa munarqachu. Bibliamanta huk qellqapa nisqanman hinaqa, manam yachakunchu maymanta otaq pikuna tayta-maman kasqantaqa. Manataqmi yachanchikchu kikinpa vidanmantapas.

DIOSMAN SONQO KASQANMI KALLPANCHARQA

Natanmanta Biblia pisillata willakuptinpas sutillatam qawachin humilde kasqanmanta, hinaspapas qarinchakuspanmi Diospa kamachikuyninta defienderqa, Jehová Diosñataqmi achka llamkayta qorqa. Allinmi kanman Natanpa Diosman sonqo kasqanpi, chaynataq kamachikuyninkuna chaninchasqanpi yuyaymanaspa qatipakunapaq kallpanchakuyqa.

Manam ñoqanchikqa atichwanchu reypa huchapakusqanmanta qaqchaytaqa nitaq rantinpi pipas kamachiyta munaptin harkakuytapas. Ichaqa atichwanmi Diospa yanapakuyninwan Diosman sonqo kaytaqa hinaspa kamachikuyninkuna kasukuytapas. Chaymantapas atichwanmi qarinchakuspa yachaywan cheqapmanta willakuyta hinaspa chaninchaytapas.

[25 kaq paginapi dibujo]

Natanqa kamachikuqtam yanaparqa, Betsabeyta yachaywan rimaspan