Diospa Palabranmanta yachay

¿Imanasqataq Diosmanta yachayqa ancha allin?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Imanasqataq Diosmanta yachana?

Diosmi yachachin runakuna suyakuyniyoq kanankupaq. Chay yachachikuymi Bibliapi tarikun. Bibliaqa Diospa apachimuwasqanchik carta hinam. (Leey Jeremias 29:11.)

2. ¿Imamanta yachananchiktam Diosqa munan?

Manam mayqen gobiernopas chinkachiyta atinchu wañuchinakuyta, mana allin rurayta, onqoyta nitaq wañuytapas. Diosmi prometen gobiernonwan allpantinpi ñakariykunata wiñaypaq chinkachinanpaq. (Leey Daniel 2:44.)

3. ¿Imanasqam Diosmanta yachana?

Diosmi chaylla chinkachinqa mana allin runakunata. Ichaqa piñakuynin manaraq chayamuchkaptinmi millonnintin runakunaman yachachichkan kuyanakunankupaq hinaspa allin kawsakunankupaq. Palabranwanmi yachachwan sasachakuykunata atipaspa Diospa agradonpaq kusisqa kawsayta. (Leey Sofonias 2:3.)

4. ¿Pipa piensaynintaq Bibliaqa?

Bibliapi 66 librokunatam 40 runakuna qellqarqaku. Qallariyninpi 5 librokunatam yaqa 3.500 wata ñawpaqta Moises qellqarqa, tukuyninpi kaqtañataqmi apostol Juan 1.900 wata ñawpaqta qellqarqa. Kay runakunaqa manam kikinkupa piensayninkutachu qellqarqaku aswanqa Diospa piensaynintam. Chaymi Bibliaqa Diospa piensaynin. (Leey 2 Timoteo 3:16; 2 Pedro 1:21.)

¿Imanasqataq seguro kanchik chaymanta? Runakunapa mana yachay atisqanta Biblia hamuq tiempomanta imam kaqta willakusqanraykum (Isaias 46:9, 10). Chaymantapas Diospa sumaq kayninkunamantam willawanchik. Bibliaqa atiyniyoqtaqmi runapa vidan cambiananpaq. Kaykunawanmi millonnintin runakuna convencisqa kachkanku Bibliaqa Diospa piensaynin kasqanmanta. (Leey Josuey 23:14; 1 Tesalonicenses 2:13.)

5. ¿Imataq necesitakun Bibliata entiendenapaq?

Jesusmi Diospa Palabranmanta allin yachachiq maestro karqa. Jesuspa tiemponpipas achka runakunam Diospa palabranmanta yacharqaku ichaqa manam entienderqakuchu. Ima nisqanmanta entiendechinanpaqmi textokunata leespan explicarqa. Kay yachachikuypas chaynatam yanapasunki Bibliapa nisqanta entiendenaykipaq. (Leey Lucas 24:27, 45.)

Munankipunichá Diosmanta hinaspa imarayku kawsasqanchikmanta yachayta. Ichaqa manam lliwchu kusikunqaku Biblia estudiasqaykimantaqa. Chayna kaptinpas Biblia estudiaynikiqa ancha allinmi. Bibliam yachachin Diosta reqsiqqa wiñay kawsay chaskinanmanta. (Leey Mateo 5:10-12; Juan 17:3.)

Astawan yachayta munaspaqa qawariy ¿Imatapunim Bibliaqa yachachin? libropa 2 kaq yachachikuyninta, kay libroqa Jehová Diospa testigonkunapa rurasqanmi.