Jehová Diosqa manam saqenqachu payta kasukuqkunataqa

“[Jehová Diosqa] manam saqenqachu payllamanña iñiykuqtaqa. Diosqa wiñaypaqmi waqaychaykullanqa paykunataqa.” (SAL. 37:28.)

1, 2. a) Cristianokunapa tiemponkumanta yaqa waranqa wata ñawpaqta, ¿imataq Dios serviqkunapa kasukuyninkuta pruebaman churarqa? b) ¿Imakunamantam Jehová Dios waqaycharqa kasukuq serviqninkunata?

CRISTIANOKUNAPA tiemponkumanta yaqa waranqa wata ñawpaqtam, Diospa serviqninkunaqa allinta tanteakunanku karqa. Israel nacionpi runakuna kikinkupura mana wañuchinakunankupaqmi, norte lawpi chunka ayllukuna sapaq kanankupaq saqesqa karqaku. Chay norte lawpi chayllaraq nombrasqa rey Jeroboanmi kamachisqanta allinta takyachinanpaq huk mosoq religionta rikurichin, hinaspa kamachisqan llaqtakunata nin lliw nisqanta kasukunankupaq. ¿Imatam tanteanqaku Jehová Diospa serviqninkuna? ¿Yaqachum Jehová Diosninkuta sonqomanta kasukunqaku? Waranqantinmi chaynata ruranku, chaymi Diosqa yanapan hinaspa waqaychanpas (1 Rey. 12:1-33; 2 Cro. 11:13, 14).

² Kunan tiempopipas Dios serviqkunapa kasukuyninkupas pruebamanmi churasqa kachkan. Bibliam kaynata niwanchik: ‘Listollayá rikchaychik, enemigoykichik Diabloqa yarqasqa leon hinam muyuriqnikichikpi purichkan pitapas millpurunanpaq’, nispa. ¿Yaqachum ñoqanchikpas atichwan ‘paypa contranpi’ qaqa hina iñiyninchikpi sayayta? (1 Ped. 5:8, 9.) Kay tapukuyta kutichinapaqqa qawasunchikyá cristianokunapa tiemponmanta 997 wata ñawpaqpi Jeroboan kamachiyta qallaykuptin imakuna pasasqanta, hinaspa qawasuntaqyá imakunatam kaymanta yachachwan. Chay tiempokunapiqa Diospa serviqninkunaqa ñakarichisqam karqaku chaynataq Diospa llaqtanta saqeruspa contranpi churakuq runakunawanmi intusqa karqaku hinaspa sasa cumplina kamachikuykunatam chaskirqakupas. Ichaqa Jehová Diosqa manam saqerqachu, chaynallataqmi kunanpas mana saqewasunchu (Sal. 37:28).

Ñakarichisqa kaptinku

3. ¿Imanasqataq Davidpa kamachisqanqa mana ñakarichikuqchu karqa?

³ Qawasunchik imakuna pasaptinmi Jeroboanqa rey kananpaq akllasqa karqa. Proverbios 29:2 kaynata nin: “Mana allin ruraqkuna munaychakuptinqa runakunam ñakarispa waqanku”, nispa. Davidpa munaychakusqan tiempopiqa, manam runakunaqa ñakarichisqa karqakuchu, David pantaqña kaspanpas Diostam sonqomanta kasukurqa hinaspa payllapitaqmi confiarqapas. Chaymi Jehová Diosqa huk contratota paywan rurarqa, nirqam: “Castaykipas chaynataq gobiernoykipas wiñaypaqmi takyanqa. Castaykipa gobiernontapas wiñaypaqmi takyachisaq”, nispa (2 Sam. 7:16).

4. ¿Imatam Salomon ruranan karqa kamachisqanta Jehová Dios hinalla bendecinanpaq?

⁴ Davidpa qepantañataqmi churin Salomonña kamachiyta qallaykurqa, paypa kamachisqanmi qallariypiqa sumaqllaña karqa hinaspa hawka kawsakuytam qorqa, kaymi qawachirqa Jesucristopa  Waranqa wata Kamachisqan imayna kananmanta (Sal. 72:1, 17). Chaymi Israel nacionpi chunka iskayniyoq ayllumanta mayqanninkupas contranpiqa churakunankuchu karqa. Ichaqa Salomonta hinaspa kamachisqankunata bendecinanpaqmi, kayna kamachisqanta cumplinan karqa: “Sichu decretoykunata, reglamentoykunata hinaspa kamachisqaykunata kasukuspa kawsaptikiqa taytayki Davidman qanmanta prometesqaykunatam cumplisaq hinaspaymi Israelpa mirayninkunawan yachasaq, Israel casta runaykunataqa manam saqesaqchu”, nispa (1 Rey. 6:11-13).

5, 6. ¿Imakunapim tukurqa Salomonpa mana kasukusqan?

⁵ Ichaqa, machuyayninpim Salomonqa Diosta qepancharuspan pantay dioskunataña yupaychayta qallaykurqa (1 Rey. 11:4-6). Pisi-pisimantam Diospa kamachisqanta manaña kasukurqachu hinaspam ñakarichiq runaña rikurirurqa. Runakunata llumpay ñakarichiq kasqanmantam, wañukusqan qepatapas churin Roboanman hinalla quejakurqaku, hinaspa mañakurqaku ñakarisqanta menosyachinanpaq (1 Rey. 12:4). ¿Imatam Jehová Dios rurarqa Salomonpa mana kasukusqanmanta?

⁶ Bibliam nin: ‘Chaymi Salomonpaq Israelpa yupaychasqan Tayta Dios piñakururqa, payqa piñakururqa iskay kutita rikurichkaptinpas Salomonpa sonqon rakikurusqanrayku’, nispa. Chayraykum Salomonta Jehová Dios kaynata nirqa: “Chaynata kawsaspa kamachisqay contratotawan decretoykunata mana kasukusqaykiraykum gobiernasqayki nacionta partispa serviqnikiman qosaq”, nispa (1 Rey. 11:9-11).

7. Salomonta Jehová Dios qepancharuptinpas, ¿imatam rurarqa kasukuq serviqninkunata librananpaq?

⁷ Chaymantam Jehová Dios kamachirqa Ahias sutiyoq profetata huktaña akllananpaq. Payqa Jeroboanmi karqa, Salomonpa kamachikuyninpi allin llamkaq runa. Davidwan contrato rurasqanta Jehová Dios respetaspanpas, payqa saqerqam Israel llaqta iskaypi rakisqa kanankuta: chunka iskayniyoq ayllu kasqankumantam, chunka ayllukuna kamachisqa kananku karqa Jeroboanwan, wakinñataqmi kamachisqa kananku karqa Davidpa castanmanta kaq Roboam sutiyoq reywan (1 Rey. 11:29-37; 12:16, 17, 21). Jehová Diosmi Jeroboanta nirqa: “Tukuy kamachisqaykunata kasukuspa, munasqayman hina kawsaspa allinta ruraptikiqa chaynataq decretoykunatapas hinaspa kamachisqaykunatapas kasukuspa serviqniy David hina ruraptikiqa, ñoqam qamta yanapasqayki, Davidpaq hinataqmi takyachisaq miraynikipa gobiernontapas, Israel naciontapas makikimanmi churasaq gobiernanaykipaq”, nispa (1 Rey. 11:38). Chaynatamá Jehová Diosqa llaqtanta yanaparqa ñakarisqankumanta.

8. ¿Ima ñakariykunatam pasanku kunan tiempopi Diospa llaqtan?

⁸ Kunan tiempopipas ñakariyqa hinaspa mana allin ruraykunaqa maypipas kachkanmi. Eclesiastes 8:9 kaynata niwanchik: “Kanmi runapaq tiempo runamasinmanta munaychakuspa ñakarichinanpaq”, nispa. Kamachiqkunapa chaynataq negociokunapi mana allin rurasqankum qollqemanta sasachakuykunata apamun. Chaymantapas gobiernopi, hatun negociokunapi hinaspa religionkunapi kamachiqkunapas manam allintachu kawsanku. Dios kasukuqkunataqa runakunapa mana allin rurasqankuta ‘qawasqanchikmi anchata llakichiwanchik’, chaynam tarikurqa allin ruraq Lot sutiyoq runapas (2 Ped. 2:7). Diospa kamachisqanta kasukunapaq kallpanchakuptinchikpas hinaspa pitapas mana imanachkaptinchikpas, hatunchakuq kamachikuqkunam contranchikpi churakunku (2 Tim. 3:1-5, 12).

9. a) ¿Imakunatam Jehová Diosqa rurarunña llaqtanta librananpaq? b) ¿Imanasqataq seguro kachwan Jesucristo haykapipas Jehová Diosta kasukunanmanta?

⁹ Ñoqanchikqa segurom kaymanta kachwan: Jehová Diosqa manam haykapipas saqenqachu pay kasukuqkunataqa. Piensasunchik imakunatam Jehová Diosqa rurarunña mana allin kamachiqkunapa rantinpi churananpaq: Jesucristotam Gobiernonpi kamachinanpaq churarunña hinaspam payqa hanaq pachapi yaqa pachak wataña kamachichkan. Rey Jesucristom librawasunña Diospa sutin respetaqkunataqa (leey Apocalipsis 11:15-18). Payqa wañunankamam qawachirqaña Jehová Dios kasukusqanta. Manam haykapipas qatiqninkunataqa hukmanyachinqachu Salomon hinaqa (Heb. 7:26; 1 Ped. 2:6).

10. a) ¿Imaynatam qawachinchik Diospa Munaychakuynin ancha valorniyoq kasqanta? b) Ima sasachakuypiña tarikuspapas, ¿imamantam seguro kachwan?

 ¹⁰ Diospa Munaychakuyninqa cheqapmi, hinaspa ñam chinkachinqaña lliw ñakariykunataqa. Ñoqanchikqa kasukunanchikmi Jehová Diosta hinaspa kamachinanpaq churasqan Jesustapas. Diospa Gobiernonpi confiaspanchikmi, runakunapa mana allin rurasqankutaqa cheqninchik, aswanmi kallpanchakunchik allin ruraykunata rurananchikpaq (Tito 2:12-14). Arí, kallpanchakunchikmá kay pachapi mana allin ruraykunawan mana qanrachakunapaq (2 Ped. 3:14). Kunan tiempopi ima sasachakuyniyoq kaptinchikpas, Jehová Diosmi espiritualpi waqaychawasun (leey Salmo 97:10). Chaymantapas, Salmo 116:15 niwanchik: “Diosman sonqo runakuna wañukuptinqa manam yanqallapaqchu hapin Tayta Diosqa”, nispa. Arí, Jehová Diosqa chaninchanmi serviqninkunataqa, chaymi mana saqenqachu llapallanku chinkachisqa kanankutaqa.

Diospa llaqtanta saqespa contranpi churakuqkunawan intusqa kaptinku

11. ¿Ima mana allinkunatam Jeroboanqa rurarurqa?

¹¹ Rey Jeroboanqa hawka kawsakuytachá apamunman karqa Jehová Diospa llaqtanman. Ichaqa astawanmi sasachakuyta apamurqa. Rey kasqanwan mana contentakuspanmi, Jeroboanqa kamachikuyninta astawan takyachiyta munarqa. Chaymi kaynata piensarqa: “Gobiernoyqa kasqallanchá Davidpa castanman kutiykunqa sichu kay runakuna Jerusalen llaqtapi kaq templopi Tayta Diospaq animalkuna wañuchiq riptinkuqa”, nispa. Chaymi Jeroboanqa mosoq religionta rikurirachirqa qorimanta iskay toro taytachakunata yupaychanankupaq. “Huknin toro taytachatam churarqa Betel llaqtapi, huknintañataqmi churarqa Dan llaqtapi. Chay rurasqanwanmá runakunata huchallirachirqa, wakin runakunaqa Dan llaqtakamaraqmi rirqaku chay taytacha adoraq. Rurachirqataqmi alto moqokunapi capillakunatapas hinaspam chaykunapi churarqa mana Leviypa mirayninmanta kaq sacerdotekunata.” Kay mosoq reyqa “Israelpa mirayninkunapaqmi hatun fiestata rurachirqa hinaspam kikinpuni altarpi inciensota kañarqa” (1 Rey. 12:26-33).

12. Diosta kasukuqkuna, ¿imatam rurarqaku toromanta taytachakunata yupaychanankupaq rey Jeroboan ruraruptin?

¹² ¿Imatam ruranmanku Jeroboanpa kamachisqan lawpi Diosta kasukuqkuna? Chaypi yachaq Leviy ayllumanta kaqkunaqa abuelonku hinam utqayman arreglota rurarqaku (Exo. 32:26-28; Num. 35:6-8; Deu. 33:8, 9). Llaqtankuta saqespankum lliw ayllunkuwan Juda llaqtaman pasakurqaku, chaynapi Jehová Diosta hawkalla yupaychanankupaq (2 Cro. 11:13, 14). Juda llaqtapi forastero hina yachaq wakin israelitakunañataqmi,  tantearurqaku Jeroboanpa kamachisqan llaqtankuman mana kutinankupaq (2 Cro. 10:17). Jehová Diosqa saqerqamá Jeroboanpa kamachisqan lawpi israelitakunapa mirayninkuna, taytacha-mamacha yupaychasqankuta saqespanku Juda llaqtaman rispanku payta yupaychanankupaq (2 Cro. 15:9-15).

13. ¿Imaynatam Dios serviqkunata sasachanku llaqtanmanta lloqsispa contranpi churakuqkuna?

¹³ Kunan tiempopipas Diospa llaqtanmanta lloqsiruspa contranpi churakuqkunaqa, sasachanmi Diospa llaqtanta. Chaymantapas wakin kamachiqkunam llaqtankupi huk religionta churarunku hinaspam runakunata obliganku chay religionniyoq kanankupaq. Kunan tiempopi sacerdotekunapas chaynataq hukkunapas ninkum, Bibliapa willakusqanman hina ‘[Jesucristo] reyta servinankupaq sacerdotekuna’ kasqankuta. Ichaqa, Diospa chuya espiritunwan akllasqa cheqap cristianokunallam kanku ‘reyta servinankupaq sacerdotekunaqa’ (1 Ped. 2:9; Apo. 14:1-5).

14. ¿Imaynam kananchik Diospa llaqtanmanta lloqsiruspa contranpi churakuqkunawan?

¹⁴ Chay ñawpaq tiempokunapi levitakuna hinam, kunan tiempopipas Dios serviqkunaqa mana engañachikunkuchu Diospa llaqtanmanta lloqsispa contranpi churakuqkunawanqa. Ungidokunawan wakin cristianokunapas chaykunataqa qepanchankum (leey Romanos 16:17). Chaynataq autoridadkunapa kamachisqanta kasukuspanchikpas, manam chaqrukunchikchu runakunapa mana allin rurayninkunapiqa, aswanmi Diospa Gobiernollanpi hapipakunchik (Juan 18:36; Rom. 13:1-8). Manam uyarinchikchu Diostam serviniku nichkaspanku imayna kawsasqankuwan qepanchaqkunataqa (Tito 1:16).

15. ¿Imanasqam kasukunanchik ‘allin yuyayniyoq confianza sirvienteta’?

¹⁵ Jehová Diosqa yanapachkanmi allin sonqoyoq runakunata, chaynapi kay pachapi mana allin ruraykunata saqespanku Dioswan hinaspa runakunawanpas allin kanankupaq (2 Cor. 12:1-4). Kaymantam agradecesqa kananchik hinaspam hapipakunanchik ‘allin yuyayniyoq confianza sirvienteman [. . .], paytam wasinpi patronnin churarqa sirvientemasinkunata imam horapi mikuchinanpaq’. Jesucristom kay sirvienteta akllarqa ‘tukuy kapuqninkunapiña nanachikunanpaq’ (Mat. 24:45-47). Chaymi paykunapa ima yachachisqankuta mana entiendespapas, manam qepanchananchikchu nitaq kutinanchikchu kay pachapi mana allin ruraykunamanqa. Kasukuq kasqanchikmi yanapawasun humilde kanapaq hinaspa chay yachachikuymanta Jehová Dios niwananchikta suyanapaqpas.

Sasa kamachikuykunata chaskiptinku

16. ¿Ima kamachikuytam Juda llaqtamanta profeta chaskirqa?

¹⁶ Jehová Diosqa manam allintachu qawarqa paypa contranpi Jeroboanpa churakusqantaqa. Chaymi kamachirqa huk profetata, Juda llaqtamanta Betel llaqtakama rispa Jeroboanman altarpi kachkaptin willananpaq. Chay willakuy Jeroboanpa contranpi kasqanraykum, profetapaqqa sasachá karqa kasukuyqa (1 Rey. 13:1-3).

17. ¿Imaynatam Jehová Diosqa profetanta waqaycharqa?

¹⁷ Chay profetapa willasqanmi Jeroboanta llumpayta piñarachirqa, chaymi makinwan tuqpispan runankunata kamachirqa: “¡Hapiychik!”, nispa. Ichaqa manaraq pipas ima rurayta atichkaptinmi, ‘makin chakirurqa [chaymi] manaña doblayta atirqachu. Altar pakipakuruptinmi uchpapas tallikururqa’. Jeroboanmi profetata ruegakurqa Jehová Diosta mañapunanpaq chaynapi makinta sanoyachinanpaq. Chaynatamá rurarqa hinaptinmi makin sanoyarurqa. Chaynatam Diosqa profetanta waqaycharqa (1 Rey. 13:4-6).

18. ¿Imaynatam Jehová Dios waqaychan mana manchakuspa paymanta willakuqkunata?

¹⁸ Wakin kutikunapiqa predicaspam tupanchik mana uyariy munaqkunawan otaq contranchikpi churakuqkunawanpas (Mat. 24:14; 28:19, 20). Amayá haykapipas chayna kasqankuwanqa kusikuyninchiktaqa chinkachisunchu. Jeroboanwan rimaq profeta hinam, pitapas mana manchakuspa Jehová Diosta servinanchik payllapaqña kawsaspa (Luc. 1:74, 75). * Kunan  tiempopi, Jehová Dios milagrokunawan yanapawananchikta mana suyaspapas, yachanchikmi chuya espiritunwan hinaspa angelninkunawan yanapawasqanchikta (leey Juan 14:15-17; Apocalipsis 14:6). Diosqa manam saqenqachu mana manchakuspa paymanta willakuqkunataqa (Fili. 1:14, 28).

Jehová Diosqa waqaychanqam kasukuq serviqninkunataqa

19, 20. a) ¿Imanasqam seguro kachwan Jehová Dios mana saqewananchikmanta? b) ¿Ima tapukuykunatam qatiqnin estudiopi yachachkasun?

¹⁹ Jehová Diosqa ima nisqanta cumpliqmi (Apo. 15:4; 16:5, NM). Arí, payqa “tukuy rurasqankunapipas allin ruraqmi” (Sal. 145:17). Bibliam prometewanchik: “Diosqa paypi sonqoyoqkunatam waqaychan”, nispa (Pro. 2:8). Kasukuq serviqninkunaqa, segurom kananku Jehová Dios yanapananmanta imawanpas ñakarichisqa kaptinku, Diospa llaqtanta saqespa contranpi churakuq runakunawan intusqa kaptinku chaynataq sasa kamachikuyta cumplinanku kaptinkupas.

²⁰ Ichaqa, llapallanchikmi tapukunanchik: “¿Imataq yanapawanqa imapas kaptin Jehová Diosta hinalla kasukunaypaq?” Huk rimaypiqa: “¿Imataq kallpanchawanqa sonqomanta Jehová Diosta kasukunaypaq?”, nispa.

[Willakuykuna]

¿Imatam niwaq?

• ¿Imaynatam Jehová Dios qawachirqa kasukuq serviqninkuna ñakariptinku mana saqesqanta?

• ¿Imaynam kananchik Diospa llaqtanta saqeruspa contranpi churakuqkunawan?

• ¿Imaynatam kasukuq serviqninkunata Jehová Dios waqaychan predicaptinku?

[Kay yachachikuypa tapukuyninkuna]

[9 kaq paginapi mapa]

(Imayna kasqanmanta yachanapaq qaway kay qellqata)

NORTE LAWPI LLAQTA (Jeroboan)

Dan

SIQUEM

Betel

SUR LAWPI LLAQTAKUNA (Roboam)

JERUSALEN

[Dibujo]

Kasukuq serviqninkunataqa Jehová Diosqa manam saqerqachu, toromanta taytachakunata yupaychanankupaq rey Jeroboan kamachiptinpas

[7 kaq paginapi dibujo]

Rey Salomon hinaspa kamachisqan runankunapas kasukuspallankum bendiciontaqa chaskinmanku karqa