1. Jehova Diospa testigunkunaqa, ¿imanasqataq kusisqa kanchik? (Qaway kay paginapi fotota).

JEHOVA DIOSPA testigunkunaqa ancha kusisqam kanchik huñunakuykunapi utaq maypipas iñiqmasinchikkunawan kaspanchik. ¿Imaynanpim chayna kusisqa kanchik? Chaynaqa kanchik ‘kusikuq Diosta’ riqsisqanchikrayku, payta servisqanchikrayku hinaspa payta qatipakusqanchikraykum (1 Tim. 1:11; Sal. 16:11). Kusisqa kasqanraykum Jehova Diosqa munan ñuqanchikpas kusisqa kananchikta, chaymi payqa niwanchik imakunata ruwaspa kusisqa kananchikmanta (Deut. 12:7; Ecl. 3:12, 13).

2, 3. (1) ¿Ima ninantaq kusisqa kayqa? (2) ¿Imakunam sasachawachwan kusisqa kananchikpaq?

² Sapakamam kaynata tapukuchwan: “¿Ñuqapas kusisqachu kachkani?”, nispa. Kusisqa kayqa allinlla tarikuymi, imayna kawsasqanchikwan hawka kaymi, hinaspapas asirisqallaña kaytaqmi. Bibliam nin kusisqa kananchikpaqqa  Jehova Dioswan kuyachikunanchikmanta. Ichaqa, kunan tiempupi kusisqa kayqa sasam. ¿Imanasqa?

³ Sasachakuykuna kasqanraykum manaña kusisqachu kachwan. Ichapas llamkayninchikmanta qarqusqa kachwan, warminchikmanta utaq qusanchikmanta rakikuruchwan, pi ayllunchikpas Diospa llaqtanmanta qarqusqa kanman utaq pi kuyasqa ayllunchikpas wañukunman. Wakinpiqa llakichiwachwantaqmi ayllupi sasachakuykuna, llamkayninchikpi utaq escuelanchikpi asikuwasqanchikkuna, Diospi iñisqanchikrayku qatikachasqa utaq carcelpi wichqasqa kasqanchikpas. Unquspanchikpas utaq imawanpas llumpay llakisqa tarikuspanchikpas manañam kusisqachu kachwan. Ichaqa Jesusqa munanmi runakunapa sunqunta tiyaykachiyta hinaspa kusisqa kanankupaq yanapayta (1 Tim. 6:15; Mat. 11:28-30). Ancha riqsisqa yachachikuyninpim, Jesusqa rimarqa sasachakuypi tarikuspanchikpas kusisqa kanapaq imakuna yanapawananchikmanta.

4, 5. Kusisqa kananchikpaq hinaspa hinalla kusisqa kananchikpaqqa, ¿imatam ruwananchik?

⁴ Jesusmi puntata nirqa: “Mayna kusisqam Diosta maskaqkunaqa, paykunapamiki hanaq pacha Diospa munaychakuyninqa”, nispa (Mat. 5:3). ¿Imata ruwaspam qawachichwan Jehova Diosta riqsiy munasqanchikta hinaspa munasqanman hina kawsakuyta munasqanchiktapas? Qawachichwanmi bibliata estudiaspa, kamachikuyninkunata kasukuspa hinaspa Diosta servisqanchikta imamantapas puntapi churaspa. Chayta ruwaspaqa aswan kusisqam kawsakusunchik, hinaspapas manam iskayrayasunchu hamuq tiempupi Dios tukuy ima niwasqanchikta ruwananmantaqa. Diospa ruwananmanta yachaypas kallpanchawanchikmi ima sasachakuykunatapas aguantanapaq (Tito 2:13).

⁵ Kusisqa kananchikpaq hinaspa hinalla kusisqa kananchikpaqqa Jehova Dioswanmi kuyachikunanchik. Apostol Pablom kaynata qillqarqa: “[Jehova Diosninchikraykuyá] tukuy tiempo kusikuychik. Huktawanraqmi nikichik: ‘¡Kusikuychikyá!’”, nispa (Filip. 4:4). Arí, Jehova Dioswan kuyachikunapaqqa paymantam yachayta chaskinanchik. Bibliam nin: “¡Mayna kusisqam yachayta tariruq runaqa! ¡Mayna kusisqam yachayta chaskiruq runaqa!”, nispa. Chaymantapas ninmi: “Yachayqa kawsaymi pipas tariruqninpaqqa. ¡Mayna kusisqam tariruspa waqaychaqkunaqa!”, nispa (Prov. 3:13, 18).

6. ¿Imatawanraqmi ruwananchik hinalla kusisqa kanapaq?

⁶ Chaymantapas, hinalla kusisqa kawsakunanchikpaqqa bibliapa yachachikuyninkunatam hinalla kasukunanchik. Chaymi Jesus nirqa: “Kaykunata yachaspaykichik hinaspa chayman hina kawsaspaykichikqa kusisqam kankichik”, nispa (Juan 13:17; qaway Santiago 1:25). Chaytam ruwananchik Diosta allinta riqsinanchikpaq hinaspa wiñaypaq kusisqa kawsananchikpaq. Ichaqa, ¿imaynataq kusisqa kachwan llumpay mana allinkuna  kachkaptinqa? Yachasunyá Jesuspa ancha riqsisqa yachachikuyninpi imakuna nisqanmanta.

7. ¿Imanasqataq llakisqakunaqa kusisqa kanku?

⁷ “Mayna kusisqam llakisqakunaqa, paykunaqariki consuelasqam kanqaku” (Mat. 5:4). Ichapas wakin runakuna kaynata ninmanku: “¿Imaynamá llakisqakunaqa kusisqaqa kanmanku?”, nispa. Jesusqa manam rimachkarqachu imaraykupas llakisqa tarikuqkunamantachu. Mana allin ruwaqkunapas llakikunkum sasachakuykunata qawaspankuqa (2 Tim. 3:1). Paykunaqa kikillankupi piensasqankuraykum llakikunku, chayraykum mana kusisqachu tarikunku. Llakisqakunamanta rimaspanqa Jesusqa rimachkarqa Diosmanta yachay munaqkunamantam, paykunaqa llakikunkum runakuna Diosmanta karunchakusqankuta hinaspa munasqankuman hina kawsakusqankuta qawaspanku. Paykunaqa riqsikunkum huchasapa runa kasqankuta. Chaymantapas llakikunkum enterun allpa pachapi mana allinkunata qawaspanku. Chayna llakisqakunataqa Jehova Diosqa qawachkanmi, chaymi paykunata bibliawan sunqunkuta tiyaykachin, kusisqa kawsakunankupaq yanapaspan hinaspam nin hamuq tiempupi wiñaypaq kawsakunankuta (qaway Ezequiel 5:11; 9:4).

8. ¿Imanasqataq ninchik llampu sunqu kayqa kusisqa kananchikpaq yanapawasqanchikmanta?

⁸ “Mayna kusisqam llampu sunquyuqkunaqa, paykunapaqmiki kay pachaqa kanqa” (Mat. 5:5). ¿Imaynatam llampu sunqu kayqa yanapawanchik kusisqa kanapaq? Achka runakunam ñawpaqtaqa rumi sunqu, maqakuq hinaspa peleollapi kaq runakuna karqaku. Bibliamanta imam kaqta yacharuspankum ichaqa llampu sunquña rikurirurqaku ‘musuq runa’ hinaña. Chaymi kunanqa kuyapayakuq, llakipayakuq, llampu sunqu, mana hatun tukuq hinaspa pacienciakuq kanku (Col. 3:9-12). Chayna kasqankuraykum lliw runakunawan hawkalla hinaspa kusisqa kawsakunku. Bibliapas niwanchikmi paykunaqa “herenciankupaq allpata chaskinankumanta” (Sal. 37:8-10, 29).

9. (1) Llampu sunqu kaqkunapaq kay pacha kananmanta Jesus nispanqa, ¿ima niytataq munachkarqa? (2) ¿Imanasqataq “allin ruwaymanta yarqachikuqkunawan yakunayachikuqkunaqa” kusisqa kanqaku?

⁹ Jesusmi nirqa llampu sunqu kaqkunapaq kay pacha kananmanta. Chaywanqa, ¿ima niytataq munachkarqa? Hanaq pachaman riqkunapaqmi kay pacha kanqa sacerdote kaspanku Jesuswan kay pachata kamachimuptinku (Apoc. 20:6). Hanaq pachaman mana riqkunapaqñataqmi kay allpa pacha kanqa kay allpa pachapi wiña-wiñaypaq kawsakuptinku. Paykunaqa kusisqa hinaspa mana huchayuqñam kawsanqaku. Hanaq pachaman riqkunamanta hinaspa kay allpa pachapi kawsaqkunamantam Jesusqa nirqa: “Mayna kusisqam allin ruwaymanta yarqachikuqkunawan yakunayachikuqkunaqa”, nispa (Mat. 5:6). Paykunapa munasqankum chay tiempupi ruwasqa kanqa (2 Ped. 3:13). Mana allinkunata Dios chinkachiptinqa, allin ruwaq runakunaqa  manañam ñakarinqakuñachu, aswanqa kusisqam wiña-wiñaypaq kawsakunqaku (Sal. 37:17).

10. ¿Ima ninantaq llakipayakuq kayqa?

¹⁰ “Mayna kusisqam llakipayakuqkunaqa, paykunaqariki llakipayasqam kanqaku” (Mat. 5:7). Llakipayakuq kayqa sunqumanta pitapas kuyaymi hinaspa pipas ñakariptin llakipayaymi. Ichaqa manam chayllachu, bibliapiqa niwanchikmi llakipayakuq kayqa runamasinchikpaq imatapas ruwaspa yanapay kasqanmanta.

11. Samaria llaqtayuq allin runamanta rikchanachiyqa, ¿imatam yachachiwanchik?

¹¹ (Qaway Lucas 10:30-37). Samaria llaqtayuq allin runamanta rikchanachiymi yachachiwanchik llakipayakuq kaspanchikqa imayna kananchikmanta. Chay Samaria llaqtayuq runam pampapi llumpay maqapasqa runata tarirurqa, hinaspam llakipayariykuspan yanapaykurqa. Chay rikchanachiyta Jesus willayta tukuruspanmi nirqa: ‘Qamkunapas chaynatayá ruwamuychik’, nispa. Chaymi tapukunanchik: “¿Samaria llaqtayuq runa hinachu ñuqapas llakipayakuq kani? ¿Llakipayaykunichu pipas sasachakuypi tarikuptin? ¿Imapipas yanapaykuymanchu yuyaq iñiqmasinchikkunata, viuda iñiqmasinchikkunata hinaspa Diosta sapallanku serviq musu-sipaskunata? Chaymantapas, ¿yanapaymanchu llumpay hukmanyasqa iñiqmasiykunata?”, nispa (1 Tes. 5:14; Sant. 1:27).

12. ¿Imanasqataq llakipayakuq kayqa kusichiwanchik?

¹² ¿Imanasqataq llakipayakuq kayqa kusichiwanchik? Llakipayaspa hukkunapaq imatapas ruwasqanchikraykum. Jesusmi nirqa: “Imapas quqmi aswan kusisqaqa imapas chaskiqmantaqa”, nispa. Kusisqataqmi kasunchik chayna kaspa Jehova Diospa sunqunta kusichisqanchikta yachaspanchikpas (Hech. 20:35; qaway Hebreos 13:16). Davidpas llakipayakuqkunamantam nirqa: ‘Jehova Diosmi chayna runataqa waqaychanqa, chayna runamanqa kawsaytam qunqa, kay pachapipas ancha kusisqam kanqa’, nispa (Sal. 41:1, 2). Hukkunata llakipayaptinchikqa Jehova  Diospas ñuqanchiktam llakipayariykuwasunchik. Chayqa anchatam kusichiwasunchik (Sant. 2:13).

13, 14. ¿Imanasqataq chuya sunquyuqkunaqa kusisqa kanku?

¹³ “Mayna kusisqam chuya sunquyuqkunaqa, paykunaqariki Diostam rikunqaku” (Mat. 5:8). Chuya sunquyuq kanapaqqa yuyayninchikpas hinaspa munasqanchikpas chuyam kanan. Chayna kaymi yanapawasun Jehova Diospaq tukuy ima ruwasqanchikta pay chaskiykuwananchikpaq (qaway 2 Corintios 4:2; 1 Tim. 1:5).

¹⁴ Chaymantapas chuya sunquyuqkunaqa kusisqam kanku Jehova Dios paykunata chaskisqanrayku. Paymi nirqa: “Mayna kusisqam hatun pachankuta taqsaqkunaqa”, nispa (Apoc. 22:14). ¿Imamantataq rimachkan hatun pachankuta taqsasqankumanta rimaspanqa? Chaymanta rimaspanqa hanaq pachaman riqkunata Dios mana huchayuqta hinaña qawasqamantam rimachkan, rimachkantaqmi hanaq pachapi wiñay kawsayta qunanmantapas, chaypiqa kusisqam kawsakunqaku. Kay allpa pachapi yachaqkunapaqñataqmi hatun pachankuta taqsasqankuqa allin ruwaq kasqankurayku Jehova Dioswan kuyachikusqanku. Bibliam nin paykunaqa ‘hatun pachankutapas malta carneropa yawarninwan taqsaspa yuraqyachisqankuta’ (Apoc. 7:9, 13, 14).

15, 16. Chuya sunquyuq runakunaqa, ¿imaynatam Diosta rikunku?

¹⁵ Bibliaqa ninmi pipas Diosta rikuruspanqa wañurunanmanta (Ex. 33:20). Hinaptinqa, ¿imanasqataq Jesus nirqa chuya sunquyuqkunaqa Diosta rikunankumanta? Griego rimaypi “rikuy” nispanqa nichkanmanmi qawachkachwanpas hina pitapas utaq imatapas qawaymanta, yachaymanta, hinaspa pitapas allinta riqsiymanta. Chaynaqa, Diostaqa rikuchwanmi payta allinta riqsispa hinaspa imayna Dios kasqanta yachaspa (Efes. 1:18). Jesusqa Jehova Diospa imayna kasqantaqa allintam qatipakurqa, chaymi nirqa: “Ñuqata rikuwaqniyqa taytaytapas rikurunñam”, nispa (Juan 14:7-9).

¹⁶ ¿Imaynataraqmi Diosta rikuchwan? Rikuchwanmi imaynata yanapawasqanchikta musyakuspa (Job 42:5). Rikuchwantaqmi payman sunquyuq kallpanchakuqkunata hamuq tiempupi imaynata bendecinanmanta yuyaymanaspapas. Hanaq pachaman riqkunam ichaqa hanaq pachapi kikin Diosta rikunqakupuni (1 Juan 3:2).

17. ¿Imanasqataq kusisqa kanku hawkayachiqkunaqa?

¹⁷ Jesusqa nirqataqmi: “Mayna kusisqam hawkayachiqkunaqa”, nispa (Mat. 5:9). Hukkunawan hawka kanapaq kallpanchakuspaqa kusisqam kasunchik. Santiagom kaynata qillqarqa: “Hawka kawsakuqkunaqa hawkayay kananpaqmi yanapakunku, chaynapim paykunaqa allin ruwaykunata ruwanku”, nispa (Sant. 3:18). Ayllunchikwan utaq iñiqmasinchikwan sientinarachikuspaqa paykunawan  allinyanakunanchikpaqmi Jehova Diosta mañakunanchik. Paymi chuya espiritunta quwaspanchik munasqanman hina ruwanapaq yanapawasun hinaspa kusisqa kanapaqpas yanapawasun. Jesusqa nirqam puntata ñuqanchikraq piwanpas hawka kawsakuyta maskanamanta, chaymi nirqa: “Ofrendaykita altarman apachkaspa wawqiki qampaq imamantapas piñasqa kasqanta chaypi yuyariruspaqa, ofrendaykita altarpa ñawpaqninpi saqiykuspa puntataqa wawqikiwan allinyanakamuy, hinaspañayá kutiruspa ofrendaykitaqa quy”, nispa (Mat. 5:23, 24).

18, 19. ¿Imanasqataq Diospa serviqninkunaqa kusisqa kanku ñakarichisqa kaspankupas?

¹⁸ “Mayna kusisqam kankichik ñuqarayku runakuna chiqnisuptikichikqa, ñakarichisuptikichikqa hinaspa contraykichikpi llullakuspa tukuy mana allinkunatapas nisuptikichikqa”. ¿Imanasqataq Jesus chaynata nirqa? Kikinmi nirqa: “Anchatayá kusikuychik, qamkunapaqmi hanaq pachapi hatun premioykichik kachkan, chaynatam Diosmanta willakuqkunatapas qamkunamanta ñawpaqtaraq ñakarichirqaku”, nispa (Mat. 5:11, 12). Diosmanta willakusqankuraykum apostulkunata maqaparurqaku hinaspa kamachirqaku manaña Diosmanta willakunankupaq, chaywanpas paykunaqa ‘hatun cortenmantam kusisqallaña pasakurqaku’. Paykunaqa manam maqapasqa kasqanraykuchu kusisqaqa karqaku, aswanqa ‘Jesuspa sutinrayku pinqaypi churasqa kasqankumantam’ (Hech. 5:41).

¹⁹ Kunan tiempupipas, Jehova Diosta servisqanchikraykum ima sasachakuykunatapas kusikuywan aguantanchik (qaway Santiago 1:2-4). Ñuqanchikqa manam ñakariytaqa munanchikchu, ichaqa sasachakuykunapi tarikuspa Diosman sunqu kaptinchikqa payqa chaykunata aguantanapaqmi yanapawasun. Rimarisun Henryk Dornik iñiqmasinchikmanta. Paytawan wawqintam 1994 watapa agosto killanpi autoridadkuna carcelarurqaku. Paykunata carcelaqninkunam nirqaku: “Imataña ruwasqapas Diosninkutaqa manam saqiyta munankuchu, maqapasqa kaytachusmi munanku”, nispa. Henryk Dornik iñiqmasinchikñataqmi nirqa: “Maqawasqankuwanqa manam kusisqachu karqani, ichaqa kusisqaqa karqani ñakarichiwaptinkupas hinalla Diosman sunqu kasqaywanmi”, nispa. Nirqataqmi: “Tukuy sunquywan Jehova Diosta mañakusqaymi yanapawarqa kallpata hapinaypaq hinaspa astawan payman asuykunaypaq. ¡Paymi anchata yanapawarqa!”, nispa.

20. ¿Imanasqataq Diosta serviyqa kusichiwanchik?

²⁰ ‘Kusikuq Diospa’ chaskisqan kaspanchikqa kusisqam kanchik qatikachasqa kaspanchikpas, ayllunchikkuna sasachawaptinchikpas, unquqña utaq yuyaqña kaspanchikpas (1 Tim. 1:11). Kusisqataqmi kanchik Diosninchik tukuy ima niwasqanchikta hamuq tiempupi ruwananmanta mana iskayrayaspa, payqa “mana llullakuq Diosmi” (Tito 1:2). Musuq pachapim Jehova Diosqa anchata bendeciwasun, chaypiqa manañam yuyarisunñachu ima sasachawasqanchikkunataqa. Jehova Diosqa tukuy imakunawanmi bendeciwasun. Hawkayaypim hinaspapas kusisqallañam kawsakusun (Sal. 37:11).