Bolivia nacionmanta carta

Wakcha kaspapas kusisqa

UNAY wataña wakcha runakunapa kasqan nacionpi misionera kaspaypas, manam amañanichu chayna wakchayayta qawaspay kawsaytaqa. Munanim ñakariykuna utqayman tukurunanta. Ichaqa yachanim Diospa Gobiernollan kay sasachakuykunata allichananta. Chayna kaptinpas, achka kutipim rikurqani Diospa kamachisqanta kasukuqkuna sasachakuypi kaspankupas kusisqaña kasqankuta. Chaynam pasarqa Sabinata.

Paypa qosanmi unay wataña huk law nacionman pasakurqa llamkayta maskananpaq, Sabinañataqmi Milena hinaspa Ghelian sutiyoq uchuy warmachankunawan qeparurqa. Killakunaña, watakunaña pasaruptinpas qosanqa manam haykapipas kutimurqachu. Chaymantapacham Sabinaqa sapa punchaw kallpanchakun warmankunata uywananpaq.

Sabinataqa huk tardem reqsirurqani ñañanpa tiendanpi rantiqkunata pacienciawan atiendechkaptin. Ñawinpim qawarqani tukuy punchaw llamkasqanwan pisipasqa kasqanta. Bibliamanta estudiota munachiptiymi niwarqa: “Munaymanmi, ichaqa manam tiempoy kanchu. ¿Manachu warmachaykunata estudiachipuwankiman?”, nispa. Warmachankunata yachachisqayman hinam, Sabinataqa astawan reqsirurqani hinaspam yacharqani wakchayaypi tarikusqanta.

Payqa llamkananpaqmi wallpa waqayta hatarin. Warmachankuna puñuchkaptinraqmi payqa ninata ratachispan empanadata rurananpaq alistakun, chayta rantikuspam familianta uywan. Payqa huk punchaw qepataraqmi masata listotaña saqen, ichaqa hatun mankapim yanunanraq empanadapa ukunman churananpaq aychayoq aderezota.

Yanuyta tukuruspanñataqmi, rantikunan sitioman apananpaq prestakusqan carretaman sumaqllata churan: paraguata, cocinata, gasta, mesata, bancochakunata, mankata, aceiteta, masa preparasqantawan aderezota hinaspa frutamanta rurasqan jugotapas.

Sabinaqa warmachankunapiwanmi manaraq inti lloqsimuchkaptin listoña kachkanku. Hukmanyasqa uyayoqmi chullalla cuartonta candadowan wichqaykuspanku lloqsinku. Manam mayqanninkupas rimarinkuchu nitaq asirinkuchu. Tukuy punchawmá llamkananku. Sapa kutim chayna kaqllata rikuniku yachasqayku wasimanta. Chayna llamkaq warmikunamanta hukninmi Sabina, pay hinam Boliviapi achka warmikuna manaraq achikyachkaptin callekunapi mikuyta rantikuq lloqsinku.

 Inti lloqsimuytaqa ñam Sabinaqa warmachankunapiwan rantikunanku esquinanman chayarunkuña. Upallalla lliw apasqankuta uraykachispankum mikuy rantikunankupaq carpachankuta sayachinku. Empanadata Sabina teqtiyta qallariptinmi, timpuchkaq aceite pawan. Hinaptinmi miskillataña asnariptin, callepi puriq runakunaqa rantiq asuykunku.

“¿Haykatam qosqayki?”, nispam Sabinaqa tapun punta rantiqninta. Hinaptinmi mana umanta hoqarispallan rantiqqa puñu-puñuysan dedollanwan nin iskayta qonanpaq. Sabinañataqmi pisichalla qollqepaq sumaq teqtisqa empanadata qon. Chaynatam tukuy madrugaw ruran. Tukurachispanñataqmi kaqlla imankunatapas carretanman hinaykuspan wasinman kutinku. Sabinaqa manam chayllatachu ruran, chakin nanaptinpas ñañanpa tiendanpi llamkaqraqmi rinan.

Milena hinaspa Ghelian sutiyoq (9 hinaspa 7 watayoq) warmachankunata Bibliamanta yachachinaypaq chayllaraq riptiymi, mamanqa iskay bancochakunata kuchupi churarusqaña. Qallariymantapacham warmachankunaqa kusikuyllawanña hinaspa allin preparasqa suyawarqaku. Mana ancha rimariq kaspankupas pisi-pisimantam rimarirqakuña, hinaptinmi allin amistadta rurarurqaniku. Chayta qawaspanmi Sabinaqa mana tiempoyoq kachkaspanpas Biblia estudiananpaq tantearurqa.

Yachasqanman hinam, Jehová Diosta kuyayta qallaykurqa. Pisi tiempollapim kusisqaña tarikurqa, manam ñawpaqtaqa chayna tarikurqachu. Manañamá ñawpaq hina llakisqachu tarikurqa. Kunanqa umanta hoqarispanmi kusisqa uyayoqña purin. Ñañanpas cambiarusqantam rikurqa, hinaspam nirqa: “Sabinaqa kusisqallañam purin, ñawpaqtaqa manam chaynachu karqa”, nispa. Manam payllachu chayna cambiarusqantaqa musyarqa. Chayraqmi Sabinaqa Diosmanta yachaspan kusisqa tarikurqa.

Payqa anchatam kusikurqa Biblia estudiasqanwan, ichaqa llamkayninwanmi huñunakuykunaman manaraq riyta atirqachu. Rirusqanmantapacham ichaqa, kunankama mana faltakunchu. Congregacionpim cheqap amistadkunata tarirun. Chaymantapas cuentatam qokun Jehová Dios kuyaqninkunata hinaspa serviqninkunata waqaychasqanmanta (Lucas 12:22-24; 1 Timoteo 6:8).

Sabinaqa anchatam yachasqankunata chanincharqa, chaymi hukkunawanpas rimayta munarqa. Ichaqa mana reqsisqan runaman predicananta piensaspanmi katkatataq. Paymi niq: “Manchakunim, manataqmi allin educacionniyoqchu kani. ¿Imaynatamá hukkunamanraq yachachisaq?”, nispa. Chayna kaptinpas anchatam agradecekurqa kuyakuywan yanapasqaymanta hinaspa Biblia estudiasqanwan vidan allinyarusqanmantapas, chayraykum predicaq lloqsinanpaq tantearurqa. Musyakurqataqmi warmankunaman allin ejemplo qonanmantapas. Predicayta qallaykuptinmi wawankunapas kusisqallaña paywan predicayta qallaykurqaku.

Sabinaqa manañam sapa punchaw llamkaq mana suyakuyniyoq wakcha warmikuna hinañachu kunanqa tarikun. Mana ancha qollqeyoq kaptinpas, suyakuyninqa manam ñawpaq hinachu. Kunanqa bautizasqañam, hinaspam Bibliamanta runakunaman yachachin Diospa gobiernollan kay pachapi wakchayayta chinkachinanmanta (Mateo 6:10).

Achikyaruptinmi Sabinaqa listoña kachkan wasinmanta lloqsinanpaq. Ichaqa manam empanadata rantikunanpaqchu, aswanmi wakin Testigokunawan predicananpaq. Yacharunmi Bibliamanta runakunaman yachachinanpaq tiempochakusqan ancha kusichisqanta. Chaymi punkunta wichqaykuspan kusisqallaña predicaq rin. Rantikunanpaq carrochanta tanqananmantaqa, kunanqa Bibliamanta qellqakunata bolsanpi apaspanmi runakunaman sumaq suyakuymanta yachachin. Kusisqallañam nin: “Manam haykapipas piensarqanichu runakunaman Bibliamanta yachachinaytaqa, kunanmi ichaqa anchata gustawan”, nispa.