¿Yacharqankichu?

¿Imanasqataq qollqe cambiaqkuna karqa Jerusalen templopi?

▪ Jesusmi manaraq wañukuchkaspan, templopi mana allin rurasqankuta corregirqa. Chaymantam Biblia kaynata nin: ‘Jesusmi [. . .] qarqorqa chaypi rantikuqkunatawan rantiqkunata. Wikaparurqa qollqe cambiananku mesakunatapas chaynataq paloma rantikuqkunapa sillankunatapas. Hinaspam nirqa: Bibliapim Dios nichkan: “Temployqa Mañakuwananku Wasiwan sutichasqam kanqa”. Qamkunam ichaqa suwakunapa machayninta hinaña rurarusqankichik’, nispa (Mateo 21:12, 13).

Ñawpa tiempopim judiokuna hinaspa mana judio kaqkuna karu llaqtakunamanta hinaspa nacionkunamanta Jerusalenman riqku. Watamanta temploman impuesto paganankupaq, animalkunata rantispa ofrecenankupaq hinaspa sonqonkumanta imakunapas ofrecenankupaqmi templopi valeq qollqewan qollqenkuta cambiaqku. Templopi cambiaqkunañataqmi gananciankurayku chayta ruraqku. Chaymi fiestakuna otaq huñunakuykuna hichpamuptinqa mana judiokunapaq patiopi qollqe cambianankupaq mesakunata churaqku.

Jesusmi chay qollqe cambiaqkunata nirqa ‘suwakunapa machayninta hinaña rurasqankunamanta’. Chayna nisqanwanqa yaqapasmi qawachirqa gananciankurayku engañasqankuta.

¿Imanasqataq aceitunas sacha ancha valorniyoq karqa ñawpa tiempopi?

▪ Diosmi prometesqankunapi nirqa payman sonqo kaqkunataqa uvas huertakunawan hinaspa aceitunas sachakunawan bendecinanmanta (Deuteronomio 6:10, 11). Kay tiempopipas tarpusqanku lawpiqa aceitunas sachaqa ancha valorniyoqmi. Mana anchata cuidaptinkupas pachaknintin watakunam achkata rurun. Chaymantapas wiñanmi ranra chakrakunapipas, manataqmi chayllachu chakirun mana paraptinpas. Takaruptinkupas chayllam ikllin raku sacha kanankama.

Ñawpa tiempopiqa tukuypaqmi chay sachataqa servichikuqku. Qarantawan rapinkunatam servichikuqku calenturayoqta hampinankupaq. Weqentañataqmi miski asnayniyoq kaptin perfumepaq servichikuqku. Kay sachataqa astawanraqmi chaninchaqku aceitunanmanta aceiteta horqosqankurayku. Poqosqa aceitunasmantaqa achka aceitetas horqonku.

Allin ruruq sachamantaqa sapa watam 57 litro aceiteta horqonku. Chay aceitentam servichikuqku Diosta yupaychanankupaq wasipi otaq imata ruraspankupas achkichikunankupaq, llusikuqkutaqmi cuerponkuman chaynataq chukchankumanpas, chaywantaqmi hampikuqku heridakuruspa otaq takakuruspapas (Exodo 27:20; Levitico 2:1-7; 8:1-12; Rut 3:3; Lucas 10:33, 34).