DIOSMANTA willakuyninchikqa ancha chaninniyuqmi, ichaqa achka runakunam mana kaqpaqpas hapinkuchu. Bibliamanta yachay munaq runakunapas manam llapanpichu ñuqanchikwan estudiayta munanku.

Chaynam pasarqa Gavin sutiyuq runawan, payqa huñunakuykunamanmi riq, ichaqa manam munarqachu pipas bibliamanta yachachinantaqa. Paymi nin: “Bibliamanta mana ancha yachasqayraykum pinqapakurqani pipas musyaruwananmanta. Manam munarqanichu paykuna pantarachiwanantaqa nitaqmi paykunapa religionninman yaykuytapas”, nispa. Gavinta qam riqsispaykiqa, ¿imatam ruwawaq karqa? ¿Haykapipas bibliata mana estudianantachu niwaq karqa? Chayna kaptinqa, ichapas yanapasunkiman Moisespa takisqanpi yuyaymanayniki, takirqam: “Sulla hinam wichiypaq wichimunqa rimasqayqa. Chayamunqaqa lliwapa hawanman paramuchkaq hinam”, nispa (Deut. 31:19, 30; 32:2). Yachasunchikyá sullapa imayna kasqanmanta hinaspa tupachisun Diosmanta willakuyninchikwan (1 Tim. 2:3, 4).

Sullaqa llampuchallam. Sullaqa alli-allimantam chiri wayrawan kikillanmanta sullayan. Moisespa rimasqanqa sulla hinam karqa, Diospa llaqtanpi runakunata kuyakuywan hinaspa sumaqllata rimapayasqanrayku. Ñuqanchikpas Moisestam qatipakuchwan hukkunapa ima piensasqankuta uyarispanchik. Huk rimaypiqa kallpanchananchikmi yuyaymananankupaq hinaspa kikinku imatapas tanteakunankupaq. Chaynata ruwaptinchikqa uyariwasunmi hinaspapas Diosmanta willakusqanchiktam uyarinqaku.

Sullaqa llumpay rupaypi chiri yaku hinam. Diosmanta willakuyninchikpas chaynam kanqa runakunapa yachay munasqanpi yuyaymanaptinchikqa. Chris sutiyuq iñiqmasinchikmi Gavin runaman yachachiyta qallaykurqa, ichaqa manam hikutarqachu, aswanmi Diospa palabranmanta yachaspan hawka tarikunanpaq hina yanaparqa. Iñiqmasinchikqa Gavin runatam nirqa bibliapi huk sumaq yachachikuy kasqanta hinaspa chayta yachaspanqa huñunakuypi rimasqankutapas astawan entiendenanmanta. Chaymantapas nirqam bibliapi willakuykuna imayna cumplikusqan Diosmanta mana iskayrayananpaq yanapasqanmanta. Chayna nisqanta uyarisqanmi Gavintaqa yanaparqa biblia estudiayta qallarinanpaq.

Sullaqa ancha allinmi kawsanapaq. Israel nacionpiqa achka killakunam mana para kaptin llumpay rupaywan usyallaña karqa. Sulla mana kaptinqa plantachakunam chakirunman. Diosmi nirqa kunan tiempopipas usya tiempopi hina runakuna iñiyninkupi kanankumanta (Amos 8:11). Ichaqa Diosqa nirqataqmi hanaq pachapaq suyakuyniyuq iñiqmasinchikkuna ‘Diosmanta hamuq sulla hina’ kasqankuta. ¿Imanasqa? Paykunam Diospa kamachimunanmanta sumaq willakuykunata willakunanku karqa ‘sapaq ovejakunapa’ yanapakuyninwan (Miq. 5:7; Juan 10:16). Arí, Diospa kamachimunanmanta sumaq willakuykunata runakunam apasqanchikmi kawsakuyta qun iñiyninkupi. ¿Chaninchanchikchu chay willakuyta?

Sullaqa Jehova Diospa bendicionninmi (Deut. 33:13). Diosmanta willakuyninchikpas uyariwaqninchik runakunapaqqa sumaq bendicionmi. Gavin runam chayna karqa, payqa bibliata estudiaspanmi lliw tapuyninkunata tarirurqa. Chaymi pisi tiempollamanta bautizakururqa, kunanqa Joyce sutiyuq warminwanmi Diosmanta kusisqa willakuchkanku.

Sullapi yuyaymanaymi yanapawasun Diosmanta astawan willakunapaq. ¿Imaynata? Huk sutuy yakullaqa manam imananchu, waranqantin sullapa sutusqanmi ichaqa allpa ukukama yaykun. Yaqa chaynam sapallanchik Diosmanta willakukuyninchikpas rikchakunman. Ichaqa lliw iñiqmasinchikkunawan kuska Diosmanta willakuspaqa ‘llapallan nacionpi runakunamanmi’ chayasunchik (Mat. 24:14). Yapapi Diosmanta willakuq lluqsiptinchikqa, ¿sumaq bendicionchu kanqa haykam Jehova Diosmanta uyariqkunapaq? Chaynam kanqa kuyakuywan hinaspa sumaqllata runakunawan rimaptinchikqa.