1, 2. (1) ¿Pim sapa punchaw yanapawanchik tukuy imata atipanapaq? (2) ¿Imamantam kay yachachikuypi qawasun?

SASACHAKUYKUNAPI tarikusqanchikta yuyarispaqa yaqa llapallanchikmi ninchik sapallanchikqa chay sasachakuykunata mana atipasqanchikmanta. Chaynataqa nirqanchik ichapas unqusqanchikrayku utaq ayllunchik wañukusqanrayku sasachakusqanchikpi yuyaymanaspa. Chaykunataqa atiparqanchik sapa punchaw taytanchik Jehova Dios yanapawasqanchikraykum. Payqa ‘runakunapa mana haypay atisqan hatu-hatun atiytam’ quwarqanchik (2 Cor. 4:7-9).

² Jehova Diospa yanapakuynintaqa munanchiktaqmi kay pachapi mana allin kaqkunata atipanapaqpas (1 Juan 5:19). Chaymantapas yanapaykuwananchiktam munanchik ‘hanaq pachapi kaq mana allin espiritukunapa contranpi peleasqanchikrayku’ (Efes. 6:12). Tukuy kaykunawan atipanakusqanchikraykum munanchik Jehova Dios yanapaykuwananchikta. Chaymi kunan qawasun imaynata Jehova Dios yanapawasqanchikmanta. Qawasuntaqmi Diospa yanapakuyninta chaskinapaq ima ruwananchikmantapas.

3. Jehova Diosqa, ¿imatam quwanchik sasachakuypi tarikuspapas ruwayninchikta hinalla ruwanapaq?

³ Sasachakuypi kaspa imapas ruwayninchikta hinalla ruwanapaqmi, Jehova Diosqa yanapawanchik atiytawan kallpata quwaspanchik. Apostol Pablopas nirqam sasachakuypi tarikuspanpas hinalla Diosta yupaychananpaq yanapakuy chaskisqanmanta (2 Cor. 12:9). Iskay kaq illasqanpiqa, manam Diosmanta willakunallanpaqchu kallpanchakunan karqa, aswanqa llamkananpaqpiwanmi. Corinto llaqtapim samapakurqa  Aquilapa wasinpi. Payqa warmichanwanmi carpakunata ruwaspa llamkaqku, chaymi Pablopas paykunawan kuska llamkarqa (Hech. 18:1-4). Arí, Pablotaqa Jehova Diosmi atiyninwan yanaparqa llamkananpaq chaynataq paymanta willakunanpaq.

4. 2 Corintios 12:7b-9, nisqanman hinaqa, ¿imawanmi Pabloqa ñakarirqa?

⁴ (Qaway 2 Corintios 12:7b-9). ¿Ima niytataq Pablo munachkarqa “tipawaqniy kichkata hina aychaypi quwarqa” nispanqa? Kichka tiparuwaptinchikqa, nanawanchikmi. Chaynaqa, Pabloqa nichkarqa ñakarichiqnin kaqkunamantam. Chay ñakariy satanaspa angelnin hina ñakarichisqantam nirqa. Manachusmi satanaswan demonionkunachu ñakariytaqa churarqa. Ichaqa, Pablopa ñakarisqanta qawaspa, ichapas astawan ñakarinanpaq tukuyta ruwarqaku. ¿Imatam Pablo ruwarqa?

5. Jehova Diosqa, ¿imaynatam Pablota yanapaykurqa mañakusqanman hina mana yanapaykuspanpas?

⁵ Pabloqa chay ñakarichiqnin kaqkunamanta ‘hurquykunanpaqmi kimsa kutikama señorninchikta mañakurqa’. Ichaqa, achka kutikama mañakuptinpas Diosqa manam chinkachirqachu chay ñakarichiqnin kaqkunataqa. Chaynaqa, ¿nichwanchu mañakusqanta Jehova Dios mana uyarisqanmanta? Manam. Mañakusqantaqa uyarirqam. Ñakarichiqnin kaqkunata mana chinkachispanpas atiytawan kallpatam qurqa. Hinaspam nirqa: “Atiyniyqa mana kallpayuq runapim lliw qawakun”, nispa (2 Cor. 12:8, 9). Jehova Dios yanapasqanraykum Pabloqa kusisqa hinaspa hawka tarikurqa (Filip. 4:4-7).

6. (1) ¿Imaynatam Jehova Diosqa yanapawachwan? (2) Kay 6 kaqpi textokunamanta, ¿mayqintaq anchata kallpanchasunki?

⁶ ¿Yaqachu Pablo hina Diosta mañakurqanchik ñakarichiwaqninchik kaqkunamanta hurquykuwananchikpaq? Diosta mañakuchkaptinchikpas ichaya ñakariykunaqa hinallapas kachkan utaq aswanyarunpas. Chaywanqa ichapas nichwan Jehova Dios manaña kuyawasqanchikmanta. Chayna kaptinqa, yuyaymanasunyá apostol Pablopi. Jehova Diosqa paypa mañakusqantam uyarirqa, chaynaqa, ñuqanchikpatapas uyarinqam. Ñakarichiwaqninchik kaqkunamanta mana hurquykuwaspanchikpas, atiytawan kallpatam quwasun hinalla ñawpaqman rinapaq (Sal. 61:3, 4). Ñakarichisqa kaptinchikpas, Jehova Diosqa manam saqiwasunchu (2 Cor. 4:8, 9; Filip. 4:13).

7, 8. (1) ¿Imaynanpitaq nichwan Diospa atiynin wayra hina kasqanmanta? (2) ¿Imatam Pedro nirqa Diospa atiynin imayna yanapawasqanchikmanta?

⁷ ¿Imaynatapiwanmi Jehova Diosqa yanapawanchik? Imaynam wayrapas lamar quchapi kaq boteta allpaman chayananpaq yanapan, chaynam Jehova Diospa atiyninpas yanapawanchik ñakaristinpas kay allpa pacha huertayanankama hinalla kallpanchakunapaq.

⁸ Apostol Pedroqa challwaq kasqanraykum, sumaqta yachaq botepi puriytaqa. Yaqapaschá chayrayku Diospa atiynin imayna yanapawasqanchikmantaqa tupachirqa boteta wayra imayna yanapasqanwan. Paymi qillqarqa: “Diosmanta willakuykunaqa manam haykapipas runakunapa munasqanman hinachu karqa, aswanqa chuya espiritu [utaq Dios atiyninwan] yanapaptinmi runakunaqa Diospa rantinpi rimarqaku”, nispa (2 Ped. 1:21).

9. ¿Ima niytataq munachkarqa apostol Pedro ‘chuya espiritu yanapaptinmi’ nisqanwan?

⁹ ¿Ima niytataq munachkarqa apostol Pedro ‘chuya espiritu yanapaptinmi’ nisqanwan? Hechos qillqata qillqaq Lucaspas  yaqa chaynatam qillqarqa, botekunata apaq wayramanta qillqaspan (Hech. 27:15). Chaynaqa, biblia qillqaqkunamanta ‘chuya espiritu yanapaptinmi’ nisqanwanqa, Pedroqa rikchanachikkarqam lamar quchanta riq botekunata apaq wayrawan. Chayna kasqanmantam nin bibliamanta sumaqta yachaq runapas. Chaynaqa, Pedroqa nichkarqa imaynam wayrapas yanapan lamar quchapi boteta allpaman chayananpaq, chayna Diospas atiyninwan yanapaptin runakuna Diospa rantinpi rimasqankumantam. Hina chay bibliamanta sumaqta yachaq runam nirqa: “Biblia qillqaqkunaqa lamar quchapi botekunapas kachkanmanku hinam karqaku. Diosñataqmi wayrawan chay botekunata allpaman apachkaq hina atiyninwan yanaparqa”, nispa. Chaynaqa biblia qillqaqkunaqa Dios atiyninwan yanapaptinmi bibliataqa qillqarqaku.

10, 11. ¿Imakunatam ruwananchik Jehova Dios atiyninwan yanapawananchikpaq? Willarimuy boteyuqkuna wayrawan imayna yanapachikusqankumanta.

¹⁰ Kunanqa, Jehova Diosqa manañam atiyninwanqa pitapas yanapanñachu nisqankunata qillqanankupaqqa. Ichaqa, hinallam runankunata atiyninwan yanapachkan. Chaynaqa, Jehova Dios atiyninwan yanapawananchikpaqqa, sapakamam kallpanchakunanchik. ¿Imata ruwaspa?

¹¹ Boteyuqkuna wayrawan yanapachikuyta munaspankuqa, puntatam boteta yakuman tanqananku, chaynapi risqanku lawman wayra apananpaq. Chaymantapas botepa qirunpi kaq tolderatam kacharinan chaynapi wayra pukumuspan yanapananpaq. Yaqa chaynatam ñuqanchikpas ruwananchik Jehova Dios atiyninwan yanapawananchikta munaspaqa. Chaypaqqa, wayrapa pukusqan lawmanmi sayananchik, huk rimaypiqa Diospaq kaqkunatam ruwananchik. Chaymantapas botepa qirunpi kaq tolderakunata kacharichkachwanpas hinam Diospaq kaqkunata ruwanapaq kallpanchakunanchik (Sal. 119:32). Kaykunata ruwaptinchikqa, Jehova Diosmi atiyninwan yanapawasun imaña-haykaña kaptinpas kay allpa pacha huertayanankama  hinalla payta yupaychananchikpaq.

12. Kunanqa, ¿imamantañam qawasun?

¹² Kunankamaqa, yacharunchikmi Dios imayna yanapawasqanchikmanta. Payqa atiytawan kallpatam quwanchik ñakaristinpas hinalla payman sunqu kanapaq. Yanapawanchiktaqmi wiñay kawsayta haypananchikkama hinalla payta yupaychanapaq. Kunanñataqmi qawasun Dios atiyninwan yanapawananchikpaq imakuna ruwanamanta.

13. (1) 2 Timoteo 3:16, 17 nisqanman hinaqa, ¿imaynatam biblia yanapawanchik? (2) ¿Imatam sapakama ruwananchik?

¹³ Bibliatam sumaqta ñawinchananchik (qaway 2 Timoteo 3:16, 17). Yachanchikmi bibliapa nisqankunaqa Diosmanta kasqanta. Diosmi atiyninwan biblia qillqaqkunaman yuyayta qurqa paypa munasqanman hina qillqanankupaq. Chaymi bibliata ñawinchaspa yuyaymanaspanchikqa Diospa nisqankuna yuyayninchikman hinaspa sunqunchikman yaykunanpaq saqichkanchik. Chaykunañataqmi yanapawanchik Diospa munasqanman hina kawsakunapaq (Heb. 4:12). Ichaqa, Dios atiyninwan yanapawananchikpaqqa sapa punchawmi bibliata ñawinchaspa yuyaymanananchik. Chayta ruwaspanchikqa Diospaq hinam imatapas ruwasun.

14. (1) ¿Imaynanpitaq ninchik Jehova Dios atiyninwan huñunakuykunapi yanapawasqanchikmanta? (2) Dios atiyninwan yanapawananchikta munaspaqa, ¿imatam ruwananchik?

¹⁴ Iñiqmasinchikkunawan kuska huñunakuspam Diosta yupaychananchik (Sal. 22:22). Jehova Diosqa atiyninwanmi yanapawanchik huñunakuykunapi (Apoc. 2:29). ¿Imaynanpitaq chayna kasqanmanta ninchik? Huñunakuykunapiqa atiynintam mañakunchik, takinchiktaqmi bibliamanta hurqusqa takikunata, hinaspapas Diospa akllasqan iñiqmasinchikkunapa yachachisqankutam uyarinchik. Hina Diostaqmi atiyninwan yanapan warmi iñiqmasinchikkunapas ñawpaqman lluqsispa sumaqta rimarinankupaq. Chaynaqa, Dios atiyninwan yanapawananchikpaqqa qillqanchikkunatam sumaqta qawananchik manaraq huñunakuyman richkaspa, chaynapi makinchikta huqarispa rimarinanpaq. Chayta ruwaptinchikqa, Diosmi atiyninwan yanapawasun.

15. ¿Imatam ruwananchik willakuptinchik Dios atiyninwan yanapawananchikpaq?

¹⁵ Jehova Diosmantam willakunanchik. Runamasinchikkunaman bibliawan willakuptinchikqa Jehova Diosmi atiyninwan yanapawasun (Rom. 15:18, 19). Chayna yanapawananchikpaqqa, sapa kutim lluqsinanchik Diosmanta willakuq, hinaspapas bibliawanmi imam nisqanchikta qawachinanchik. Sumaqta willakunapaqqa, qawachwantaqmi sapa killa lluqsimuq Diospa munayninta ruwananchikpaq huñunakuypi yanapawaqninchik qillqata.

16. ¿Imatam ruwananchik Dios atiyninwan yanapawananchikpaq?

¹⁶ Jehova Diostam mañakunanchik (Mat. 7:7-11; Luc. 11:13). Jehova Dios atiyninwan yanapawananchikpaqqa paytam mañakunanchik. Payqa uyariwasunmi carcelpi kaptinchikpas, manataqmi satanaspas harkakunmanchu pay mañakunanchiktaqa (Sant. 1:17). Ichaqa, ¿imaynatam mañakunanchik atiyninwan yanapawananchikpaq? Kaymanta allinta yachanapaqqa Lucas * qillqapi rikuriq rikchanachiymanta qawasun.

17. Lucas 11:5-9, 13 Jesus nisqanman hinaqa, ¿imaynatam Diosta mañakunanchik?

¹⁷ (Qaway Lucas 11:5-9, 13). Kay ñawinchasqanchikmi qawachiwanchik atiyninwan yanapawananchikpaq Diosta imayna mañakunamanta. Kay ñawinchasqanchikpi runaqa mana amispa mañakusqanraykum mañakusqanta chaskirqa. Manam pinqakurqachu riqsinakusqanta chawpi tutataña qayaytapas. * Kaywanqa, ¿ima niytataq Jesusqa munachkarqa? Nirqam: “Hinallayá mañakuychik hinaptinqa qusunkichikmi, hinallayá maskaychik hinaspaqa tarinkichikmi, hinallayá punkuta takaychik hinaptinqa kichaykusunkichikmi”, nispa. Chaynaqa, Dios atiyninwan yanapawananchikpaqqa mana amispam mañakunanchik.

18. ¿Imanasqataq hinalla Diosta mañakunanchik atiyninwan yanapawananchikpaq?

¹⁸ Jesuspa chay willakusqanqa yanapawanchikmi imaynanpi Dios atiyninwan yanapawananchikmanta yachanapaq. Jesuspa nisqanman hinapas chay runaqa watukuqnintam tutataña chayachkaptinpas sumaq chaskiykuyta munarqa. Imachallatapas mikuykunantam munarqa, ichaqa manam kapurqachu. Jesusmi nirqa mana amispa  chay riqsinakusqan runata mañakusqanrayku, chay runa tanta qusqanmanta. Kaywanqa, ¿ima yachananchiktam Jesusqa munachkarqa? Chay wasiyuq pantaq runa kachkaspanpas mañakuqninman quykuchkaptinqa astawanraqchá kuyakuq Diosninchikqa atiyninwan yanapawasun mana amispa mañakuptinchikqa. Chaynaqa, Jehova Diosta atiyninwan yanapawananchikpaq mañakuptinchikqa yanapawasunmi (Sal. 10:17; 66:19).

19. Satanasqa imataña ruwaspanpas, ¿imanasqataq Diosmantaqa mana karunchawasunchu?

¹⁹ Satanasqa, imataña ruwaspanpas Diosmantaqa manam karunchawasunchu, Jehova Dios atiyninwan yanapawasqanchikrayku. Payqa atiyninwanmi yanapawanchik sasachakuykunata atipananchikpaq. Yanapawanchiktaqmi kay allpa pacha huertayanankama hinalla payta yupaychanapaqpas. Chaynaqa, Dios atiyninwan hinalla yanapawananchikpaqyá kallpanchakusun.