Jesusqa munanmi Taytanpa imayna kasqanta reqsichiyta

‘Manam Taytaytaqa pipas reqsinchu aswanqa ñoqa Churillanmi, Churipa reqsichisqallantaqmi reqsin Taytataqa’ (LUC. 10:22).

¿IMATAM NIWAQ?

¿Imanasqam Jesusqa allintapuni qawachirqa Jehová Diospa imayna kasqanta?

¿Imaynatam Jesusqa qawachirqa Taytan imayna kasqanta?

¿Imakunata ruraspam Jesus hina Diospa imayna kasqanta qawachichwan?

1, 2. ¿Ima tapukuytam achka runakuna kutichiyta mana atinkuchu hinaspa imanasqa?

¿PITAQ Diosqa? Kay tapukuytam achka runakuna mana kutichiyta atinkuchu. Piensasun, yaqa lliw cristiano tukuq runakunam Diospi creespankupas, hukllapi kimsa dioskuna kasqanta piensanku, wakinkuñataqmi chay yachachikuy mana entiendey atina kasqanta ninku. Huk religioso runam qellqanpi nirqa: “Chay yachachikuytaqa manam entiendeyta atichwanchu”, nispa. Runakuna monomanta rikurimusqanpi yaqa llapallan creeqkunapas, piensankum Dios mana kasqanta. Ninkum tukuy imakunapas kikillanmanta rikurimusqanta. Ichaqa chay yachachikuymanta rimaq Charles Darwin runaqa manam nirqachu Dios mana kasqanmantaqa, aswanmi nirqa Diosmanta runakuna mana entiendey atisqankuta.

² Chayna kaptinpas, yaqa llapallan runakunam tapukunku sichu Dios kasqanmanta. Ichaqa achkallaña runakunam chay tapukuyninkupa kutichiyninta mana tarispanku, manaña maskankuchu. Arí, Satanasmi paykunapa yuyayninkuta tutayarachin (2 Cor. 4:4). Manamá admirakunapaqchu yaqa llapallan runakuna pantaypi kasqankuqa hinaspa Unanchawaqninchik Taytanchikmanta mana yachasqankupas (Isa. 45:18).

3. a) ¿Pitaq Unanchawaqninchikta reqsichiwarqanchik? b) ¿Ima tapukuykunamantam yachasunchik?

³ Chayna kaptinpas, ancha allinpunim Diosmanta runakuna yachayninkuqa. ¿Imanasqa? ‘[Jehová] nispa mañakuqllatam payqa salvaykunqa’ (Rom. 10:13). Chaynata mañakunapaqqa Jehová Diospa imayna kasqanmantam yachananchik. Chaytam Jesucristopas qatiqninkunaman yachachirqa Taytanpa imayna  kasqanta qawachispan (leey Lucas 10:22). ¿Imanasqam Jesusqa pimantapas aswan allinta yachachirqa? ¿Imaynatam chayta rurarqa? Hinaspa, ¿imaynatam Jesusta qatipakuchwan runakunaman Jehová Dios imayna kasqanmanta yachachispa? Qawasunchik kay tapukuykunapa kutichiyninkunata.

JESUCRISTOM PIMANTAPAS ASWAN ALLINTA YACHACHIRQA

4, 5. ¿Imanasqam Jesusqa pimantapas aswan allinta Taytanmanta yachachinman karqa?

⁴ Jesusmi pimantapas aswan allinta Taytanmantaqa yachachinman karqa. ¿Imanasqa? Paymi tukuy imamantapas puntata unanchasqa karqa, manaraq kay Pachapi kawsachkaspanmi hanaq pachapi ‘Diospa sapallan Churin’ karqa (Juan 1:14; 3:18). ¡Mayna sumaqchá chayqa karqa! Manaraq imapas unanchasqa kachkaptinmi, payqa Taytanpa kuyasqan karqa hinaspa Taytanpa imayna kasqanmantawan ima rurasqanmantapas yachachkarqa. Arí, Taytawan Churiqa kuskam wara-waranqantin watakuna yacharqaku hinaspam anchata kuyanakurqakupas (Juan 5:20; 14:31). ¡Chayraykuchá Jesusqa Taytanpa imayna kasqanta allintapuni reqsirqa! (Leey Colosenses 1:15-17.)

⁵ Jehová Diosqa Churintam kamachirqa paypa rantinpi willakunanpaq, chaymi “Diospa Simin” nispa sutichakun (Apo. 19:13). Hinaptinqa, Jesusllam pimantapas aswan allinta Taytanpa imayna kasqanmantaqa reqsichinman otaq yachachinman karqa. Allintapunim Juanpas qellqasqan libropi Jesusmanta otaq ‘Simimanta’ rimaspan nirqa ‘Dioswan kuska yachasqanmanta’ (Juan 1:1, 18). Griego rimaypiqa manam kuska yachasqallankumantachu Juanqa rimachkarqa. Kayqa tupanmi tiemponpi runakuna mikuspanku rimanankupaq imayna tiyasqankuwan. Mikunanpaq hamuq runaqa parlanankupaqmi kuskalla tiyaqku. Chaynallataqmi Jesuspas Taytanwan kuskalla kaspanku allintapuni parlaqku.

6, 7. ¿Imanasqam Churiqa Taytanwan aswan amistad karqaku?

⁶ Aswan amistad kaptinkum, Taytaqa Churinwan ‘sapa punchaw kusikurqa’ (leey Proverbios 8:22, 23, 30, 31). Arí, Churiqa Taytanwan llamkasqanraykum hinaspa Taytanpa imayna kasqanta qatipakusqanraykum aswan amistad karqaku. Jehová Diospa imayna unanchasqanta qawaspanmi, Jesusqa astawan Diospa imayna kasqanta chanincharqa.

⁷ Diospa llapallan kamachiq kasqanta Satanas iskayrayachiptinmi, Jesusqa chay sasachakuypi Taytanpa kuyakuyninta, allin rurayninta, yachayninta hinaspa atiyninta qawarqa. Kaykunachá yanaparqa kay Pachaman hamuptin sasachakuykunata atipananpaq (Juan 5:19).

8. ¿Imanasqam Jesusmanta Bibliapa willakusqanqa yanapawanchik Diospa sumaq kayninkunamanta allinta entiendenapaq?

⁸ Allin amistad kasqankuraykum, Jesusqa pimantapas aswan allinta Taytanmanta yachachirqa. Chaynaqa Jehová Diosta reqsinapaqqa, Churinpa ima nisqanmantawan ima rurasqanmantam yachananchik. Piensasun: kuyakuy nisqa palabrapa ima niy munasqanmanta allintapuni entiendeyqa, sasamá kanman diccionariollapi qawaptinchikqa. Ichaqa Bibliapa willakusqanman hina Jesuspa predicasqanpi hinaspa runakunata imayna yanapasqanpi yuyaymanaspaqa, aswan allintam entiendenchik “Diosqariki kuyakuqllañam” nisqanta (1 Juan 4:8, 16). Chaynataqmi aswan allinta entiendesun Diospa wakin sumaq kayninkunatapas, chaytam Jesusqa qatiqninkunaman qawachirqa.

 JESUSQA QAWACHIRQAM TAYTAN IMAYNA KASQANTA

9. a) ¿Imaynatam Jesusqa qatiqninkunaman Taytanpa imayna kasqanta qawachirqa? b) Willamuy yachachikuyninkunawan Taytanta Jesus imayna qawachisqanmanta.

⁹ ¿Imaynatam Jesusqa punta qatiqninkunaman hinaspa ñoqanchikmanpas Taytanpa sumaq kayninkunata qawachirqa? Qawachirqam yachachikuyninkunawan hinaspa rurayninkunawanpas. Yachachisqanpiqa qawanchikmi Jehová Diospa imayna piensasqantawan munayninta allinta entiendesqanta. Huk kutipim Jesusqa Taytanta kuyakuq michiqwan tupachirqa. Michiqmi chinkasqa ovejachanta maskaspan tarirurqa, hinaspam “isqon chunka isqonniyoq mana chullaruq ovejakunamantapas mastaqa kusikun tarisqan kaqmanta”. Kaywanqa, ¿ima niytam munachkarqa? Kikin Jesusmi nirqa: “Hanaq pachapi kaq Taytaykichikpas manam munanchu hukllanpas kay uchuychakuna chinkananta”, nispa (Mat. 18:12-14). ¿Imatam yachachiwanchik? Mana valeqpaq hina hapikuptinchik hinaspa qonqasqa hina tarikuptinchikpas, hanaq pachapi kaq Taytanchikqa manam qonqawanchikchu. Jesuspa nisqanman hinam ñoqanchikpas chay “uchuychakuna” kanchik.

10. ¿Imaynatam Jesusqa rurasqanwan qawachirqa Taytanpa imayna kasqanta?

¹⁰ Chaymantapas, qatiqninkunamanmi Jesusqa Taytanpa imayna kasqanta qawachirqa rurayninkunawan. Chaymi Jesusta apostol Felipe Taytanta qawachinanpaq niptin, payqa nirqa: “Ñoqata rikuqniyqa Taytatapas rikuykunñam”, nispa (Juan 14:8, 9). Qawasun imakunapim Diospa imayna kasqanta Jesucristo qawachisqanmanta. “Leprawan onqoq runa” sanoyachinanpaq niptinmi, Jesusqa llapchaykuspan nirqa: “Arí, munanim, allinyayña”, nispa. Lepra onqoyniyoq runaqa sutillatamá qawarqa Jesuspa chayna rurasqanpi Jehová Dios yanapasqanta (Luc. 5:12, 13). Chaymantapas, Lazaro wañukuptin sonqonpi sinchita llakikuspan Jesus waqaptinmi, qatiqninkunaqa qawarqaku Diospa llakipayakuyninta. Kawsarichinanta yachaspanpas, Jesusqa sinchitamá llakikurqa Lazaropa ayllunkuna hinaspa amistadninkuna waqasqankurayku (Juan 11:32-35, 40-43). Llapanchiktam Jesusmanta Bibliapi huk kaqnin willakuynin gustawanchik, kaykunam yanapawanchik llakipayakuq Diospa imayna kasqanta qawanapaq.

11. a) ¿Imatam Taytanmanta Jesusqa qawachirqa templomanta rantikuqkunata qarqospan? b) ¿Imanasqataq chay willakuyqa kallpanchawanchik?

¹¹ Chaymantapas, huk kutipim Jesucristoqa waskamanta latigota rurakuykuspan templomanta bueyeskuna hinaspa ovejakuna rantikuqkunata qarqorurqa, qollqe cambiaq runakunapa qollqentapas tallirurqam chaynataq mesankutapas wikaparurqam (Juan 2:13-17). ¿Imatam kaymanta yachachwan? Chay rurasqanmi Jesuspa qatiqninkunata yuyarichirqa Davidpa kayna willakusqanta: “Sinchitam sientini  qampa wasikimantaqa”, nispa (Sal. 69:9). Mana iskayrayaspan qarqosqanwanmi, Jesusqa qawachirqa cheqap yupaychayta chaninchasqanta. ¿Kaypipas qawanchikchu Taytanpa imayna kasqanta Jesus qawachisqanta? Kay willakuyqa yuyarichiwanchikmi kay Pachapi mana allinkunata chinkachinanpaq Dios atiyniyoq kaspanpas, chay rurayta anchatapuni munasqanmanta. Jesuspa chayna rurasqanmi qawachin kay Pachapi mana allinkunata Jehová Dios imayna qawasqanta. ¡Mayna kusikunapaqmi mana allinkunata rurawaptinchik chayta yuyariyninchikqa!

12, 13. Qatiqninkunawan Jesus imayna kasqan, ¿imatam Jehová Diosmanta yachachiwanchik?

¹² Yachachwantaqmi qatiqninkunawan Jesus imayna kasqanmantapas. Qatiqninkunaqa sapa kutim atipanakurqaku mayqanninku aswan reqsisqa kasqankumanta (Mar. 9:33-35; 10:43; Luc. 9:46). Una-unay watakuna Taytanwan kasqanraykum, Jesusqa yacharqa hatun tukuq kayta Taytan mana allinta qawasqanta (2 Sam. 22:28; Sal. 138:6). Kikintaqmi qawarqa Satanas chayna kasqanta, Satanasqa yarqasqa hinamá kamachikuq kayta munarqa. Chaychá Jesusqa wakin qatiqninkuna hinaspa wakin apostolninkuna chayna kasqankumanta llakikurqa, paykunataqa achka kutipim yachachirqa. Apostolninkunaqa Jesuspa wañukunan punchawpipas chayna hatunchakuy otaq reqsisqa kay munasqankutam qawachirqaku (Luc. 22:24-27). Chaywanpas Jesusqa mana chayna kanankupaqmi hinalla kuyakuywan yachachirqa, yacharqam tiempopa risqanman hina pay hina humilde kanankumanta (Fili. 2:5-8).

¹³ Qatiqninkunawan Jesus pacienciakusqanpi, ¿qawanchikchu Dios imayna kasqanta? ¿Qawanchikchu Jesuspa rimasqanpiwan rurasqanpi sapa kuti pantaptinchikpas Jehová Dios mana haykapipas saqewananchikmanta? Diospa imayna kasqanpi yuyaymanaspaqa, ¿manachu kallpanchasqa tarikunchik imapas huchanchikmanta willakunapaq?

JESUSQA MUNARQAM TAYTANPA IMAYNA KASQANTA REQSICHIYTA

14. ¿Imaynatam Jesusqa qawachirqa Taytanta reqsichiy munasqanta?

¹⁴ Achka kamachikuqkunam, kamachisqan runankuna makillankupi kanankupaq, mana imatapas yachachinkuchu. Jesusmi ichaqa Taytanmanta yachasqankunata mana iskayrayaspan reqsichiyta munarqa (leey Mateo 11:27). Chaymantapas huk kaqnin qatiqninmi Jesusmanta nirqa: “Paymi entiendechiwarqanchik cheqap Diosta reqsinanchikpaq”, nispa (1 Juan 5:20). Arí, Jesusmi paykunata yanaparqa Taytanmanta yachachisqanta allinta entiendenankupaq. Manamá Jehová Diosmantaqa sasa entiendenapaq yachachikuykunawanqa rimarqachu, kunan tiempopi kimsa dioskuna hukllapi kasqanmanta yachachiqkuna hinaqa.

15. ¿Imanasqam Jesusqa Taytanmanta lliw yachasqantaqa mana reqsichirqachu?

¹⁵ ¿Jesusqa Taytanmanta lliw yachasqantachu reqsichirqa? Manamá, payqa achkamantam mana yachachirqachu (leey Juan 16:12). ¿Imanasqa? Kikinmi qatiqninkunata nirqa: “Manaraqmi entiendewaqchikchu”, nispa. Chaywanpas, willarqam aswan yachachisqa kanankupaq ‘kallpanchaqninkuta’ otaq chuya espirituta kachamunanmanta, chaynapi ‘cheqap kaqkunamanta’ entiendenankupaq (Juan 16:7, 13). Imaynam tayta-mamakunapas warmachankuman tukuy imakunata mana willankuchu hatunyanankukama, chaynam Jesucristopas qatiqninkunaman mana lliwtachu Taytanmantaqa willarqa, iñiyninkupi allin takyasqa hinaspa entiendenankupaq hina kanankukama. Chayna rurasqanwanmi kuyakuyninta qawachirqa.

 JESUS HINA RUNAKUNATA YANAPASUN DIOSTA REQSINANKUPAQ

16, 17. ¿Imanasqam ancha favorecesqa kanchik Diosmanta willakunapaq?

¹⁶ Imayna kasqanpi allin runamasinchikta reqsiruspaqa hinaspa chaninchaspaqa, munanchikmi paymanta willakuyta. Chaytam Jesuspas rurarqa Taytanmanta kay Pachapi willakuspan (Juan 17:25, 26). ¿Ñoqanchikpas atichwanchu Jehová Diospa imayna kasqanmanta runamasinchikman qawachiyta?

¹⁷ Qawasqanchikman hinaqa Jesusmi Taytantaqa pimantapas astawan reqsirqa hinaspam paymanta yachasqankunata willakuyta munarqa. Arí, Jesusqa qatiqninkunamanmi yachayta qorqa, Diosmanta sasa kaqkunata entiendenankupaq. Jesucristo yachachiwasqanchikraykum, ñoqanchikqa huk runakunamantaqa Diosta astawan kuyanchik. Anchatataqmi agradecekunchik yachachisqanwan hinaspa rurasqanwanpas Taytanpa imayna kasqanta qawachiwasqanchikmanta. Chaymi nichwan Unanchaqninchikta reqsisqanchikmanta (Jer. 9:24; 1 Cor. 1:31). Jehová Diosman asuykunapaq kallpanchakusqanchikraykum, paypas asuykamuwarqanchik (Sant. 4:8). Chaymi huk runakunamantaqa ñoqanchik ancha favorecesqa kachkanchik paymanta willakunapaq. ¿Imaynatam chayta rurachwan?

18, 19. ¿Imakunata ruraspam Dios imayna kasqanta qawachichwan?

¹⁸ Jesus hinam ñoqanchikpas rimasqanchikwan hinaspa rurasqanchikwan Jehová Dios imayna kasqanta qawachichwan. Achka runakunam mana yachankuchu Jehová Dios imayna kasqantaqa. Wakinpiqa pantay yachachikuykunam mana yanapanchu Jehová Diosmanta allinta yachanankupaq. Ñoqanchikmi ichaqa atichwan sutinmanta, ima munasqanmantawan Bibliapa nisqanman hina imayna kasqanmantapas yachachiyta. Bibliata leespaqa, allintaqmi kanman Diospa imayna kasqanmanta astawan entiendespanchik iñiqmasinchikkunawan rimayninchikqa. Chaynapim paykunatapas yanapanqa.

¹⁹ Kallpanchakunataqmi rurasqanchikkuna Jesuspa rurasqanman hina kananpaq, chaynapi Diospa imayna kasqanta qawachinapaq. Rurasqanchikkunapi Jesuspa kuyakuyninta runakuna qawaptinkuqa, Jesucristomantawan Diosmantam yachayta munanqaku (Efe. 5:1, 2). Pablom niwanchik: “Ñoqapa ejemploytayá qatiychik, ñoqapas Cristopa ejemplontam qatini”, nispa (1 Cor. 11:1). Ñoqanchikqa atichwanmi Diospa imayna kasqanta rurasqanchikkunapi qawachiytaqa, chayqa mayna kusikunapaqmi. Chaynaqa hinallayá Jesusta qatipakusun Jehová Dios imayna kasqanta qawachinapaq.

[Kay yachachikuypa tapukuyninkuna]