CHUNKA waranqa masnin predicaqkunam enteron Estados Unidos nacionpi 1929 kaq watapi agosto killa tukupayninmanta septiembre killapa qallariynin punchawkunapi isqon punchawpuni predicanankupaq kallpanchakurqaku. Chay punchawkunapim aypururqaku 250.000 librokunata chaynataq folletokunatapas. Chaypim yanapakurqaku yaqa waranqa colportorkuna otaq precursorkuna. ¡Achkañam karqaku! Bulletin * nisqanku qellqapim willakurqaku 1927 kaq watamanta 1929 watakama precursorkuna “admirakuypaq” kimsa kutikama yapakusqankumanta.

1929 kaq octubre 29 punchawpim Nueva York llaqtapi Bolsa de valores nisqanku oficinapi fabricayoq otaq empresayoq runakuna manaña rantiyta nitaq vendeyta atirqakuñachu, chaywanmi qollqemanta llumpay sasachakuy enteron Allpapi qallaykurqa. Hinaptinmi bancokuna mana qollqeyoq rikurirurqa, haciendayoqkunapas fracasarurqakum. Hatun fabricakunatapas wichqarurqakum. Millonnintin runakunam mana llamkapakuyniyoq qeparurqaku. 1933 kaq watapiqa Estados Unidospim debekusqankumanta wasikuna qechuyta autoridadkuna qallaykurqaku, huk punchawllapim waranqa wasikunata qechurqaku.

¿Imaynatam qollqemanta chayna sasachakuy kaptinpas precursorkunaqa hinalla predicarqaku? Achkam tiyarqaku otaq yacharqaku ruedayoq wasichakunapi. Chaymi mana pagarqakuchu arriendota nitaq impuestotapas. Chaynata ruwaspam llumpayta mana gastaspa hinalla Diosta servirqaku. * Asamblea kaptinpas chay ruedayoq wasichankupim puñuqku hotelpi hinaraq. 1934 kaq watapim Bulletin nisqa qellqapi planota horqorqaku chayna wasichakunata imaynata ruwanankupaq, chay planowanmi ruedayoq wasichankuta ruwarqaku cañoyoqta, cocinayoqta, patarana camayoqta chaynataq chiriptinpas qoñiqta.

Chay planowanmi Allpantinpi precursorkuna ruedayoq wasichankuta sumaqta ruwarqaku. Victor Blackwell iñiqmasinchikmi yuyarispan nin: “Noeyqa manam haykapipas barcokuna ruwaytaqa yacharqachu, ñoqapas manam haykapipas chayna wasichataqa ruwarqanichu”, nispa. Ichaqa chay ruedayoq wasichatam ruwarqa.

Avery hinaspa Lovenia Bristow iñiqmasinchikkunapam karqa ruedayoq wasichanku. Averynmi nin: “Taqra wasanta tortuga apachkaq hinam wasiyta maymanpas apaq kani”, nispa. Bristow familiam Harvey hinaspa Anne Conrow familiawan precursor karqaku, paykunapapas chayna ruedayoq wasichankum karqa. Chay wasichankuta huklawman apaptinkum breawan llusisqa cartonninkuna wichiq. Averymi nin: “Manam haykapipas chayna wasichataqa rikurqanichu nitaq chaymanta qepatapas”, nispa. Ichaqa nirqam: “Familia Conrowqa iskay churinkunapiwanmi ancha kusisqa karqaku”, nispa. Harveymi qellqarqa: “Manam imaykupas pisipuwarqakuchu, hawkam tarikurqaniku Jehova Diosta servispayku, paymi kuyakuywan cuidawarqaku”, nispa. Familia Conrowqa watakuna pasaytam tawanku rirqaku Galaad Escuelaman, chaymantam Perú nacionman misionero kanankupaq hamurqaku.

Giusto hinaspa Vincenza Battaino familiapas precursormi karqaku, paykunaqa wawanku kananta yacharuspankum chayraq rantisqanku carronkuta wasichata hinaña ruwarurqaku. Chayqa hotelpi sumaq cuartomanmi rikchakurqa, chaymanta ñawpaq watakunataqa karpakunapim karqaku. Paykunaqa hinallam precursor  karqaku warmi warmachankupiwan, tukuy sonqonkuwanmi predicarqaku Estados Unidospi Italiamanta kaq runakunaman.

Diospa allin noticiankunamantam achka runakuna yachayta munarqaku, ichaqa wakchakunawan mana llamkapakuyniyoqkunaqa manam atirqakuchu Bibliamanta qellqakunata conseguiyta. Chaymi qollqenku mana kaptin imankuwanpas Bibliamanta qellqakunata truequeqku otaq cambiaqku. Chayna cambiasqankutam iskay precursorakuna yuparqaku soqta chunka tawayoqta. Paykunam nirqaku: “Chay yupasqaykutam listapi churarqaniku”, nispa.

Fred Anderson iñiqmasinchikmi chakrayoq runawan tuparurqa, chay runam munarqa Bibliamanta librokunata ichaqa qollqen mana kaptinmi mamanpa lentesninwan cambiarqa. Chay runapa vecinonpas munarqam Bibliamanta qellqakunata, ichaqa nirqam: “Leenaypaqmi lentesniy mana kanchu”, nispa. Vecinonpa lentesninwanmi ichaqa librokuna leeyta atirqa, chaymi lentesmantawan librokunamanta qollqechanwan colaborarqa.

Herbert Abbott iñiqmasinchikmi wallpakuna apanapaq jaulata carronpi apaq. Chaymi qellqakunawan cambiasqan kimsaña otaq tawaña wallpakuna kaptinqa rantikunanpaq mercadoman apaq, hinaspam chay qollqewan gasolinata rantiq. Paymi nin: “Wakinpiqa qalaypaqmi qollqeyku mana kaqchu. Ichaqa manam saqerqanikuchu predicayniykutaqa. Carroykupaq gasolina mana kaptinqa tukuy sonqoykuwan Jehova Diospi confiaspam chakillawan riq kaniku”, nispa.

Jehova Diospi tukuy sonqonkuwan confiasqankum chay sasachakuy watakunapi hinalla predicanankupaq precursorkunata yanaparqa. Maxwell hinaspa Emmy Lewis iñiqmasinchikmi huk kutipi llumpay wayra-para kaptin wasichankupa hawanman sacha manaraq kumpakamuchkaptin ñakayta lluptirurqaku, chay sacham wasichankuta iskayman parterurqa. Maxwellmi nirqa: “Chayna pasawasqankuwanqa manam harkachikurqanikuchu, hinallam Jehova Diosta servirqaniku. Dios serviypiqa tukuymi ruwanaykupaq karqa; chaykuna ruwaypim piensarqaniku”, nispa. Hukmanyanankumantaqa Maxwellwan Emmyliqa ruedayoq wasichankutam kaqmanta ruwarqaku iñiqmasinchikkunapa yanapayninwan.

Kay tiempopipas sasachakuy tiempopim kawsanchik ichaqa millonnintin iñiqmasinchikkunam Jehova Diosta tukuy sonqonkuwan hinalla servichkanku. Amañayá predicaychikchu nispan Jehova Dios niwananchikkamam chay precursorkuna hina llapallanchik kallpanchakunanchik predicananchikpaq.