ALLEGHENY (Pensilvania, Estados Unidos) lawpi 1886 watapi Casa Bíblica nisqamantam La Aurora del Milenio (volumen I) nisqa pachak librokunata Chicago (Illinois) lawman aparqaku. Charles Taze Russellqa munarqa librokuna rantikunanku wasipi chay librokuna rantikusqa kanantam. Religionmanta rimaq librokunata rantikunanku tiendapim La Aurora del Milenio sutiyoq librokunata rantikurqa. Ichaqa iskay semana qepamanmi chay librokunataqa Casa Bíblica nisqaman kutichirqaku. ¿Imanasqa?

Yaqachusmi ancha reqsisqa predicaq kikinpa libronkunawan kuska rantikusqa kasqanta rikuruspan piñakururqa. Hinaspam nirqa: “Sichu kay librokunata andamiomanta mana horqoptikichikqa evangelico-masiykunawanmi chay libroykuta huklawmanña apakusaqku”, nispa. Qollqewan mana sasachakunanraykum chay tiendayoqqa llapallan Aurora sutiyoq librokunata kutichirqa. Wakin willakuyninchikkuna periodicokunapi lloqsimunanpaq contratota ruraptinchikpas chay evangelicokunaqa harkakurqakum. Chaynaqa, ¿imaynatataq kay mosoq librokunaqa chayanman karqa pipas cheqap maskaqkunaman?

Chaytaqa ñawpaq tiempopi tukuy tiemponkuwan Diosta serviq colportorkunam llapa runakunamanqa chayachirqaku. * 1881 watapi Zion’s Watch Tower (La Torre del Vigía de Sión) nisqa revistam willakurqa tukuy tiemponkuwan waranqa runakunata Bibliamanta willakuq librokunata cheqechinankupaq. Yaqa huk-iskay pachaklla kaspankupas, tarpuchkaq hinam cheqapmanta willakuq chay librokunata cheqechirqaku. 1897 watapaqqa La Aurora del Milenio nisqa qellqaqa yaqa huk millonñam cheqechisqa karqa, yaqa llapanpiqa colportorkunam chaykunataqa cheqechirqaku. Paykunaqa yaqa llapankum mantienekuqku chay rantikusqanku librokunamanta chaskisqanku wakin qollqewan chaynataq Zion’s Watch Tower nisqa revistata sapa kuti chaskinankupaq padronasqankuwanpas.

¿Pikunataq karqaku chay mana manchakuq colportorkunaqa? Wakinninkuqa karqaku mozo-sipaskunam chaynataq yuyaqkunam. Karqakutaqmi achka solterokunapas chaynataq warmayoq hinaspa mana warmayoq casarasqa familiakunapas. Yaqa llapallan colportorkunam tukuy punchawta predicaqku, wakinninkuñataqmi predicaqku huk otaq iskay horata sapa punchaw. Manamá llapallankuchu colportor kaytaqa atiqku onqosqankurayku otaq imawanpas sasachakusqankurayku. Chayna kaptinpas, 1906 watapi apakuq asambleapim willakurqa pipas colportor kay munaqqa mana yachaysaparaqchu, ancha educacionniyoqraqchu chaynataq sumaq rimaqraqchu kanankumanta.

Chay iñiqmasinchikkunaqa achka nacionkunamanmi chayarqaku. Huk wawqenchikmi nirqa qanchis watallapi 15.000 librokunata aypusqanmanta. Chaymantapas  nirqataqmi: “Manam librokunata rantikunaypaqchu colportorqa karqani, aswanqa Jehová Diosmanta willakunaypaqmi”, nispa. Colportorkunapa willakusqankuqa muhu hinam runakunapa sonqonpi sapichakurqa, Biblia estudiaqkunapas astawantaqmi yapakurqa.

Chayraykum religionpi punta apaqkunaqa llumpayta despreciaqku qamkunaqa librokuna rantikuqllam kankichik nispanku. 1892 Zion’s Watch Tower nisqa qellqam kaynata nirqa: “Yaqa llapallankum mana Señorpa cheqap willakuqninpaqchu hapisunkichik, manataqmi chaninchankuchu humilde hinaspa ancha kallpanchakuq kasqaykichiktapas, Señormi ichaqa chaninchan”, nispa. Huk colportorapa nisqanman hinaqa sasachakuykunapas karqataqmi. Paykuna maymanpas rinankupaqqa bicicletatawan allin zapatokunatam servichikuqku. Mana qollqeyoq kaspankuñataqmi libronkuta cambiaqku mikuywan. Predicaruspankuñataqmi inti seqaykuyta karpankuman otaq arriendasqanku cuartonkuman kutiqku, chaypiqa pisipasqa puñuspankupas ancha kusisqallañam kaqku. Chaymantam rikuriramurqa “colportorkunapaq carrokuna” nisqanku, chay carrokunaqa karqa wasiman rikchakuqmi. Kikinkum chaykunataqa ruraqku, chaywan purispankuqa manam anchataqa tiemponkutawan qollqenkutaqa usuchiqkuñachu. *

1893 watata Chicago lawpi asambleapim wakin discursokuna colportorkunapaq karqa, manam mayqen asambleapipas chayna discursokunaqa apakuqchu. Chaypi kaqkunaqa yacharqakum sumaq experienciakunamanta, imayna predicanapaq yachachikuykunamanta chaynataq sumaq consejokunamantapas. Huk kutipim wawqenchik Russell tukuy sonqonkuwan predicaqkunata consejarqa allin desayunota tomanankupaq, samarispanku lecheta tomanankupaq chaynataq llumpay rupay kaptinqa chiri yakuchata tomanankupaqpas.

Asambleakunapi predicaqmasinta huk colportor maskaspanqa qellu cintawanmi hinakuq. Chayllaraq predicaqkunaqa experienciayoqkunawan lloqsispankum predicayta yachaqku. Chayna rurayqa ancha allinmi karqa, ¿imanasqa? Huk kutipim mana ancha experienciayoq colportora manchakuywan katkatatastin huk warmita nirqa: “Kay librokunata manam munankichu ¿aw?”, nispan. Chay señoram ichaqa nirqa “arí munanim” nispa, hinaspam iñiqmasinchikña rikurirurqa.

Huk wawqenchikmi tapukurqa: “¿Imataq aswan allin kanman: hinalla llamkaspay sapa wata waranqa dolar qollqeta qoyniychu icha colportor kayniychu?”, nispan. Kaynatam contestarqaku: “Diosqa iskaynintam munan, ichaqa aswan allinmi kanman tukuy sonqoykiwan Payta serviptikiqa”, nispa. Mary Hinds sutiyoq colportoram chayna llamkaymanta nirqa: “Kaynata servispanchikmi aswan achka runakunata yanapanchik”, nispa. Alberta Crosby sutiyoq iñiqmasinchikpas qallariypiqa llumpay manchakuqmi karqa, paymi nirqa: “Sapa punchawmi colportora kaytaqa astawanraq kuyani”, nispa.

Kunanqa chay mana manchakuspa predicaq colportorkunapa wawa-churinkunawan yachachisqanku runakunaqa Diostam hinalla servichkanku. Familiaykipi mana pipas colportor otaq precursor kaptinqa, ¿manachu kallpanchawaq precursor kanankupaq? Chayta ruraspaqa astawanraqchá tukuy tiempo Dios serviyta munankichik.

[Willakuykuna]

[32 kaq paginapi suti rikuylla kaq willakuy]

Colportor kay munaqqa manam yachaysaparaqchu, ancha educacionniyoqraqchu chaynataq sumaq rimaqraqchu kananku

[31 kaq paginapi foto]

Ghana nacionpi Alfred W. Osei, yaqa 1930 watapi

[32 kaq paginapi fotokuna]

Hanaypi: Inglaterra nacionpi Edith Keen hinaspa Gertrude Morris, 1918 watapi. Uraypiñataq: Estados Unidos nacionpi Stanley Cossaboom hinaspa Henry Nonkes sutiyoq colportorkuna, waqtanpiñataqmi kachkan mana imayoq achka cajakuna