Piwanpas amistadta ruwaspanchikqa yachananchikmi imayna runa kasqanta. Chaynallataqmi Diosman asuykunapaqpas yachananchikmi imayna Dios kasqanmanta. Imayna kasqanmanta yachaspanchikqa paymanmi asuykusun. Kay yachachikuypim yachasun atiyniyuq, yachayniyuq, allin kaqkunallata ruwaq chaynataq kuyakuq kasqanmanta.

‘¡Dios taytalláy!, qamqa hatun atiynikiwanmi cielokunatapas kay pachatapas unancharqanki’ (JEREMIAS 32:17).

Diospa tukuy unanchasqankunam qawachiwanchik ancha atiyniyuq kasqanta. Diosmi intita unancharqa, ichaqa manam rupayninwan wañurunanchikpaq hinachu, aswanqa qunikunanchikpaq hinallam. Ichaqa intiman asuykuspaqa chayllam ruparuchwan. Intiqa rawraq ninamantapas pura-puramintitam rupakullan (15.000.000 °C). Kay allpapi imapa rupayninpas intipa rupayninmanqa manam haypanchu.

Ichaqa hanaq pachapiqa kanmi intimantapas astawanraq hatunllay-hatun chaskakuna. Yachaysapa runakunam ninku UY Scuti sutiyuq chaska chayna hatu-hatun kasqanmanta. Chay hatunllay-hatun chaska intinchikpa rantinpi kaptinqa manachá kanmanchu allpa pachaqa. Kay yachayninchikmi yanapawanchik Jeremiaspa qillqasqanta allinta yachanapaq, paymi qillqarqa  hanaq pachapi kaqkuna chaynataq kay pachapi kaqkuna Jehova Diospa atiyninwan ruwasqa kasqanmanta.

¿Imaynatam Diosqa atiyninwan yanapawanchik? Diosmi tukuy imata unancharqa, chaykunaqa yanapawanchikmi kawsakuyninchikpi. Chaymantapas, sapakamatam atiyninwan yanapawanchik. ¿Imaynata? Kay allpapi Jesus kachkaptinmi milagrokunata ruwananpaq Jehova Diosqa atiyta qurqa. Chaymantam biblia nin: “Ñawsakunam kaqmanta qawakuchkanku, wistukunam purichkanku, leprawan unquqkunam sanoyachkanku, mana uyariqkunam uyarichkanku, wañuqkunam kawsarimuchkanku”, nispa (Mateo 11:5). ¿Imaynatam kunan tiempopipas Diosqa yanapawanchik? Bibliapim nin: “Paymi pisipasqakunata kallpanchan”, nispa. Nintaqmi: ‘Diosman hapipakuqkunam ichaqa musuq kallpayuq kanqaku’, nispa (Isaias 40:29, 31). Diospa quwasqanchik atiyqa yanapawanchikmi ima sasachakuytapas atipananchikpaq (2 Corintios 4:7). Anchatamá kusikunchik Diosqa kuyawaspanchik atiyninwan yanapawasqanchikmanta.

‘Dios taytalláy, ruwasqaykikunaqa mana yupay atinam, tukuy chaykunataqa yachaywanmi ruwarqanki’ (SALMO 104:24).

Diospa tukuy ima unanchasqankunata qawaspanchikmi musyanchik tukuy chaykunata yachaywan ruwasqanmanta. Chaymi yachaysapa runakunaqa imatapas ruwayta munaspanku Jehova Diospa unanchasqankunata qawanku qatipakunankupaq. Chaynata qatipakusqankuwanmi avionkunatapas allinta ruwanku.

Ichaqa Diospa tukuy ima unanchasqankunamantaqa runakunam aswan admirakuypaq unanchasqaqa kanchik. Wiksallapiraq kaq wawacha imayna wiñasqanpi yuyaymanasun. Warmi wiksayakuruptinqa wawacham wiñayta qallaykun. ¿Imaynata? Uchuychalla sulluchamantam pisi-pisimanta tulluchankunawan ankuchankuna wiñan, makichankunawan chakichankunapas wiñan, chaymantaqa wawachaqa mamanpa wiksanpim haytakachaytaña qallaykun. Isqun killallapim wawachaqa nacen chukchayuq, silluchayuq chaynataq tayta-mamanman rikchakuq. ¡Kayqa mayna admirakuypaqmi! Imayna unanchasqa kasqanchikmanta yachaspankum yachaysapa runakunapas admirakunku, bibliata qillqaq huk kaqnin runapas nirqam: “Admirakuypaq unanchawasqaykimantam yupaychayki”, nispa (Salmo 139:14).

¿Imaynatam yanapawanchik Dios ancha yachayniyuq kasqanqa? Diosninchikqa munanmi kusisqa kawsakunanchikta, chaymi bibliapi allinninchikpaq kaqkunata niwanchik, huk kaqninmi nin: “Hinallayá aguantanakuychik hinaspa tukuy sunqumanta pampachanakuychik”, nispa (Colosenses 3:13). ¿Allinninchikpaqchu kanman bibliapa chayna nisqanqa? Arí, allinninchikpaqmi. Doctorkunapas ninkum pampachakuq kasqanchikqa  miskita puñunapaq, imawanpas llumpayta mana unqunapaq chaynataq kusisqa kawsakunanchikpaq yanapawasqanchikmanta. Diosqa kuyakuq taytanchikmi, payqa ñuqanchikmantam nanachikun, chaymi allinninchikpaq kaqkunata niwanchik (2 Timoteo 3:16, 17). ¿Munawaqchu chayna Diosman asuykuyta?

“Diosqa allin ruwaytam kuyan” (SALMO 37:28).

Diosqa allin kaqkunallatam ruwan. Payqa manam haykapipas mana allin kaqtaqa ruwanmanchu (Job 34:10). Jehova Diosqa mana pimanpas sayapakuspam runakunata juzganqa (Salmo 67:4). Payqa sunqunchiktam qawan, yachanmi imakuna piensasqanchikta chaymi sapakamata chayman hina juzgawasunchik (1 Samuel 16:7). Qawamuchkantaqmi runakunapa tukuy mana allin ruwasqankutapas, chaymi mana allin ruwaypi kawsaqkunataqa ‘kay pachamanta chinkachinqa’ (Proverbios 2:22).

Ichaqa Diosqa manam munanchu runakuna wañunankutaqa. Bibliapim nin: “Diosqa llakipayarikuspa kuyakuqmi”, nispa. Arí, Jehova Diosqa llakipayakuqmi, chaymi pipas huchanmanta tukuy sunqunwan wanakuptinqa pampachaykun. Qawasqanchikman hinam Jehova Diosqa allin kaqkunallata ruwaq (Salmo 103:8; 2 Pedro 3:9).

¿Imaynatam yanapawanchik Diospa allin ruwaq kasqanqa? Apostol Pedrom nirqa: ‘Diosqa mana pimanpas sayapakuqmi, Diosqa chaskinmi lliw nacionkunapi respetaqnin hinaspa allin ruwaq runataqa’, nispa (Hechos 10:34, 35). Diosqa pimanpas mana sayapakusqanraykum may llaqtamanta, nacionmanta, ima kastamanta chaynataq kapuqniyuq utaq wakcha kaptinchikpas yupaychananchikpaq chaskiykuwanchik.

 Jehova Diosqa unanchawarqanchik imam allin utaq imam mana allin kasqanta musyakuqtam, chayna sunquyuqtam Diosqa unanchawarqanchik (Romanos 2:15). ¿Imapim chayna unanchasqa kasqanchikqa yanapawanchik? Chayna sunquyuq kasqanchikmi yanapawanchik allin kaqkunallata ruwanapaq, mana allin kaqkunata ruwaruptinchikñataqmi sunqunchik hukmanyasqa tarikun. Chayna hukmanyasqanchikmi yanapawanchik wanakunanchikpaq hinaspa mana allin kaqkunataqa manaña ruwananchikpaq. Wanakusqanchikqa Diosmanmi asuykachiwanchik.

“Diosqa kuyakuymi” (1 JUAN 4:8).

Jehova Diosqa atiyniyuqmi, chay atiyninwanmi tukuy imata unancharqa, chay unanchasqankunam qawachin ancha yachayniyuq kasqanta chaymantapas Jehova Diosqa allin kaqkunallata ruwaqmi. Ichaqa tukuy chaykunataqa ruwarqa kuyakuqllaña kasqanraykum.

Kuyakuqllaña kasqanraykum Jehova Diosqa unancharqa hanaq pachapi angelkunata, kay pachapiñataq runakunata. Kuyawasqanchikraykutaqmi allpa pachata tukuy imayuqta unancharqa. Chaymi ‘payqa intitapas qispichimun allin hinaspa mana allin runakunapaq, parachimunpas kasukuq chaynataq mana kasukuq runakunapaqmi’ (Mateo 5:45).

Chaymantapas “Jehova Diosqa llumpay kuyapayakuqmi hinaspapas llakipayakuqmi” (Santiago 5:11). Tukuy sunquwan payta riqsiy munaqkunataqa kuyakuywanmi yanapaykun. Payqa “manam llumpay karupichu” kachkan llampu sunquyuq runakunamantaqa (Hechos 17:27).

¿Imakunapim qawanchik Diospa kuyakuyninta? Diospa kuyakuynintam qawachwan ayllunchikpa kuyawasqanchikwan, wawachapa kuyayllapaq asirisqanwan chaynataq inti sapa punchaw lluqsimusqanwan. Chaykunaqa kusisqatam kawsachiwanchik.

Diospa kuyawasqanchiktaqa qawanchiktaqmi mañakusqanchikta uyariwasqanchikpipas. Chaymi biblia nin: “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik”, nispa. Taytanchik Jehova Diosqa munanmi ima llakinchiktapas willakunanchikta. Willakuptinchikqa paypa ‘hawkayayninmi sunqunchiktawan yuyayninchikta waqaychanqa’ (Filipenses 4:6, 7).

Kay yachachikuypim yacharunchik Jehova Diosqa atiyniyuq, yachayniyuq, allin kaqkunallata ruwaq chaynataq kuyakuqllaña kasqanmanta. Qatiqnin yachachikuykunapiñataqmi yachasunchik imata ruwasqanmanta chaynataq hamuq tiempopi imata ruwananmanta.