1. ¿Imanasqataq tukuy imakunapas Jehova Diospa? (Qaway kay paginapi fotota).

JEHOVA DIOSPAM tukuy imapas. Paypam “hanaq pachapas, chaypi tukuy ima kaqkunapas, kay pachapas hinaspa chaypi tukuy ima kaqkunapas” (Deut. 10:14; Apoc. 4:11). Chaymi runakunapas paypa unanchasqan kasqanchikrayku paypa kanchik (Sal. 100:3). Chayna kaptinpas ñawpaqmantaraqmi Jehova Diosqa tantearqa runakunamanta pikuna paypaq kanankupaq.

2. ¿Pikunatataq bibliaqa nin Jehova Diospa akllakusqan runankuna kasqankumanta?

² Salmo 135 capitulopim willawanchik Jehova Diosqa ñawpaq tiempopi Israel runakunata ‘llaqtanpaq akllakusqanmanta’ (Sal. 135:4). Chaymantapas Oseas qillqapim  willakurqa Israel nacionmanta mana kaqkunapas Diospa llaqtan kanankumanta (Os. 2:23). Chay willakuyman hinam karqa mana judio kaqkunatapas Jesuswan kamachimunankupaq Jehova Dios akllayta qallaykuptin (Hech. 10:45; Rom. 9:23-26). Chuya espirituwan chayna akllasqa kaqkunatam biblia sutichan Diospa ‘chuya llaqtan’ nispa “Diospaq sapaqchasqa runakuna” kasqankurayku (1 Ped. 2:9, 10). Chaynallataqmi Diosqa kay pachapi kawsanankupaq kaq serviqninkunatapas nin runankuna hinaspa akllakusqankuna kasqankumanta (Is. 65:22).

3. (1) ¿Pikunataq kunan tiempopiqa Jehova Diospa akllakusqan runakuna kanku? (2) ¿Imamantam kay yachachikuypi yachasun?

³ Kunan tiempopi hanaq pachapaq ‘aslla kaq ovejakunaqa’ kay pachapi kawsanankupaq kaq ‘sapaq ovejakunawanmi’ “huk kanchallaña” hina Jehova Diosta yupaychachkanku (Luc. 12:32; Juan 10:16). Anchatamá munachkanchik chayna kananchikpaq Jehova Dios akllaykuwasqanchikmanta agradecekuytaqa. Chaymi kay yachachikuypi yachasunchik imakunata ruwaspa payta agradecekunamanta.

4. (1) ¿Imata ruwasqanchikwanmi Jehova Dios agradecekusqanchikta qawachinchik? (2) ¿Imatam Jesuspas ruwarqa?

⁴ Jehova Diosllapaqña kawsananchikpaq tanteakuspanchikqa pay agradecekusqanchiktam qawachinchik. Bautizakuspañataqmi hukkunapa qayllanpi qawachinchik Jehova Diospaña kasqanchikta hinaspa payllataña kasukusqanchikta (Heb. 12:9). Jesuspas chaytam bautizakuspan qawachirqa. Chayqa karqa “Diosnilláy, munasqaykiman hinam ruwayta munani” nispa nichkanmanpas hinam (Sal. 40:7, 8). Chaynatam Jesusqa taytanpa munayninta ruwayta qallarirqa, nacesqanmantapacha Diospa sapaqchasqan llaqtapiña kachkaspanpas.

5, 6. (1) ¿Imaynataq Jehova Diosqa tarikurqa Jesus bautizakuptin? (2) Jehova Diosllapaqña kawsakuptinchik pay imayna tarikusqanmanta huk rikchanachiyta willarimuy.

⁵ ¿Imaynataq Jehova Diosqa tarikurqa Jesus bautizakuptin? Bibliam nin: “Chaymi Bautizarachikuspan Jesusqa yakumanta chaylla lluqsirqa, hinaptinmi hanaq pacha kicharikuykuptin rikururqa Diospa espiritun paloma hina payman uraykamuchkaqta. Chaymantapas hanaq pachamantam [Dios] nimurqa: ‘Paymi churiy, paytam kuyani hinaspapas chaskinim’”, nispa (Mat. 3:16, 17). Jehova Diosqa anchatam kusikurqa payllataña servinanpaq churinpa tanteakusqanwanqa. Chaynallataqmi anchata kusikun payllapaqña kawsanapaq tanteakuptinchikqa, payqa anchatam bendeciwasun (Sal. 149:4).

⁶ Chayna ruwasqanchikrayku Jehova Diospa ancha kusikusqantayá rikchanachisun: Imaynam huk taytapa huertanpi kuyayllapaq waytachakuna kanman, hinaptinñataq hukninta warmachan pallaramuspan taytanman quykunman. Hinaptinqa, ¿manachu taytanqa kikinpa waytallan kachkaptinpas chay qusqanmanta anchata kusikunqa?  Chaynam Jehova Diospas payllapaqña kawsakunapaq tanteakusqanchikwanqa ancha-anchata kusikun (Ex. 34:14).

7. ¿Ima nintaq Malaquias qillqaqa serviqninkunarayku Jehova Diospa imayna tarikusqanmanta?

⁷ (Qaway Malaquias 3:16). Diosllapaqña kawsakunankupaq manaraq tanteakuqkunaqa hinaspa manaraq bautizakuqkunaqa musyakunankum chay ruwayqa allin kasqanmanta. Arí, lliw runam mamanchikpa wiksanpi rikurisqanchikmantapacha Jehova Diospa kanchik. Chayna kaptinpas kamachiqninchikta hina Jehova Diosta riqsikuspa payllapaqña kawsakunapaq tanteakuptinchikqa, hinaspa payllata kasukuptinchikqa anchatam kusikunqa (Prov. 23:15). Payñataqmi tukuy sunquwan serviqninkunata bendicen, hinaspapas ‘huk libropim’ sutinkuta qillqan.

8, 9. ¿Imatam ruwananchik Diospa ‘libronpi’ utaq yuyayninpi sutiyuq kaqkunaqa?

⁸ Jehova Diospa qillqasqan ‘libropi’ utaq yuyayninpi sutinchik kaptinqa, Malaquias qillqapa nisqanman hinam Diosta kasukunanchik hinaspa paypi yuyaymanananchik. Jehova Diosmanta hukkunata yupaychaptinchikqa libronmanta utaq yuyayninmantam sutinchikta chinkarachinqa (Ex. 32:33; Sal. 69:28).

⁹ Chaynaqa, Jehova Diosllapaqña kawsakunapaq tanteakuyqa manam Diospa munayninta ruwanapaq niyllachu nitaq bautizakuyllachu. ¿Imanasqa? Bautizakunchikqa huk kutillatam, huk kutillatataqmi Diospa munayninta ruwanapaqpas ninchik. Jehova Diosllapaqña kawsakunapaq tanteakuyqa manam chayllachu, aswanqa sapa punchaw imapipas Diosta kasukuytaqmi (1 Ped. 4:1, 2).

10. ¿Imayna kasqankuwantaq Diosta serviqkunaqa mana chaynallachu kanku huk runakunawan?

¹⁰ Pasaq yachachikuypim yacharqanchik Cainmanta, Salomonmanta hinaspa Israel runakunamanta. Paykunaqa Diosta yupaychasqankutam nirqaku, ichaqa manam tukuy sunqunkuwanchu yupaycharqaku. Tukuy chaykunawanmi yachanchik Jehova Diospa runankunaqa mana allinkunata chiqnina kasqanta hinaspa allin ruwayta kuyana kasqanta (Rom. 12:9). Jehova Diospa ‘libronmanta’ Malaquias willakuspanmi Diospa nisqanmanta kaynata nirqa: “Hinaptinmi yachankichik pim allin ruwaq kasqanta chaynataq pim mana allin ruwaq kasqantapas, pim Diosta yupaychaq kasqantapas chaynataq pim Diosta mana yupaychaq kasqantapas”, nispa (Mal. 3:18).

11. ¿Imanasqataq ancha allin Diospa runankuna kasqanchikta mana pinqakuspa hukkunaman riqsichikuyqa?

¹¹ Diospaq kasqanchikmanta agradecekusqanchiktaqa qawachinchiktaqmi Diospa runankuna kasqanchikta sutillata qawachispapas (1 Tim. 4:15; Mat. 5:16). Chaymi tapukunanchik: “¿Sutillatachu imayna kasqaywan qawachini Jehova Diospa runan kasqayta? ¿Mana manchakuspachu Jehova Diospa  testigon kasqayta riqsichikuni?”, nispa. Diosqa maynataya llakikunman akllasqan runankuna kachkaspa pinqakusqanchikrayku hukkunaman testigon kasqanchikta mana riqsichikuptinchikqa (Sal. 119:46; qaway Marcos 8:38).

12, 13. ¿Imanasqataq wakin iñiqmasinchikkunaqa mana sutillatachu qawachinku Diospa runankuna kasqankuta?

¹² Ancha llakikuypaqmi wakin iñiqmasinchikkunapa ruwasqankuqa, paykunaqa runakunapa imayna kasqanta qatipakuspankum mana sutillatachu qawachinku Diospa runankuna kasqankuta (1 Cor. 2:12). Kay pachapi runakunapa imayna kasqanta qatipakuqkunaqa kikillankupaq munaqmi kanku (Efes. 2:3). Wakinqa rimapayasqa kachkaspankupas hawa runakuna hinam pachakunku hinaspa allichakunku. Pachakunkum tiquy-tiquy, takalla hinaspa arañapa llikan hina pachakunawan, chaynaraqmi wakinqa huñunakuymanpas rinku. Wakinkuqa hukmanpataraqmi chukchankutapas rutuchikunku (1 Tim. 2:9, 10). Chayraykum huk runakunawan kaptinkupas mana sutillachu qawakun Jehova Diospa kasqankuqa (Sant. 4:4).

¹³ Wakin iñiqmasinchikkunaqa kusirikuq rispankupas tususqankuwan utaq chaypi imatapas ruwasqankuwanmi qawachinku hawa runakuna hina kasqankuta. Wakinkuqa fotonkutapas internetman churaspankum hawa runakunapa rimasqanman hina qillqanku. Chayna ruwasqankuwanqa mana hatun hucha kasqanraykuchá Diospa llaqtanmantaqa mana qarqusqachu kanqaku,  chaywanpas paykunaqa mana qatipakunapaq hinam kanku (qaway 1 Pedro 2:11, 12).

14. ¿Imatataq qipanchananchik Dioswan hinalla kuyachikunapaq?

¹⁴ Diosta mana yupaychaq runakunaqa ‘aychapa munapayasqankunapi, ñawipa munapayasqankunapi hinaspa imapas kapuqniyuq kaspa hatunchakuykunapi’ umayuqllañam kanku (1 Juan 2:16). Ñuqanchikmi ichaqa Jehova Diospa kanchik, chaymi kamachiwanchik ‘runakunapa mana allin munayninkunata hinaspa imapas mana allin kaqkunata qipanchananchikpaq’, kamachiwanchiktaqmi imatapas ‘allin yuyaywan ruwanapaq, allin ruwaq kanapaq hinaspa Diosta tukuy sunquwan servinapaqpas’ (Tito 2:12). Kawsakuyninchikpiqa rimaspapas, mikuspapas, tomaspapas, pachakuspapas, allichakuspapas hinaspa llamkaspapas sutillatam qawachikunanchik Diospa runankuna kasqanchikta (qaway 1 Corintios 10:31, 32).

15. ¿Imanasqataq iñiqmasinchikkunata kuyananchik?

¹⁵ Diospaq kasqanchikmanta agradecekusqanchikqa qawakunqataqmi iñiqmasinchikkunawan imayna kasqanchikpipas. Paykunapas Jehova Diospam kanku. Chayta mana qunqaspaqa kuyakuqllañam iñiqmasinchikkunawanqa kasun (1 Tes. 5:15). Jesusmi qatiqninkunata nirqa: “Qamkuna kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:35).

16. ¿Imatam Moisespa chaskisqan kamachikuypi nirqa templopi serviciokunamanta, hinaspa imatam chayqa Jehova Diosmanta yachachiwanchik?

 ¹⁶ Iñiqmasinchikkunawan imayna kanamanta astawan yachanapaqyá rimarisun templopi serviciokunamanta. Jehova Diospa templonpi serviciokunaqa payllata yupaychanapaqmi sapaqchasqa karqa. Moisespa chaskisqan kamachikuypim nirqa chaykunata imayna waqaychanankumanta, nirqataqmi chayta mana kasukuqkunaqa wañuchisqa kanankumantapas (Num. 1:50, 51). Jehova Diosqa anchatam munarqa templopi serviciokunaqa allinlla kananta, chayna kananta munachkaspanqa astawanraqchá payman sunqu serviqninkunapas allinlla kanantaqa munan. Huk kutipim llaqtanta nirqa: “Pipas qamkuna llapchaykuqqa, ñawi ruruytam llapchaykun”, nispa (Zac. 2:8).

17. ¿Imakunatam Jehova Diosqa qawamuchkan?

¹⁷ Malaquias qillqapim willawanchik iñiqmasinchikkunawan rimasqanchikta Jehova Dios uyarisqanmanta (Mal. 3:16). Arí, “Jehova Diosqa paypa kaqkunataqa riqsinmi” (2 Tim. 2:19). Imapas rimasqanchikwan ruwasqanchikqa Jehova Diospa yachasqallanmi kachkan (Heb. 4:13). Iñiqmasinchikkunawan mana kuyakuq kasqanchiktapas Jehova Diosqa qawamuchkanmi. Qawamuchkantaqmi hukkunawan pampachakuq, samaykachikuq, qukuykuq hinaspa kuyakuq kasqanchiktapas (Heb. 13:16; 1 Ped. 4:8, 9).

18. ¿Imata ruwaspam Jehova Diospa llaqtanpi kasqanchikmanta agradecekusqanchikta qawachinchik?

¹⁸ Diospa llaqtanpi kasqanchikmantaqa anchatam agradecekuyta munanchik. Diosllapaqña kawsakunanchikpaq tanteakusqanchikqa manam yanqapaqchu. “Mana allin ruwaq runakunapa” chawpinpi kawsakuspapas munanchikmi “mana culpayuq hinaspa chuya sunqu” kasqanchikta runakuna qawananta, chaynataq ‘runakunapa kasqanpi kancharichkaq’ hina kaytapas (Filip. 2:15). Pasaypaqtam mana allin ruwaykunataqa chiqninanchik (Sant. 4:7). Chaymantapas, iñiqmasinchikkunatam kuyaspa respetananchik paykunapas Diospa kasqankurayku (Rom. 12:10).

19. ¿Imakunawanmi Diosqa runankunata bendicen?

¹⁹ Diosqa manam llaqtantaqa saqinqachu (Sal. 94:14). Chaymantaqa manamá iskayrayachwanchu. Manam wañuypas Diospa kuyakuyninmantaqa rakiwachwanchu (Rom. 8:38, 39). “Kawsaspaqa kawsanchik Jehova Diospaqmi, wañuspapas wañunchik Jehova Diospaqtaqmi. Hinaptinqa, kawsaspapas utaq wañuspapas Jehova Diospam kanchik” (Rom. 14:8). Diosqa kuyasqan runankunatam kawsarichinqa, chaytaqa anchatam munachkanchik (Mat. 22:32). Kunanpas Diospa bendicionninkunatam chaskichkanchik. Bibliapas ninmi: “¡Mayna kusisqam Tayta Diosman hapipakuq nacionqa! ¡Mayna kusisqam Tayta Diospa akllakusqan llaqtaqa!”, nispa (Sal. 33:12).