1. ¿Imam sutillata qawakun unanchayta Dios qallarisqanmantapacha?

JEHOVA DIOSMI Jesusta unancharqa manaraq imatapas unanchachkaspan. Chaymantapacham paykunaqa huk sunqulla llamkarqaku. Jesusqa Jehova Dioswanmi llamkarqa ruwaysiqnin maestro hina tukuy imata unanchaypi (Prov. 8:30). Ñawpaq tiempopi Diospa serviqninkunaqa yanapanakurqakum Diospa munayninta huk sunqulla ruwanankupaq. Noeymi ayllunwan kuska llamkarqa hatun buqueta ruwanankupaq. Chaymanta qipatañataqmi Israel runakunaqa kuska llamkarqaku Diosman asuykunapaq carpata ruwanankupaq, paskanankupaq hinaspa huk lawman apanankupaq. Diospa templonpiñataqmi takiqku hinaspa tukuy imaymana takikunata waqachiqku Jehova Diosta yupaychanankupaq. Diospa llaqtanpiqa tukuy kaykunatam ruwarqaku yanapanakusqankurayku (Gen. 6:14-16, 22; Num. 4:4-32; 1 Cron. 25:1-8).

2. (1) ¿Imaynam punta pachak watapi Diosta serviqkunaqa karqaku? (2) ¿Imamantam kay yachachikuypi yachasunchik?

 ² Punta pachak watapi Diosta serviqkunapas huk sunqullam Diosta yupaycharqaku. Apostol Pablom nirqa Diospa mana imallapaq qusqankunaqa tukuy rikchaq kasqanmanta. Paykunaqa kamachiqninku Jesucristotam kasukurqaku. Chaymi Pabloqa paykunata tupachirqa achka parteyuqkuna cuerpoman huk hinalla llamkasqankurayku (leey 1 Corintios 12:4-6, 12). ¿Ñuqanchikpas atichwanchu chayna huk sunqulla llamkayta? Kay yachachikuypim qawasunchik Diosmanta willakuypi, iñiqmasinchikkunawan hinaspa ayllunchikwan imayna yanapanakuymanta.

3. ¿Imatam apostol Juanqa musquypi hina rikurqa?

³ Punta pachak watapim apostol Juanqa musquypi hina rikurqa qanchis angelkuna cornetillankuta waqachichkaqta. Pichqa kaq angel cornetillanta waqaykachiptinmi, Juanqa qawarqa hanaq pachamanta kay pachaman lucero wichiykamuqta. Chay lucerom chaskirqa uku-ukuman chinkaykuq uchkupa llaventa, chay lucero kichaykuptinmi qusni lluqsiramurqa hinaspa qipantañataq aqarway urukuna lluqsimurqa. Kay pachapi qurakunata mikunanmantaqa, chay aqarway urukunaqa kamachisqam karqaku Diospa sellonwan urkunpi mana marcasqa kaq runakunallata kachunankupaq (Apoc. 9:1-4). Juanqa allintam yacharqa Egiptota Dios aqarway urukunawan castigasqanrayku aqarway urukuna ima plantakunatapas chaylla tukuruq kasqanta (Ex. 10:12-15). Juanpa rikusqan aqarway urukunaqa tupanmi hanaq pachapaq suyakuyniyuq iñiqmasinchikkunawan, paykunam willakuchkanku unay wataña pantay religionta Dios chinkachinanmanta. Paykunawan kuskataqmi willakuchkanku millonnintin kay pachapi kawsanankupaq suyakuyniyuq runakunapas. Chayna huk sunqulla Diosmanta willakusqankuraykum achka runakuna satanaspa munaychakusqan pantay religionmanta lluqsikurunku.

4. (1) ¿Diospa ima kamachiwasqanchiktam ruwananchik? (2) ¿Imayna kaspallam chay ruwaytaqa atisun?

⁴ Diosmi kamachiwarqanchik enteron allpa pachapi sumaq willakuykunata willakunapaq manaraq Diospa piñakuynin punchaw chayamuchkaptin (Mat. 24:14; 28:19, 20). Chaymi ‘pipas yakunayachikuchkaq’ hina Diosmanta yachayta munaptinqa, “kawsachikuq yakuta” quchkaq hina yachachinanchik (Apoc. 22:17). Chay ruwaytaqa atisun huk sunqulla Diospa llaqtanpi yanapakuspanchikmi (Efes. 4:16).

5, 6. ¿Imaynatam huk sunqulla Diosmanta willakunchik?

⁵ Achka runakunaman Diosmanta willakunanchikpaqqa huk sunqullam kananchik. Chayta ruwanapaqmi Diospa llaqtanpi  tukuy ima kamachiwasqanchikkunata kasukunanchik. Diosmanta willakunapaq huñunakuspam, sumaq willakuykunata runakunaman willananchikpaq lluqsinchik hinaspam qillqanchikkunata saqinchik. Kunankamaqa enteron pachapi wara-waranqantin runakunamanmi qillqanchikkunata saqirqanchik. Wakinpiqa hatun huñunakuykunaman hamunankupaqmi runakunaman willanchik. Kayta ruwaspanchikqa, wara-waranqantin iñiqmasinchikkunawan kuskam huk sunqulla llamkachkanchik. Angelkunawan kuskataqmi llamkachkanchik, paykunaqa Diosmanta willakuy apakunanpaqmi yanapakuchkanku (Apoc. 14:6).

⁶ Enteron pachapi Diosmanta willakuy yapakusqanmanta Anuario qillqapi yachayqa ancha kusikunapaqmi. Chaymantapas huk sunqullam runakunaman willakunchik hatun huñunakuyninchikman hamunankupaq. Chay huñunakuykunapim uyarinchik yachachikuykunata hinaspapas qawanchiktaqmi actuacionkunata, chaykunam kallpanchawanchik Jehova Diosta tukuy sunqunchikwan servinanchikpaq. Chaymantapas iñiqmasinchikkunawanmi huk sunqulla kanchik Jesuspa wañukusqan punchawta sapa wata yuyarispanchik (1 Cor. 11:23-26). Chay punchawpim inti siqaykuyta huñunakunchik ñuqanchikrayku Jehova Diospa ruwasqanta agradecekunapaq hinaspa Jesuspa kamachisqanta kasukusqanchikta qawachinapaq. Iskay-kimsa semanakuna ñawpaqtam huk sunqulla llapanchik runakunaman willamunchik chay punchaw ñuqanchikwan kuska huñunakunankupaq.

7. ¿Ima ruwaytam atinchik huk sunqulla llapanchik willakusqanchikrayku?

⁷ Huk aqarway uruchallaqa manam lliw plantakunataqa tukurunmanchu. Yaqa chaynam ñuqanchikpas sapallanchikqa mana lliw runakunaman willakuytaqa atichwanchu. Llapanchik willakuspanchikmi ichaqa wara-waranqantin runakunaman willakuyta atinchik Jehova Diosta hatunchanankupaq.

8, 9. (1) Efesios 4:15, 16 nisqanman hinaqa, ¿imawanmi Pabloqa tupachirqa llapallan iñiqkunata? (2) ¿Imaynatam yanapakuchwan iñiqmasinchikkunawan huk sunqulla kawsakunanchikpaq?

⁸ Apostol Pablom Efeso llaqtapi iñiqmasinkunaman qillqaspan nirqa ‘llapallan iñiqkunaqa huk cuerpo hinalla kasqankuta’, chaymi yuyarichirqa tukuy imapi wiñanankupaq (leey Efesios 4:15, 16). Pabloqa iñiqkunatam tupachirqa huk cuerpo hina kasqankuta, sapa iñiqkuna huk sunqulla kanankupaq yanapakuyta atiptinku, chaynapi llapallan iñiqkunapa uman Jesucristota qatikunankupaq. Nirqataqmi cuerpopa partenkunaqa llapallanku yanapanakusqankumanta ankukunawan hapinasqa kasqankurayku. Chaymi mozo-sipasña utaq yuyaqña kaspanchikpas, unquspa utaq mana unquspapas, ¿imatam  ruwachwan huk sunqulla iñiqmasinchikkunawan kananchikpaq?

⁹ Ancianokunata respetananchikta hinaspa kamachiwasqanchikta kasukunanchiktam Jesusqa munan, paykunatam Jesusqa churarqa lliw iñiqkunamanta nanachikunankupaq (Heb. 13:7, 17). Kasukuyqa wakinpiqa sasamá. Chayna kaptinpas, Jehova Diospa yanapakuynintam mañakuchwan chaynapi chuya espiritunwan yanapaykuwaptinchik ancianokunapa kamachisqankunata kasukunanchikpaq. Mana hatun tukuq kayninchiktaqmi yanapawasun kasukunanchikpaq. Chaynata ruwaptinchikqa iñiqmasinchikkunawanmi huk sunqulla kawsakusunchik hinaspapas astawanmi kuyanakusunchik.

10. ¿Imaynatam yanapakunku siervo ministerialkunaqa huk sunqulla kawsakunapaq? (Qaway 18 kaq paginapi fotota).

¹⁰ Siervo ministerialkunapas iñiqmasinchikkunawan huk sunqulla kanapaqmi yanapakunku. Paykunaqa anchatam yanapanku ancianokunata ruwayninkupi. Chayraykum ancha kusisqa tarikunchik. Siervo ministerialkunaqa Diosmanta willakunanchikpaq qillqanchikkuna mana pisinanpaqmi yanapakunku. Chayllaraq huñunakuyman hamuqkunatam kusikuywan chaskinku. Huñunakunanchik wasitam chuyanchanku hinaspapas kallpanchakunkum imapas allichasqa kananpaq. Kay iñiqmasinchikkunata yanapaspanchikqa astawan huk sunqullam Jehova Diosta yupaychasunchik (tupachiy Hechos 6:3-6).

11. ¿Imaynatam mozollaraq iñiqmasinchikkuna yanapakunmanku huk sunqulla kananchikpaq?

¹¹ Wakin ancianokunaqa achka watakunam iñiqmasinchikkunata iñiyninpi yanapanankupaq llamkarqaku. Kunanmi ichaqa yuyaqña kasqankurayku manaña ñawpaqpi hinachu ruwanku. Paykunatam mozokuna yanapanmanku. Mozo iñiqmasinkuta imapipas yanapakunankupaq yachachiptinkuqa, paykunaqa atinmankum astawan yanapakuyta. Siervo ministerialkuna anchata kallpanchakuspankuqa atinmankum anciano hinaña yanapakuyta (1 Tim. 3:1, 10). Wakin mozollaraq ancianokunaqa anchata kallpanchakuspankum congregacionta watukuq anciano hinaña yanapakuchkanku iñiqmasinkunata kallpanchaspanku. Anchatam agradecekunchik chaynata kallpanchakuspanku yanapakusqankumanta (Leey Salmo 110:3; Eclesiastes 12:1).

12, 13. ¿Imatam ayllukunaqa ruwanmanku huk sunqulla kanankupaq?

¹² ¿Imatam ayllukunaqa ruwanmanku huk sunqulla kanankupaq? Sapa semanam wasinkupi kaqkunawan Diosta yupaychananku. Tayta-mamakuna warmankuwan kuska Jehova Diosmanta yachaptinkuqa, kuyanakuyninkum astawan wiñanqa. Chaypiqa Diosmanta willakunankupaqmi yachachinakunmanku, chaymi yanapanqa aswan allinta willakunankupaq. Ayllukunaqa aswan huk sunqullam kanku llapanku Jehova Diosta kuyasqankumanta hinaspa munaynin ruway munasqankumanta yachasqankuwan.

¹³ Jehova Diosqa munanmi warmi-qari huk sunqulla yanapanakunankuta (Mat. 19:6). Iskayninku Jehova Diosta kuyaspankuqa hinaspa payta servispankuqa, kusisqam kanqaku chaynataq casado vidankupipas huk sunqullam kanqaku. Chaymantapas Abrahampawan Sarapa, Isaacpawan  Rebecapa hinaspa Elcanapawan Anapa kuyanakusqankutam qatipakunanku (Gen. 26:8; 1 Sam. 1:5, 8; 1 Ped. 3:5, 6). Warmi-qari kuyanakunankupaq kallpanchakuspankuqa aswan allinmi kawsakunqaku hinaspapas Jehova Diosmanmi astawan asuykunqaku (leey Eclesiastes 4:12).

14. Qusayki utaq señorayki Jehova Diosta mana yupaychaptinqa, ¿imatam ruwawaq allinlla kawsakunaykichikpaq?

¹⁴ Bibliaqa sutillatam nin Jehova Diosta mana yupaychaqkunawan mana casarakunapaq (2 Cor. 6:14). Ichaqa wakin iñiqmasinchikkunam casarasqa kachkaspankuña Jehova Diospa testigon karqaku. Qusanku utaq señorankuñataqmi mana munankuchu Jehova Dios yupaychayta. Wakinkuñataqmi iñiqmasinchikkunawan casarakuptinkupas hukninkuqa Diospa llaqtanmanta karunchakurun. Chayna tarikuspankupas iñiqmasinchikkunaqa kallpanchakunkum bibliapa nisqanta kasukuspanku casado vidankupi allin kawsakunankupaq. Chayqa wakinpiqa sasamá. Rimarisun Mariamantawan qusan Davidmanta, paykunaqa iskayninkum Jehova Diosta yupaycharqaku. Ichaqa qusanmi huñunakuykunaman riyta saqirurqa. Chayna kaptinpas Mariaqa hinallam kallpanchakurqa warmankunata Jehova Diosmanta yachachinanpaq hinaspapas hinallam rirqa huñunakuykunaman hinaspa hatun huñunakuykunamanpas. Watakuna risqanman hinam warmankunaqa wiñaruspanku manaña paykunawanñachu yacharqa. Chaymi Mariaqa sapallan hina tarikurqa, chaywanpas hinallam Jehova Diosta servirqa. Chay tiempopaqqa qusanqa qillqanchikkuna leeytam qallaykurqa señoran paypaq saqiptin. Chaymantam wakin huñunakuykunaman riytapas qallaykurqaña. Suqta watachayuq willkanñataqmi huñunakuypi tiyananta sapa kuti paypaq sapaqchapuq. Abuelon huñunakuyman mana riptinñataqmi willkanqa niq: “Abuelito, huñunakuypim suyarqaykiku”, nispa. Davidqa 25 watamantañam Jehova Diospa llaqtanman kutiramun, kunanqa kusisqam Mariaqa qusanwan kuska Diosta servichkan.

15. ¿Imaynatam unay wataña casarasqa kaqkuna yanapanmanku chayllaraq casarasqa kaqkunata?

 ¹⁵ Satanasqa ayllukuna rakinachiypim kunanqa kachkan. Chaymi Diosta serviq casarasqa kaqkunaqa astawan huk sunqulla kanankupaq kallpanchakunanku. Hayka wataña casarasqa kaspaykipas, yuyaymanay imakunata ruwaspa astawan huk sunqulla kanaykichikpaq. Unay wataña casarasqa kaqkunam chayrallaraq casarasqa kaqkunata yanapanmanku kuskanku Diosta wasinkupi yupaychaspanku. Chaynapim qawachinqaku hayka wataña casarasqa kaspapas hinalla kuyanakuyqa hinaspa huk sunqulla kayqa ancha allin kasqanta (Tito 2:3-7).

16, 17. ¿Imaynam tarikusunchik hamuq tiempopi?

¹⁶ Israel runakuna Jerusalenpi pascua fiestaman rispankuqa huk sunqullam yanapanakuqku. Llapankum alistakuqku, ñanpim yanapanakuqku hinaspam Jehova Diostapas templopi yupaychaqku (Luc. 2:41-44). Ñuqanchikpas paykuna hinam musuq pachaman richkachwanpas hina tarikunchik. Chaymi haykapipas kallpanchakunanchik huk sunqulla llapanchik yanapanakunanchikpaq. ¿Yaqachu chayta ruwanaykipaq astawan kallpanchakuwaq?

¹⁷ Kunan tiempopi runakunaqa manam huk sunqullachu kanku imapipas nitaqmi kusisqachu kanku kapuqninkuwanpas. Ñuqanchikmi ichaqa Jehova Diosta agradecekunchik hawkayayta quwasqanchikmanta hinaspa chiqap kaqkunata paymanta yachachiwasqanchikmanta. Chaymi Jehova Diosta serviqkunaqa paypa munasqanman hina enteron pachapi yupaychanchik. Jehova Diospa llaqtanqa kay tukupay tiempokunapim astawan huk sunqulla kachkan Diosmanta willakuq Isaiaspa hinaspa Miqueaspa nisqaman hina, paykunam nirqaku: ‘Hakuchikyá risunchik [Jehova] Diospa urqunman’, nispa (Is. 2:2-4; leey Miqueas 4:2-4). ¡Mayna kusisqachá tarikusunchik enteron pachapi runakuna huk sunqulla kaspanku Jehova Diosta yupaychaptinkuqa!