1, 2. (1) ¿Imatam Jehova Diosqa qawan Jesuspa wañukusqanta yuyarinapaq huñunakuyman runakuna riptinku? (Qaway kay qillqapa qaranpi kaq fotota). (2) ¿Imamantam kay yachachikuypi yachasunchik?

JESUSPA wañukusqanta yuyarinapaq huñunakuymanqa millonnintin runakunam rinku. Jehova Diosqa manam hayka runakuna risqantachu qawan, aswanqa payqa chay huñunakuyman riqkunatam sapakamata qawan, qawanmi imayna sunquyuq kasqankuta. Jehova Diosqa yachanmi chay huñunakuyman sapa wata pikuna risqankuta. Wakiqninkum chay huñunakuyman rinku autoridadkunapa qatikachasqa kaspankupas. Wakinkuñataqmi sapa semana huñunakuyman mana rispankupas Jesuspa wañukusqanta yuyarinapaq huñunakuymanqa sapa wata rinku. Jehova Diosqa qawachkantaqmi chay huñunakuyman chayllaraq riq runakunatapas.

² Jehova Diosqa anchatam kusikun Jesuspa wañukusqanta yuyarinapaq huñunakuyman achkallay-achka runakuna riptinku (Luc. 22:19). Hayka runakuna risqankuta qawaspanpas payqa astawanmi kusikun imarayku risqankuta qawaspan. Kay yachachikuypim yachasunchik kay tapukuymanta: ¿Imanasqataq mana rinchikchu Jesuspa wañukusqanta yuyarinapaq huñunakuyllamanqa, aswanqa rinchiktaq sapa huñunakuykunamanpas? Yachasunyá imaynam mana hatun tukuq kasqanchik, mana manchakuq kasqanchik hinaspa kuyakuq kasqanchik huñunakuykunaman rinapaq yanapawasqanchikmanta.

3, 4. (1) ¿Imanasqataq huñunakuyman rinchik? (2) ¿Imayna kasqanchiktam qawachinchik huñunakuyman rispanchik? (3) 1 Corintios 11:23-26 nisqanman hinaqa, ¿imaynanpitaq rinanchikpuni Jesuspa wañukusqanta yuyarinapaq huñunakuymanqa?

³ Huñunakuymanqa rinchik Jehova Diosta yupaychananchikpaqmi. Rinchiktaqmi Jehova Diosmanta astawan yachananchikpaq. Hatun tukuq runakunam ichaqa manaña munankuñachu pi yachachinantapas (3 Juan 9). Ñuqanchikmi ichaqa munanchik Jehova Dios llaqtantakama yachachiwananchikta (Is. 30:20; Juan 6:45).

⁴ Huñunakuykunaman rispanchikqa mana hatun tukuq kasqanchiktam qawachinchik. Qawachinchiktaqmi Jehova Diospa yachachisqan kayta munasqanchiktapas. Jesuspa wañukusqanta yuyarinapaq huñunakuymanqa rinchik manam pipas hikutawaptinchikchu, aswanqa mana hatun tukuq kasqanchikraykum hinaspa Jesuspa kamachiwasqanchikta kasukusqanchikraykum. Paymi nirqa: “Hinallayá kayta ruwaychik ñuqata yuyariwaspa”, nispa (qaway 1 Corintios 11:23-26). Kay huñunakuyqa anchatam kallpanchawanchik suyakuyninchikpi yuyaymananapaq, chaymantapas qawachiwanchiktaqmi Jehova Dios ancha-anchata kuyawasqanchikta. Chaywanpas Diosqa yachantaqmi astawan kallpanchasqa kananchikta, chayraykum huñunakunanchikpaq niwanchik. Mana hatun tukuq kayninchikmi yanapawanchik niwasqanchikta kasukunapaq. Chayraykum sapa huñunakuyman rinchik hinaspa chaypaq kaq qillqanchikkunata allinta ñawinchanchik.

5. ¿Imanasqataq mana hatun tukuq runakunaqa huñunakuyninchikkunaman riyta munanku?

⁵ Sapa watam, mana hatun tukuq achka runakuna Diosmanta yachayta munanku (Is. 50:4). Wakinkuqa puntatam Jesuspa wañukusqanta yuyarinapaq huñunakuyman rinku, chaymantañam sapa semana huñunakuyman riyta qallarinku (Zac. 8:20-23). Paykunapas hinaspa ñuqanchikpas anchatam kusikunchik huñunakuypi Jehova Diospa kamachikuyninkunamanta yachaspanchik hinaspapas yanapayninta chaskispanchik. Arí, Jehova Diosqa mana allinkunamantam libraykuwanchik (Sal. 40:17). Chaynaqa huñunakuykunaman riyqa imamantapas aswan allinmi, chaypim Jehova Dioswan Jesus yachachiwanchik (Mat. 17:5; 18:20; 28:20).

6. Jesuspa wañukusqanta yuyarinapaq huñunakuyman huk runa rinanpaq, ¿imaynatam mana hatun tukuq kasqanqa yanaparqa?

⁶ Sapa watam runakunata ninchik Jesuspa wañukusqanta yuyarinapaq huñunakuyman hamunankupaq, chaypaqqa anchatam kallpanchakunchik. Mana hatun tukuq achka runakunam chay huñunakuypi ima uyarisqankuwan allinta yanapachikurqaku. Huk kutipim, huk iñiqmasinchik Jesuspa wañukusqanta yuyarinapaq huñunakuyman huk runata rinanpaq nirqa. Chay runañataqmi mana riy atinanmanta nirqa. Ichaqa chay huñunakuymanqa rirqam. Chaywanmi iñiqmasinchikqa anchata kusikurqa. Wakin iñiqmasinchikkunapas kuyakuywanmi chaskiykurqaku, chayta qawaspanmi chay runaqa kusikurqa hinaspa huñunakuykunamanpas riyta qallaykurqa. Payqa kimsa kutillatam watapi mana riyta atirqachu. Ichaqa, ¿imataq chay runata yanaparqa huñunakuykunaman rinanpaq? Iñiqmasinchikmi chay runamanta nin: “Payqa mana hatun tukuqmi”, nispa. Arí, Jehova Diosqa chay runatam llaqtanman pusamurqa, chaymi kunanqa Jehova Diospa testigonña (2 Sam. 22:28; Juan 6:44).

7. ¿Imaynatam yanapawanchik huñunakuykunapi yachasqanchikkuna hinaspa bibliata ñawinchasqanchikkuna mana hatun tukuq kananchikpaq?

⁷ Huñunakuykunapi yachasqanchikkuna hinaspa bibliata ñawinchasqanchikkunam yanapawanchik mana hatun tukuq kananchikpaq. Iskay-kimsa semanakuna manaraq Jesuspa wañukusqanta yuyarinapaq huñunakuy chayachkaptinmi, huñunakuykunapi Jesusta imayna qatipakunapaq yachachikuykuna kan, kantaqmi mana hatun tukuspan ñuqanchikrayku vidanta qusqanmanta  yachachikuykunapas. Chaymantapas chay punchaw manaraq chayamuchkaptinmi kallpanchakunanchik bibliata ñawinchananchikpaq. Ñawinchachwanmi Jesuspa wañusqanmanta hinaspa imayna kawsarichisqa kasqanmantapas. Kaykunam yanapawasunchik Jesuspa ruwasqanta anchata chaninchananchikpaq. Yanapawasuntaqmi Jesus hina mana hatun tukuq kananchikpaq hinaspa imaña kaptinpas Jehova Diospa munayninta hinalla ruwananchikpaqpas (Luc. 22:41, 42).

8. ¿Imaynatam Jesusqa mana manchakuq kasqanta qawachirqa?

⁸ Jesusqa mana manchakuqmi karqa. Payqa yacharqam chiqniqninkuna payta pinqaypi churanankumanta, maqapanankumanta hinaspa qirupi warkunankumanta (Mat. 20:17-19). Payqa manam wañuytaqa manchakurqachu. Wañunanpaq tiempo chayaramuptinmi Getsemani huertapi paywan kaq apostolninkunata kaynata nirqa: “Hatariychik, hakuchik. Traicionawaqniymi hamuchkanña”, nispa (Mat. 26:36, 46). Presochanankupaq maskaptinkuñataqmi Jesusqa mana manchakuspa nirqa maskasqanku runaqa pay kasqanta, nirqataqmi qatiqninkunata ama imananankupaqpas (Juan 18:3-8). Chaywanqa mana manchakuq kasqantam qawachirqa. Kay tiempopipas, hanaq pachapaq kaqkunaqa hinaspa kay pachapi kawsanankupaq suyaqkunaqa, Jesuspa mana manchakuq kasqanta qatipakunanchikpaqmi kallpanchakunchik. ¿Imaynata?

9. (1) ¿Imanasqataq anchata kallpanchakunanchik hinaspa mana manchakuq kananchik sapa kuti huñunakuykunaman rinanchikpaq? (2) ¿Imaynam presochasqa iñiqmasinchikkunaqa tarikunku huñunakuykunaman rinapaq kallpanchakusqanchikta yachaspanku?

⁹ Ichapas sasachakuykuna kasqanrayku wakinpiqa huñunakuykunaman riyta mana atinchikchu. Chayna kaptinqa anchatam kallpanchakunanchik hinaspa mana manchakuq kananchik. Wakin iñiqmasinchikkunam unqunku, llumpay llakisqa utaq hukmanyasqa tarikunku. Wakin iñiqmasinchikkunatañataqmi ayllunku utaq autoridadkuna llumpayta sasachanku Diosta yupaychasqankurayku. Piensarisun presochasqa iñiqmasinchikkunapi. ¿Haykallapipas piensarqanchikchu Diosta hinalla servisqanchikrayku paykuna kallpanchasqa tarikusqankumanta? (Heb. 13:3). Sasachakuykunapi tarikuspanchikpas Diosta hinalla servisqanchikta yachaspankum, paykunaqa kallpanchasqa tarikunku Diosman sunqu kanankupaq. Chaynam apostol Pablopas tarikurqa. Roma nacionpi preso kachkaspanmi, payqa kusisqa tarikurqa iñiqmasinchikkuna hinalla Diosman sunqu kasqankuta uyarispan (Filip. 1:3-5, 12-14). Chaymanta qipakunatam iñiqmasinkunata kaynata nispan qillqarqa: “Amayá huñunakuyman riytaqa saqisunchu”, nispa. Nirqataqmi: “Wawqi-panintin hina kuyanakuynikichikqa amayá chiriyaruchunchu”, nispa (Heb. 10:24, 25; 13:1).

10, 11. (1) ¿Pikunatam ninanchik Jesuspa wañukusqanta yuyarinapaq huñunakuyman hamunankupaq? (2) Efesios 1:7 nisqaman hinaqa, ¿imanasqataq chayta ruwananchik?

¹⁰ Mana manchakuq kasqanchiktaqa qawachinchiktaqmi Jesuspa wañukusqanta yuyarinapaq huñunakuyman ayllunchikta, llamkaqmasinchikkunata hinaspa riqsinakusqanchikkunata hamunankupaq  nispanchik. ¿Imanasqataq chaypaq anchata kallpanchakunchik? Jehova Diospa hinaspa Jesuspa ñuqanchikpaq ruwasqankumanta anchata agradecekusqanchikraykum. Chaymantapas ñuqanchikwan huñunakuspankum paykunapas yachanqaku Jehova Dios ñuqanchikpaq Jesuspa wañukusqanwan tukuy ima ruwasqanta (qaway Efesios 1:7; Apoc. 22:17).

¹¹ Huñunakuykunaman rispanchikqa qawachinchiktaqmi kuyakuq kasqanchikta. Jehova Dioswan Jesusqa kuyakuq kasqankutaqa sutillatam qawachinku.

12. (1) ¿Imanasqataq huñunakuykunaqa Jehova Diostawan Jesusta astawan kuyanapaq yanapawanchik? (2) 2 Corintios 5:14, 15 nisqanman hinaqa, ¿imaynatam Jesusta qatipakuchwan?

¹² Jehova Diostawan Jesusta kuyasqanchikraykum huñunakuykunaman rinchik. Huñunakuykunañataqmi astawan paykunata kuyananchikpaq yanapawanchik. Chaypim sapa kuti yuyarinchik Jehova Dioswan Jesus ñuqanchikpaq ruwasqankumanta (Rom. 5:8). Jesuspa wañukusqanta yuyarinapaq huñunakuypim astawanraq yachanchik maynata kuyawasqanchikta. Ñuqanchikqa ancha agradecesqam tarikunchik, chaymi kawsakuyninchikpi Jesusta sapa kuti qatipakunanchikpaq kallpanchakunchik (qaway 2 Corintios 5:14, 15). Chaymantapas ñuqanchikpaq churinta kachamusqanmantam Jehova Diosta hatunchayta munanchik. Diostaqa hatunchanchiktaqmi huñunakuykunapi sunqumanta rimarispapas.

13. ¿Imaynatam qawachichwan Jehova Diostawan Jesusta anchata kuyasqanchikta?

¹³ Jehova Diostawan Jesusta kuyasqanchiktaqa qawachinchiktaqmi paykunarayku imatapas ruwaspanchik utaq saqispanchik. Huñunakuykunaman rinapaqqa anchatam kallpanchakunanchik. Wakinninchikqa llamkasqanchik punchawkunapipas huñunakuyninchikmanqa rinchikmi pisipasqa tarikuspapas. Sabado utaq domingo punchawpiñataqmi huknin huñunakuyninchikman rinchik, samarinanchik kachkaptinpas. ¿Jehova Diosqa qawachkanchu pisipasqaña kaspapas huñunakuykunaman rinanchikpaq kallpanchakusqanchikta? Arí. Chaymantapas astawan kallpanchakusqanchikta qawaspanmi Jehova Diosqa astawanraq kuyawasun (Mar. 12:41-44).

14. ¿Imaynam Jesusqa karqa?

¹⁴ Jesusqa hukkunata kuyasqanraykum allinninkuta maskarqa. Chaymi runakunarayku wañurqa. Chaymantapas qatiqninkunapa allinnintam sapa punchaw maskaq kikinpa allinninta  maskananmantaqa. Chaymi paykunawan huñunakurqa pisipasqa utaq llakipa intusqan kaspanpas (Luc. 22:39-46). Chaymantapas payqa manam suyarqachu hukkuna servinantaqa, aswanqa hukkunatam servirqa (Mat. 20:28). Jesus hina Jehova Diosta hinaspa iñiqmasinchikkunata sunqumanta kuyaspanchikqa, kallpanchakusunmi Jesuspa wañukusqanta yuyarinapaq huñunakuyman hinaspa wakin huñunakuykunamanpas rinapaq.

15. ¿Pikunatam astawanraq yanapananchik?

¹⁵ Ñuqanchikqa Diospa chiqap llaqtanpim kachkanchik, chaymi anchata kallpanchakunchik hukkunapas ñuqanchikwan kanankupaq. Ichaqa astawanmi yanapananchik huñunakuykunaman manaña hamuq ‘iñiqmasinchikkunata’ (Gal. 6:10). Kuyaspanchikmi paykunata kallpanchananchik huñunakuykunaman hamunankupaq, astawanraq Jesuspa wañukusqanta yuyarinapaq huñunakuyman hamunankupaq. Jehova Dioswan Jesus hinam ñuqanchikpas anchata kusikunchik paykuna Diosman kutiykuptinku (Mat. 18:14).

16. (1) ¿Mayman rinanchikpaqmi iñiqmasinchikkunawan kallpanchakunanchik, hinaspa imayna kananchikpaqmi huñunakuykunaqa yanapawasunchik? (2) ¿Imanasqataq kay punchawkunaqa ancha allin Juan 3:16 versiculopi Jesuspa nisqanta yuyarinapaq?

¹⁶ Kay punchawkunam anchata kallpanchakunanchik Jesuspa wañukusqanta yuyarinapaq huñunakuyman runakunata hamunankupaq niypi, chayqa kanqa kay 2019 watapa abril killanpi viernes 19 kaq punchawninpim (qaway “ Runakunatayá nisun hamunankupaq” niq willakuyta). Chay pasaruptinpas iñiqmasinchikkunawanyá hinalla kallpanchanakusun huñunakunanchikpaq. Diospa piñakuynin punchawqa hichpallapiñam kachkan, chaymi huñunakuykunaman rinanchik. Huñunakuykunam yanapawasunchik mana hatun tukuq, mana manchakuq hinaspa kuyakuq kanapaq (1 Tes. 5:8-11). Jehova Dioswan Jesus anchata kuyawasqanchikmantayá agradecekusqanchikta qawachisun (qaway Juan 3:16).