1. ¿Imanasqataq llapallan iñiqkuna huk sunqulla kanchik?

TAYTANCHIK Jehova Diosta yupaychasqanchikwanqa kusisqam tarikunchik. Paypa churasqan umalliqkunata kasukuspanchikmi llapallan iñiqkuna huk sunqulla kanchik.

2. ¿Ima tapukuykunamantam kay yachachikuypi yachasun?

² Kay yachachikuypim yachasun llapallan iñiqkuna pikunata kasukunamanta. Yachasuntaqmi kay tapukuykunamantapas: ¿Imakunatam warmi iñiqmasinchikkuna ruwanku? ¿Qarikunaqa llapallan Diosta serviq warmikunapa umanchu? ¿Iñiqkunapi punta apaqkunaqa ayllupi umalliqkuna hinachu iñiqmasinkuta kamachinanku?

3. ¿Imamanta yachaspam astawan warmi iñiqmasinchikkunata kuyasun?

³ Warmi iñiqmasinchikkunaqa anchatam kallpanchakunku ayllunkuta uywanankupaq, Diosmanta willakunankupaq hinaspa iñiqmasinchikkunata yanapaykunankupaq. Chaymi paykunataqa kallpanchaykunanchik. Paykunataqa Jehova Dioswan Jesuspas anchatam kuyanku. Apostol Pablopas allintam paykunamantaqa rimarqa. Chaykunamanta  yachaspam warmi iñiqmasinchikkunataqa astawan kuyasun.

4. ¿Imaynatam yachanchik qaripas warmipas Jehova Diospaqqa chaynalla kasqanta?

⁴ Jehova Diospaqqa warmipas qaripas hina chaynallam. Chaymi payqa apostolkunapa tiemponpi warmimanpas qarimanpas atiyninta quykurqa huk rimaykunapi rimanankupaq (Hech. 2:1-4, 15-18). Diosqa hanaq pachamanta kamachimunankupaqpas qarikunatawan warmikunatam akllaykun (Gal. 3:26-29). Chaymantapas, llapallanchikmi qaripas warmipas kay allpa pachapiqa wiñaypaq kawsakusun (Apoc. 7:9, 10, 13-15). Jesuspas qarimanwan warmimanmi Diosmanta willakunankupaqqa kamachirqa (Mat. 28:19, 20). Bibliapipas willawanchikmi Priscila sutiyuq warmi qusan Aquilapiwan Diosmanta Apolosman sumaqta yachaykachisqankumanta (Hech. 18:24-26).

5. Lucas 10:38, 39 hinaspa 42 nisqanman hinaqa, ¿Jesusqa warmikunata respetaspan imatam ruwarqa?

⁵ Jesusqa warmikunataqa kuyaqmi hinaspapas respetaqmi. Payqa manam fariseokuna hinachu karqa. Fariseokunaqa warmikunata mana valeqpaq hapispankum paykunawanqa mana rimaqkuchu runakunapa qayllanpiqa, manataqmi paykunamanqa Diospa palabranmantapas yachachiqkuchu. Jesusmi ichaqa qarikunamanpas chaynataq warmikunamanpas Diosmanta allinta yachachiq (qaway Lucas 10:38, 39, 42). * Diosmanta willakuq risqanpipas riysirqam warmikunapas (Luc. 8:1-3). Warmikunamantaqmi kawsarimuspanpas puntataqa rikuriykurqa, hinaspam apostolninkunaman willamunankupaq nirqa (Juan 20:16-18).

6. ¿Imaynatataq apostol Pabloqa warmikuna respetasqanta qawachirqa?

⁶ Apostol Pablom Timoteota nirqa warmikunata respetananpaq. Paymi nirqa mayor kaq warmikunata mamanta hina qawananpaq, sipaskunatañataq paninta hina qawananpaq (1 Tim. 5:1, 2). Pabloqa Diosta kuyananpaq Timoteota yanapaspanpas riqsikurqam mamanpiwan abuelan Diosmanta puntata yachachisqanta (2 Tim. 1:5; 3:14, 15). Chaymantapas, Pabloqa Roma nacionpi iñiqmasinkunaman qillqasqanpim achka warmikunapa sutinta qillqarqa. Qillqarqaqa imapas ruwasqankumanta alabaykunanpaqmi (Rom. 16:1-4, 6, 12; Filip. 4:3).

7. ¿Ima tapukuykunamantam yachasun?

⁷ Bibliapiqa manam ninchu warmikunamanta qarikuna aswan allin kasqantaqa. Warmi iñiqmasinchikkunaqa kuyakuqllaña hinaspa Diosman sunqu kaspankum iñiqmasinkutapas yanapanku, hinaspam paykunawan hawkalla chaynataq huk sunqulla kawsakunku. Ichaqa, ¿imanasqataq wakinpiqa umankuta tapakunanku? Chaymantapas, ¿qarikunaqa llapallan warmi iñiqmasinchikkunapa umanchu? Chaykunamantayá yachaykusun.

8. Efesios 5:23 nisqanman hinaqa, ¿imanasqataq qarikunaqa mana llapallan warmikunapa umanchu?

⁸ Manam. Diosta serviq llapallan warmikunapa umanqa Jesusllam (qaway Efesios 5:23). Casarasqa warmikunapa umanqa qusanmi, qari wawanqa manam umanqa  kanmanchu bautizasqaña kaspanpas (Efes. 6:1, 2). Iñiqkunapi punta apaqkunapas iñiqkunamanta nanachikuspanpas manam warmikunataqa tukuy imapichu kamachinanku (1 Tes. 5:12; Heb. 13:17). ¿Ima nichwantaq tayta-mamankuwan manaña yachaq yuyayniyuq sipaskunamantaqa? Tayta-mamanta hinaspa iñiqkunapi punta apaqkunata respetaspanpas kikinñam tantiakunan imapaqpas. Ichaqa yuyarinanmi paypa uman Jesus kasqanta.

9. ¿Imanasqataq warmikunaqa umankuta tapakunanku?

⁹ Jehova Diosqa iñiqkunapi punta apaq kanankupaqqa churan manam warmikunatachu, aswanqa qarikunatam (1 Tim. 2:12). Chaynataqa churan iñiqkuna huk sunqulla kananchikpaqmi. Chayraykum Diosqa Jesustapas churaykun qarikunapa uman kananpaq. Chaymi qaripa ruwananta warmikuna ruwaspankuqa Diospa nisqanman hina umankuta tapakunanku (1 Cor. 11:4-7). * Umankutaqa tapakunanku manam paykunamanta qarikuna aswan allin kasqankuraykuchu, aswanqa Diospa nisqanta kasukusqankuraykum. Kunanñataq yachaykusun ayllupi umalliqkunawan iñiqkunapi punta apaqkuna mana chaynalla kasqankumanta.

10. ¿Imanasqataq iñiqkunapi punta apaqqa iñiqmasinkunata kamachiyta qallaykunman?

¹⁰ Jehova Diostawan Jesusta kuyasqankuraykum iñiqkunapi punta apaqkunaqa iñiqmasinkuta yanapanankupaq kamachisqanta  kasukunku (Juan 21:15-17). Ichapas iñiqkunapi punta apaqqa iñiqmasinkunapaq taytan hina kasqanta piensaspan kaynata ninman: “Imaynam ayllupi umalliq ayllun allinlla kananpaq imatapas kamachin, chaynam ñuqapas iñiqmasiykuna allinlla kanankupaq imatapas kamachiyman”, nispa. Chaymantapas, wakin iñiqmasinchikkuna imatapas tantiaykapunankupaq nisqankuwanmi punta apaqkunaqa kamachiq kasqankupaqña hapikunmanku. Ichaqa, ¿iñiqkunapi punta apaqkunaqa ayllupi umalliqkuna hinachu iñiqmasinkupaq kananku?

11. ¿Imapitaq yaqa chaynalla kanku iñiqkunapi punta apaqkunawan ayllupi umalliqkunaqa?

¹¹ Apostol Pablom iñiqkunapi punta apaqkunamanta hinaspa ayllupi umalliqkunamanta rimaspan nirqa yaqa chaynalla kasqankuta (1 Tim. 3:4, 5). Ayllupi kaqkunaqa umalliqtam kasukunanku, chaynam iñiqkunapas punta apaqkunata kasukunanku (Col. 3:20). Qusakunaqa utaq ayllupi umalliqkunaqa ayllunta kuyaspanmi Diosmanta yachachinan. Chaynallataqmi iñiqkunapi punta apaqkunapas iñiqmasinkuta kuyaspanku Diosman sunqu kanankupaq yanapananku. Kuyakuq tayta  hinataqmi iñiqmasinkupa imapas pisipuqninpi yanapaykunanku (Sant. 2:15-17). Chaymantapas, iñiqkunapi punta apaqkunawan ayllupi umalliqkunaqa hukkunatam yanapananku bibliapi qillqasqa kasqanman hinalla imatapas ruwanankupaq (1 Cor. 4:6).

12, 13. Romanos 7:2 nisqanman hinaqa, ¿imapitaq iñiqkunapi punta apaqkunaqa mana chaynallachu kanku ayllupi umalliqkunawan?

¹² Ichaqa, ¿imapitaq mana chaynallachu kanku iñiqkunapi punta apaqkunawan ayllupi umalliqkunaqa? Iñiqkunapi punta apaqkunallam pi iñiqpas huchallikuruptinqa correginmanku utaq mana wanakuptinqa manaña testigo kananpaqpas tantianmanku (1 Cor. 5:11-13).

¹³ Ichaqa manam iñiqmasinkutaqa kamachinmankuchu. Ayllupi umalliqkunam ichaqa imatapas tantiaspanku ayllunpi kaqkunaman kamachinmanku (qaway Romanos 7:2). Paykunam tantianmanku churinku wasiman imay hora kutiykunankutapas. Mana kasukuptinkupas corregiykunmankum (Efes. 6:1). Kuyakuq qusaqa warmichanwan hukllaña kasqanraykutaqmi payta tapuykunqa ayllunpaq imatapas manaraq tantiachkaspan (Mat. 19:6). *

14. (1) Marcos 10:45 nisqanman hinaqa, ¿imanasqataq Jehova Diosqa Jesusta churaykun iñiqkunapa umalliqnin kananpaq? (2) ¿Imaynatam Diospa llaqtanpi punta apaqkuna yanapawanchik? (Qaway “ ¿Imaynatam Diospa llaqtanpi punta apaqkuna yanapawanchik?” niqta).

¹⁴ Taytanchik Jehova Diosmi Jesuspa  wañukusqanwan llapallanchikta huchamantawan wañuymanta libraykuwanchik (qaway Marcos 10:45; Hech. 20:28; 1 Cor. 15:21, 22). Chayraykum Jesustaqa iñiqkunapa umalliqnin kananpaq churaykun. Jesusqa umalliqninchik kasqanraykum imayna kawsakunanchikpaqpas kamachiwanchik (Gal. 6:2). Ichaqa manam kamachiyllachu-kamachiwanchik, aswanqa imapas pisipuwaqninchikta quwaspanchikmi sapakamata yanapawanchik (Efes. 5:29).

15, 16. ¿Imatam yachachwan iñiqmasinchik Marlemantawan Benjaminmanta?

¹⁵ Warmi iñiqmasinchikkunaqa umalliqkunapa nisqanta kasukuspankuqa Jesustam kasukuchkanku. Estados Unidos nacionpi yachaq Marlem kaynata nin: “Ñuqaqa allin warmi kayta hinaspa Dios kasukuytam munani. Chaymi kallpanchakuni paypa churasqan umalliqkunata kasukunaypaq. Ichaqa qusaypas chaynataq iñiqkunapi punta apaqkunapas kuyakuqllaña kasqankuraykum paykuna kasukuytaqa mana sasachakunichu”, nispa. Umalliqkunapas warmikunata kuyaspanku hinaspa respetaspankum qawachinku Jesus kasukusqankuta.

¹⁶ Inglaterra nacionpi yachaq Benjaminmi nin: “Warmi iñiqmasinchikkunapa huñunakuypi rimarisqankum allinta yanapawan. Paykunamantataqmi yacharuni allinta estudiayta hinaspa runamasinchikkunaman Diosmanta sumaqta willakuytapas. Paykunaqa imatapas tukuy sunqumantam ruwanku”, nispa.

17. ¿Imaynam kawsakusun Diospa nisqanta kasukuspaqa?

¹⁷ Llapallanchikmi qaripas warmipas, ayllupi umalliqkunapas chaynataq iñiqkunapi punta apaqkunapas Diosta kasukuspanchikqa hawkalla hinaspa huk sunqulla kawsakusun. Hinaspapas taytanchik Jehova Diostam hatunchasun (Sal. 150:6).