Mariatam Dios servichikurqa munayninta rurananpaq

ACHKA runakunaman Jesus predicachkaptinmi, huk warmi qonqayllamanta qaparispan nirqa: “¡Mayna kusisqaraq wachakusuqniki hinaspa ñuñusuqniki warmiqa!”, nispa. Sichum mamanta discipulonkuna yupaychananta Jesucristo munaspanqa chay ratochiki yupaychanankupaq ninman karqa. Ichaqa Jesusmi nirqa: ‘Aswan kusisqaqa Diospa palabranta uyarispa kasukuqkunam’, nispa (Lucas 11:27, 28).

Jesusqa manam haykaqpas mamantaqa hatuncharqachu manataqmi discipulonkunatapas nirqachu chayta ruranankupaqqa. Hinaptinqa, ¿imanasqataq achka runakuna Mariata yupaychanku? Qawasunchikyá bibliapa nisqanta servichikuspa, Mariapi imayna creesqankumanta.

Wakin warmikunamantaqa astawan favorecesqam

Jehová Diospa munayninta rurananpaq akllasqa kasqanmanta Mariaman manaraq willachkaspanmi Angel Gabriel kaynata nirqa: “Rimaykullayki Diospa favorecesqan Maria, Diosmi qanwan kachkan”, nispa (Lucas 1:28). Wakin Bibliapiqa kaynatam angelpa saludasqanta tikranku: ‘Diospa salvasqan chaynataq favorecesqan, Señormi qanwan kachkan’, nispa. Huk kutipiñataqmi Mariaqa Elizabetman watukuq rirqa, hinaptinmi Mariata rikuruspan Elizabet nirqa: “Wakin warmikunamanta astawan favorecesqam qamqa kanki. Diospa favorecesqantaqmi wachakunayki wawapas”, nispa (Lucas 1:42). Kayna nisqankuqa, ¿yachachichkanchu Mariata yupaychanapaq?

 Manamá. Religión Católica nisqapi runamasinchikkunam angel Gabrielpa hinaspa Elizabetpa nisqankuta Mariaman rezakunankupaq rurarunku, bibliam ichaqa mana chaynatachu yachachin. Mariata chayna saludasqankuwanqa qawachirqakum Cristota wachakunanpaq favorecesqa kasqanta, ichaqa manam payman orakunamantachu nichkarqaku. Mariaman orakunapaqqa manam bibliaqa yachachinchu. Diosman orakunankupaq discipulonkunata Jesucristo yachachispanmi nirqa piman orakunankumanta kaynata nispa: “Hanaq pachapi Taytayku, sutiki yupaychasqa kachun”, nispa (Mateo 6:9).

Hanaq pachapim kamachichkan

Chaymantapas creenkutaqmi Mariaqa “hanaq pachapi Kamachiq kasqanta”. Bibliam ichaqa mana chaytaqa yachachinchu. Ichaqa ninmi Mariaqa Diospa munayninta rurananpaq hanaq pachapi sapaqchasqa kasqanmanta. ¿Imapaqtaq sapaqchasqaqa kachkan?

Jesusmi nirqa, wakin discipulonkunawan kuska Gobiernamunankumanta (Lucas 22:28-30). Kay sapaqchasqa discipulonkunataqa Jesusmi yachachirqa, Diosninchikta “Sacerdotekuna [hina servispanku] kay pachata gobiernamunankupaq” (Apocalipsis 5:10). Chaymi bibliapa kayna yachachisqanwan nichwan, Mariaqa hanaq pachamanta kamachiqkuna hina sapaqchasqa kasqanta. ¿Imaynatataq chayta yachanchik?

Manaraq kay yachachikuymanta rimachkaspam yachamurqanchik Cristo wañukuptin wawqenkunapas, mamanpas hinaspa discipulonkunapas ‘huñunakuykuspanku huk sonqolla Diosta mañakusqankumanta’. Chaypim 120 qarikunapiwan ‘warmikuna’ karqaku (Hechos 1:12-15). Bibliam willan Pentecostes Fiestata rurachkaptinkum, ‘lliw iñiqkuna huk wasillapi huñunasqa kachkarqaku’ chaypim chuya espiritunwan Diosqa sapakamata huntaykurqa, huk idiomakunapi rimanankupaq (Hechos 2:1-4).

Chay chuya espiritu chaskiqkunapa kasqanpi Maria chaynataq wakin warmikunapas tarikusqanmi qawachin, hanaq pachamanta Jesuswan kuska Kamachimunanpaq sapaqchasqa kasqanta. Chaymi qawachin Mariaqa kunanpuni Cristowan hanaq pachapi kasqanta (Romanos 8:14-17). ¿Imatataq Mariaqa ruranqa sapaqchasqamasinkunapiwan Diospa munasqankuna rurakusqanpi?

Diospa Gobiernonpim Jesusta yanapanqa

Bibliapim willachkan 144.000 runakunam hanaq pachapi kawsarinqaku chaymi sacerdote, juez chaynataq reykuna hina Jesuswan kuska Diosta servinqaku nispa (Apocalipsis 14:1, 4; 20:4, 6). Chay sapaqchasqa sacerdotekunam rantinchikpi Jesuspa wañusqanwan yanapamunqaku kay pachapi Diosman sonqo runakunata portakuyninkupi, cuerponkupi chaynataq Diosta serviyninkupipas mana huchayoq kanankupaq (Apocalipsis 21:1-4). ¡Maynatamá munanchik Diosta tukuy sonqonchikwan serviqkunaqa chay tiempo chayamunanta! *

Jehová Diosqa munasqanta rurananpaqmi Mariataqa ñawpa tiempopi servichikurqa, chaynallataqmi kay tiempopipas servichikuchkan. Mariaqa allin warmim, humildem, Diosman sonqom, kasukuqmi hinaspa ima sasachakuypas aguantaqmi karqa chaymi llapanchikpaq allin ejemplo. Mariata qatipakuspanchikpas respetananchikmi Cristota wachakusqanrayku hinaspa Diospa munaynin rurakunanpaq yanapakusqanraykupas.

Mariapa lliw rurasqankunamantaqa, astawanmi qatipakunanchik Jehová Diosllata yupaychasqanta, ñawpa tiempopi hinaspa kunan tiempopi iñiqmasinchikkuna hina. Mariaqa Cristowan kamachiqmasinkunapiwanmi ninku: ‘Tiyananpi tiyaq Diostayá [Jesucristowan] Wiña-wiñaypaq [. . .] yupaychasun, hatunchasun hinaspa [atiysapapaq] hapisun’ nispa (Apocalipsis 5:13; 19:10).

[Willakuy]

[31 kaq paginapi suti rikuylla kaq willakuy]

Mariatayá qatipakusun humilde, Diosman sonqo hinaspa kasukuq kayninta