¿Yacharqankichu?
¿Imanasqataq huklaw nacionniyuqkunapas Davidpa soldadon karqa?
DAVIDPA soldadonkunaqa manam Israel runakunallachu karqa. Karqataqmi Ammon kasta Zelecpas, Het kasta Uriaspas chaynataq Moab llaqtayuq Itmapas (1 Cron. 11:39, 41, 46). a Karqataqmi ‘Keret runakunapas, Pelet runakunapas chaynataq Gat runakunapas’ (2 Sam. 15:18). Keret runakunawan Pelet runakunaqa yaqachusmi Filistea runakunapa ayllun karqaku (Ezeq. 25:16). Gat runakunaqa Gat allpapim yacharqaku (Jos. 13:2, 3; 1 Sam. 6:17, 18).
¿Imanasqataq Davidqa huklaw nacionniyuqkunatapas soldadon kananpaq akllarurqa? Payqa yacharqam Jehova Diosta respetasqankurayku payta mana saqinankuta. Keret hinaspa Pelet runakunamantam huk libro nin: “Paykunaqa kamachiq David sasachakuykunapi kaptinpas manam saqirqakuchu”, nispa. Huk kutipim Seba sutiyuq runa ‘chaqwata ruwaspan’ Davidpa contranpi hatarirurqa, hinaptinmi “Israelpi llapallan runakuna” Davidta saqirurqaku. Keret hinaspa Pelet runakunam ichaqa mana saqirqakuchu. Aswanqa yanaparqakum Sebapa umachasqan runakunata vencenankupaq (2 Sam. 20:1, 2, 7). Huk kutipiñataqmi Davidpa contranpi churin Adonias huqarikuruspan Israel runakunata payña kamachiyta munarqa. Keret hinaspa Pelet runakunam ichaqa Davidtaqa mana qipancharqakuchu. Aswanqa Davidtam yanaparqaku paypa qipanta churin Salomon kamachiq kananpaq. Paykunaqariki yacharqakum Salomontaqa kikin Jehova Dios akllaykusqanta (1 Rey. 1:24-27, 38, 39).
Gat llaqtayuq Itaipas Davidtaqa manam saqirqachu. Paywan 600 soldadonkunam Davidta yanaparqaku churin Absalon contranpi hatariruspan kamachiq kayta munaptin. Absalonqa Israel runakunawanmi kuyachikuyta qallaykurqa, chaynapi kamachiqta churarunankupaq. Davidmi Itaita nirqa huklaw llaqtayuq kasqanrayku ama yanapananpaq. Itaimi ichaqa nirqa: “¡Kawsaq Jehova Diospa sutinpi hinaspa qampa qayllaykipim niki, maymanña riptikipas hinaspa wañunayña kaptinpas qanwanmi risaq kamachiqlláy!”, nispa (2 Sam. 15:6, 18-21).
Itaimi Jehova Diospa akllasqan rey Davidta imaña kaptinpas mana saqirqachu.
Keret, Pelet hinaspa Gat runakuna huklaw nacionniyuq kaspankupas Jehova Dios chiqap kasqantam riqsikurqaku, Davidtapas Diospa akllasqan kasqanraykum respetarqaku. Davidqa maynatachá agradecekurqa imaña kaptinpas mana saqiqnin runakunataqa.
a Deuteronomio 23:3-6 nisqanman hinaqa Diosmi Israel runakunata kamachirqa Moab hinaspa Ammon runakunawan ama huñunakunankupaq. Chaywanqa yaqachusmi nichkarqa huklaw nacionniyuq runakunaqa Israel runakuna hina derechoyuq mana kanankumanta. Ichaqa atinmankum karqa Israel runakunawan hukllawakuytaqa chaynataq paykunapa allpanpi yachaytaqa. Chaypaq Perspicacia para comprender las Escrituras sutiyuq libropi maskay “Ammonitas” niqta, hinaspañataq maskay “Se casan con israelitas” nisqanta.
