DIOSMAN ASUYKUY
Ñoqam mosoqyachisaq tukuy imata
¿Munawaqchu imawanpas mana onqospa familiaykiwan wiñaypaq kawsakuyta? ¿Munawaqchu nanaypas ñakariypas wañuypas chinkananta? Chaykunaqa manam yanqa piensayllachu Diosmi prometen chayna kawsakuytaqa. Chaytayá qawasun Apocalipsis 21:3-5 nisqankunapi.
“Diosmi pichanqa [runakunapa] weqenta.” (Apocalipsis 21:4.) ¿Imamanta waqayninchiktataq Diosqa pichanqa? Manam kusikuymanta waqasqanchiktachu aswanqa llakimanta waqasqanchiktam. Imawanpas manaña waqananchikpaqmi Diosqa ñakariykunata chinkachinqa.
“Manañam kanqachu wañuypas.” (Apocalipsis 21:4.) Kuyasqa ayllunchik otaq amistadninchik wañukuptinqa llumpaytam waqanchik. Ichaqa Jehova Diosmi kasukuqnin runankunataqa wañuymanta libranqa ¿Imaynata? Adanmanta herenciata hina chaskisqanchik huchata chinkachispanmi (Romanos 5:12). Rantinchikpi Jesucristopa wañusqanwanmi Jehova Diosqa manaña huchallikuq kanapaq chuyanchawasun. * Chaymi runapa ‘enemigon wañuyqa’ chinkachisqa kanqa (1 Corintios 15:26). Hinaptinmi qallariymantapacha Diospa munasqanman hina runakunaqa imawanpas manaña onqospa wiñaypaq kawsanqaku.
Manañam “nanaypas” kanqañachu (Apocalipsis 21:4). ¿Imayna nanaytam Diosqa chinkachinqa? Pantaq kasqanchikrayku sonqonchikpi llumpay hukmanyachiwaqninchik ñakariykunatam.
Chayllam manaña kanqachu wañuypas, waqaypas nitaq nanaypas. Ichapas tapukuwaq “¿maypitaq chayqa kanqa? ¿Hanaq pachapichu?”, nispa. Manam. Bibliam nin: “Diosqa runakunawanñam yachachkan”, nispa. Runakunaqa kay pachapim kawsanchik (Apocalipsis 21:3). Chaymantapas ninmi: “Manañam kanqachu wañuypas”, nispa. Hanaq pachapiqa manam kanchu wañuyqa, kay pachapim ichaqa wañuy kan, Adanpa tiemponmantapacha. Chaywanmi entiendenchik Diospa prometesqan wiñay kawsayqa kay Pachapi kananmanta.
Ñakarisqankuwan chaynataq llakisqa kasqankuwan para hinaña waqasqankutam Diosqa pichanqa
Jehova Diosqa munanmi promesankunapi confiananchikta. Tukuy chaykunata prometespanmi nin: ‘Ñoqam mosoqyachisaq tukuy imata’, nispa. Chaymantapas nintaqmi: “Kay nisqaykunaqa confiakunapaqmi hinaspa cheqapmi”, nispa (Apocalipsis 21:5). Diosta kasukuq runakunaqa rikunqakum paypa promesankuna imayna cumplikusqanta, ¿manachu qampas kallpanchakuwaq familiaykiwan kuska chaypi kanaykipaq?
^ par. 5 Rantinchikpi Jesuspa wañusqanmanta astawan yachayta munaspaqa qaway ¿Imatapunim Bibliaqa yachachin? niq libropa 5 kaq yachachikuyninta, chayqa Jehova Diospa testigonkunapa ruwasqanmi.
