ACHKA runakunam munanku pimantapas aswan respetasqa utaq aswan derechoyuq kayta. Respetasqaña kaspankupas aswan autoridadniyuq kaytaraqmi munanku. Bibliapas willawarqanchikñam kay tukupay tiempopi runakuna hatuntukuq hinaspa mana agradecekuq kanankumanta (2 Tim. 3:2).

Kikillanchikpaq munaq kayqa manam kay tiempollanchikmantachu. Adanwan Evapas chaynam karqaku. Chaymi piensarqaku imam allin hinaspa imam mana allin kasqanta tantianankupaq derechoyuq kasqankuta. Chayraykum llapallanchik ñakarichkanchik. Pachak watakuna pasaytañataqmi Juda nacionta kamachiq Uzias templopi inciensota kañarurqa sacerdotekunallapa ruwanan kachkaptinpas (2 Cron. 26:​18, 19). Fariseokunawan saduceokunañataqmi Abrahanpa miraynin kasqankuraykulla piensarqaku hukkunamanta aswan respetasqa hinaspa aswan derechoyuq kasqankuta (Mat. 3:9).

Kikillankupaq munaq runakunapa chawpinpi kawsasqanchikraykum paykuna hina rikuriruchwan (Gal. 5:26). Chayraykum piensayta qallaykuchwan imapaqpas nombrawananchikpaq utaq hukkunamanta aswan respetasqa kananchikpaq derechoyuq kasqanchikta. ¿Imatam ruwachwan chayna mana rikurirunapaq? Puntatam entiendenanchik chayna runata Jehova Dios imayna qawasqanta. Chaypaqyá qawaykusun bibliapa ima nisqanta.

Jehova Diosllam tantianan sapakama imata chaskinamanta. Bibliapa wakin nisqankunatayá qawaykusun.

•   Jehova Diosqa munan qusakunata warminku respetanankutam, qusakunañataq warminkuta kuyanankuta (Efes. 5:33). Chaymantapas Diosqa munan casarasqakuna qusallankupaq utaq warmillankupaq kanankutam (1 Cor. 7:3). Tayta-mamakunapapas derechonkum churi-wawanku kasuyninqa, churi-wawakunapapas derechonkutaqmi tayta-mamanku kuyakuywan cuidayninqa (2 Cor. 12:14; Efes. 6:2).

• Bibliapim niwanchik punta apaqkuna iñiqmasinkupaq tukuy imata ruwasqankurayku respetananchikmanta (1 Tes. 5:12). Chaywanpas paykunapaqa manam derechonku kanchu iñiqmasinkuta imapas ruwasqankupi controlanankupaqqa (1 Ped. 5:​2, 3).

• Diostaqmi gobiernokunamanpas atiyta quykun impuestokunata mañawananchikpaq hinaspa paykunata respetananchikpaq (Rom. 13:​1, 6, 7).

Jehova Diosqa ancha kuyakuq kasqanraykum imata chaskinanchikmantapas astawanraq quwanchik. Llapallanchik huchayuq kasqanchikraykum wañuyllapaq kanchik (Rom. 6:23). Chaywanpas Diosqa kuyakuq kasqanraykum allin kaqkunata quwanchik (Sal. 103:​10, 11). Arí, anchata kuyawasqanchikraykum imapaqpas nombrasqaqa kanchik (Rom. 12:​6-8; Efes. 2:8).

Manam piensananchikchu Diosta mana serviqkuna hinaqa. Mana cuentata qukuspallam hukkunamantapas astawanraq imatapas munachwan. Chayna piensayta qallaykunanchikmantam huk kutipi Jesus willakurqa. Paymi willakurqa uvas chakrayuq runa peonkunata contrataruptin huk denario qullqipaq tukuy punchaw llamkapunankumanta. Chaymantam huk peonkunatawanraq contratarqa, hinaspanmi tutaykuqtaqa huk horata llamkaqkunamanpas igualninkalla pagapurqa. Chaywanpas tempranomanta llamkaqkunaqa rupayllapiña llamkasqankuraykum pagonkuta masta chaskiyta piensarqaku (Mat. 20:​1-16). Chaywanmi Jesusqa yachachirqa qatiqninkunaqa Diospa imapas qusqallanwan contentakunankuta.

Agradecekuqmi kananchik, manam hukkuna imatapas quwananchikpaqqa hikutananchikchu (1 Tes. 5:18). Apostol Pablotam qatipakunanchik.  Payqa derechoyuq kaspanpas manam Corinto iñiqmasinkunamantaqa imapas yanapakuytaqa mañakurqachu (1 Cor. 9:​11-14). Hukkuna imatapas quwananchikpaq mañakunamantaqa tukuy imapas chaskisqanchikmantam agradecesqa kananchik.

Humildem kananchik. Hukkunamanta aswan allinpaq hapikuq runaqa manam imapas kapuqninkunawanqa contentakunchu, astawanraq imatapas chaskiypim piensan. Ichaqa humilde kaymi yanapawasun mana chaynata piensanapaq.

Profeta Danielmi humilde kaypiqa ancha qatipakunapaq. Payqa kapuqniyuq familiamantam karqa, hinaspapas allin rikchayniyuq, yuyaysapa hinaspa tukuy ima ruway yachaqmi karqa. Chayraykum payqa piensanman karqa kikin kallpanchakusqanrayku kamachiqpa serviqnin kananpaq churasqankuta (Dan. 1:​3, 4, 19, 20). Chaynata piensananmantaqa humildem karqa, chayraykum Jehova Diosqa ‘ancha valorniyuqpaq’ hapirqa (Dan. 2:30; 10:​11, 12).

Chaynaqa, amayá kay tiempopi runakuna hina kikillanchikpaq munaqqa hinaspa hatuntukuqqa kasunchu. Aswanqa Jehova Dios anchata kuyawasqanchikrayku imapas quwasqanchikwanyá kusisqa kasun.