Jehová Diosqa Librawaqninchikmi

“Tayta Diosllapunim paykunataqa yanapaykunqa. Tayta Diosllapunim paykunataqa libraykullanqa.” (SAL. 37:40.)

1, 2. ¿Imamanta yachasqanchikmi anchata kallpanchawanchik?

KAY Pachapa muyusqanman hinam, Inti kanchamuptin imakunapapas llantuyninqa cambian. Ichaqa kay Pachata hinaspa Intita Unanchaqqa manam cambianchu (Mal. 3:6). Bibliam kaynata nin: ‘Diosqa manam cambianchu llantuy hinaqa’, nispa. (Sant. 1:17.) Kaymanta yachayqa anchatam kallpanchawanchik, astawanqa sasachakuykunapi tarikuptinchik. ¿Imanasqa?

² Qayna estudiopi yachasqanchikman hinam, Jehová Diosqa ñawpa tiempopi serviqninkunapa ‘Libraqninmi’ karqa (Sal. 70:5). Pay mana cambiasqanrayku hinaspa nisqantapas cumplisqanraykum, kunan tiempopi serviqninkunapas seguro kananchik yanapawananchikmanta hinaspa librawananchikmantapas (Sal. 37:40). Hinaptinqa, ¿imatam Jehová Dios rurarqa kunan tiempopi llaqtanta waqaychananpaq? ¿Imaynatam waqaychawanchikman sapakamata?

Contranchikpi kaqkunamantam librawanchik

3. ¿Imanasqam seguro kananchik harkakuy kaptinpas Diospa llaqtanpi kaqkuna hinalla predicanankumanta?

³ Satanas imataña ruraspanpas, manam haykapipas harkayta atinqachu Jehová Diospa testigonkuna Diosta yupaychasqankutaqa. Bibliam  nin: “Ichaqa manam pipas contraykipi atirqachu arma rurayta. Manam atirqachu wañuchisunaykipaq arma rurayta. Juzgadopi llapallan acusaqnikikunam juiciopi vencesqa kanqa”, nispa (Isa. 54:17). Jehová Diospa testigonkunapa hinalla predicanankutam contranpi kaqkunaqa harkayta munarqaku, ichaqa manam atirqakuchu. Chayna kasqanmanta iskay ejemplokunata qawasun.

4, 5. ¿Ima sasachakuykunapim tarikurqa Jehová Diospa llaqtan 1918 watapi, hinaspa imapim tukurqa?

⁴ Cristiano tukuqkunam 1918 watapi Diospa llaqtanta qatikachaspanku predicasqankuta upallarachiyta munarqaku. Chaymi 7 punchaw mayo killapi J. F. Rutherford wawqenchikta hinaspa wakin llamkaqmasinkunatapas Estados Unidos nacionpi gobierno kamachirqa presochanankupaq. Paykunam piensarqaku gobiernopa contranpi kasqankuta. Yaqa iskay killamanta hinam yanqamanta juzgaspanku, Rutherford wawqenchikta hinaspa yanapaqninkunatapas sentenciarurqaku achka watakuna carcelpi kanankupaq. ¿Yaqachum predicacionta wiñaypaq harkarunmanku karqa? Manamá.

⁵ Yuyarisun Jehová Diospa prometesqanta, nirqam: “Manam pipas contraykipi atirqachu arma rurayta. Manam atirqachu wañuchisunaykipaq arma rurayta”, nispa. Isqon killa pasaruptinmi, 1919 watapi 26 punchaw marzo killapi: qonqaymanta wawqenchik Rutherford hinaspa yanapaqninkunapas libre lloqsirqaku, ichaqa prendata saqespankum lloqsirqakuqa. Qatiqnin watapiñataqmi, 5 punchaw mayo killapi chaykunamantaqa libre karqaku. Paykunaqa libre kaspankum Diospa Gobiernonmanta astawan willarqaku. ¿Allinpichu tukurqa predicasqanku? Chay tiempomanta kunankama haykaman yapakusqanchikmi chaymantaqa willawanchik. Hinaptinqa, ¿pipa yanapayninwantaq cristianokunaqa yapakuchkan? Libraqninchik Jehová Diosraykum (1 Cor. 3:7).

6, 7. a) ¿Imatam Jehová Diospa testigonkunapa contranpi rurarqaku Alemania nacionpi, hinaspa imapim tukurqa? b) ¿Imatam qawachin kunan tiempopi Diospa llaqtanpi kaqkunapa pasasqanku?

⁶ Kunanñataq qawasun iskay kaq ejemplota. 1934 watapim Adolf Hitler nirqa Alemania nacionmanta Jehová Diospa testigonkunata chinkarachinanpaq, kaytaqa cheqaptamá rimarqa. Chay nisqanpa qepallantam achka iñiqmasinchikkuna presochasqa karqaku. Waranqantinmi maqasqa karqaku, hinaspa iskay pachak pichqa chunka masninmi preso kaspa llamkasqankupi wañuchisqa karqaku. ¿Chinkarachirqachu Jehová Diospa testigonkunata Hitler sutiyoq runa? ¿Yaqachum Diosmanta willakusqankuta Alemaniapi harkarurqa? ¡Manamá! Chay sasa tiempokunapi wawqe-paninchikkunaqa, pakakuspallam predicarqaku. Hitler sutiyoq runapa kamachisqan tukuruptinñataqmi, libre kasqankuta servichikurqaku hinalla predicanankupaq. Kunan tiempopiqa 165, 000 masnin predicaqkunam Alemaniapi kachkanku. Chaynaqa  Librawaqninchikpa kayna nisqanmi cumplikurun: “Manam pipas, contraykipi atirqachu arma rurayta. Manam atirqachu wañuchisunaykipaq arma rurayta”.

⁷ Jehová Diospa kunan tiempopi testigonkunapa chayna pasasqanmi qawachiwanchik, llaqtanta Dios haykapipas mana saqenanta (Sal. 116:15). Ichaqa, ¿imatam ninchikman sapakamamanta? ¿Imaynatam Jehová Diosqa sapakamata librawanchik?

¿Suyananchikchu vidanchik waqaychananta?

8, 9. a) ¿Imaynatam yachanchik tukuy imamantapas sapakamata Jehová Dios mana cuidawananchikta? b) Cristianokunata, ¿imakuna pasananmantam yachanchik?

⁸ Jehová Diosqa manam prometewarqanchikchu, kunan tiempopi imapas pasawananchikmanta sapakamata cuidawananchikpaqqa. Chaymi ñoqanchikpas kimsa hebreokuna hina kanchik, paykunam Nabucodonosorpa rurachisqan qorimanta taytachaman mana munarqakuchu qonqorakuyta. Manataqmi nirqakuchu Jehová Diosqa manam milagro ruraytaqa atinmanchu nispankuqa (leey Daniel 3:17, 18). Chayna kaptinpas, Jehová Diosqa librarqam hornopi kañasqa kanankumanta (Dan. 3:21-27). Ichaqa yuyarinanchikmi, ñawpaq tiempopipas chayna milagrokunaqa manam llapallanpaqchu karqa. Arí, achkataqmi Dios serviqkunaqa enemigonkupa wañuchisqan karqaku (Heb. 11:35-37).

⁹ ¿Ima ninchikmantaq kunan tiemponchikmanta? Jehová Diosqa atiyniyoqmi pitapas Librananpaqqa. Ichaqa, ¿yaqachum seguro kachwan Jehová Dios milagrota ruraspan wakin kutikunapi yanapasqanmanta? Manam segurochu kachwan chaymantaqa. Chayna kaptinpas, Jehová Dios milagronwan salvasqanta pipas creeptinqa, manachá allinchu kanman manam chaynachu nispa niyqa. Imayna kaptinpas kaypi piensarisun, kasukuq cristianokunapas achkanpim ñakaristin otaq qatikachasqa kaspapas wañurqaku, Alemania nacionpi hina (Ecl. 9:11). ¿Ninchikmanchu Jehová Diosqa manam waqaycharqachu kasukuq serviqninkunata nispa? Manapunim.

10, 11. Wañuymanta, ¿imatam runakuna mana rurayta atinmankuchu? Ichaqa, ¿imatam Jehová Diosqa ruranman?

¹⁰ Piensarisun kaypi: runakunaqa llapallanchikmi wañunchik, manam kikillanchikmantaqa ‘pi runapas wañusqakunapa kasqanmantaqa librakuyta’ atinchikmanchu (Sal. 89:48). Jehová Diosqa, ¿wañuymanta librawanchikmanchu? Alemania nacionpim huk cristianapa ayllunkunata wañurachirqaku, chaymi paypa maman Testigo kaspan kayna kallpanchasqanmanta yuyarirqa: “Sichu runakuna wiñaypaq wañuypi kanmanku, wañuychiki Diosmantaqa aswan atiyniyoq kanman ¿aw?”. Wañuyqa manamá aswan atiyniyoqchu, Kawsay qoq hinaspa tukuy atiyniyoq Jehová Diosmantaqa (Sal. 36:9). Paymi yuyayninpi kaq llapallan wañuqkunata libranqa otaq kawsarichinqa (Luc. 20:37, 38; Apo. 20:11-14).

¹¹ Kunan tiempopipas Jehová Diosqa kasukuq serviqninkunataqa yanapachkanmi. Qawasunchik Jehová Dios imakunapi yanapawasqanchikta.

Diosqa paywan amistadninchiktam waqaychan

12, 13. ¿Imanasqataq Dioswan amistadninchikta waqaychay ancha allin, hinaspa imaynatam Jehová Dios waqaychawanchik?

¹² Jehová Diosqa paywan amistadninchiktam waqaychan, kaymi imamantapas ancha allinqa. Cheqap cristianokunaqa yachanchikmi Dioswan amistadninchik vidanchikmantapas aswan allin kasqanta (Sal. 25:14; 63:3). Mana chayqa, yanqam kawsanchikman hinaspa chinkarachichwanmi wiñaypaq kawsay suyasqanchiktapas.

¹³ Jehová Diosqa qowanchikmi imapas necesitasqanchikta paywan amistadninchik hinalla kananpaq. Kapuwanchikmi Biblia hinaspa paypa chuya espiritun chaynataq enteron pachapi wawqe-paninchikkunapas. ¿Imatam rurananchik chay yanapakuykunata allintapuni servichikunapaq? Bibliata sapa kuti estudiaptinchikmi, iñiyninchik hinaspa suyakuyninchikpas kallpanchakunqa (Rom. 15:4). Chaynataq chuya espiritunta qowananchikpaq Diosta mañakuspam, kallpayoq kasunchik tentacionkuna kaptin mana huchallikunapaq (Luc. 11:13).  Chaymantapas qellqanchikkunapi, huñunakuykunapi hinaspa asambleakunapipas allin yuyayniyoq confianza sirvientepa yanapawasqanchikta kasukuspam, allin kallpanchasqa kasun ‘imam horapi mikuchiwasqanchikwan’ (Mat. 24:45). Tukuy kaykunam Dioswan amistadninchikta waqaychan (Sant. 4:8).

14. Huk experienciata willamuy espiritualpi Jehová Diospa waqaychawayninchik imamantapas ancha allin kasqanmanta.

¹⁴ Qawasunchik huk ejemplota Jehová Dioswan amistadninchik ancha allin kasqanmanta. Qayna estudiopa qallariyninpim, qawarqanchik huk casado cristianopa Theresa sutiyoq churin chinkaruptin, señoranpiwan ancha llakisqa kasqankumanta. Huk-iskay punchawkunallamantam ancha llakikunapaq noticiata chaskirurqaku: Theresatam wañurachisqaku. * Taytanmi kaynata willarqa: “Jehová Diostam mañakurqani Theresata waqaychananpaq [. . .]. Ichaqa, wañurachiptinkum tapukurqani, imanasqam mañakusqayta Dios mana uyariwarqachu nispa. Yachanim Jehová Diosqa manam segurawanchikchu milagrota ruraspan serviqninkunata sapakamata waqaychananmantaqa, ichaqa hinallam mañakurqani kaymanta entiendenaypaq. Jehová Dios llaqtanta espiritualpi waqaychasqanmanta otaq paywan amistadninchikta waqaychanapaq tukuy qowasqanchikmanta yachaymi kallpanchawarqa. Chayna waqaychayninmi ancha allinqa, kaymi yanapawasun hamuq tiempopi wiñay kawsayta chaskinapaq. Jehová Diosqa waqaycharqam Theresataqa, payqa wañukunan punchawkamam tukuy sonqonmanta kasukurqa. Diospa makinpiña hamuq tiempopi kawsarimunan kasqanmi hawkayachiwan”.

Onqoptinchikpas yanapawanchikmi

15. ¿Imaynatam Jehová Diosqa yanapawanchik onqoyninchik anchata llakichiwaptinchik?

¹⁵ Jehová Diosqa Davidta imayna yanapasqanman hinam yanapawanchikman ‘onqosqaña kaptinchikpas’ (Sal. 41:3). Onqosqa kaptinchik milagrota ruraspan mana sanoyachiwaspanchikpas, yanapawanchikmi imaynatapas. Bibliapi yachachikuyninkuna tarisqanchikmi yanapawanchik allinta tanteaspa imayna hampichikunapaq hinaspa hukkunapipas (Pro. 2:6). Chaymantapas wakin onqoykunamanta yachanapaqmi makillanchikpi kachkan achka qellqakuna, chay yachachikuykunam lloqsimurqa La Atalaya hinaspa ¡Despertad!, revistakunapi. Chuya espiritunwanmi Jehová Diosqa, ‘hatu-hatun atiyta’ qowanchikman onqoyninchikta aguantanapaq chaynataq imapas kaptin sonqomanta hinalla kasukunapaqpas (2 Cor. 4:7). Chaynapim onqospanchikpas mana llumpay llakisqaqa kasunchu hinaspa Jehová Dioswan amistadninchiktapas chinkachisunchu.

16. ¿Imaynatam huk cristiano onqoyninta aguantan?

¹⁶ Chaynataq qayna estudiopa qallariyninpim rimarqanchik, mozollaraq cristiano mana hampiy atina onqoywan tarikusqanmanta. Ima onqoywan kasqantam yacharurqa 1998 watapi,  chay onqoymi tiempopa risqanman hina lliw cuerponta manaña kuyuchirqachu. * ¿Imaynatam chay onqoyninta aguantan? Paymi kaynata nin: “Llumpay nanaywan chaynataq hukmanyasqa kasqaywanmi wakinpiqa munarqani wañukuyta. Chaymi manaña atispay Jehová Diosta mañakuni hawkayayta, pacienciata hinaspa kallpata qowananpaq. Segurotaqmi tarikuni mañakusqayta Jehová Dios uyariwasqanmanta. Hawka tarikuspaymi yuyaymanani kallpanchakuq kaqkunapi, mosoq pachapi purinaymanta, miski mikuykuna mikunaymanta hinaspa kaqmanta aylluykunawan rimanaymantapas. Pacienciakuyqa ancha allinmi kay onqoypa sasachawasqankunata aguantanaypaq. Aguantasqaymi yanapawan Diosta sonqomanta kasukunaypaq hinaspa paywan amistadniyta mana chinkachinaypaqpas. David hinam sientikuni, ñoqapas piensanim onqosqaypi Jehová Dios yanapawasqanta” (Isa. 35:5, 6).

Ima necesitasqanchiktapas qowanchikmi

17. ¿Imatam Jehová Dios prometewarqanchik, hinaspa ima ninantaq chayqa?

¹⁷ Jehová Diosqa niwarqanchikmi cuerponchikpa necesitasqanta qowananchikpaq (leey Mateo 6:33, 34 y Hebreos 13:5, 6). Manamá chaywanqa nichkanchikchu milagrota ruraspan necesitasqanchikta qowananchikmantachu otaq manaña llamkananchikmantachu (2 Tes. 3:10). Ichaqa niwanchikmi Diospa munayninta puntapi churaspa chaynataq llamkanapaq kallpanchakuptinchik, ima necesitasqanchikta qowananchikmanta seguro kananchikpaq (1 Tes. 4:11, 12; 1 Tim. 5:8). Payqa manam suyasqanchikman hinachu yanapawasunchik, ichapas huk iñiqmasinchikwan llamkayta qowaspanchik otaq imaynatapas.

18. Huk experienciamanta rimarimuy, imapas necesitasqanchikta Jehová Dios qowasqanchikmanta qawachiqta.

¹⁸ Chaymantapas, ¿yuyachkanchikchu qayna estudiopa qallariyninpi wawanta sapallan uywaq cristianamanta? Wawanpiwan huk llaqtaman ripukuspankum, sasachakurqa llamkayta tarinanpaq. Paymi nin: “Madrugawmi predicaq lloqsirqani, tardenñataqmi llamkayta maskarqani. Huk punchawmi lecheta rantinaypaq tiendaman rirqani. Hinaspam verdurakunata qawaylla-qawarqani rantinaypaq qollqey mana kaptin. Manam haykapipas chayna llumpay llakisqaqa tarikurqanichu. Wasiyman kutiruspaymi ichaqa llumpayta admirakurqani: wasiypa pationpim kachkasqa bolsakunapi tukuy rikchaq verdurakuna. Achkallañam karqa, achka killakunapaq hina. Waqaspaymi Jehová Diosta agradecekurqani”. Kay cristianam chaymantaña yacharurqa huertayoq huk iñiqmasin chay verdurakunata saqesqanta. Chaymi qellqaspan kaynata nirqa: “Chay punchaw yanapaykuwasqaykimantam agradecesqa kachkani, chaynallataqmi Jehová Diostapas anchata agradecekuni kuyakuynikita servichikuspan ancha kuyawasqan yuyarichiwasqanmanta” (Pro. 19:17).

19. ¿Imamantam seguro kasunchik Jehová Diospa serviqninkuna hatun ñakariy chayamuptin, hinaspa imatam rurananchik imapas kaptin?

¹⁹ Pasaq tiempokunapi hinaspa kunan tiempopipas Jehová Diospa rurasqankunam, kallpanchawanchik promesankunapi confianapaq. Pisi tiempollamantañam kay pachapi runakunapaq chayamunqa hatun ñakariy hinaptinmi necesitasun Diospa yanapakuyninta. Diospa serviqninkunaqa confianzawanmi payman asuykuchwan hinaspa kusisqapas tarikuchwanmi, librasqa kayninchikqa hichpallapiña kasqanrayku (Luc. 21:28). Chay punchaw chayamunankamaqa, ima pasaptinpas Jehová Diospim confiananchik. Amayá haykapipas qonqasunchu, Jehová Diosqa manam cambianchu hinaspapas payllam atiyniyoq Librawaqninchikqa.

[Willakuykuna]

¿Yuyachkankichu?

• ¿Imaynatam Jehová Diosqa libran wañuq runakunata?

• ¿Imanasqam Dioswan amistadninchik imamantapas aswan allinqa?

• ¿Imaynatam entiendenanchik cuerponchikpa necesitasqanta Jehová Dios qowananchikpaq prometesqanta?

[Kay yachachikuypa tapukuyninkuna]

[12 kaq paginapi dibujo]

Wawqenchik Rutherford hinaspa yanapaqninkunapas presochasqam karqaku 1918 watapi. Tiempopa risqanman hinam libre karqaku hinaspa yanqamanta tumpasqa kasqankupas allichasqam karqa

[14 kaq paginapi dibujo]

Jehová Diosqa yanapawanchikmanmi ‘onqosqaña kaptinchikpas’