Jehová Diospa testigonwan rimaspa ¿Jesusqa Dioschu kanman?

JEHOVÁ DIOSPA TESTIGONKUNAQA anchatam munanku vecinonkuwan Bibliamanta rimaytaqa. ¿Kachkanchu Bibliapa yachachisqanmanta ima tapukuynikipas? ¿Jehová Diospa testigonkunapa imapi creesqankumanta yachayta munawaqchu? Chayna kaptinqa, ¿imanasqataq paykunawan tupaspayki mana tapunkichu? Paykunaqa kusikuywanmi yanapaykusunki.

Paykunapa yachachisqanku imayna kasqanmanta yachanaykipaq piensariy Carmen sutiyoq huk Testigo Susana sutiyoq warmiman watukusqanpi.

¿Cheqaptachu Testigokunaqa Jesuspi mana creenkichik?

Susana: Iglesiaypi pastormi nin Jehová Diospa testigonkuna Jesuspi mana creesqaykichikta. ¿Cheqapchu chay?

Carmen: Creenikum Jesuspiqa. Creenikutaqmi paypi iñispa salvakunaykutapas.

Susana: Ñoqapas chaynatam piensani.

Carmen: Allinmi, iskayninchikmi chaynallata creesqanchik. Ñoqapa sutiymi Carmen, ¿qampaqa?

Susana: Susanam.

Carmen: Susana, ichapas kaynata tapukuchkanki: “Jesuspi creechkaptikichikqa, ¿imanasqataq runakunaqa ninku Jehová Diospa testigonkunaqa Jesuspim mana creenkuchu?”, nispa.

Susana: Arí, munaymanmi yachayta.

Carmen: Jesuspi anchata iñispaykupas paymanta runakunapa tukuy ima nisqankutaqa manam cheqappaqqa hapinikuchu.

Susana: ¿Imaynataq chayqa?

Carmen: Wakin runakunam ninku Jesusqa allin runalla kasqanta, ñoqaykum ichaqa mana chaynalla kasqantachu piensaniku.

Susana: Ñoqapas qam hinam piensani.

Carmen: Allinmi, kaypipas iskayninchikmi chaynallata creesqanchik. Chaymantapas, Jesuswan Dios imayna kasqankumanta kikin Jesuspa yachachisqanpa contranpi kaq yachachikuykunataqa manataqmi creenikuchu.

Susana: ¿Imatataq chaywanqa nichkanki?

Carmen: Achka religionkunam yachachinku Jesusqa Dios kasqanta. Ichapas qanmanpas chaynata yachachisurqanki.

Susana: Arí, pastorniykuqa ninmi Jesuswan Diosqa chaynalla kasqankuta.

Carmen: ¿Manachu Jesusmanta cheqapta yachanapaqqa kikinmanta ima yachachisqanta yachayninchik aswan allin kanman?

Susana: Arí, allinmi chayqa kanman.

¿Imatataq Jesusqa yachachirqa?

Carmen: Qawasun Biblia chaymanta ima nisqanta. Qawaykuy ama hina kaspa Juan 6:38 nisqanta, chaypim Jesus nirqa: “Hanaq pachamantaqa hamurqani manam munasqallayta ruranaypaqchu aswanqa kachamuwaqniypa munasqanta ruranaypaqmi”, nispa. Kay nisqanqa hukmanchá kanman Jesus Dios kaptinqa, ¿aw?

Susana: Manam entiendenichu.

 Carmen: Musyariy, Jesusqa hanaq pachamantaqa hamurqa manam munasqallanta rurananpaqchu.

Susana: Cheqapmi chay nisqaykiqa, kaypiqa nichkanmi kachamuqninpa munasqanta rurananpaq hamusqanmanta.

Carmen: Sichu Jesus Dios kaptinqa, ¿pitaq hanaq pachamantaqa kachamunman karqa? Hinaspapas ¿imanasqataq kachamuqninpa munasqanta ruraspan kasukunman karqa?

Susana: Musyachkaniñam ima niy munasqaykita. Ichaqa manachusmi kay textoqa qawachinchu Jesusqa mana Dios kasqanmantaqa.

Carmen: Allinmi kanman hukpipas Jesuspa ima nisqanmanta yachayninchikpas. Yaqa chayna niqtam tarinchik Juan libropa 7 capitulonpipas. ¿Leeykuwaqchu kay 16 versiculonta?

Susana: Kaypim nin: “Chaymi Jesus nirqa: Kay yachachisqayqa manam ñoqallapachu aswanqa kachamuwaqniypam”, nispa.

Carmen: Kaypi nisqanman hinaqa, ¿kikinpa piensayllanmantachu Jesusqa yachachirqa?

Susana: Manam, paypa yachachisqanqa manam kikillanmantachu kasqa aswanqa kachamuqninmantam.

Carmen: Arí. Hinaptinqa, ¿pitaq Jesustaqa kachamurqa? ¿Pitaq willarqa tukuy ima yachachisqankunataqa? Pipas kachamuqqa aswan atiyniyoqmi kachamusqa kaqmantaqa, ¿aw? Hinaptinqa ¿manachu kachamuqninqa paymanta aswan atiyniyoq kanman?

Susana: ¡Allinchus chayqa! Chaytaqa manam haykapipas leerqanichu.

Carmen: Piensariytaq, Juan 14:28 textopi Jesuspa nisqanmantapas: “Ñam uyarirqankichikña: ‘Riruspaymi kasqallan kutimusaq’ nisqayta. Cheqapta kuyawaspaykichikqa kusisqam kawaqchik Taytaman risqaywanqa, payqa ñoqamantaqa aswan atiyniyoqmi”. Kay versiculopa nisqanman hinaqa, ¿Taytanmanta imayna kasqantataq Jesus reqsikusqa?

Susana: Paymantaqa Taytan aswan atiyniyoq kasqantam reqsikusqa. Chaymantapas musyani Diostaqa paymanta aswan atiyniyoqta hina qawasqantam.

Carmen: Arí, chaynamiki. Leesunchiktaq Mateo 28:18 nisqantapas. Kaypim discipulonkunaman Jesus nirqa: “Diosmi qowarqa tukuy atiyta hanaq pachapipas, kay pachapipas”, nispa. ¿Haykapipas chayna atiyniyoq kasqanmantachu kaypi nichkan?

Susana: Manam, atiytaqa chaskisqas.

Carmen: Sichu Jesus Dios kaptinqa, ¿imaynatataq atiytaqa chaskinman karqa?

Susana: Chaytaqa piensanaychiki kanqa.

¿Pimantataq Jesusqa rimarqa?

Carmen: ¿Yachankichu imaraqtaq yanapawanchikman Jesusqa mana Dios kasqanmanta yachananchikpaq?

Susana: Manam. ¿Imataq chayqa kanman?

Carmen: Jesuspa bautizakusqanmanta Bibliapa willakusqanmi. Maskaykusunchik Lucas 3:21, 22 nisqanta. ¿Munawaqchu leeykuyta?

Susana: ‘Juan runakunata bautizachkaptinmi Jesuspas paywan bautizachikurqa. Chay ratopi Jesus mañakuchkaptinmi hanaq pacha kicharikuykuptin chuya espiritu sutillata paloma hina Jesuspa hawanman tiyaykurqa. Hinaptinmi hanaq pachamanta nimurqa: “Qanmi kanki kuyasqay Churiy, qamraykum kusisqa kachkani”’, nispa.

Carmen: ¿Imatam Jesusqa bautizakuspan rurachkarqa?

Susana: Mañakuchkarqam.

Carmen: Arí, chaynaqa pay Dios kaspanqa, ¿pitataq mañakuchkanman karqa?

Susana: Allinmi chay tapukusqayki. Pastorniytachiki tapunay kanqa.

Carmen: Kaypipas piensarinanchiktaqmi: yakumanta Jesus lloqsiramuptin, ¿ima nimurqam hanaq pachamanta?

Susana: Chaypim nimurqa: “Qanmi kanki kuyasqay Churiy, qamraykum kusisqa kachkani”, nispan.

Carmen: Allinmi. Jesus Dios kaptinqa, ¿pitaq chaykunataqa nimuchkanman karqa?

Susana: Manam haykapipas chaypiqa piensarqanichu.

 ¿Imanasqataq “Tayta” hinaspa “Churi” ninku?

Carmen: Leesqanchikman hinaqa Diosmantam Jesus nirqa hanaq pachapi kaq Taytan kasqanta. Bautizakuchkaptinpas hanaq pachamantam Dios nimurqa ‘Churiymi’ nispa. Kikin Jesuspas nirqataqmi Diospa Churin kasqanta. Chaynaqa, sichu iskay runakuna chaynalla kasqankumanta willawayta munaspaqa ¿imayna wawa-churikunawantaq tupachiwaq?

Susana: Kaqkamallaña iskay churikunawanchiki.

Carmen: Arí, ichapas mellizokunawan ¿aw? Jesusmi Diosmanta nirqa Tayta kasqanta, kikinmantañataqmi nirqa Churi kasqanta. Chaynaqa, ¿imatam kaywanqa Jesusqa niyta munachkarqa?

Susana: Entienderuniñam. Jesusqa nichkarqa mayornin hinaspa paymantapas aswan atiyniyoqqa Dios kasqanmantam.

Carmen: Allinpunim chay nisqaykiqa. Iskay runakuna chaynalla kasqankumanta qawachiwanaykipaqqa tupachirqanki familiapi iskay churikunawanmi otaq kaqkamallaña mellizokunawanmi ¿aw? Chaynaqa, Taytanwan chaynalla kasqanmanta Jesus willayta munaspanqa, ¿manachu chaynata tupachinman karqa otaq aswan allin kaqwanraqpas?

Susana: Yaqachusmi.

Carmen: Ichaqa Dioswan imayna kasqantaqa tupachirqa Taytawan hinaspa Churiwanmi.

Susana: Chay nisqaykiqa ancha allinmi.

¿Imatataq yachachirqaku Jesuspa punta qatiqninkunaqa?

Carmen: Manaraq pasakuchkaspaymi rimasqanchikwan tupaq huk yachachikuymanta rimayta munayman, ¿kanmanchu tiempoyki?

Susana: Arí, kachkanmi huk-iskay minutollaqa.

Carmen: Sichu Jesus Dios kaptinqa, ¿manachu qatiqninkunaqa ninmanku karqa pay Dios kasqanmanta?

Susana: Arí, chaytachusmi ninmanku karqa.

Carmen: Ichaqa, manam mayqan partepipas Bibliapiqa tarinchikchu qatiqninkunapa Jesusqa Diosmi nisqankutaqa. Aswanqa qawasunchik apostol Pablopa qellqasqanmanta, payqa karqa Jesuspa punta qatiqninkunamanta hukninmi. Filipenses 2:9 willawanchik Jesus wañukuptin chaynataq kawsarimuptin Dios ima rurasqanmanta: “Chayraykum Dios llumpa-llumpayta hatuncharuspan llapallanmanta suma-sumaq sutiwan sutichaykurqa”, nispa. Kaypi nisqanman hinaqa, ¿imatam Diosqa Jesuspaq rurarqa?

Susana: Nichkanmi ‘llumpa-llumpayta hatuncharusqanmanta’.

Carmen: Chaynam. Sichu Jesus manaraq wañukuchkaspan Dios hina kanman karqa, chaymantaña llumpa-llumpayta Dios hatunchaptinqa, ¿manachu nichkanman Diosmantapas aswan atiyniyoq Jesus kasqanta? ¿Pipas kanmanchu Diosmanta aswan atiyniyoqqa?

Susana: Manam pipas chaynaqa kanmanchu.

Carmen: Qawasqanchikman hinaqa, ¿Biblia yachachinchu Jesus Dios kasqanmanta?

Susana: Manam. Aswanqa ninmi Diospa Churin kasqanta.

Carmen: Arí. Kaywanqa manam nichkanichu Jehová Diospa testigonkunaqa Jesusta mana kuyasqaykutachu. Creenikum prometesqa Mesias hina wañukusqanwan llapallan allin ruraq runakuna salvakuy atisqankuta.

Susana: Ñoqapas chaynatam creeni.

Carmen: Chaynaqa, allinmi kanman kayna tapukuyninchik: “¿Imaynatam Jesusman agradecekusqanchikta qawachichwan ñoqanchikrayku wañukusqanmanta?”. *

Susana: Wakinpiqa chaytam tapukurqani.

Carmen: Munaptikiqa kutimuymanmi huk punchaw chay tapukuymanta Bibliapa nisqanman hina contestanaypaq. ¿Hinapichu kanki hawan semanata kay horata kutimunaypaq?

Susana: Arí, hinapim kasaq.

Carmen: ¡Allinmi! Chaynaqa hawan semanakama.

[Willakuy]