Ama qonqasunchu wawankuta sapallan uywaqkunata

¿YACHANKICHU qosan mana yanapaptin wawankunata sapallan uywaqpa mayna sasachakusqanta? * Tukuytam ruranan tiempontawan kallpanta allinta servichikunankupaq: llamkananmi, wasitam atiendenan, rantipakunanmi, yanukunanmi hinaspa hukkunatapas rurananmi. Atiendenantaqmi saludninkupi allin kanankupaq chaynataq pukllachinan kusisqa kanankupaq, atispaqa kikinpaqpas tiempochakunan.

Wawankuta sapallanku uywaqkunaqa kunanmi astawan yapakuchkan, manam chaskinkuchu necesitasqanku yanapakuytaqa. Huk warmim nirqa: “Sapallanku wawankuta uywaqkunapiqa manam ancha piensaqchu kani, ñoqapas chayna rikurirunaykama”, nispa. ¿Ñoqanchikqa? ¿Yaqachu qonqachkanchikman wawankuta sapallan uywaqkunata? Imanasqa paykunata mana qonqanamantam qatiqninpi kimsamanta yachasun.

Imanasqam paykunata mana qonqanachu

Yanapananchiktam necesitanku. 41 watanpi tarikuq 2 wawayoq viudam nin: “Wakinpiqa achkallaña ruranay kaptinmi mana yachanichu mayqanwan qallariytapas. Llumpaymi ñoqapaqqa”, nispa. Qawasqanchikman hinaqa, qosan wañukuptin otaq saqeruptin chaynataq imanasqapas sapallankuña familiankuta atiendeyqa llumpay sasam kanman. Huk señoram kaynata nirqa: “Llumpay sasallañam imayna tarikusqaykuqa. ¡Necesitanikum pipas yanapaykuwanankuta!”, nispa.

Yanapaspam aswan kusisqa kasunchik. ¿Manachu pipas llumpay llasaqta apachkaptin yanapaykuspaqa allin sientekunchik? Wawankuta sapallanku uywaq mamakunaqa chayna llumpay llasaq qepitam sapa punchaw apanku. Allinta yanapaspanchikqa cuentatam qokusun Bibliapa kayna nisqan cheqap kasqanmanta: ‘Mayna kusisqamya wakcha runakunamanta nanachikuq [otaq interesakuq] runaqa’ (Salmo 41:1).

Diosqa munanmi paykunata yanapaykunanchikta. Bibliam nin: “Dios Taytataqa agradanchik [. . .] mana tayta-mamayoqkunatawan viudakunata llakinkunapi yanapaykuspam”, nispa (Santiago 1:27). Wawankuta sapallanku uywaqkunapas yanapananchiktam necesitanku. * Chaymantapas Hebreos 13:16 nin: “Allin  ruraytawan kapuqnikichikwan yanapanakuytaqa amayá qonqaychikchu, chay rurasqaykichikwanmi kañasqa ofrendawan hina Diosta agradankichik”, nispa.

Ichaqa, ¿imaynatam allinta yanapachwan? Qatiqninpiyá qawasun imayna yanapanamanta.

Necesitasqankupi yanapasun

Ichapas utqayman ninchikman: “¿Munawaqchu imawanpas yanapanayta?”, nispa. Ichaqa, ¿hayka mamakunataq niwanchikman ima necesitasqankuta? Salmo 41:1 niwanchik paykunamanta nanachikunapaq, chaytam qawachisun ruraspa. Huk libropa nisqanman hinaqa, hebreo rimaypi interesakuymanta chay textopi niq palabram qawachichkan “allinta ruranapaq otaq yanapakunapaq yuyaymanaspa piensanamanta”.

Wawankuta sapallan uywaqkunata allinta yanapanapaqqa, imayna tarikusqankupim puntata yuyaymanana. Manam qawasqallanchikpichu piensana aswanqa imayna tarikusqanmantam yachana. Tapukunanchikmi: “¿Imatam necesitayman paypa lugarninpi tarikuspayqa?”, nispa. Yaqapaschá achka mamakuna ninmanku paykuna hina pasaqkunalla entiendesqankumanta. Chayna nisqanku cheqap kaptinpas, entiendenapaq kallpanchakuspaqa allintam yanapachwan.

Diospa ejemplonta qatipakusun

Sasachakuypi tarikuqkunata yanapanapaq aswan allin ejemploqa Jehová Diosmi. Viudakunamanta, mana tayta-mamayoqkunamanta hinaspa wawankuta sapallan uywaqkunamanta llumpayta interesakusqantam Bibliaqa achka kutita willawanchik. Manam pipas pay hinaqa kuyakuywan hinaspa allintaqa cuidanmanchu. Chaynaqa necesitasqankupi allinta yanapananpaq Jehová Diospa tawa rurasqanmanta qawasun hinaspa imayna qatipakunamanta piensasun.

Tiempochakunanchikmi uyarinapaq

Israelitakunaman Ley qosqanpim viudakunamantawan mana tayta-mamayoqkunamanta nirqa: “Mañakuwaptinqa uyarisaqpunim”, nispa (Exodo 22:22, 23). ¿Imaynatam qatipakuchwan chayna interesakusqanta? Chayna mamakunamantam achka sapallanku tarikunku, sientisqankuta willanankupaq yuyayniyoq runa ladonkupi mana kaptin. Huk señoram nin: “Wakinpiqa warmaykuna puñuruptinmi llumpay sapallay tarikuspay mana amispa waqani”, nispa. Hinaptinqa, wawankunata sapallan uywaqkunapa nisqankuta uyariytaqa atichwanmi, qarikunaqa allintam tanteana paywan mana sapallanchik kanapaq. Pipas uyarisunaykipaq hichpallaykipi kasqanmanta yachayqa kallpatam qosunki puntaman rinaykipaq.

Rimasqanchikqa kallpanchananmi

Jehová Diosmi wakin israelitakunata chuya espiritunwan yanaparqa payta yupaychanapaq takikunata qellqanankupaq. ¿Imaynataq viudakunawan mana tayta-mamayoqkunaqa takispanku tarikunmanku karqa? Kusisqachá tarikurqaku, chay takikunam paykunata yuyarichirqa Diosqa ‘taytanku’ hinaspa ‘defiendeqnin’ juezninku kasqanta (Salmo 68:5; 146:9). Ñoqanchikpas rimasqanchikwanmi kallpanchachwan wawankuta sapallanku uywaqkunataqa, ichapas chayna nisqanchiktaqa manapas qonqanqakuchu. Chaynam pasarqa Ruthta. Payqa kuyakuywanmi yuyarin 20 wata ñawpaqtaraq churinkuna allin uywaq experienciayoq cristianopa kayna nisqanta: “Yachanim iskaynin wawaykikunata kuyakuywan uywanaykipaq anchata kallpanchakusqaykita. Allintam rurachkanki, hinalla kallpanchakuy”. Ruthmi nin: “Chayna niwasqanmi sonqoyman chayarurqa”, nispa. Bibliapa nisqanman hina consuelakuq rimayqa “hampi hinaraqmi” (Proverbios 16:24). Chaynaqa, ¿imallatapas huk mamaman sonqomanta hinaspa kallpanchaq kaqta niykuchwanchu?

 Qoykunanchikmi imallanchiktapas

Ley qosqanpim Diosqa kamachirqa viudakuna hinaspa mana tayta-mamayoqkuna mikuyta tarinankupaq, chaytam rurarqa respetasqa kanankupaq. Chayna kamachikuywanmi paykunapa imankupas haykapipas mana pisinmanchu karqa (Deuteronomio 24:19-21; 26:12, 13). Chaynaqa allinmi kanman necesitaq familiakunaman imallanchikpas qoykuyninchikqa, ichaqa yachaywan chaynataq respetowanmi chaytaqa rurananchik. Ejemplopaq, ichapas wasinman mikuyta apachwan, serviq pachata qochwan otaq ima necesitasqankupaqpas yanapachwan.

Ima rurasqanchikmanpas paykunata invitasunchik

Diosmi israelitakunata kamachirqa sapa wata fiestata ruraspanku mana tayta-mamayoqkunawan hinaspa viudakunawan kuska ruranankupaq. Chaynataqa rurananku karqa Dios serviqkunawan kuska kusikunankupaqmi. Sapakamatam nirqa: “Chay fiestapim kusikunkichik”, nispa (Deuteronomio 16:10-15). Kunanpas cristianokunaqa ‘wasinchikpi samaykachiq’ otaq chaskiykuqmi kananchik (1 Pedro 4:9). ¿Imanasqataq mana invitanchikchu wawankuta sapallan uywaqkunata ñoqanchikwan kuska warmankunapiwan mikunankupaq? Manam achka qollqepa chanin mikuytaraqchu rurananchik. Amistadninkunaman wasinpi watukuspa Jesuspa nisqanta yuyariy, nirqam: “Hukllam ruranaykiqa kachkan”, nispa (Lucas 10:42).

Allintam yanapachwan

Sapallanku tarikuq mamakunaqa yachankum wawankuta paykuna uywanankuta, chaymi mana suyankuchu hukkuna chayta ruranankutaqa. Ichaqa, tukuy sonqonkumantam agradecekunqaku imawanpas yanapasqanchikmantaqa. Kimsa wawankunata sapallan uywaq Kathleenmi nirqa: “Manam imatapas hukkunamantaqa suyanachu, ichaqa agradecekunam sonqonkumanta yanapawasqanchiktaqa”, nispa. Chaynaqa tukuypiyá yanapasun, Jehová Diosqa prometerqam chayna rurasqanchikmanta ‘pagapuwananchikpaq’ (Proverbios 19:17). Chaynapim paykunapas hinaspa ñoqanchikpas aswan kusisqa kasunchik.

[Willakuykuna]

[25 kaq paginapi dibujo]

¿Paykunata invitawaqchu kuska mikunaykichikpaq?