QARANPI KAQ YACHACHIKUY | ¿KANCHU DIABLO?
¿Kanchu Diablo?
Rumimanta llaqllasqapim wichiykamuq angelta hina Diablota qawachichkan (Madrid, España)
El Salvador nacionmanta Rogelio sutiyuq runam nin: “Warma kaspayqa Diospim iñirqani ichaqa Diablo mana kasqantam piensarqani. Mana allinta portakuptiymi mamayqa niwaq ‘¡Diablom aparusunki!’, nispa. Hinaptinmi niq kani: ‘¡Imataq qukuwan, aparuwachunyá!’”, nispay.
Qamqa, ¿ima ninkitaq Diablomanta? Qatiqninpi kaqkunamanta, ¿mayqannintam chiqapmi niwaq?
-
Diabloqa manam kanchu. Tukuy mana allinkunallatam chaywan sutichanku.
-
Diabloqa kanmi, ichaqa manam imanawanchikchu.
-
Diabloqa ancha atiyniyuq espiritum chaymi runakunawan munasqanta ruwan.
Runakunaqa hukta-huktam piensanku. ¿Pipa nisqantaq chiqapqa? ¿Yachananchikchu? Diablo mana kaptinqa pantaypichá paypi creeq runakunaqa kachkanku. Sichum kan ichaqa mana imanakuq kaptinqa yanqamantachá payta manchakuqkunaqa ñakarichkanku. Sichu Diabloqa atiyniyuq hinaspa munasqanta ruwan runakunawan hinaptinqa manchakunapaqchá kanman.
¿Mana allinkunapa sutillanchu Diabloqa icha kawsaqchu payqa? Kaptinqa, ¿mana allinmanchu aysaykusunkiman? Chaynaqa, ¿imaynatam paymanta waqaychakuwaq? Bibliapa ima nisqantayá qawasun.
