¿Yaqachum Diospa nisqankunaqa ruwakunpuni? Jesusqa manam chaymantaqa iskayrayarqachu, chaymi runakunata kallpancharqa Diospi astawan hapipakunankupaq. Jesusmi chaymanta rimaspan Mateo 5:18 kaynata nirqa: “Chiqaptapunim nikichik: Hanaq pachawan kay pacha chinkaptinpas, Moisespa leyninpa huknin letrachallanpas nitaq letranpa partechallanpas manam chinkanqachu lliw nisqankuna cumplikunankama”, nispa.

Hebreo rimaypiqa kay letracham aswan taksachalla י (yod), chay letrachawanmi hebreo rimaypi Jehova Diospa sutinqa qallarin. * Escribakunawan fariseokunaqa leymantam sumaqta yachaqku, chaymi taksa letrachapa ima ninantapas yachaqku.

Huk rimaypiqa Jesusqa nichkarqa, hanaq pachawan kay pacha chinkaptinpas Diospa rimasqanqa lliw ruwakunanmantapunim. Bibliam ichaqa niwanchik, hanaq pachawan kay pachaqa wiñaypaq hinalla kananmanta (Salmo 78:69). Chayna nisqanwanmi Jesusqa nichkarqa Moisespa chaskisqan leyqa lliw ruwasqa kananmanta.

¿Jehova Diosqa lliw kamachisqankunata kasukunanchiktachu munan? Arí. Jehova Diosmi Israel runakunata kamachirqa, pascua fiesta ruwasqankupi wañuchisqanku carneropa tullunta mana pakinankupaq (Exodo 12:46). Ichapas chay kamachikuyqa mana kaqpaq hina rikchakun. ¿Israel runakunaqa entienderqakuchu imanasqa carneropa tullunta mana pakinankumanta? Manapaschá. Jehova Diosmi ichaqa yacharqa. Chay carneropa tullunta mana pakisqankum tuparqa Jesus wañukuptin tullunta mana pakisqankuwan (Salmo 34:20; Juan 19:31-33, 36).

Jesuspa nisqanman hinamá Jehova Diosqa tukuy imapas nisqankunata ruwanqapuni. Arí, hebreo rimaypi taksachalla letracham yanapawanchik Diospa nisqankunamanta mana iskayrayanapaq.