QARANPI KAQ YACHACHIKUY | ¿KANCHU DIABLO?
¿Manchakunachu Diablota?
Diabloqa monóxido nisqa qusni hinam mana rikuy atina hinaspapas wañuchikuqmi
Monoxido de carbono nisqaqa gas hina otaq qusni hinam ichaqa mana rikuy atina hinaspa mana asnaqmi, kayqa mana musyayllatam pitapas wañurachinman. Achka runakunam kay qusnita samaykuspanku wañurqaku. Ichaqa manam manchakunapaqchu. Kanmi aparatokuna maypi chay qusni kasqanta musyanapaq, chaymi achka runakuna chay aparatokunata servichikunku musyaruspa chaylla imatapas ruwanankupaq.
Diablopas chay qusni hina mana rikuy atinam, wañuchikuq hinaspa sasa musyaymi. Ichaqa manam manchakunanchikchu, Diosmi achka yanapakuykunata quwanchik. Qawasun wakinkunata.
Tanteakuyta. Santiago 4:7 nin: ‘Diablopa contranpi qaqa hina sayaychik, chaynapim Diabloqa qamkunamanta ayqikunqa’, nispa. Atiyniyuqña kaspanpas Satanasqa manam mana ruway munasqanchikta ruwanapaqqa hikutawasunchu. Kikinchikmantam kanqa. Iñiyninchikpi suni takyaptinchikqa manam imatapas ruwawasunchu (1 Pedro 5:9). Jesusqa hawka saqinankamam kimsan kutipi Satanaspa tentasqantaqa qipancharqa (Mateo 4:11). Ñuqanchikpas chay ruwaytaqa atichwanmi.
Amistadninta. Santiago 4:8 nin: ‘Diosmanyá asuykuychik’, nispa. Kaywanqa kikin Jehova Diosmi niwachkanchik amistadnin kananchikpaq. ¿Imata ruwaspam amistadnin kachwan? Bibliapi paymanta willakusqanta yachaspam (Juan 17:3). Diosmanta astawan yachaspanchikqa astawanmi kuyasun hinaspam astawan serviytapas munasun (1 Juan 5:3). ¿Imatam Jehova Diosqa ruwanqa payman asuykunapaq kallpanchakuptinchikqa? ‘Paypas asuykuwasunmi’.
Jehova Diosqa waqaychaytam munawanchik
Waqaychakuyninta. Proverbios 18:10 [Chuya Qellqa, revisión 2012] nin: “Diospa sutinqa mana tuñichiy atina torre hinam, allin runaqa chayman kallpaspam amparakun”, nispa. Kaywanqa manamá wayruruta hina Diospa sutinta servichikunapaqchu nichkan, manachayqa ima sasachakuypi tarikuspapas Diosman asuykunanchikmantam.
Qatipakunapaq kaqta. Hechos 19:19 nin: “Brujokunapas libronkuta apamuspankum llapallanpa ñawpaqninpi kañarqaku, chay kañasqanku llapa librokunapa precionmi hayparqa pichqa chunka waranqa jornalpa chaninman”, nispa. Kay willakuymi qawachiwanchik Efeso llaqtapi wakin runakuna cristiano kayta qallaykuspanku imakuna ruwasqankumanta. Paykunaqa layqa ruwanankupaq tukuy imankutam mayna chaninniyuqña kaptinpas kañarurqaku. ¡Mayna sumaqmi chay ruwasqankuta qatipakuyqa! Kunan tiempopiqa tukuy imapim mana musyaylla layqa ruwaykunaqa kachkan. Chaynaqa tukuy chaykunamantayá karunchakusun mayna sasaña kaptinpas (Deuteronomio 18:10-12).
Qallariyllanpi rimasqanchik Rogelio runaqa 50 watanpi kaspanñam Diablopa chiqap kasqantaqa riqsikurqa. ¿Imaynanpitaq chaynataña piensarqa? Kikinmi nin: “Bibliata tariruspaymi chaylla leerurqani, chaypi leesqaymi qawachiwarqa Diablo chiqap kasqanmanta. Chaykunata yachasqaymi waqaychawarqa mana allinkuna ruwawananmanta”, nispa.
“Bibliapi leesqaymi qawachiwarqa Diablo chiqap kasqanmanta. Chaykuna yachasqaymi waqaychawarqa mana allinkuna ruwawananmanta”
¿Munawaqchu Diablo chinkachisqa kaptin hawka kawsakuyta? Chaynapunim kanqa. Bibliapim willawanchik, runakuna ñakarichiq Diabloqa manapas unayllamanta ‘azufreyuq rupachkaq quchaman’ wischusqa kananmanta (Apocalipsis 20:10). Chay rupachkaq quchaqa manam chiqap quchachu, chaywanqa rikchanachin wiña-wiñaypaq chinkachiytam. Chaynaqa, wiñaypaqmá Satanasqa chinkanqa. ¡Mayna hawkayaypim kawsakusun Jehova Dios serviqkunaqa!
Chay punchaw chayamunankamayá Jehova Diosmantawan ima piensasqanmanta hinalla yachay. * Chayta ruwaspaqa hamuq punchawkunapim nisunchik: “¡Diabloqa manañam kanchu!”, nispa.
^ par. 11 Astawan yachayta munaspaqa qaway ¿Imatapunim Bibliaqa yachachin? libropa 10 kaq yachachikuyninta. Kaytaqa Jehova Diospa huk kaqnin testigonmanta mañakuy otaq hurquy www.dan124.com/quy nisqamanta.
