1, 2. ¿Ima tapukuymi rikurin Mateo 24:14 leeptinchik?

JESUSMI willakurqa tukupay punchawkunapi Diosmanta sumaq willakuykuna enteron allpa pachapi apakunanmanta (Mat. 24:14). Chaymi Jehova Diospa testigonkunaqa Diosmanta willakusqanchikwan maypiñapas riqsisqa kanchik. Wakin runakunam willakusqanchikta uyariyta munanku, wakinkuñataqmi mana. Ichaqa kantaqmi wakin runakuna willakusqanchikta uyariyta mana munaspankupas, willakusqanchikta chaninchaqkuna. Ñuqanchikqa Jesuspa willakusqanman hinam Diosmanta runakunaman willakunchik. ¿Imanasqam chaymanta mana iskayrayanchikchu?

² Achka religionpi runakunam ninku Jesus hina Diosmanta willakusqankuta. Ichaqa iglesiallankupim, televisionllapim utaq internetllapim willakunku. Wakinkum ninku Diosmanta willakuyqa Jesusta imayna riqsisqankumanta willakuy kasqanta. Wakinkuñataqmi ninku wakchakunata hospitalpi  yanapaspanku utaq estudianankupaq yanapaspanku Diosmanta willakusqankuta. Ichaqa, ¿chaynata ruwaspachu Jesuspa nisqanman hina Diosmanta willakuchkanku?

3. Mateo 28:19, 20 nisqanman hinaqa, ¿imakunatam Jesuspa qatiqninkunaqa ruwananku?

³ ¿Jesusqa munarqachu qatiqninkuna suyaptinku runakuna kikillankumanta asuykunankuta? Manam. Kawsarimusqan qipallatam Jesusqa achka qatiqninkunata kaynata nirqa: “Llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik [...]. Yachachimuychikyá tukuy ima kamachisqaykunata kasukunankupaq”, nispa (Mat. 28:19, 20). Jesuspa qatiqninkuna hinam ñuqanchikpas kaykunata ruwananchik: Runakunamanmi yachachimunanchik Jesuspa qatiqnin kanankupaq, bautizamunanchik hinaspa tukuy ima kamachiwasqanchikta yachachinanchik. Ichaqa, ¿imatam puntata ruwananchik? Jesusmi nirqa rinanchikpaq. Bibliamanta yachaq ancha riqsisqa runam nirqa: “‘Rinapaq’ kamachikuytaqa Diosta lliw yupaychaqkunam kasukunanku, callekunapi utaq lamar quchapa huk lawninpi willakunanku kaptinpas”, nispa (Mat. 10:7; Luc. 10:3).

4. ¿Imatam ruwana ‘runakunata challwanapaqqa’?

⁴ ¿Imata qatiqninkuna ruwanankutam Jesusqa munarqa? ¿Sapallanku Diosmanta willakunankutachu, icha llapanku huk sunqulla willakunankutachu? Chullalla runaqa manamá atinmanchu enteron pachapi runakunaman willakuytaqa, aswanmi achka runakuna huk sunqulla willakunanku karqa. Chaytam niyta munachkarqa qatiqninkunata ‘runakunataña challwamunankupaq’ nispan (leey Mateo 4:18-22). Jesusqa manam nichkarqachu anzuelollawan challwata hapinanpaq tiyakuspa suyanankumantachu. Aswanmi rimachkarqa mallawan challwakunata hapinankumanta. Chayta ruwanapaqqa anchatam kallpanchakuna hinaspapas achka runakunam huk sunqulla llamkananku (Luc. 5:1-11).

5. ¿Ima tawa tapukuykunamantam yachananchik hinaspa imanasqa?

⁵ Jesuspa willakusqanta kunan tiempopi pikuna ruwasqanta yachanapaqmi qatiqninpi tawa tapukuykunamanta yachananchik:

• ¿Imamantam willakunanchik?

• ¿Imam kallpanchawananchik willakunapaq?

• ¿Imaynatam willakunanchik?

• ¿Maykamam hinaspa haykapikamam willakunanchik?

Kay tapukuykunamanta yachayninchikmi yanapawasun pikuna chayta ruwasqankuta yachanapaq. Chaymi kallpanchawasun hinalla Diosmanta willakunanchikpaq (1 Tim. 4:16).

6. ¿Imanasqam mana iskayrayanchikchu Jehova Diospa testigonkunalla Jesuspa kamachisqanman hina willakusqankumanta?

⁶ (Leey Lucas 4:43). Jesusqa runakunamanmi sumaq willakuyta willakurqa hinaspapas munanmi qatiqninkuna chayta ruwanankuta. ¿Mayqan religiontaq enteron allpa pachapi Diosmanta willakuchkan? Chaytaqa ruwachkanku Jehova Diospa testigonkunallam. Chay ruwasqanchiktaqa chiqniwaqninchik runakunapas yachankum. Huk sacerdotem achka nacionkunapi yachaspan Jehova Diospa testigonkunata tapuq imamanta willakusqankuta. Chaymi chay sacerdote  willakun: “Llapankum rabiapaq hina kaqllata niwaq ‘Diosmanta sumaq willakuykunata’ willakusqankumanta”, nispa. Chayna nisqankuwanmi sutillata qawachirqaku Jehova Diospa yupaychaqninkuna huk sunqulla kasqankuta (1 Cor. 1:10). Chay willakusqanchikqa Willakuq qillqapa sutin hinam: Jehova Diospa Gobiernonmanta Willakuq. Kay qillqanchiktam sapa killa ruwanku yaqa 59 millonta 254 rimaykunapi. Chayraykum nichwan enteron pachapi mayqin qillqamantapas aswan achka ruwakusqanta.

7. ¿Imanasqam ninchik religionpi punta apaqkuna Jesuspa kamachisqanman hina mana willakusqankuta?

⁷ Religionpi punta apaqkunaqa manam Diospa kamachimunanmantaqa willakunkuchu. Chaymanta rimaspankuqa, runakunapa sunqupi hawkayay kasqallanmantam ninku (Luc. 17:21). Manam yachachinkuchu chay kamachikuy hanaq pachapi Jesuspa makinpi kasqantaqa nitaq kay pachapi mana allinkunata tukuchispan runakunapa sasachakuyninta allichananmantapas (Apoc. 19:11-21). Aswanmi paykunaqa Jesusmanta rimanku navidadllapi hinaspa pascuallapi. Manam yachankuchu kay pachata Dios kamachimuspan tukuy ima ruwanantaqa. Manam entiendenkuchu imamanta nitaq imanasqa willakunankutapas.

8. ¿Imam kallpanchawananchik Diosmanta willakunapaq?

⁸ Jesuspa qatiqninkunaqa Diosmantaqa willakunku manam qullqita huñunankupaqchu nitaq suma-sumaq wasikunata ruwanankupaqchu. Jesusmi nirqa: ‘Qamkunaqa mana imallapaqmi chaskirqankichik [...], mana imallapaqtaqyá quychikpas’, nispa (Mat. 10:8). Chaymi Diosmanta willakuyqa mana negociota ruwanapaqchu (2 Cor. 2:17). Jesuspa qatiqninkunaqa manam Diosmanta willakuspankuqa qullqitaqa chaskinankuchu (leey Hechos 20:33-35). Chaykunamanta sutillata Jesus yachachichkaptinpas, yaqa llapallan religionkunapim qullqita huñunku iglesiankupaq, yachachiqninkupaq hinaspa yanapaqninkupaq. Chayraykum religionpi punta apaqkuna apu runakuna rikurirunku (Apoc. 17:4, 5).

9. ¿Imaynatam Jehova Diospa testigonkunaqa Jesuspa kamachisqanman hina ruwasqankuta qawachinku?

⁹ ¿Jehova Diospa testigonkunaqa mañakunkuchu qullqita huñunankupaq? Manam. Paykunaqa sunqumanta qusqallankuwanmi tukuy imatapas ruwanku (2 Cor. 9:7). Manam huñunakunanku wasipiqa nitaq hatun huñunakuykunapipas qullqitaqa mañakunkuchu. Pasaq watallapim, yaqa 2.000 millon horata Diosmanta willakurqaku hinaspa 9 millon runakunaman bibliamanta yachachirqaku sapa killa. Chayta ruwasqankumantaqa manam qullqitaqa mañakurqakuchu. Paykunaqa kusisqam kikinkupa qullqinkuwan yacharqaku. Huk riqsisqa runam Jehova Diospa testigonkunamanta nirqa: “Paykunapa ruwayninqa Diosmanta willakuymi hinaspa yachachiymi [...]. Punta apaqninkumanqa manam  qullqitaqa qunkuchu”, nispa. Chaynaqa, ¿imataq kallpanchawanku Diosmanta willakunaykupaq? Chaytaqa ruwaniku Jehova Diostawan runakunata kuyasqaykuraykum. Chay ruwasqaykum Salmo 110:3 (leey) nisqanpi willakuyman hina apakuchkan.

10. ¿Imaynatam Jesuswan qatiqninkunaqa Diosmanta willakurqaku?

¹⁰ ¿Imaynatam Jesuswan qatiqninkunaqa Diosmanta willakurqaku? Runakunapa kasqanmanmi riqku. Wakinkutam tariqku ñankunapi, rantikuqkunapa kasqanpi hinaspa wasin-wasin risqankupi (Mat. 10:11; Luc. 8:1; Hech. 5:42; 20:20). Wasin-wasin Diosmanta willakuq rispankuqa llapallan runakunamanmi chayaqku mana chaqwata ruwaspalla.

11, 12. ¿Imanasqam Jehova Diospa testigonkunawan religionpi punta apaqkunaqa mana chaynallachu kanku Diosmanta willakuyninkupi?

¹¹ ¿Religionpi punta apaqkunaqa Jesus hinachu Diosmanta willakunku? Paykunaqa yaqa llapankum qullqita chaskispallanku runakunamanqa yachachinku. Paykunaqa manataqmi Jesuspa qatiqnin kanankupaqqa runakunataqa yachachinkuchu, aswanmi iglesiankupi runankuna mana lluqsikunankupaq harkakunku. Wakinpim religionpi punta apaqkunaqa runankunata kamachirqaku Diosmanta willakamunankupaq. 2001 watapim papa Juan Pablo II runankunata nirqa Diosmanta willakunankupaq hinaspa apostol Pablo hina kaynata ninankupaq: “¡Imaynaraq kayman allin noticiata mana willakuspayqa!”, nispa. Nirqataqmi mana wakillanku Diosmanta willakunankupaq,  aswanqa nirqam iglesiaman llapan riqkuna willakunankupaq. Ichaqa manamá llapankuchu chay ruwaytaqa atirqaku.

¹² ¿Imatam Jehova Diospa testigonkunaqa ruwarqaku? Paykunallam willakunku 1914 watamanta hanaq pachapi Jesuspa kamachisqanmantaqa. Paykunaqa Jesustam kasukunku, chayraykum Diosmanta willakuyta imamantapas puntapi churanku (Mar. 13:10). Huk yachaysapa warmim kaynata qillqarqa: “Jehova Diospa testigonkunaqa imamantapas puntapim churanku Diosmanta willakuyninkuta”, nispa. Huk iñiqmasinchikmanta rimaspanmi nirqa: “Runakunata yarqaymanta, sapallanta utaq unquqta tariruspankuqa kallpanchakunkum yanapanankupaq, [...] ichaqa manam qunqankuchu iñiyninkupi yanapayta puchukay punchawpi mana wañunankupaq”, nispa (Pillars of Faith—American Congregations and Their Partners). Jehova Diospa testigonkunaqa Jesuspa hinaspa qatiqninkunapa Diosmanta imayna willakusqankutam qatipakunchik.

13. ¿Maykamam Diosmanta willakunanchik?

¹³ Jesusmi nirqa tukupay tiempopi Diosmanta willakuy ‘enteron allpa pachapi’ apakunanmanta. Qatiqninkunam enteron allpa pachamanta kanan karqa (Mat. 24:14; 28:19, 20). Kaywanqa nichkarqam enteron allpa pachapi Diosmanta willakunanchikpaq.

14, 15. ¿Imanasqam nichwan Diosmanta willakusqanchik Jesuspa nisqanman hina ruwakusqanmanta? (Qaway 9 kaq paginapi dibujota).

¹⁴ Jehova Diospa testigonkunallam enteron pachapi Diosmanta willakuy apakunanpaq Jesuspa willakusqantaqa ruwayman churachkanku. ¿Imanasqam chaynata ninchik? Estados Unidos nacionpim kachkan 600.000 religionpi punta apaqkuna, Jehova Diosmanta willakuq testigokunañataqmi chay nacionpi kanku yaqa 1.200.000. Enteron pachapim kanku 400.000 catolico religionpi sacerdotekuna. Jehova Diospa testigonkunañataqmi kanchik 8 millon masnin 240 nacionkunapiwan llaqtakunapi. Qawasqanchikman hina, Jehova Diospa testigonkunaqa enteron pachapi Diosmanta willakuchkanchik payta hatunchananchikpaq (Sal. 34:1; 51:15).

¹⁵ Jehova Diospa testigonkunaqa Diospa piñakuynin punchaw manaraq chayamuchkaptinmi llapallan runakunaman Diosmanta willayta munanchik. Kay willakuyta tukuy hinastinpi runakuna yachanankupaqmi, tukuy rimaykunapi tikrarqanchik hinaspa ruwarqanchik millonnintin librokunata, revistakunata, folletokunata hinaspa invitacionkunata. Chaymantapas qillqanchikkunatam tikrarqanchik 700 masnin rimaykunaman. Traducción del Nuevo Mundo de las Santas Escrituras sutiyuq bibliatapas hurqurqanchikmi 200 millon masninta 130 rimaykunapi. Pasaq watallapim hurqurqanchik yaqa 4.500 millon qillqakunata. Chaymantapas internetpi direccionninchikmi 750 masnin rimaykunapi kachkan. Manamá mayqan religionpas chaynataqa ruwanchu.

16. ¿Imaynatam yachanchik Jehova Diospa testigonkunaqa chuya espirituwan yanapachikusqankuta?

¹⁶ ¿Haykapikamataq Jehova Diosmanta hinalla willakunanchik? Jesucristom nirqa Diospa piñakuynin punchaw chayamunankama hinalla apakunanmanta (Mat. 24:14). Chaymi Jehova Diospa testigonkunaqa kunan tiempopipas Diospa chuya espiritunpa yanapakuyninwan hinalla  willakuchkanchik (Hech. 1:8; 1 Ped. 4:14). Wakin religionniyuq runakunapas ninkum Diospa chuya espiritun yanapasqanmanta. Ichaqa, ¿Jehova Diospa testigonkuna hinachu tukupay punchawpi Diosmanta willakuchkanku? Wakin religionkunam ñuqanchik hina Diosmanta willakuyta qallaykurqaku, ichaqa manam atirqakuchu. Wakinkum Diosmanta willakuyta munanku, ichaqa manam unaychu chayta ruwanku. Wakinkuñataqmi wasin-wasin willakuspankupas, hamuq tiempopi Jehova Diospa imakuna ruwananmantaqa manam willakunkuchu. Paykunaqa mana Jesuspa  yachachisqanman hinachu ruwachkanku.

17, 18. (1) ¿Imaynanpim mana iskayrayanchikchu Jehova Diospa testigonkunalla Diospa kamachimuyninmanta willakusqankuta? (2) ¿Imaynatam chay ruwayta atinchik?

¹⁷ ¿Pikunataq Diospa kamachimuyninmanta willakuchkanku?Jehova Diospa testigonkunallam, ¿imaynanpim yachanchik? Diospa kamachimuyninmanta imam kaqta willakusqanchikraykum. Willakuq lluqsispapas Jesuspa yachachisqanman hinam runakunata maskanchik. Chaytaqa ruwanchikmi Diosta chaynataq runamasinchikkunata kuyasqanchikrayku. Chaymantapas enteron pachapi runakunamanmi willakuyninchikqa chayachkan ¿imanasqa? Lliw nacionkunapi hinaspa tukuy richkaq rimaykunapi willakusqanchikraykum. Chaymi hinalla Diospa kamachimuyninmantaqa willakunanchik, tukupay punchaw chayamunankama.

¹⁸ Ancha admirakuypaqmi tukupay punchawpi sumaq willakuykunata runakunaman apanapaq tukuy ima ruwasqanchikqa. ¿Imaynatam chay ruwayta atinchik? Apostol Pablom willakun: ‘Diosmi munasqanman hina allin munayta qususpaykichik allinkuna ruwanaykichikpaq yanapasunkichik’, nispa (Filip. 2:13). Chaynaqa Jehova Diosninchiktayá mañakusun paymanta tukuy sunqunchikwan hinalla willakunanchikpaq (2 Tim. 4:5).