¿Diospa yanapayninwanchu mana yachasqanku idiomakunapi rimanku?

DEVON sutiyoqmi nin: “Manam entiendeyta atinichu. Sapa semanam iglesiaypi runakuna chuya espirituta chaskisqankuman rikchakunku hinaspam mana yachasqanku idiomakunapi milagrowan hina rimanku. Wakinqa huchapakuqmi kanku, ñoqañataqmi kallpanchakuni Bibliapa nisqanta kasukunaypaq. Ichaqa, espirituta qowananpaq mañakuspaypas manam chaskinichu. ¿Imanasqataq chaynaqa?”, nispa.

Gabrielpa risqan iglesiapipas yaqa chaynam pasan. Paymi nin: “Astawanmi kay hukmanyachiwan: mañakuchkaptiymi mana entiendesqankuta qapariyllawanña rimaspanku wakinkuqa mana saqewankuchu mañakuqta. Kayna rurasqankuqa yanqachusmi. Diospa yanapayninwan ruraptinkuqa, ¿manachu runakunata yanapanman?”

Chaynakuna pasaptinmi tapukuchwan: “¿Dioschu milagrota ruraspan huk idiomakunapi kunan tiempo rimachinman?”, nispa. Chaymanta yachanapaqmi punta pachak watapi cristianokuna mana yachasqanku idiomakunata imanasqa rimasqankumanta yachananchik.

‘Mana yachasqanku idiomakunapim rimayta qallaykurqaku’

Bibliam willawanchik mana yachasqanku idiomakunapi rimanankupaq chay tiempopi wakin qarikunatawan warmikunata Dios yanapasqanta. Chaynam Jerusalenpi puntata pasakurqa Cristopa wañukusqan semanakuna qepallata, 33 wata Pentecostes fiestapi. Chay punchawmi 120 cristianokunaman ‘chuya espiritu huntaykuptin mana yachasqanku idiomakunapi rimayta qallaykurqaku’. Chaymi karu llaqtamanta hamuqkunaqa “sapakama rimayninkuta uyariruspanku” admirakurqaku (Hechos 1:15; 2:1-6).

Bibliaqa nintaqmi Jesuspa wakin qatiqninkunapas huk idiomakunapi rimay atisqankumanta. Hukninmi karqa Pablo, chuya espiritu yanapaptinmi achka idiomakunata rimarqa (Hechos 19:6; 1 Corintios 12:10, 28; 14:18). Hinaptinqa, chuya espiritunwan Dios yanapaptin imakunapas rurayqa manam yanqachu kanan karqa. Chaynaqa, ¿imapaqtaq Diospa yanapayninwan ñawpaq tiempopi mana yachasqanku idiomakunata rimaqku?

Diospa yanapasqantam qawachirqa

Corinto llaqtapi cristianokunaman qellqaspanmi Pablo willarqa ‘huk idiomakunapi rimayqa milagro hina mana iñiqkunapaq’ kasqanta, chaypiqa wakinkuchusmi mana yachasqanku idiomakunapi rimarqaku (1 Corintios  14:22). Espiritupa yanapasqanwan imakunatapas rurasqankuman hinam, mana yachasqanku idiomakuna rimasqankupas qawachirqa chayllaraq rikuriq congregacionta Dios yanapasqanta. Chayna rimasqankuqa karqa carreterapi señalkuna hinam, cheqapmanta yachay munaq allin sonqoyoq runatam reqsichirqa Diospa akllasqan llaqta mayqen kasqanta.

Bibliaqa manam willawanchikchu Jesuspa chaynataq cristianokunapa tiemponmanta puntataraq Diosmanta willakuqkunapa chayna rimasqankumantaqa. Kanmi huk razonpas Cristopa qatiqninkuna mana yachasqanku idiomakunata imanasqa rimasqankumanta.

Allin noticiamanta willakuyta cheqechinapaq

Predicayta qallarispanmi qatiqninkunata Jesus kamachirqa judiokunallaman Diospa Gobiernonta willanankupaq (Mateo 10:6; 15:24). Chaymi paykunaqa wakillanpi purirqaku judiokunapa mana kasqanku lawpiqa. Ichaqa manam chaynallachu kanan karqa.

Jesusmi kawsarimusqan qepallata otaq 33 watapi, qatiqninkunata nirqa: “Llapallan nacionpi runakunaman rispayá willamuychik qatiqniykunaña kanankupaq”, nispa. Nirqataqmi “kay pachapa cantonkama” paypa testigon kanankuta (Mateo 28:19; Hechos 1:8). Chaymi enteron allpapi allin noticiamanta willanankupaqqa hebreo rimaymantapas huk idiomakunatawan rimananku karqa.

Ichaqa, Jesuspa punta qatiqninkunaqa achkam “mana ancha educacionniyoq” karqaku (Hechos 4:13). ¿Imaynatam karu llaqtakunapi predicanmanku karqa chay runakunapa rimasqanku idiomakunata mana yachaspankuqa? Chuya espiritum yanaparqa haykapipas mana yachasqanku idiomata mana sasachakuspa allinta rimanankupaq.

Arí, mana yachasqanku idiomakunapi rimayqa 2 razonraykum karqa. Puntatam qawachirqa punta cristianokunata Dios yanapasqanta. Chaynataq, allinmi karqa lliw nacionniyoq runakunaman predicanapaq kamachikuyta cumplinapaq. Ichaqa, ¿imatam nichwan mana yachasqanku idiomakunata kay tiempopi rimasqankumanta? ¿Punta pachak watapi hinachu kanman?

Kunan chayna rimasqankuqa, ¿Diospa yanapasqantachu qawachin?

Ancha allin willakuyniyoq letrero kapusuptikiqa, ¿maypitaq churaruwaq lliw runakuna leenanta munaspaykiqa? Manachá taksa wasi ukupichu. Aswanqa churawaqchá lliw runakunapa rikunan sitiopi. Bibliapa nisqanman hinaqa achkam rikurqaku cristianokunapa mana yachasqanku idiomakunata Pentecostespi rimasqankuta. Hinaptinmi, Diospa llaqtanman “chay punchaw yapakurqaku yaqa kimsa waranqa runakuna” (Hechos 2:5, 6, 41). Kunanqa manam chaynachu, mana yachasqayku idiomakunapim rimani niqkunaqa chaytam ruranku iglesianku ukullapi. ¿Imaynataq chayqa señal hina servinman llapallan runakuna mayqan cheqap religion kasqanmanta yachanankupaq?

Bibliaqa nintaqmi huchapakuywan ‘aychapa munasqallanta’ rurayqa chuya espiritu yanapawananchikta sasachasqanta. Nintaqmi “chayna mana allin ruraqkunaqa” Diospa munaychakusqanman mana yaykunankuta (Galatas 5:17-21). Chaymi achka hukmanyanku mana yachasqanku idiomakunata rimaniku niqkuna mana allinta kawsaptinku. ¿Imaynamá Diosqa qonman espiritunta Palabranpa contranpi ruraqkunamanqa? ¡Chayqa kanmanchá pantasqa sitioman rinapaq carreterapi señalkuna churay hina!

Mana yachasqanku idiomakunapi kunan rimasqankuqa, ¿allin noticiamanta willanapaqchu?

Punta pachak watapiqa mana yachasqanku idiomakunapi rimasqankum yanaparqa allin noticiamanta chay idioma rimaqkuna uyarinankupaq. ¿Kunanpas chaynachu? Ama qonqasunchu, 33 wata Pentecostespi Jerusalenman riqkuna achka nacionkunamanta kasqankuta. Chuya espiritu yanapaptin chay runakunapa idiomanpi cristianokuna rimaptinkum paykunaqa allintapuni entienderqaku. Kay tiempopi mana yachasqanku idiomakuna rimaqkunapa  nisqankuqa manam imaniraqllatapas entiendekunchu.

Chayna rimasqankuqa manataqmi imaniraqllatapas tupanchu punta cristianokunapa chuya espiritupa yanapayninwan rimasqankuwanqa. Chaynataq, manam confianapaq pruebakunaqa kanchu apostolkunapa wañukusqanku qepata chuya espiritupa yanapayninwan pipas chaynata rimasqanmantaqa. Chayna kananmantam Biblia leeqkunaqa mana admirakunkuchu, chuya espiritupa yanapayninwan imakuna rurasqankumanta rimaspanmi Pablo nirqa: “Manañam rimanqakuchu mana yachasqanku idiomakunatapas”, nispa (1 Corintios 13:8). Chaynaqa, ¿imaynatam yachachwan pikunata espiritunwan Dios kunan yanapasqanmanta?

¿Pikunataq qawachinku chuya espirituwan yanapachikusqankuta?

Jesusqa yacharqam congregacion cristiana qallarisqan qepallata mana yachasqanku idiomakunapi rimasqanku tukunanta. Chaymi manaraq wañukuchkaspan willarqa cheqap cristianokunata imayna reqsinamanta, nirqam: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Bibliam 1 Corintios 13:8 willarqa chuya espiritupa yanapayninwan imakuna ruray tukunanmanta, nintaqmi ‘kuyakuy wiñaypaq’ kananmantapas.

‘Chuya espiritupa’ yanapayninwan imayna kanamanta rimaspanmi, Bibliaqa puntata riman kuyakuymanta (Galatas 5:22, 23). Chaynaqa Diospa hinaspa espiritunwan yanapachikuqkunaqa kanku cheqaptapuni kuyanakuqkunam. Chaynataq, chuya espiritupa yanapayninwan imayna kanamanta 3 kaqqa hawka kaymi. Chaymi cheqap cristianokunaqa kallpanchakunku hawkayayta maskanankupaq, chaypaqmi sonqonkumanta chinkachinku piensasqallankuman hapipakuyta, hukkunata mana allin qawayta hinaspa cheqnikuytapas.

Yuyarisuntaq Jesuspa Hechos 1:8 nisqantapas. Willarqañam “kay pachapa cantonkama” qatiqninkuna paypa testigon kanankumanta. Nirqataqmi “kay pacha puchukanankama” hinalla predicakunanta (Mateo 28:20). Allin noticiamanta lliw nacionniyoq runakunaman willakusqankupas, kay tiempopim señal hina qawachin pikunata chuya espiritu yanapasqanta.

Qawasqaykiman hina, ¿pikunataq qawachinku Diospa espiritunwan yanapachikusqankuta? ¿Pikunataq guerraman enteron pachapi mana rinkuchu Diospa espiritunman hina kuyakuq hinaspa hawkayayta maskaq kaspanku, chayna kasqankurayku wakin gobiernokuna qatikachachkaptinpas? (Isaias 2:4.) ¿Pikunataq kallpanchakunku mana huchapakunankupaq hinaspa congregacionninkumanta qarqonku chayna huchapakuq mana wanakuptin? (1 Corintios 5:11-13.) Hinaspa, ¿pikunataq enteron pachapi willachkanku Diospa Gobiernollan lliw runakunaman suyakuy qosqanmanta? (Mateo 24:14.)

Kay revista qellqaqkunaqa mana iskayrayaspam niymanku, Bibliapa nisqanman hina chuya espirituwan yanapachikuqkunaqa Jehová Diospa testigonkuna kasqanta. ¿Imanasqataq mana asuykunkichu astawan reqsinaykipaq? Chaynapim cuentata qokunki paykunata Dios yanapasqanmanta.