¿Imaraykutaq Diosta mañakunku?
Samuelmi * nirqa: “Pukllaspay achka qullqita gananaypaqmi Diosta mañakurqani, ichaqa manam haykapipas ganarqanichu”, nispa (Kenia).
Teresam nirqa: “Escuelapim yachachiwarqaku umallaykumanta rezakuspa Diosta mañakunaykupaq”, nispa (Filipinas).
Magdalenam nirqa: “Diostam mañakuni sasachakuypi tarikuspa, huchaymanta pampachaykuwananpaq chaynataq allin sunquyuq kanaypaqpas”, nispa (Ghana).
Willakusqankuman hinam wakinqa Diosta mañakunku imapipas yanapaykunanta munaspanku. Wara-waranqantin runakunam Diosta mañakunku examenta quptin yanapaykunanpaq, ayllun allinlla kananpaq utaq imapaqpas. Ninkum ima religionpi mana kaqkunapas Diosta mañakusqankumanta.
¿Qampas Diosta mañakunkichu? ¿Imatataq mañakunki? Ichapas wakinqa piensanku: “¿Allinpaqchu kanman mañakuyqa? ¿Diosqa uyarinchu mañakusqanchikta?”, nispa. Huk runam nirqa Diosta mañakuyqa rumita parlapayaruspa hawkayaruyman rikchakusqanta. Wakin doctorkunapas unquqkunatam ninku mañakuspankuqa allinyarinankupaq allin kasqanmanta. ¿Qamqa ima ninkitaq?
Runakunam yachachinku hawkayayta utaq allinyayta munaspaqa Diosta mañakunapaq. Bibliam ichaqa yachachin imanasqa hinaspa imaynata mañakunamanta chaynata mañakuptinchikqa Dios uyariwasqanchikmantapas. ¿Ciertochu chayqa kanman? Qatiqnin yachachikuykunapiyá yachasun.
^ par. 2 Sutikunaqa cambiasqam kachkan.
