Diospa llaqtanpi manaraq casarakuqkunam, wakinku yaqa chaynata ninku. Ichaqa yachankum ‘Señorpi iñiqllawan’ utaq bautizasqa kaqkunallawan casarakunankumanta (1 Cor. 7:39). Chaynaqa, ¿imanasqataq chaynata piensanku?

Wakinkum chaynata piensanku soltero qarikunamantaqa soltera warmikuna aswan achka kasqanrayku. Chaynam wakin nacionkunapipas. Rimarisun Corea nacionmanta, chaypim 100 iñiqmasinchikkunamanta 57 warmikuna kanku qarikunañataq 43. Hinaspa Colombia nacionpiñataq 100 iñiqmasinchikkunamanta 66 warmikuna kanku qarikunañataq 34.

Wakin nacionkunapiqa noviapa tayta-mamanmanmi novioqa qullqitawan regalokunata qunan paywan casarakuyta munaspanqa. Noviapa tayta-maman Diosta mana serviq kaptinqa, aswan achka qullqitam utaq regalokunatam mañakunmanku. Achka soltero iñiqmasinchikkunaqa chayna regalokuna rantiytaqa manam atinkuchu. Chaymi wakin soltera iñiqmasinchikkuna piensanku mana haykapipas iñiqmasinkunallawan casarakuy atinankumanta. *

Haykapipas chaynata piensaspaykiqa, yuyarinaykim Jehova Dios imayna tarikusqaykita yachasqanmanta hinaspa entiendesusqaykimantapas (2 Cron. 6:29, 30).

Chayna kaptinpas, Jehova Diosqa niwanchikmi serviqninkunallawan casarakunanchikpaq. ¿Imanasqa? Payqa yachanmi allinninchikpaq kasqanta hinaspapas yanapawayninchiktam munan. Payqa manam munanchu mana allinta tanteasqanchikrayku ñakarinanchiktaqa. Diosmanta willakuq Nehemiaspa tiemponpim achka judiokuna Diosta mana  serviq warmikunawan casarakurqaku. Chaymi Nehemiasqa yuyarichirqa Salomonwan ima pasasqanta. Nirqam Salomonta Dios kuyasqanrayku Israel nacionpa kamachiqnin kananpaq churasqanmanta. Ichaqa Salomonmi Jehova Diosta mana serviq warmikunawan casarakururqa, paykunañataqmi payta huchallirachirqa (Neh. 13:23-26). Jehova Diosqa allinninchiktam munan. Chaymi serviqninkunata kamachiwanchik iñiqmasinchikkunallawan casarakunapaq (Sal. 19:7-10; Is. 48:17, 18). Payllam niwanchikman imam allin utaq mana allin kasqantaqa. Chaymi payta agradecekunchik kuyawasqanchikrayku allinninchikpaq tukuy ima niwasqanchikmanta (Prov. 1:5).

Jehova Diosta mana serviqwan casarakuptikiqa, chay runaqa yaqapaschá imatapas ruwanqa Dios serviyta saqinaykipaq. Manachá chay pasasunaykitaqa munawaqchu (2 Cor. 6:14). Jehova Diosqa haykapipas allinninchikpaqmi niwanchik. Diospa achka serviqninkunam allinta tantearqaku hinaspa Diospa kamachisqantapas kasukurqaku. Ichaqa wakinkum mana chaynatachu ruwarqaku.

Australia nacionpi Maggy sutiyuq iñiqmasinchikmi, Diosta mana serviqwan lluqsiyta qallaykurqa. * Paymi willakun chay runawan kayta munasqanrayku huñunakuykunaman achka kutita mana risqanmanta. Chaymi Jehova Dioswan amistadninqa manaña ñawpaqta hinañachu karqa. India nacionpi Rayda sutiyuq iñiqmasinchikpas estudiaqmasinwanmi lluqsiyta qallaykurqa. Chay runaqa Biblia estudiaytam qallaykurqa iñiqmasinchikwan kayta munaspallan. Tiempopa risqanman hinam, iñiqmasinchikqa Jehova Dios serviyta saqirurqa hinaspa chay runapa religionninmanpas cambiakururqa casarakuyta munasqanrayku.

Camerún nacionpi Nancy sutiyuq iñiqmasinchikmi 19 watanpi casarakururqa Diosta mana serviq runawan. Chay runaqa iñiqmasinchiktam nirqa Jehova Diosta servinanpaq mana harkakunanmanta. Ichaqa iskay semana pasayllatam huñunakuykunaman rinanta harkakururqa. Iñiqmasinchikmi willakun sapallan hina tarikusqanmanta hinaspa mana amiyta waqasqanmanta. Musyakururqam hukpa makinpiña kasqanta hinaspapas chay ruwasqanmantam tukuy tiempo ñakakurqa.

Yaqapaschá kaynata niwaq: “Wakin iñiqmasinchikkunaqa Diosta mana serviqkunawanmi casarakururqaku hinaspapas paykunaqa allin runakunam kanku”, nispa. Chayna kaptinpas, ¿allinchu kanqa Jehova Dioswan amistadniki chayna runawan casarakuruptikiqa? ¿Imaynataq tarikunki allinnikipaq Jehova Dios nisusqaykita mana kasukuspaykiqa? Hinaspapas, ¿imaynataq Jehova Diosqa tarikunqa? (Prov. 1:33.)

Yaqa llapallan iñiqmasinchikkunam Jehova Diospa kamachisqanta kasukunku, chaymi iñiqmasinkunallawan casarakunku. Paykunaqa manam iskayrayankuchu chay tanteasqanku allin kasqanmantaqa. Chaymantapas, Jehova Diosta kusichiyta munasqankuraykum chaytaqa ruwanku. Japón nacionmanta Naomi iñiqmasinchikmi Diosta kasukuyta munarqa, ichaqa ayllunkunam Diosta mana serviq runawan casarakunanta munarqaku. Chaymantapas, paypa amistadninkunaqa Diosta serviqkunawanmi casarakuchkarqaku, payñataqmi sapallan qipachkarqa. ¿Imataq payta yanaparqa mana hukmanyananpaq? Paymi nin: “Sapa kutim yuyariq kani: kusisqa kananpaqqa manam casarasqa kaymantachu nitaq mana casarasqa kaymantachu, aswanqa kusisqa Diosta serviymantam”, nispa (1 Tim. 1:11, NM). Payqa manam iskayrayanchu munasqanchikta Jehova Dios quwananchikmantaqa. Chaymi pay nin: “Diospa llaqtanpi casarakunaykipaq hina qarita utaq warmita mana tarispaykiqa, aswan allinmi kanman Diosta kasukuspa sapallaykiraq kaynikiqa”, nispa. Tiempopa risqanman hinam, Naomi iñiqmasinchikqa Diosta serviq allin iñiqmasinchikwan casarakururqa. Payqa Jehova Diosta kasukusqanwanmi kusisqa tarikun.

Chaymantapas, wakinkuqa manam casarakurqakuraqchu paykunapaq hina qarita utaq warmita suyasqankurayku. Rimarisun Australia nacionmanta Bill sutiyuq iñiqmasinchikmanta, payqa willakunmi wakinpi Diosta mana serviq warmikunata qawapayasqanmanta. Ichaqa Diosta mana serviqwan riqsinakuyta mana munasqanraykum mana llumpaytaqa paykunawanqa kuskanchakuqchu. Tiempopa risqanman hinam, Diospa llaqtanpi wakin  warmikunawan casarakuyta munarqa, ichaqa paykunam mana munarqakuchu. Bill iñiqmasinchikqa 30 wata pasaytañam paypaq hina iñiqmasinchikwan casarakururqa. Kunanqa kusisqam tarikun warminwan kuska Diosmanta willakuspanku, estudiaspanku hinaspa kuskanku Diosta servispankupas. Nintaqmi warminpa amistadninkuna paypa amistadnin kasqanmanta, paykunapas Diospa llaqtanpi kasqankurayku. Chaymantapas ninmi Bibliapa nisqankunata kasukusqankuqa casado kayninkupi yanapasqanmanta.

Jehova Diosta kasukusqaykirayku manaraq casarakuptikiqa, ¿imataq yanapasunkiman hinalla suyanaykipaq? Jehova Diosta kasukusqaykimanta kusisqa tarikusqaykipim yuyaymanawaq (1 Sam. 15:22; Prov. 27:11). Yanapasunkitaqmi Diosta sapa kuti mañakuspayki imayna tarikusqaykita willakuynikipas (Sal. 62:8). Tentacionkunamanta hinaspa mana allin munaykunamanta karunchakuptikiqa Jehova Dioswan amistadnikim wiñanqa. Payqa anchatam kuyasunki hinaspapas yachanmi ima necesitasqaykitapas. Payqa manam ninchu pimanpas qarita utaq warmita qunanmantaqa, ichaqa yachanmi kusisqa kanapaq imakuna allinninchikpaq kasqanta (Sal. 145:16; Mat. 6:32).

Yaqapaschá wakinpiqa David hina tarikuwaq, paymi nirqa: ‘Dios taytalláy, chayllayá contestaykamuway ñuqallaytaqa. Wañuruchkaniñam ñuqallayqa’, nispa (Sal. 143:5-7, 10). Chayna tarikuspaykiqa ama hukmanyaychu. Mañakusqaykita Jehova Dios qusunaykikama suyay. Bibliata leey hinaspa leesqaykipi yuyaymanay. Chaynata ruwaspaykiqa yachankim qanmanta Jehova Dios ima munasqanta hinaspa ñawpaq tiempopi serviqninkunata yanapananpaq ima ruwasqanmantapas. Kaymi yanapasunki Diospi hapipakunaykipaq hinaspa kasukunaykipaqpas.

¿Imatawanmi ruwawaq? Jehova Dioswan amistadnikita kallpanchay hinaspa allin respetasqa kanaykipaqpas kallpanchakuy. Chaymantapas kallpanchakuwaqmi wakinkunawan allinlla kawsakunaykipaq hinaspa qukuykuq kanaykipaq chaynataq allin llamkaq hinaspa Diosman sunqu kanaykipaqpas. Kaykunam yanapasunki casado vidaykipi kusisqa kawsakunaykipaq (Gen. 24:16-21; Rut 1:16, 17; 2:6, 7, 11; Prov. 31:10-27). Diosmanta willakunaykipaq hinaspa iñiqmasinchikkunata yanapanaykipaq astawan kallpanchakuy. Kaykunata ruwasqaykim yanapasunki allinta tanteanaykipaq. Bill iñiqmasinchikmi willakun soltero kayninpi precursor kasqanrayku tiempoqa chaylla pasarusqanmanta.

Jehova Diosta kasukuyqa hinaspa ‘Señorpi iñiqllawan’ casarakuyqa atikunraqmi. Jehova Diosta serviqwan casarakuspaqa, Diostam hatunchasun hinaspapas kusisqam tarikusunchik. Bibliaqa niwanchikmi Jehova Diosta sunqumanta kasukuspaqa wiñaypaq kusisqa kawsakunanchikmanta (Sal. 112:1, 3). Chaymi, ‘Señorpi iñiqllawan’ casarakunapaq Jehova Diospa kamachiwasqanchikta haykapipas kasukunanchik.