1, 2. (1) Mateo 28:18-20 nisqanman hinaqa, ¿ima ruwananchikpaqmi Jesusqa niwarqanchik? (2) ¿Ima tapukuykunamantam yachasunchik?

JESUSPA qatiqninkunaqa kusisqallañachá kachkarqaku. Paykunataqa kikin Jesusmi Galilea urqupi tupaykunankupaq nirqa (Mat. 28:16). Chaypichá Jesusqa “pichqa pachak masnin huñunasqa wawqi-panikunaman rikuriykurqa” (1 Cor. 15:6). ¿Imanasqataq chaypi huñunakunankupaq nirqa? Qatiqninkunaman kay kamachikuyta ninanpaqmi: “Chaynaqa llapallan nacionpi runakunaman rispayá yachachimuychik qatiqniykunaña kanankupaq”, nispa (qaway Mateo 28:18-20).

² Jesuspa chay nisqanta uyariqkunaqa Diospa llaqtanmi karqaku, chaymi tukuyta ruwaspa Diosmanta runamasinkuman yachachinanku karqa, chaynapi paykunapas Jesuspa qatiqninkunaña kanankupaq. * Kunanpas Jesuspa qatiqninkunaqa enteron pachapim kachkanchik. Runamasinchikunaman rispam Jesuspa qatiqninña kanankupaq yachachinchik. Kay yachachikuypim kay tawa tapukuykunamanta yachachkasunchik: ¿Imanasqataq hukkunata yanapananchik Jesuspa qatiqninña kanankupaq? ¿Imatam ruwananchik Jesuspa qatiqninña kanankupaq? ¿Llapallanchikchu yanapakunchik Jesuspa qatiqninña kanankupaq? Hinaspa, ¿imanasqataq hinalla mana amispa yanapananchik?

3. Juan 14:6 hinaspa 17:3 nisqanman hinaqa, ¿imanasqataq hukkunata yanapananchik Jesuspa qatiqninña kanankupaq?

³ Ñuqanchikqa, hukkunatam yanapananchik Jesuspa qatiqninña kanankupaq. Chaynapi paykunapas Jehova Dioswan kuyachikunankupaq, hinaspa allinña kawsakuspa wiñay kawsayta haypanankupaq (qaway Juan 14:6; 17:3). Jesuspa nisqanta ruwanapaqqa manam sapallanchikchu kachkanchik. Apostol Pablom nirqa: “[Ñuqaykuqa] Diospa llamkaqmasinmi kaniku”, nispa (1 Cor. 3:9). Arí, ¡ancha kusisqam tarikunchik taytanchik Jehova Diospaq hinaspa señorninchik Jesucristopaq llamkasqanchikwan!

4. Casarasqa iñiqmasinchikpa ruwasqanmanta, ¿imatam yachachwan?

⁴ Hukkunata Jesuspa qatiqninña kanankupaq yanapaspaqa kusisqam tarikunchik. Chaynam tarikurqaku Ivan hinaspa warmichan Matildepas. Paykunaqa Colombia nacionpim yachanku. Chaypim, Davier sutiyuq musuman Diosmanta willarqaku. Hinaptinmi chay musuñataq nirqa: “Diospa munasqanman hina kawsakuytaqa munanim, ichaqa manam atinichu”, nispa. Chay musuqa qullqipaqmi hukkunawan takanakuq, chaymantapas llumpaytam sinkakuq, drogakuq, hinaspa Erikawanpas uywanakuspallam kawsakuqku. Ivan iñiqmasinchikmi willakun: “Warmichaywanmi Diosmanta yachachiyta qallaykurqaniku, karupi wasin kasqanraykum mitullaña ñanta bicicletawan riq kaniku. Chay musu Diospa munasqanman hina kawsakuyta qallaykuptinmi, uywanakusqan warmipas bibliamanta yachayta qallaykurqa”, nispa. Punchaw pasasqanman hinam Davierqa punta vidanta saqiruspan uywanakusqan warmiwan casarakururqa. Matilde iñiqmasinchikmi willakun: “Davier hinaspa Erikaqa 2016 watapim bautizakurqaku. Chayllaraq bibliamanta willaptiyku Davierpa nisqanta yuyariptiykum, wiqiyku atipaykuwarqaku”, nispa. Chaynam llapallanchik kusisqa tarikunchik Jesuspa qatiqninña kanankupaq hukkunata yanapaspaqa.

5. ¿Imatam ruwananchik Jesuspa qatiqninña kanankupaq?

⁵ Puntatam, Jehova Diosmanta yachay munaqkunata maskananchik (Mat. 10:11). Chaypaqqa, maymi yachasqankumanmi rinchik. Chaywanmi qawachinchik Jehova Diosta yupaychaq hinaspa Jesuspa qatiqnin kasqanchikta.

6. ¿Imaynatam bibliamanta imam kaqta yachachichwan?

⁶ Wakin runakunaqa bibliamantam imam kaqta yachayta munanku, wakinñataqmi mana kaqpaqpas hapinkuchu. Chaynaqa, ¿imaynatam bibliamanta imam kaqta yachachichwan? Chaypaqqa imamanta yachachinapaqmi sumaqta tantiananchik. Rimapayachwantaqmi imapas munasqanku kaqkunamanta.

7. (1) ¿Imaynatam parlayta qallarichwan? (2) ¿Imanasqataq runakunata sumaqta uyariykunanchik hinaspapas imanasqam mana pinqayman churananchikchu?

⁷ Nichwanmi: “Allinllachu imaynallam. Kunanqa llumpa-llumpay sasachakuypim kawsakunchik, ¿pitaq chinkachiyta atinman kay sasachakuykunata?”, nispa. Hina chayllamantaqmi ñawinchaykapuchwan Daniel 2:44 nisqanta. Utaqmi nichwan: “¿Imaynatam churi-wawanchikta allinta uywachwan?”, nispa. Hinaspam qawaykachichwan Deuteronomio 6:6, 7 nisqanta. Manaraq piwanpas bibliamanta rimachkaspam imamanta paykunawan  parlananchikpaq hinaspa nisqanchikkunaqa allinninpaq kananmanta yuyaymanananchik. Chaymantapas, paykunawan parlaspaqa niwasqanchiktam sumaqta uyariykunanchik. Parlanchik mana tupaptinpas amayá pinqaymanqa churasunchu. Chayta ruwaptinchikqa Diosmanta willakusqanchiktam allinpaq hapinqaku.

8. ¿Imanasqataq sapa kuti watukunanchik?

⁸ Wakin runakunaqa manam chayllachu bibliamanta yachaytaqa qallarinku, ¿imanasqa? Wakinpiqa wasinkupi mana kasqankurayku utaq wasinkupi kaspapas ruwayniyuq kasqankuraykum. Wakinñataqmi pinqakunku mana riqsisqan runawan parlayta. Chayraykum paykunataqa sapa kuti watukunanchik kanqa ayllunta hina qawawananchikkama, chayta ruwaptinchikqa bibliamantam yachayta munanqaku. Imaynam kawsaytapas allin qispinanpaqqa parqupayanchik, yaqa chaynam bibliamanta parlapayasqanchik runakunatapas yanapananchik Jehova Diostawan Jesusta pisi-pisimanta kuyanankupaq.

9, 10. ¿Imanasqataq ninchik bibliamanta yachay munaq runakunata tarinapaq llapallanchik yanapakusqanchikmanta?

⁹ Llampu sunqu runakunata tarinapaqqa llapallanchikmi yanapakunchik. Chay ruwayninchikqa chinkasqa warmachata maskachkachwanpas hinam. Imaynanpi chayna nisqanchikmantayá qawasunchik. Huk kutipim kimsa watachayuq warmacha chinkaruptin, yaqa 500 runakuna maskayta qallaykurqaku. Yaqa huk punchaw huk tutan maskasqankumantañam, huk kaqnin maskaq sara ukupi tarirurqa. Chay tariruq runa alabakunanmantaqa, llapallan maskaqkunapa yanapakuyninwan tarirusqankumantam nirqa.

¹⁰ Achka runakunam chay chinkaruq warmacha hina tarikullanku. Paykunaqa munankum  Diosmanta pipas yachaykachinanta (Efes. 2:12). Chayraykum llapallan Jehova Diospa testigonkuna paykunata maskachkanchik. Ichapas wakiqninchikqa mana tarinchikchu bibliamanta yachay munaq runakunataqa, chayna kaptinpas llapallanchikmi kusikunchik huk kaqnin iñiqmasinchik allin sunquyuq runata tariruptinqa.

11. Bibliamanta mana yachachispanchikpas, ¿imaynatam yanapakuchwan hukkuna Jesuspa qatiqninña kanankupaq?

¹¹ Bibliamanta mana yachachispanchikpas, atichwanmi yanapakuytaqa. ¿Imaynatam yanapakuchwan Jesuspa qatiqninña kanankupaq? Huñunakuyman wamaq hamuqkunata kuyakuywan chaskiykuspam. Chayta ruwaptinchikqa paykunam musyakunqaku Diospa chiqap llaqtan kasqanchikta (Juan 13:34, 35). Chaymantapas, huñunakuypi rimarispaqa paykunatam yanapachkanchik paykunapas rimarinankupaq. Diosmanta willakuq lluqsispapas chayllaraq Diosmanta willakuq lluqsiqwanmi kuska willakuchwan, yanapachwantaqmi hukkunata bibliamanta allinta yachachinanpaqpas. Chaynatam Jesuspa qatiqninña kanankupaq yanapakunanchik (Luc. 10:25).

12. Hukkunata yanapanapaqqa, ¿educacionniyuqraqchu kananchik? Rimarimuy Faustina iñiqmasinchikmanta.

¹² Jesuspa qatiqninña kanankupaq yanapakunapaqqa manam ancha educacionniyuqraqchu kananchik. Chaypaq iñiqmasinchik Faustinamanta yachasun. Payqa Bolivia nacionpim yachan. Jehova Diospa testigonkunata manaraq riqsichkaspanqa manam ñawinchaytaqa yacharqachu, kunanpas yanqa-yanqallatam letrakunataqa riqsin. Payqa bautizasqañam hinaspapas educacionniyuq runakunamanmi sapa semana bibliamanta yachachichkan. Bibliamanta yachachisqan runakuna hina mana kachkaspanpas Faustinaqa suqta runakunatañam yanaparun Jesuspa qatiqnin kanankupaq (Luc. 10:21).

13. Tukuy ima ruwayniyuq kaspanchikpas, ¿imanasqataq kallpanchakunchik hukkunaman bibliamanta yachachinanchikpaq?

¹³ Tukuy ima ruwayniyuq kachkaspapas tiempochakunchikmi bibliamanta runakunaman yachachinanchikpaq. ¿Imanasqa? Chay ruway kusichiwasqanchikraykum. Rimarisun Melani iñiqmasinchikmanta. Payqa llumpa-llumpay chirinan lawpim yachan, chayqa kachkan Alaska lawpim. Chaypiqa sapallanmi Diospa testigon. Chaymantapas payqa sapallanmi warmachanta uywan, cancer unquywan ñakariq taytantam yanapan. Hinaspapas sapa punchawmi llamkan. Melani iñiqmasinchikqa sapa kutim Jehova Diosta mañakuq, chiriptinpas Diosmanta willakuq lluqsinanpaq. Payqa munarqam bibliamanta yachachiyta. Chayna kachkaspanmi Sarawan tuparqa. Kay warmim anchata  kusikurqa Diospa sutinta niykuptin, chaymi iñiqmasinchikwan bibliamanta yachayta qallaykurqa. Iñiqmasinchik Melanim willakun: “Pisipasqa kaspaypas, sapa viernesmi warmachaypiwan bibliamanta yachachiq riq kaniku. Chay ruwasqaykuwanqa anchatam kusikuq kaniku, kusikuqtaqmi kaniku tapukuyninkunamanta bibliawan qawachispayku. Ancha-anchataraqmi kusichiwarqaku Jehova Diostaña kuyasqanqa”, nispa. Saraqa iglesianta saqispanmi Jehova Diostaña yupaycharqa.

14. (1) Diosmanta willakuyninchikqa, ¿imanasqataq tupan challwa hapiywan? (2) 2 Timoteo 4:1, 2 nisqanqa, ¿imapaqmi kallpanchawanchik?

¹⁴ Llapallanchikmi kallpanchakunanchik bibliamanta yachay munaq runakunata maskanapaq. Jesusmi chayta tupachirqa challwaywan. Challwaqkunaqa yaqa tukuy tuta nisqam wakinpiqa mana imatapas hapinkuchu, wakinqa lamar quchapa chawpiniqninmanraqmi rinku chaypi hukllatapas hapinankupaq (Luc. 5:5). Yaqa challwa hapiq runakuna hinam, Jehova Diospa testigonkunapas sapa punchaw maskanchik Diosmanta yachay munaq runakunata. Chaypaqqa maymi kasqankumanmi rinchik hinaspa imay hora wasinpi tarikusqankuman hinam watukunchik. Kay ruwayninchikqa manam yanqapaqchu, mana amispa hinalla maskaspanchikqa tarisunmi bibliamanta yachay munaqkunata. Chaymi sapakama tapukunanchik: “¿Yaqachu ñuqapas kallpanchakuyman runakunapa maymi kasqanman rinaypaq utaq samasqanku horapi watukunaypaq?”, nispa (qaway 2 Timoteo 4:1, 2).

15. ¿Imanasqataq mana amispa bibliamanta yachachisqanchik runakunata hinalla yanapananchik?

 ¹⁵ Chaynaqa, ama amispayá hinalla yanapasun bibliamanta yachachisqanchik runakunata. Paykunaqariki bibliamantam imam kaqta yachananku, chayqariki manam iskay-kimsa punchawllapichu kanqa. Paykunataqa yanapananchiktaqmi Jehova Diosta riqsinankupaq hinaspa kuyanankupaqpas. Diospa kamachikuyninkunamanta willaspapas, yanapananchiktaqmi kanqa yachasqankuta ruwayman churanankupaq. Yanapananchiktaqmi kanqa Diosta yupaychasqanrayku sasachakuykunapi tarikuptinpas. Wakinqa mana sasachakuspallam imapas yachasqankutaqa ruwayman chaylla churanku, wakinñataqmi mana, chaymi paykunataqa yanapananchik kanqa Diospa nisqanman hinaña kawsakunankupaq.

16. ¿Imatam yacharunchik Raulmanta?

¹⁶ Kaymanta astawan yachanapaq, rimarisun Diosmanta willakunanpaq Peru nacionman riq iñiqmasinchikmanta. Paymi willakun: “Raul sutiyuq runamanmi bibliamanta yachachiyta qallaykurqani. Raulqa iskay qillqamantañam yacharusqa. Chaywanpas hinallam kawsakuyninpiqa sasachakusqa. Warminwanpas manam allintachu apanakusqa, qacha siminwanmi pitapas rimariq hinaptinmi churinkunapas mana riqsisqa runata hina qawaqku. Huñunakuyman sapa kuti risqanraykum payta hinaspa ayllunta hinalla watukurqani. Raulqa, hinalla watukusqayraykum kimsa watamanta bautizakururqa, chayqa ancha kusikunapaqmi karqa”, nispa.

17. ¿Imamantam qatiqnin yachachikuypi yachasunchik?

¹⁷ Jesusmi kamachiwarqanchik runakunaman rispa yachachinapaq, chaynapi Jesuspa qatiqninkunaña kanankupaq. Jesusta kasukusqanchikraykum pimanñapas Jehova Diosmanta willanchik. Diosmantaqa willanchiktaqmi huk religionniyuq runakunamanpas utaq Diospi mana qalaypaq iñiqkunamanpas. Chayraykum qatiqnin yachachikuypi yachasunchik, imaynata Diospa munayninmanta chayna runakunaman willanapaq.