1, 2. (1) ¿Imamantam musyakururqa huk iñiqmasinchik? (2) ¿Imatam ruwarqa chayta musyakuruspan?

ROBERTO sutiyuq iñiqmasinchikmi mozollaraq kaspa bautizakururqa, ichaqa manam tukuy sunqunwanchu Diostaqa yupaychachkarqa. Paymi nin: “Manam ima huchatapas ruwarqanichu, ichaqa Jehova Diostaqa manam tukuy sunquywanchu yupaycharqani, ñuqamantaqa llapallan huñunakuykunamanmi rirqani hinaspa watapi wakin killakuna 50 horata Diosmanta willakurqani. Ichaqa manam allinchu tarikurqani”, nispa.

² Casarakusqan qipatañam imanasqa chayna tarikusqanmanta musyakururqa. Paymi warmichanwan bibliamanta tapunakuspanku pukllaqku. Warmichanqa Diosta kuyasqanraykum bibliamanta allinta yacharqa, chaymi Robertopa imapas tapusqanta yacharqa. Robertoñataqmi warmichanpa tapusqanta mana yachasqanwan pinqapakurqa. Chaymi yuyaymanarqa: “Aylluypi nanachikuq kaspayqa astawanmi Diosmanta kikiy yachanay”, nispa. Chaytamá payqa ruwarqa, paymi nin: “Bibliatam alli-allinta estudiayta qallaykurqani, hinaspam nisqanta chayraq allinta yacharurqani”,  nispa. Chay ruwasqanmi yanaparqa bibliamanta imam kaqta yachananpaq hinaspa Jehova Diosta astawan kuyananpaqpas.

3. (1) ¿Imatam yachachiwanchik Robertota pasasqan? (2) ¿Ima tapukuykunamantam yachachkasun?

³ Robertota pasasqanqa kaytam yachachiwanchik: Ichapas bibliapa nisqanta yachanchik, llapallan huñunakuykunaman rinchik hinaspa iñiqmasinchikkunawan Diosmanta willakunchik. Ichaqa manam chay ruwasqanchikraykuqa nichwanchu Diosta kuyasqanchiktaqa. Ichapas Dios yupaychayninchikpi ñawparichkanchik, ichaqa allinta qawakuspam musyakunchik hinalla kallpanchakunanchikmanta (Filip. 3:16). Chaymi astawan kallpanchakunapaq kimsa tapukuykuna yanapawasunchik: ¿Imataq yanapawasun Diosta kuyasqanchik imayna kasqanta musyakunapaq? ¿Imatam ruwananchik Diosta astawan kuyananchikpaq? Hinaspa, ¿imaynatataq kawsasqanchikpi yanapawasun astawan Diosta kuyayqa?

4. ¿Pikunataq kasukunanku Efesios 4:23, 24 nisqanta?

⁴ Diospa yupaychaqninkuna kanapaqqa, ñawpaqpi mana allin ruwasqanchiktam saqirqanchik. Hinaspa bautizakuruspapas hinallam allinkunata ruwanapaq kallpanchakunanchik karqa. Bibliam niwanchik: “Hinallayá imayna piensasqaykichikta musuqyachiychik”, nispa (Efes. 4:23, 24). Pantaq runa kasqanchikraykum, llapallanchik hinalla kallpanchakunanchik musuq runa hinaña kanapaq. Unay watakunaña Jehova Diosta yupaychaqkunapas hinallam kallpanchakunanku Diosta astawan kuyanankupaq (Filip. 3:12, 13).

5. ¿Ima tapukuykunataq yanapawasun Diosta kuyasqanchik imayna kasqanta musyakunapaq?

⁵ Mozo-sipasña kaspapas utaq yuyaqña kaspapas llapallanchikmi tapukunanchik: “¿Astawan Dios kuyasqaytachu musyakuni? ¿Kallpanchakuchkanichu Jesuspa imayna kasqanta qatipakunaypaq? ¿Huñunakuykunata chaninchasqaytachu qawachini imapas ruwasqaywan? Iñiqmasiykunawan rimaspayqa, ¿imamantam astawan rimani? ¿Imayna runa kasqaytataq qawachin bibliata imayna estudiasqay, imayna pachakuspa allichakusqay hinaspa rimapayawasqankuta kasukusqay? ¿Imatam ruwani mana allinkunata ruwanaypaq hikutasqa kaspay? Iñiyniypi, ¿warma hinallaraqchu kani icha yuyayniyuq hinachu?”, nispa (Efes. 4:13). Kay tapukuykunamanta ima nisqanchikmi yanapawasun Diosta kuyasqanchik imayna kasqanta musyakunapaq.

6. ¿Imataq yanapawasun Diosta kuyasqanchik imayna kasqanta yachananchikpaq?

⁶ Diosta kuyasqanchik imayna kasqanta yachananchikpaqqa wakinpiqa hukkunapa  yanapakuynintam chaskinanchik. Apostol Pablom nirqa munasqallanman hina kawsaq runaqa ruwasqanwan Diosta piñachisqanta mana musyakusqanmanta. Dioswan kuyachikuyta munaq runam ichaqa Dios hina piensan, chaymi yachan aychapa munasqanman hina kawsakuytaqa Jehova Dios chiqnisqanta (1 Cor. 2:14-16; 3:1-3). Iñiqkunapi punta apaqkunaqa Jesus hina piensasqankuraykum, chaylla musyakunku pikuna aychapa munasqanman hina kawsasqankuta hinaspa yanapanku. Punta apaqkuna mana allin kasqanchikta musyaspanku rimapayawaptinchikqa, ¿kasukunchikchu? Kasukuspaqa qawachisunmi Diosta astawan kuyasqanchikta (Ecl. 7:5, 9).

7. ¿Imanasqataq Diosta tukuy sunqunchikwan kuyanapaqqa mana bibliamanta yachayllachu?

⁷ Bibliamanta achkata yachaspanchikpas manam chayraykullaqa nichwanchu Diosta tukuy sunqunchikwan kuyasqanchiktaqa. Salomonqa achkatam Diosmantaqa yacharqa, hinaspapas yachaywan rimasqantam bibliapi tarinchik, ichaqa chaymanta qipataqa manañam Diosman sunquñachu karqa (1 Rey. 4:29, 30; 11:4-6). Chaynaqa, bibliamanta yachaspanchikpas kallpanchakunanchikmi Diosta tukuy sunqunchikwan hinalla kuyananchikpaq (Col. 2:6, 7). ¿Imaynatam chayta ruwachwan?

8, 9. (1) ¿Imataq yanapawasun iñiyninchik allinta takyananpaq? (2) ¿Imapaqmi estudiananchik hinaspa yuyaymananchik? (Qaway 22 kaq paginapi fotokunata).

⁸ Pablom iñiqmasinkunata kallpancharqa yuyayniyuq kanankupaq (Heb. 6:1). Kunanpas Pablopa nisqantam ruwananchik. Chaymi ancha allin kanman Hinallayá Dioswan kuyachikusun niq qillqanchikta estudiayninchik. Chay qillqata estudiaymi yanapawasun bibliapa yachachisqanman hina kawsakunanchikpaq. Chay qillqata estudiayta tukuruspanchikqa huk kaqnin qillqanchikkunatañam estudiananchik, chaynapi iñiyninchik allinta takyananpaq (Col. 1:23). Chaymantapas Diostam mañakunanchik, hinaspa yuyaymanananchik yachasqanchikman hina imayna kawsanapaq.

 ⁹ Estudiasqanchikpi yuyaymanayqa kallpanchawananchikmi tukuy sunquwan Diospa munayninta ruwanapaq hinaspa kasukunapaq (Sal. 40:8; 119:97). Chaymantapas kallpanchakunanchikmi imapas mana allinkunata saqinanchikpaq chaynapi hinalla Dioswan kuyachikunapaq (Tito 2:11, 12).

10. ¿Imatam mozo-sipaskunaqa ruwananku Diosta astawan kuyanankupaq?

¹⁰ Mozo-sipas kaspaykiqa, ¿tantearqankiñachu astawan Diospaq llamkanaykipaq? Betel wasipi yanapakuq iñiqmasinchikmi hatun huñunakuykunapi bautizakuq mozo-sipaskunata rimapayan. Paykunawan rimaspanmi tapun Diospa llaqtanpi imakuna ruway munasqankumanta. Achka mozo-sipaskunapa nisqanmi qawachin Diosta yupaychasqankupi imakuna ruway munasqankuta. Wakinkum tukuy tiemponkuwan Diospaq llamkayta munanku utaq Diosmanta mana willakuqkuna kasqanman astakuyta munanku. Ichaqa wakinpim wakin mozo-sipaskuna mana yachankuchu ima niyta. Ichapas piensanku bautizakusqanku qipataqa manaña imatapas ruwanankumanta. Chaymi allin kanman mozo-sipaskunapa kayna tapukuyninku: “¿Tayta-mamay mana piñakunanraykullachu huñunakuykunaman hinaspa Diosmanta willakuq rini? Icha, ¿Dioswan kuyachikuyta munaspaychu?”, nispa. Chaynaqa, mozo-sipasña utaq yuyaqña kaspapas llapallanchikmi Diospaq astawan llamkanapaq kallpanchakunanchik. Kaymi yanapawasun Diosta astawan kuyananchikpaq (Ecl. 12:1, 13).

11. (1) ¿Imatam ruwananchik Diosta astawan kuyananchikpaq? (2) ¿Pitaq qatipakunapaq hina?

 ¹¹ Imapipas kallpanchakunamanta musyakuspaqa chayllam chayta ruwananchikpaq kallpanchakunanchik. Chay ruwayninchikqa ancha allinmi, chaymantam kanqa kawsakuyninchik utaq wañuyninchikpas (Rom. 8:6-8). Allin yuyayniyuq kanapaqqa Diosmi espiritunwan yanapawanchik, ichaqa ñuqanchikpas hinallam kallpanchakunanchik. Hanaq pachapaq suyakuyniyuq John Barr iñiqmasinchikmi Lucas 13:24 versiculomanta kaynata nirqa: “Achka iñiqmasinchikkunam Diosmanta karunchakunku Diospa munayninta ruwanankupaq mana anchata kallpanchakusqankurayku”, nispa. Jacob hinam ñuqanchikpas kananchik, payqa huk angelwanmi atipanakurqa bendecinankama (Gen. 32:26-28). Bibliamanta yachayqa suma-sumaqmi. Ichaqa manam ñawinchayllachu-ñawinchananchik. Astawanqa suma-sumaqtam estudiananchik, chaymi yanapawasun Diosta astawan kuyananchikpaq.

12, 13. (1) ¿Imataq yanapawasun Jesus hina piensanapaq? (2) ¿Imam Pedrota pasarqa hinaspa imata ruwananchikpaqmi nirqa? (3) ¿Imatam ruwananchik Diosta astawan kuyananchikpaq? (Qaway “¿Imatam ruwachwan Diosta astawan kuyanapaq?” niq willakuyta).

¹² Diosta kuyanapaq astawan kallpanchakuptinchikqa, Diosmi chuya espiritunwan yanapawasunchik Jesus hinaña piensananchikpaq (Rom. 15:5). Yanapawasuntaqmi mana allinkunata mana munapayanapaq, hinaspa Diospa munasqanman hina sumaq sunquyuq kanapaq (Gal. 5:16, 22, 23). Qullqisapa kayta utaq aychanchikpa munasqanta ruwayta munasqanchikta musyakuspaqa, kallpanchakunanchikmi Diospa chuya espiritunta hinalla mañakunanchikpaq. Chaynapim Jehova Diosqa yanapawasun allin kaqkunata ruwanapaq (Luc. 11:13). Yuyarisun apostol Pedropa pasasqanta. Payqa achka kutipim pantarurqa (Mat. 16:22, 23; Luc. 22:34, 54-62; Gal. 2:11-14). Chayna kaptinpas hinallam kallpanchakurqa. Diospa yanapakuyninwanmi Pedroqa Jesus hinaña piensayta qallaykurqa. Ñuqanchikpas atichwanmi Jesus hina piensayta.

¹³ ¿Imakunatam chaypaq ruwananchik? Pedrom nirqa ‘controlakuq kananchikpaq, sasachakuykunapi allinta takyananchikpaq hinaspa wawqi-panintin hina sientinakunanchikpaq’ (qaway 2 Pedro 1:5-8). Chaymi allin kanman sapa punchaw kayna tapukuyninchik: “¿Imatam kunan ruwayman Diosta astawan kuyanaypaq?”, nispa.

14. ¿Imapaqmi yanapawasunchik tukuy sunqunchikwan Diosta kuyayqa?

¹⁴ Jesus hina piensasqanchikmi suti riqsiylla kanqa rimayninchikpi, sapa punchaw imapas tanteasqanchikpi hinaspa llamkayninchik utaq estudiasqanchik lawpi imayna kasqanchikpi. Chaykunam qawachinqa Jesusta qatipakunapaq kallpanchakusqanchikta. Tukuy sunqunchikwan Jehova Diosta kuyaspanchikqa, manam saqisunchu Dioswan kuyachikusqanchikta imapas yanqacharunantaqa. Mana allinkunata ruwanapaq hikutasqa kaspapas chayllam qipanchasun. Hinaspapas manaraq imatapas ruwachkaspam kaynataraq tapukusun: “¿Bibliapa ima nisqantaq yanapawanqa allinta tanteanaypaq? ¿Imatam Jesusqa ruwanman karqa? ¿Ima ruwanaytam Jehova Diosqa munan?”, nispa. Sapa kuti kaykunapi yuyaymanananchikpaqmi kallpanchakunanchik. Kunanñataq qawasun bibliawan yanapachikuspa imaynata tanteanamanta.

15, 16. (1) Jesus hina piensayqa, ¿imaynatam yanapawanchik piwan casarakunapaq allinta tanteananchikpaq? (2) Jesus hina piensayqa, ¿imaynatam yanapawanchik amistadninchikkunata akllananchikpaq?

 ¹⁵ Piwan casarakunapaq tanteaymanta. Chaypaqqa qawananchikmi 2 Corintios 6:14, 15 nisqanta (qaway). Pablopa nisqanqa sutillatam yachachiwanchik iñiq runaqa mana iñiq runawanqa mana hukllawakunanmanta. Hinaptinqa, ¿imaynatam kayna nisqanqa yanapawanchik piwan casarakunapaq tanteananchik kaptinqa?

¹⁶ Amistadninchikkunata akllaymanta. Bibliapa nisqanta qawasun 1 Corintios 15:33 nisqanpi (qaway). Dioswan kuyachikuyta munaqkunaqa manam Diosmanta karunchachikuq amistadkunawanqa hukllawakunankuchu. Bibliapa kayna nisqanpi yuyaymanaspanchikmi tapukuchwan: “¿Imaynatam bibliapa kayna nisqanqa yanapawanman internetta imayna servichikunaypaq? ¿Imatam ruwayman mana riqsisqay runa internetnintakama paywan pukllanaypaq niwaptin?”, nispa.

17-19. (1) ¿Imakunapim tiemponchikta mana usuchisunchu Diosta kuyaspanchikqa? (2) ¿Imakunata ruwananchikpaqmi kallpanchakusun Diosta kuyaspanchikqa? (3) ¿Imaynatam Diosta kuyasqanchikqa yanapawanchik piwanpas piñanakuruptinchik chaylla allichanapaq?

¹⁷ Diospaq astawan ruwananchikpaq tiemponchikta usuchiq ruwaykunamanta. Chaymantam yachachiwanchik Hebreos 6:1 (qaway). Pablom qillqarqa ‘mana valeq ruwaykunata’ mana ruwananchikpaq, chay ruwaykunaqa tiemponchiktam usuchin Diosmanta astawan yachananchikmantaqa. Bibliapa kayna nisqanqa yanapawanchikmi kaykunapi yuyaymanananchikpaq: “¿Kay ruwasqayqa allinniypaqchu icha yanqachu tiempoyta usuchiwan? ¿Astawan qullqita chaskinayraykullachu huk llamkayta chaskikunay? ¿Imanasqataq mana hukllawakunaychu kay allpa pacha allin kananpaq tukuy imata ruwaq runakunawanqa?”, nispa.

¹⁸ Diospa llaqtanpi imakuna ruway munasqanchikmanta. Ancha riqsisqa yachachikuyninpim Jesusqa nirqa imakunata ruwananchikpaq kallpanchakunanchikmanta (Mat. 6:33). Diosta kuyaq runapaqa Diospa munaychakuyninmi imamantapas aswan allinqa. Ichapas tapukunchik: “¿Estudiasaqchu universidadpi icha manachu? ¿Allinchu kanman niwasqanku llamkaypi llamkay?”, nispa. Jesuspa nisqanqa imapipas allinta tanteananchikpaqmi yanapawanchik.

¹⁹ Piwanpas piñanakuruspa. Roma llaqtapi iñiqmasinkunaman Pablopa nisqanmi yanapawasun piwanpas piñanakuruptinchik (Rom. 12:18). Jesuspa qatiqninkunaqa kallpanchakunchikmi “llapallan runakunawan hawkalla” kananchikpaq. ¿Imaynataq kanchik piwanpas piñanakuruspanchik? ¿Sasachakunchikchu iñiqmasinchikta rimapayanapaq icha chayllachu allinyanakurunchik? (Sant. 3:18).

20. ¿Imanasqataq Diosta astawan kuyanaykipaq kallpanchakunayki?

²⁰ Hinaptinqa, bibliapa nisqanpi yuyaymanayqa yanapawasunmi allinta tanteananchikpaq, chaywanqa qawachisuntaqmi Diosta kuyasqanchiktapas. Chaymantapas aswan kusisqam kasun. Kay yachachikuypa qallariyninpi rimamusqanchik Robertom nin: “Jehova Diosta astawan riqsiruspaymi aswan allin qusa hinaspa allin tayta karqani. Chaywanmi ancha kusisqa tarikuni”, nispa. Chaynam ñuqanchikpas tarikusun tukuy sunqunchikwan Diosta kuyanapaq kallpanchakuspanchikqa. Kusisqam kay tiempopi hinaspa hamuq tiempopipas tarikusunchik (1 Tim. 6:19).