Huchanchikmanta pampachasqaqa kachwan ñuqanchikrayku Jesus wañukusqallanwanmi (Efes. 1:7). Chaywanpas bibliam nin Jehova Diosqa ‘hawkalla suyaspan ñawpaq tiempopi huchakunata pampachasqanmanta’ (Rom. 3:25). Chay nisqanwanmi yachanchik Jesus manaraq wañukuchkaptinpas Dios runakunapa huchanta pampachasqantaña. ¿Imaynatataq chayqa atikurqa Jesus manaraq hamuchkaptinqa?

Jehova Diosmi nirqa ‘miray’ rikurimunanmanta, chaynapi paypi iñiq runakuna salvasqa kanankupaq. Chay nisqan punchawmantapacham Jehova Diospaqqa karqa chay mirayqa vidanwan runakunapa huchanmanta pagasqan hinaña (Gen. 3:15; 22:18). Chay mirayqa churin Jesusmi karqa. Jehova Diosqa manam iskayrayarqachu churin Jesus tiempollanpi ñuqanchikrayku vidanta qunanpaq hamunanmantaqa (Gal. 4:4; Heb. 10:​7-10). Kay pachapi kachkaspanmi Jesusqa taytanpa sutinpi imatapas ruwaq, chaymi Diospi iñiq runakunapa huchanta pampachayqa makillanpi karqa. Runakunarayku manaraq wañukuchkaspanpas runakunataqa yanapachkarqañam huchankumanta pampachasqa kanankupaq. Payqariki yacharqam ñuqanchikrayku vidanta qunanmantaqa (Mat. 9:​2-6).