HUK viudam sapallan wawanta kusikuymanta abrazaykun. Kay wawanqa wañukurqam, ichaqa kaqmantam kawsariramun. Wasinpi samapakuq runam payta nin: “Kayqaya wawaykiqa kawsarirun”, nispa.

Kay kawsarimuymanta willakuyqa yaqa kimsa waranqa wata ñawpaqtaraqmi pasakurqa, hinaspapas 1 Reyes libropa 17 capitulonpim tarikun. Viudapa wasinpi samapakuq runaqa Diosmanta willakuq Eliasmi karqa, warmapa mamanñataqmi Sarepta llaqtamanta huk viuda. ¡Maynatachá iñiyninta kallpancharqa wawanpa kawsarisqanqa! ¿Imakunatam yachachwan kay warmimanta?

Jehova Diosmi nirqa mana allin rey Acab Israel nacionta kamachiptin usyay tiempo kananmanta. Usyay tiempo kananmanta Elias willakuruptinmi, Diosqa payta Acabmanta pakaykurqa hinaspam tantatawan aychata cuervokunawan apachirqa mikunanpaq. Chayna kachkaptinmi Dios nirqa: “Hatarispaykiyá Sidon law Sarepta llaqtaman riy hinaspayá chaypi yachamuy, chaypim viudata kama[chisaq] mikuchisunaykipaq”, nispa (1 Rey. 17:1-9).

Sareptaman chayaruspanmi Eliasqa tuparurqa yanta huñukuq wakcha viudawan. ¿Paychu mikuchinan karqa? ¿Manachu llumpay wakcha karqa? Iskayrayaspanpas Eliasqa paytam nirqa: “Ama hina kaspaykiyá aysakupi as yakuta aparamuway tomaykunaypaq”, nispa. Yaku apamuq riptinmi Eliasqa kaqmanta nirqa: “Apamuwaytaqyá tantatapas”, nispa (1 Rey. 17:10, 11). Viudapaqqa manachá sasachu karqa as yaku qoykuyqa, mikunanpaq qoykuymi ichaqa sasa karqa.

 Chaymi nirqa: “Yupaychasqayki kawsaq [Jehova] Diosraykum jurayki, tantayqa manam kapuwanchu, kapuwaspaqa-kapuwachkan tinajaypi putqoy harinawan puyñuchaypi pisi aceitellañam, kunanmi huñuchkarqani iskay kimsa yantakunata chaywan ñoqapaqwan wawaypaq tantarunaypaq hinaspa mikuykuspa wañukunaykupaq”, nispa (1 Rey. 17:12). ¿Imakunatam kay nisqanmanta yachachwan?

“Kawsaq [Jehova] Diosraykum” nisqanqa yaqachusmi qawachin Eliaspa Diosninta reqsisqanta, ichaqa manam allintapunichu reqsirqa “Diosniymi” nispa Jehova Diosta ninanpaqqa. Payqa Sidon law Sarepta llaqtapim yacharqa. Sarepta llaqtapi runakunaqa yaqapaschá Baal taytachata yupaycharqaku. Chayna kaptinpas Jehova Diosmi chay wakcha viudapa sonqonta qawarqa.

Taytachakuna yupaychaq runakunapa chawpinpi yachaspanpas, Israel runakunapa Diosninpim iñirqa. Viudapa wasinman rinanpaq Eliasta Jehova Diospa kamachisqanqa allinninkupaqmi karqa. Kayqa allintamá yachachiwanchik.

Baal taytachata yupaychasqanku Sarepta llaqtapiqa manam llapallankuchu taytachakunataqa yupaychaqku. Jehova Diosmi Eliasta kamachirqa viudapa wasinman rinanpaq, kaymi qawachin runakunapa sonqonta Dios qawasqanta. “Payqa chaskinmi lliw nacionkunapi payta kuyaspa manchakuywan allin ruraq runakunataqa” (Hech. 10:35).

¿Kanmanchu Sarepta llaqtamanta viuda hina runakuna predicasqanchik lawpipas? Pantay religionniyoq runakunapa chawpinpi yachaspankupas, yaqapaschá pisillatapas Diosmanta yachanku. Chaymi paykunata maskananchik hinaspa yanapananchik Jehova Diosta reqsinankupaq.

Kunanñataq qawasunchik Eliaspa mañakusqanmanta. Paytam viudaqa nirqa warmanpaqwan payllapaqña mikuy kasqanmanta, chayta mikuspankum wañunanku karqa. Eliasñataqmi nirqa: “Amayá manchakuychu, rispaykiyá ruraramuy nisqaykiman hina ichaqa ñoqapaqyá puntata ruraykapamuway tortillata, chayta aparamuwaspaykiñam, qampaqwan wawaykipaqqa ruramunki. Israelpa yupaychasqan [Jehova] Diosmi nin: ‘Tinajaykipi harinapas chaynataq puyñuchaykipi aceitepas manam pisinqachu ñoqa Tayta Dios allpaman parata chayachimunaykama’”, nispa (1 Rey. 17:11-14).

Yaqapaschá hukkunaqa kaynata ninmanku karqa: “¿Imaynamá chaychallaña kapusqan mikuynintaqa qoykunman?”, nispa. Ichaqa, ¿imatam viuda ruwarqa? Jehova Diosmanta mana anchata yachaspanpas, Eliaspa nisqantam ruwarqa. ¡Chay ruwasqanqa allinpimá tukurqa!

Diosqa manam saqerurqachu. Eliaspa nisqanman hinam, usyay tiempo tukunankama Jehova Diosqa mana pisichipurqachu mikuyninkutaqa. “Tinajapi harinapas manam tukurqachu, manataqmi pisirqachu puyñuchapi aceitepas. Chaynamá karqa Eliaswan [Jehova] Diospa nichisqanpi hina” (1 Rey. 17:16; 18:1). Eliaspa nisqanta  viuda mana kasukuptinqa, as harinawan hinaspa as aceitewan tanta ruwasqanqa tukurunmanchá karqa. Ichaqa Jehova Diospi hapipakuspanmi Eliasman puntata mikuchirqa.

¿Imatam kaymanta yachachwan? Sasachakuykunapipas Diosman sonqo kaptinchikqa, payqa yanapawasunmi. Chaymantapas, Qowaqninchik, Waqaychawaqninchik hinaspa Amistadninchikmi payqa kanqa (Ex. 3:13-15).

1898 watapim, kay qellqa viudamanta rimaspam nirqa: “Kay warmi iñiynintawan kasukusqanta qawachiptinqa, Diosqa paymanta willakuqninwan yanapananpaqmi favorecenman karqa. Mana iñiyniyoq kaptinmi ichaqa huk viudata maskanman karqa. Chaynam ñoqanchikwanpas pasanman [. . .]. Iñiyniyoq kaspanchikqa bendicionkunatam chaskisun, mana iñiyniyoq kaspanchikmi ichaqa mana”, nispa.

Sasachakuykunapi tarikuspanchikqa Diospa yanapakuynintam maskananchik Palabranpi hinaspa qellqanchikkunapi. Chaymantapas Diospa nisqantam kasukunanchik sasa kaptinpas. Nisqankunata kasukuspanchikqa achka bendicionkunatam chaskisun. “Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy Tayta Diosta. Paymi munasqanman hina kawsachisunki qamta” (Prov. 3:5, 6).

Kay viudapa iñiyninmi kaqmanta pruebaman churasqa karqa. “Wasiyoq viudapa wawan llumpayllataña onqoruptinmi samayninpas chinkarurqaña”. Chaymi imarayku pasasqanmanta viuda yachayta munaspan Eliasta nirqa: “¿Imatataq kayta ruraruwanki, Diospa runan? ¿Mana allin rurasqaymanta yuyarichiwaspa waway wañuchinaykipaqchu hamurqanki?”, nispa (1 Rey. 17:17, 18). ¿Imanasqam chaynataqa nirqa?

¿Imapas hucha ruwasqanmantachu viudaqa yuyarichkarqa? ¿Piensarqachu wawanta wañuchispan Dios castigasqanta, hinaspa wawanta wañuchinanpaq Elias hamusqanmanta? Bibliaqa manam chaykunamantaqa willakunchu, viudam ichaqa mana tumparqachu Dios mana allin ruwaq kasqantaqa.

Eliasqa hukmanchá tarikurqa chaypi kachkaptin viudapa wawan wañukuptinqa. Wasipa altosninman warmapa cuerponta apaspanmi Eliasqa Diosta mañakurqa: “Yupaychasqay Dios Taytalláy ¿samakusqay wasipi viudatapas llakichinkichum wawanta wañurachispayki?”, nispa. Eliasqa manam munarqachu chay viuda hinalla ñakarinantaqa. Chaymi Diosta mañakurqa: “Yupaychasqay Dios Taytalláy, ruegakuykim kay wawapa vidanta kasqallan kutiykachinaykipaq”, nispa (1 Rey. 17:20, 21).

Jehova Diosqa uyarirqam. Viudaqa iñiynintam qawachirqa Eliasman mikuyta qospan. Diosqa yaqachusmi warmapa onqoynin hinalla kananta saqerqa, chaynapi wañukuptin kawsarichinanpaq. Chay ruwasqanmi qawachin hamuq tiempopi ima ruwananmanta. Eliaspa mañakusqanman hinam, Jehova Diosqa warmata kawsarichirqa, paymi Bibliapa nisqanman hinaqa puntata kawsarichisqa karqa. Maynatachá viudaqa kusikurqa Elias kaynata niptinqa: “Kayqaya wawaykiqa kawsarirun”. Viudañataqmi nirqa: “Kunanqa yachaniñam cheqap Diospa runan kasqaykita, yachanitaqmi Tayta Diospa palabran rimasqaykipas cheqap kasqanta”, nispa (1 Rey. 17:22-24).

Bibliaqa manam imatapas viudamantaqa ninñachu. Ichaqa Jesusmi paymanta allinta rimarqa, chaymi nichwan Jehova Diosta wañukunankama servisqanmanta (Luc. 4:25, 26). Kayqa qawachintaqmi Diospa serviqninkunata yanapaq runakunaqa Diospa yanapakuyninta chaskisqankuta (Mat. 25:34-40). Yanapantaqmi sasachakuypipas Diosman sonqo kaqkunataqa (Mat. 6:25-34). Qawachiwanchiktaqmi Jehova Diosqa wañuqkunata kawsarichiy munasqanta hinaspa atisqantapas (Hech. 24:15). Chaynaqa, allinpunimá Sarepta llaqtamanta viudapa vidanta yuyariyqa.