SÃO PAULO llaqtapi kaq Conservatório Dramático e Musical nisqa sutiyoq hatun wasipim runakuna huntallaña kachkarqaku. Chayqa karqa 1923 kaq watapim. Chaypim George Young sutiyoq iñiqmasinchik huk discursota qorqa, hinaptinmi rimasqanman hina tikrasqa karqa portugués rimayman. Chaypi 585 kaq runakunam discurso qosqanta allinta uyarirqaku. Bibliapa textonkunañataqmi perqa qatapi rikurirqa portugués rimaypi. Yachachikuy tukuruptinñataqmi pachak folletokunata aypurqaku, sutinmi karqa Wara-waranqantin kunan kawsaqkunam mana haykapipas wañunqakuchu niq. Chay folletokunaqa karqa portugués, alemán, inglés hinaspa italiano rimaykunapim. ¡Sumaqmá discurso qosqanqa karqa! Chay huñunakuymantaqa achka runakunam willanakururqaku, chaymi minchantin tutapaqqa kaqmanta achkallaña runakuna huñunakurqaku huk yachachikuyta uyarinankupaq. Ichaqa, ¿imanasqataq tukuy chaykunaqa apakurqa?

1867 watapim Sarah Bellona Ferguson sutiyoq señora familiantin Estados Unidosmanta Brasil nacionman astakurqa. 1899 watapim Sarahqa Bibliamanta rimaq qellqakunata leeruspan Diosmanta cheqap kasqanta nirqa, chaytaqa sullka turinmi Estados Unidosmantaraq aparqa. Sarahqa Bibliamanta yachayta munaspanmi inglés rimaypi Watch Tower qellqata mañakurqa sapa killa apachimunankupaq. Payqa ancha kusisqa tarikuspanmi iñiqmasinchik Russellman qellqarqa mayna karupiña kaq runamanpas Jehova Diosmanta yachachikuykuna chayasqanta.

Sarahqa anchatam kallpanchakurqa Jehova Diosmanta willakunanpaq. Ichaqa piensarqam payta, familianta hinaspa Brasilpi kaq allin sonqoyoq runakunata Diosmanta yachayninkupi ñawparinankupaq pi yanapaykunanmanta. 1912 watapim Brooklyn Betelmanta willarqaku São Paulo llaqtaman huk iñiqmasinchikta kachanankupaq. Paymi portugués rimaypi ¿Maypitaq wañusqakuna kachkan? nisqa sutiyoq waranqantin tratadokunata apaspan rinan karqa. 1915 watapim Sarah nirqa Biblia Estudiaqkuna chayllaña hanaq pachaman rinankupaq suyasqankumanta admirasqa kasqanta. Paymi qellqarqa: “¿Manachu Brasil nacionpiwan tukuy Sudamérica lawpi Diosmanta willakuyqa apakunqa? [. . .] América del Sur lawqa hatu-hatunmi. Chaypiqa achkaraqmi kachkan cosechanapaqqa”,  nispa. Arí, ¡achka runakunamanraqmá Diosmantaqa yachachinanku karqa!

1920 watapim buquepi llamkaq Brasil nacionniyoq pusaq mozokuna Nueva York llaqtapi wakin huñunakuyman rirqaku buquenkuta allichanankukama. Río de Janeiro llaqtankuman kutiruspankum Bibliamanta yachasqankuta hukkunaman willakurqaku. 1923 watapa marzo killanpim Río de Janeiro llaqtaman George Young chayarurqa, payqa karqa peregrinom (kunanñataqmi sutichakun congregacionkunata watukuq ancianowan). Chaypim tarirurqa Diosmanta yachay munaq achka runakunata. Chaymi portugués rimaypi qellqakuna ruwakunanpaq qallarichirqa. Chaymantañataqmi rirqa São Paulo llaqtaman, chaypiqa 600.000 runakunam yacharqaku. Chay llaqtapim discursota qorqa qallariyninpi nisqanchikman hina, hinaspapas Millones sutiyoq folletotam aypurqaku. George Youngmi nirqa: “Sapallay kasqayraykum discurso qonayman runakuna hamuyninkuqa periodicokunapa willakusqanmanta karqa”, nispa. Nirqataqmi chay discurso qosqan Brasil nacionpi IBSA * sutiwan reqsichikuqkunamanta punta kaq discurso kasqantapas.

Brasil nacionmanta willakusqanpim, 1923 watapi 15 de diciembre killapi lloqsimuq Watch Tower qellqa nirqa: “Chaypiqa junio killapa qallariyninpim Diosmanta willakuyqa qallarirqa, manam ima qellqanchikkunapas karqaraqchu. Chayna kaptinpas, Señorninchikmi chay llamkayta bendecirqa”, nispa. Chay willakuyqa nirqataqmi São Paulo llaqtapi iñiqmasinchik Young, junio killa qallariymanta septiembre killa tukuykama 21 discursokuna qosqanmanta 2 discursollaraq kasqantapas. Chay huñunakuymanmi rirqaku 3.600 runakuna. Río de Janeiro sutiyoq llaqtapiqa pisi-pisimantam Diosmanta willakuyqa cheqerqa hinaspapas iskay-kimsa killakunallamantam portugués rimaypi qanchis waranqa qellqakunata aypururqaku. Portugués rimaypi Watch Tower qellqañataqmi lloqsiyta qallarirqa 1923 watapi noviembre-diciembre nisqawan.

George Young sutiyoq iñiqmasinchikmi watukurqa Sarah Fergusonman. Watch Tower qellqam kaynata willakun watukusqanmanta: “Sarahm wasi ukuman yaykuykuspan mana imatapas rimarirqachu. Youngta makinwan haywarispanmi uyanta qawaspan qeparurqa, chaymantam kaynata nirqa: ‘¿Cheqaptachu kanki congregacionkunata watukuq anciano?’”, nispa. Paywan wakin wawankunam chay qepallaman bautizakurqaku. ¡Sarahqa iskay chunka pichqayoq watam bautizakunanpaqqa suyarqa! 1924 watapa 1 de agosto killanpi lloqsimuq Watch Tower qellqam nirqa 50 runakuna Brasil nacionpi bautizakusqankumanta, yaqa llapankum bautizakurqaku Río de Janeiro llaqtapi.

Chaymantaqa yaqa isqon chunka watañam pasarun, manañam tapukuchwanchu: “¿Manachu Brasil nacionpiwan tukuy Sudamérica lawpi Diosmanta willakuyqa apakunqa?”, nispaqa. 760.000 masnin Testigokunam Brasil nacionpiqa Diosmanta willakuchkanku. Diosmanta willakuyqa apakuchkantaqmi Sudamérica lawpipas portugués, español chaynataq huk rimaykunapipas. 1915 watapi Sarah Ferguson sutiyoq cristianapa nisqanman hinaqa ¡achkaraqmá cosechanapaqqa karqa! (Brasil nacionpi waqaychasqa kaqkunamanta.)